Ko e hā ʻa e faleʻi fekauʻaki mo hono fakahoko ʻa e ngaahi ongo fakasekisualé?

Ko ha Moʻui Angamaʻa

“ʻIkai ʻoku mou ʻilo ko e fale tapu ʻo e ʻOtuá ʻa kimoutolu, pea ʻoku nofoʻia ʻa kimoutolu ʻe he Laumālie ʻo e ʻOtuá?” (1 Kolinitō 3:16).

Ko hotau sinó ko ha meʻaʻofa makehe ia mei he ʻOtuá. ʻOku nau ʻomi ha founga ke aʻusia ai ʻe hotau laumālié ʻa e māmani fakamatelié. ʻOku nau mahuʻinga ki heʻetau malava ʻo maʻu ʻa e hakeakiʻí. Ko e konga mahuʻinga ʻo e hoko ʻo tatau mo ʻetau Ongomātuʻa Fakalangí ʻa hono ako ke mapuleʻi hotau sinó. ʻOku fie maʻu ha taimi, ʻahiʻahi, mo e faʻa kātaki ki he mapuleʻí, ka ʻoku ʻi ai hono ngaahi nunuʻa taʻengata.

Kuo fekauʻi mai ʻe he ʻOtuá ke tau “taʻofi kotoa [ʻetau] ngaahi holi fakakakanó, koeʻuhí ke [tau] fonu ʻi he ʻofá” (ʻAlamā 38:12).

Ko hono moʻui ʻaki ʻa e fono ʻo e angamaʻá ko ha maʻuʻanga iaʻo ha ngaahi tāpuaki maʻongoʻonga. Hangē ko e lea ʻa Palesiteni Marion G. Romney: “ʻOku ʻikai ke u ʻilo ha tāpuaki ʻoku toe lahi ange hono fie maʻú ka ko e ngaahi tāpuaki ko ia kuo talaʻofa maʻanautolu ʻoku maʻa mo angatonú. Naʻe folofola ʻa Sīsū ʻo kau ki ha meʻaʻofa pau maʻá e ʻulungaanga lelei kehekehe ka ʻoku hangē kiate au ʻoku tuku e lelei tahá maʻanautolu ʻoku maʻa honau lotó, he naʻá Ne folofola, ‘he te nau mamata ki he ʻOtuá’ (Mātiu 5:8). He ʻikai ke ngata pē ʻi heʻenau mamata ki he ʻOtuá, ka te nau ongoʻi malu ʻi Hono ʻaó.

“Ko e palōmesi ʻeni … ʻa e Fakamoʻuí: ‘Tuku ke ngaohi ke fakaʻofoʻofa maʻu ai pē ʻe he angamaʻá ʻa hoʻo ngaahi fakakaukaú; pea ʻe ʻāsili mālohi ʻa hoʻo falalá ʻi he ʻao ʻo e ʻOtuá’ T&F 121:45)” (“Trust in the Lord,” Ensign, May 1979, 42).

Ko e toʻonga fakasekisualé ko ha konga mahuʻinga ia ʻo e hoko ko e tangatá pea ko ha maʻuʻanga foki ia ʻo e ngaahi holi ʻoku fie maʻu ke mapuleʻí. Neongo ʻa e ngaahi ongo mālohi ko ʻení, ka ʻoku ʻi ai ha Kāingalotu ʻo e Siasí ʻoku nau muimui faivelenga ki he fono ʻo e angamaʻa ʻa e ʻEikí ʻi ha ngaahi taʻu lahi.

Kuo fakahoko ʻe he niʻihi fakafoʻituitui ko ʻení ha tukupā ke moʻui angamaʻa pea fakaʻehiʻehi mei ha faʻahinga meʻa pē te ne holoki ʻa e ngaahi mālohí. ʻIkai ngata aí, ka kuo nau fakahoko ha tokoni makehe ki he niʻihi kehé, tautautefito ki he ngaahi meʻa ʻoku hoko ʻi he Siasí. ʻI heʻenau fai iá, kuo nau maʻu ai ha fiefia, fiemālie mo e nonga.

ʻOku Totonu ke Akoʻi ʻe he Mātuʻá ʻEnau Fānaú

ʻOku fie maʻu ʻe he fānaú mo e toʻu tupú ʻa e tokoni ʻa e mātuʻá mo e kakai lalahi falalaʻangá ke nau ako pea mahino kiate kinautolu ʻa e tōʻonga fakasekisualé ʻi hono tuʻunga fakalangí: “ʻOku ʻa e ngaahi mātuʻá ʻa e tefitoʻi fatongia ke akoʻi e fetuʻutaki fakasekisuale ʻo ʻenau fānaú. ʻE tokoni hano akoʻi totonu mo mahino ʻo e kaveingá ni ki he toʻu kei talavoú, ʻi he ʻapí, ke nau fakaʻehiʻehi ai mei ha ngaahi angahala mamafa fakaeangamaʻa.

“ʻI he ngaahi feituʻu kuo akoʻi ai ʻi he ngaahi ʻapiakó ʻa e fetuʻutaki fakasekisualé, ʻoku totonu ke feinga ʻa e mātuʻá ke fakapapauʻi ʻoku fenāpasi ʻa e ngaahi fakahinohino ʻoku ʻoange ki heʻenau fānaú mo e ngaahi tuʻunga ʻulungaanga ʻoku maʻa mo totonú” (“Sex Education,” Tohi Tu‘utuʻuni Fakakātoa: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.14).

ʻAhiʻahi Fetuʻutaki ʻi tuʻa ʻi he Nofo-malí

Ko ha angahala mamafa ʻa hono ʻahiʻahi fakahaaʻi ʻa e ngaahi ongo fakasekisualé ʻi tuʻa ʻi he nofo-malí.

“Ko e fono ʻo e angamaʻa ʻa e ʻEikí ke:

• Taʻofi ha faʻahinga fetuʻutaki fakasekisuale pē ʻi tuʻa ʻi ha nofomali ʻa ha tangata mo ha fefine ʻo fakatatau mo e fono ʻa e ʻOtuá.

• Anganofo ʻi he nofomalí.

“ʻOku fakataumuʻa e feohi fakaesino ʻi he husepānití mo e uaifí ke fakaʻofoʻofa mo toputapu. Ko e tuʻutuʻuni ia ʻe he ʻOtuá ke fakatupu ʻa e fānaú mo fakahaaʻi ʻa e ʻofá ʻi he vahaʻa ʻo e husepānití mo e uaifí.

“Ko ha tangata mo ha fefine pē kuó na ʻosi mali fakalao mo totonu ko e husepāniti mo e uaifí, ʻoku totonu ke na fakahoko ʻa e feohi fakasekisualé. ʻOku mahuʻinga fau ʻa e ʻulungaanga maʻá ʻi he ʻao ʻo e ʻOtuá. Ko hono maumauʻi ʻo e fono e angamaʻá ʻoku mamafa ʻaupito (vakai, ʻEkesōtosi 20:14; Mātiu 5:28; ʻAlamā 39:5). Ko kinautolu ʻoku kau aí, ʻoku nau ngāuehala ʻaki e mālohi toputapu kuo foaki ʻe he ʻOtuá ke fakatupu ʻaki ha moʻuí” (“Angamaʻá mo e Anganofó,” Tohi Tuʻutu‘uni Fakakātoa, 38.6.5).

“ʻOku tapui ʻe he ngaahi fekau ʻa e ʻOtuá ʻa e ngaahi tōʻonga angaʻuli kotoa, ʻo tatau ai pē ʻi ha vahaʻa ʻo ha tangata mo ha tangata pe fefine mo ha fefine pe ʻi ha tangata mo ha fefine. ʻE faleʻi ʻe he kau taki ʻo e Siasí ʻa e kāingalotu ʻoku nau maumauʻi e fono ʻo e angamaʻá. ʻE tokoni e kau takí ke mahino lelei kiate kinautolu ʻa e tui kia Sīsū Kalaisí mo ʻEne Fakaleleí, founga ʻo e fakatomalá, mo e taumuʻa ʻo e moʻui ʻi māmaní. ʻE lava ke hoko ha ʻulungaanga ʻoku fehangahangai mo e fono ʻo e angamaʻá ko ha meʻa ke fakahoko ai ha fakataha alēlea ki he tuʻunga mēmipasipi ʻi he Siasí (vakai ki he [Tohi Tuʻutuʻuni Fakakātoa,] 38.6.5). ʻE lava ke fakamolemoleʻi ia ʻi he fakatomala fakamātoato” (“Same-Sex Attraction and Same-Sex Behavior,” Tohi Tu‘utuʻuni Fakakātoa, 38.6.12).