ʻOku totonu nai ke u fokotuʻu ke fakahoko ha faleʻi fakapalofesinale ki he kāingalotu fakafāfine/fakatangatá mo/pe ko honau fāmilí?

ʻE lava ʻe he Faifaleʻí ʻo Fakamālohia ʻa e Ngaahi Sīpinga Moʻui Leleí ʻo e Moʻuí

ʻOku ʻikai totonu ke hoko ʻa e liliu ʻi he femanakoʻakí ke taku pe tukuakiʻi ko ha foʻui ia ʻa e ongomātuʻá, kau takí, pe kau faifaleʻi fakapalofesinalé. Ka neongo ia, ko e fekumi ko ia ki ha fakakaukau ʻa ha faifaleʻi fakapalofesinalé ko ha fakaʻilonga ia ʻo e mālohi mo e loto-fakatōkilalo. Kapau ʻe fili ʻe ha taha ke fekumi ki ha tokoni pehē, ʻoku totonu ke fakaʻapaʻapaʻi ʻe he niʻihi kehé ʻa ʻene totonu ke fakapapauʻi ʻa e ngaahi ola ʻoku fie maʻú.

ʻOku faingataʻa he taimi ʻe niʻihi ke te vakai totonu kiate kita. ʻE lava ke tokoni ʻa e fekumi ki ha fakakaukau mei ha faifaleʻi fakapalofesinalé ki ha ngaahi tapa kehekehe ʻo e moʻuí—mei hono talanoaʻi e ngaahi sīpinga ʻo e kulukiatamakí mo e loto-hohaʻá ki hono fakamālohia ʻo ha nofo-malí. Hangē ko ia kuo lea ʻaki ʻe ʻEletā Jeffrey R. Holland, ko e taimi ʻe niʻihi ʻoku lava ke mahuʻinga tatau pē ʻa e tokoni fakapalofesinalé mo e tokoni fakalaumālié (vakai, “Hangē Ha Ipu Kuo Maumaú,” Liahona, Nōvema 2013, 40–42).

Ko e taimi ʻoku kumi faleʻi ai ha taha, ʻoku poupouʻi ʻe he Siasí ʻa e ngaahi founga ʻokú ne fakaʻapaʻapaʻi ʻa e “tauʻatāina ʻa e kasitomaá.” ʻI hono fakalea ʻe tahá, ʻoku maʻu ʻe he fakafoʻituituí ʻa e totonu ke fakapapauʻi ʻa e ngaahi ola ʻoku fie maʻú, pea ʻoku totonu ke fakaʻapaʻapaʻi ʻe he kau faifaleʻí ʻene ngaahi fakaʻamú. ʻE lava ke tokoni ʻa e faleʻí ki ha taha ʻoku ne foua ʻa e femanakoʻaki fakahomosekisualé pe tala ʻoku fakafāfine/fakatangatá, ke ne vakai ki hono tuʻunga sekisualé ʻi ha founga ʻoku moʻui lelei mo fiemālie angé. Neongo ia, ʻoku ʻikai fie maʻu ʻa e faifaleʻí maʻá e tokotaha kotoa pē.

Neongo ʻe malava pea ʻoku hoko ha ngaahi liliu ʻi he tuʻunga fakasekisuale ʻa ha kakai ʻe niʻihi, ka ʻoku ʻikai taau fakaʻulungaanga ia ke tokanga taha pē ki he faitoʻo fakapalofesinalé ʻo fakakaukau ʻe hoko pe kuo pau ke hoko ha liliu ʻi he anga fakasekisualé. Manatu, ʻoku maʻu ʻe he fakafoʻituituí ʻa e totonu ke fakapapauʻi ʻa e ola ʻoku fie maʻú.