Te u lava fēfē ʻo poupouʻi ʻa e kāingalotu mo honau ngaahi fāmili ʻoku nau foua ʻa e kulukiatamakí pe fakakaukau taonakitá?

Manavaʻofá mo e Falalá

Ko e kakai ʻoku nau foua ʻa e femanakoʻaki fakahomosekisualé pe ʻoku ʻilo ʻaki kinautolu ʻa e fakafāfine/fakatangatá ʻoku nau tuʻu laveangofua ange ki he kulukiatamakí pe taonakitá. Ko e kakai ʻoku nau kulukiatamakí pe fakakaukau ke taonakitá ʻoku fie maʻu ke nau ʻiloʻi ʻoku ʻofaʻi kinautolu pea ʻoku totonu ke ʻave kinautolu ki ha mataotao ʻi he moʻui lelei fakaeʻatamaí. ʻOku moʻoni ʻa e ngaahi ongoʻi kulukiatamakí pea ʻe malava pē ke fakamafasia mo holoki moʻui ia.

ʻOku lea ʻa ʻEletā Sefilī R. Hōlani ʻi he manavaʻofa fekauʻaki mo e fekuki mo e kulukiatamakí:

“Kāinga neongo pe ko e hā ʻokú ke fefaʻuhi mo iá—fakaʻatamai pe fakaeloto pe fakatuʻasino pe ko ha faʻahinga meʻa pē—ʻoua naʻá ke fili ke ke taʻofi e mahuʻinga ʻo e moʻuí ʻaki haʻo fakangata ia! Falala ki he ʻOtuá. Pikitai ki Heʻene ʻofá. ʻIloʻi ʻe ʻi ai e ʻaho ʻe mafoa ngingila mai ai e atá pea ʻe mōlia atu leva e ngaahi haʻahaʻa kotoa ʻo e moʻui fakamatelié. Neongo te tau ongoʻi hangē ha ‘ipu kuo maumaú,’ ʻo hangē ko e lau ʻa e Tangata Sāmé, ka kuo pau ke tau manatuʻi ko e ipu ko iá ʻoku ʻi he nima ia ʻo e tokotaha ngaahi ipu fakalangí” (“Hangē ha Ipu Kuo Maumaú,” Liahona, Nōv. 2013, 42

Ngaahi Meʻangāue mo e Ngaahi Maʻuʻanga Tokoni

Ko e taimi ʻoku liliu ai e ngaahi ongoʻi kulukiatamakí ki ha ngaahi fakakaukau ke taonakitá, ʻoku matuʻaki mahuʻinga ke talanoa ki ha taha. Ko e kakai ʻoku nau fakakaukau taonakitá ʻoku nau matuʻaki mamahi fakatuʻasino, fakaeʻatamai, pe fakaeloto; ʻoku faʻa liʻekina kinautolu; pea mahalo ʻoku nau ongoʻi kuo siva ʻenau ʻamanaki ki he kahaʻú. Mahalo ʻoku nau ongoʻi ʻoku ʻikai pē ha toe founga ke fakangata ai ʻa e mamahi fakatuʻutāmakí ka ko hono toʻo pē ʻenau moʻuí. Ko e ngaahi fakakaukau ke taonakitá ʻoku faʻa tomuʻa vakavakaiʻi, fakakaukauʻi pea toutou fakakaukauʻi ia kimuʻa pea toki feinga ke fai iá. ʻI he lolotonga e vahaʻataimi ʻo e vakavakaiʻi ko ʻení, ʻe lava ke fai ai ha tokoni ke fakahaofi ha moʻui.

• Ngaahi Telefoni Tokoni ki ha Faingataʻa.

• ʻE lava ʻe he faleʻi fakapalōfesinalé mo e tokoni fakafaitoʻó ʻo tokoniʻi e kakaí ke nau matatali e kulukiatamakí.

• ʻOku lava ke maʻu ʻa e ngaahi maʻuʻanga tokoni fekauʻaki mo e taonakitá, hangē ko e Ngaahi Fakakaukau ke Taonakitá, ʻi he Tokoni ʻo e Moʻuí mo e Moʻui Fakafalala pē Kiate Kitá ʻi he ChurchofJesusChrist.org pe ʻi he polokalama Gospel Library.

• ʻOku kamata ʻa hono taʻofi ʻo e taonakitá ʻi hono fakatokangaʻi ʻa e ngaahi fakaʻilonga fakatokangá.  

• Kapau ʻoku hangē ka ʻi ha tuʻunga fakatuʻutāmakí ha taha, ko e meʻa lelei taha pē ʻe ala lava ke faí ko e talanoa kiate ia. Mahalo ʻe hā ngali kehe pe fie-matamuʻa, ka ko e kakai ʻoku kulukiatamakí ʻoku nau faʻa fie maʻu vivili ha taha ke nau talanoa mo ia, ko ha taha ke tokoniʻi kinautolu ke nau makupusi ʻa e ngaahi fakakaukaú mo e ongó. Mahalo ʻe faingataʻa ʻa e ngaahi fepōtalanoaʻaki ko ʻení, ka ʻoku mahuʻinga ia ki hono fakasiʻisiʻi ʻa e ongoʻi liʻekiná mo e siva e ʻamanakí ʻa ia ʻe lava ʻo iku ki he taonakitá.