ʻOku ʻi ai haʻaku ʻapoinimeni mo ha mēmipa ʻoku tala ʻoku nonofo fakafefine, nonofo fakatangata, pe fakatou nonofo tangata mo fefine pe ʻokú ne foua ʻa e femanakoʻaki fakahomosekisualé. Ko e hā e meʻa ʻoku totonu ke u faí pe lea ʻakí?

Fakahaaʻi ʻa e Faʻa Kātakí mo e ʻOfá

“ʻOku mātuʻaki mahuʻinga ʻa e ngaahi ʻuluaki fakafeangaí. Pea ko e fakahehemá, ko e ʻahiʻahi ʻoku faʻa maʻu ʻe he kakaí ko e ʻita pe ko e fakafisingaʻi. Ko e taimi ʻe niʻihi ʻoku fakaʻikaiʻi pē ia ʻe he ongo tafaʻakí fakatouʻosi, ʻo tatau ai pē pe ko e hā. Pea ʻoku mahuʻinga ke maʻu ʻa e mapuleʻi feʻunga kitá ke tuku kotoa e meʻa ko iá ki he tafaʻakí kae kiʻi kātaki pē pea kamata talatalanoa pea kamata fakafanongo pea kamata feinga ke maʻu ha mahinoʻoku toelelei ange. ʻOku ʻikai haʻatau mole ʻi heʻetau feohí, ʻi heʻetau feinga ke maʻu ha mahinó. Naʻa mo e tuʻunga ʻoku ʻikai ha loto-taha ki ha meʻa ke fai he taimi ko iá pe founga ke talí pe founga ke fakafōtungá, ʻoku ʻikai fie maʻu ia ke tau fai e meʻa kotoa pē he ʻahó ni. ʻOku ʻikai fie maʻu ia ke tau fakaleleiʻi ʻa e meʻa kotoa pē ʻi ha māhina pē taha pe uike pē taha pe taʻu pē taha. Ko e ngaahi meʻá ni ko ha ngaahi fehuʻi ia ke solova hili ha ngaahi taimi pea feau ia hili ha ngaahi taimi pea fekumi ki he finangalo ʻo e ʻEikí hili ha ngaahi taimi pea maʻu ʻEne tatakí hili ha ngaahi taimi. Ko ia ai ʻoku ou fakatauange te tau tuku ha taimi moʻotautolu ke tau maʻu e faʻa kātaki ke fakafanongo mo mahino kae ʻikai kikihi ke fakaleleiʻi ʻa e meʻa kotoa pē ʻi ha vahaʻa taimi pau” (D. Todd Christofferson, “Ko e Taumuʻa ʻo e Uepisaiti Ko ʻEní,” ChurchofJesusChrist.org).

Fakapapauʻi ʻa e Moʻoni ʻo e Ngaahi Ongó

“Ko ha meʻa ʻe taha ʻoku mahuʻinga maʻu pē ko e fakatokangaʻi ʻa e ngaahi ongo ʻoku maʻu ʻe ha taha, ke pau ʻoku moʻoni ia, ke pau ʻoku totonu, ke pau ʻoku ʻikai ke tau fakaʻikaiʻi ʻa e ongo ʻoku maʻu ʻe he tokotaha ko iá. ʻOku tau maʻu ʻa e moʻoní ʻi he tuʻunga ʻoku ʻi aí, pea tau hoko atu leva mei ai. Pea ʻoku tau fakaʻamu ke ongoʻi ʻe he kakaí ʻoku ʻi ai ha potu moʻonautolu ʻi heni, ʻoku lahi ange ʻa e meʻa ʻoku tau faitatau aí ʻi he meʻa ʻoku tau faikehekehe aí. Ko e niʻihi ʻo e ngaahi aʻusia ʻoku lave ki ai ʻi he ngaahi feituʻu kehé, ʻoku tau tālangaʻi ia ʻi he uepisaiti ko ʻení. Pea ʻoku ou tui ʻoku mahuʻinga ke hokohoko atu maʻu pē ʻetau ongoʻi peheé, ke fakahaaʻi ia, ke ʻiloʻi ʻa hono moʻoni ʻo e ngaahi ongo mo e tūkunga ʻa e kakaí pea toki hoko atu mei ai” (D. Todd Christofferson, “Ko e Taumuʻa ʻo e Uepisaiti Ko ʻEní,” ChurchofJesusChrist.org).