ʻE ʻi ai nai ha taimi ʻe liliu ai ʻe he Siasí ʻene tokāteliné mo e fakataputapui ʻo e mali ʻa ha ongomeʻa ʻokú na tuʻunga fakasekisuale tatau?

ʻOku Taʻengata ʻa e Tokāteline ʻo e Malí

Ko e tokāteline ʻo e mali ʻi he vahaʻa ʻo ha tangata mo ha fefiné ko e uho ia e palani ʻa e ʻOtuá, pea ko ha akonaki mahuʻinga ia ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní pea he ʻikai liliu ia:

“ʻOku fakapapauʻi mai ʻe he Siasí ko e mali ʻa ha tangata mo ha fefiné, ko e konga mahuʻinga ia ʻo e palani ʻa e Tokotaha Fakatupú ki he ikuʻanga taʻengata ʻo ʻEne fānaú, ʻa ia ko ha tefitoʻi tokāteline ia ʻoku makatuʻunga ʻi he folofolá. ʻOku toe fakamahinoʻi foki ʻe he Siasí ko e fono ʻa e ʻOtuá ʻoku ʻuhinga ia ko e malí ko hano fakatahaʻi totonu mo fakalao ia ʻo ha tangata mo ha fefine.

“Ko ha tangata mo ha fefine pē kuó na ʻosi mali he founga totonu mo fakalao ko e husepāniti mo e uaifí, ʻoku totonu ke na fakahoko ʻa e feohi fakasekisualé. Ko ha toe fetuʻutaki fakasekisuale kehe, ʻo kau ai e fetuʻutaki ʻi he vahaʻa ʻo ha kakai ko e tangata mo e tangata pe fefine mo e fefiné, ko ha angahala ia pea ʻokú ne fakamaʻamaʻaʻi e faʻunga fakalangi ʻo e fāmilí” (“Same-Sex Marriage,” Tohi Tuʻutuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.13).

Fakahoko ʻa e Tokāteliné ʻi he ʻOfa

ʻOku ʻikai ha liliu ʻi he tuʻunga ʻo e Siasí ki he meʻa ʻoku totonu fakaeʻulungāngá. Ka ko e meʻa ʻoku liliú—pea fie maʻu ke liliú—ko hono tokoniʻi e kāingalotu ʻo e Siasí ke nau tali ʻi he ongoʻingofua mo e faʻa fakakaukau ʻa e taimi ʻoku nau fehangahangai ai mo e femanakoʻaki fakahomosekisuale ʻi honau fāmilí, ʻi he kāingalotu ʻo e Siasí, pe ʻi ha toe feituʻu pē (vakai, Dallin H. Oaks, “Ko e Meʻa ʻOku Fie Maʻu ke Liliú,” ChurchofJesusChrist.org).

Ko e malí ko ha konga mahuʻinga ia ʻo e palani ʻa e ʻOtuá ki heʻetau fiefiá. ʻOku mahuʻinga ʻa e mali taʻengata ʻi he vahaʻa ʻo ha tangata mo ha fefine (ʻi ha taimi) ki heʻetau fakalakalaka ki he hakeakiʻí, ko ha tuʻunga ʻoku fakaʻuhingaʻi ko e moʻui ʻi he faʻahinga moʻui ʻoku lolotonga fiefia ai ʻetau Ongomātuʻa Fakalangí.

“ʻI he nāunau fakasilesitialé ʻoku ʻi ai ʻa e ngaahi langi pe ngaahi tuʻunga ʻe tolu; pea ko e meʻa ʻe maʻu ai ʻa e tuʻunga māʻolunga tahá, kuo pau ke kau ha tangata ʻi he angá ni ʻo e lakanga fakataulaʻeikí [ko e ʻuhinga ki he fuakava foʻou mo taʻengata ʻo e malí]; pea kapau ʻe ʻikai te ne kau ki ai, ʻe ʻikai te ne lava ke maʻu ia. Te ne lava ʻo hū ki he tuʻunga ʻe tahá, ka ko e ngataʻanga ia ʻo hono puleʻangá; ʻe ʻikai te ne lava ʻo maʻu ha tupulaki” (Tokāteline mo e Ngaahi Fuakava 131:1–4).