E noa’a ānei i te mau homo’āpeni te mau ha’amaita’ira’a i fafauhia e te Atua ?

E noa’a te mau ha’amaita’ira’a a te Atua i te mau ta’ata ato’a

« I te tahi taime e hi’o tātou pā’āto’a i tō tātou orara’a ’e e tāmata i te fa’afāito, ’tei hea tātou ? Tei hea vau i roto i tō’u orara’a ?’ ’Ua parau tāmau noa vau ē ’ia ha’amata ana’e ’outou i te fa’aau ’ia ’outou iho i te tahi ’e te tahi, e arata’i atu te reira i te mana’o ha’aparuparu ’aore rā, e arata’i atu te reira i te te’ote’o. ’Aita ato’a te reira i riro ’ei mea maita’i, e mea pinepine rā te reira i te tupu ’ia ha’amata ana’e te ta’ata i te fa’aauhia. E ha’amata rātou i te feruri, e mea maita’i a’e tō’u huru orara’a ’aore rā e mea ’ino roa tō’u huru orara’a. ’E nō reira, e ’ere i te hō’ē ’ohipa maita’i nō tātou i te tāmata i te fa’aau i tō tātou huru orara’a i tō te tahi atu ta’ata. E tae mai te mau ha’amaita’ira’a i te tau poto ; e tae mai te mau ha’amaita’ira’a i te tau roa. I te tahi taime, e ha’aputuhia te mau ha’amaita’ira’a nō tātou, tē ti’aturi nei au, i muri a’e i tō tātou haerera’a i muri mai i te pāruru, i roto i tō tātou orara’a i muri mai i te orara’a tāhuti nei. ’E nō reira, tei roto tātou i te hō’ē vāhi iti roa i teienei, ’e i roto i teie vāhi iti e ’ere i te mea maita’i ’ia tāmata i te fa’aau i te ’ati tā tātou i fāri’i ’aore rā, ’ia tāmata i te fa’aau i te mau ha’amaita’ira’a i roa’a ia tātou.

« Tē ha’amana’o ra tātou i te taime ’a fa’aru’e ai Adamu ’e ’o Eva i te ’ō i Edene, hō’ē o te mau mea i fa’a’itehia ’a fa’aru’e ai rāua i reira ’o te tātarāmoa ’e te mōtu’u ïa, ’e tē fāri’i pā’āto’a nei tātou i te reira i roto i tō tātou orara’a. E nehenehe rā tātou e ti’aturi ē e nehenehe teie mau mea ato’a e upo’oti’ahia noa atu te huru o te reira mau mea tei tu’uhia i mua ia tātou. Tē parau mai nei te Fatu ia tātou ē e tupu mai te ’ati i ni’a i te ’ē’a, ’e tē parau ato’a mai ra ’oia ia tātou ē e ha’amo’ahia tō tātou mau ’ati nō tō tātou iho maita’i. I teienei, i te tahi taime e ti’a ia tātou ’ia tīa’i e rave rahi matahiti nō te reira, i te pae hope’a rā e nehenehe tātou e pāpū ē nō te mau ta’ata ato’a te fafaura’a o te ora mure ’ore. E fa’autu’a-’aifāito-hia te mau ta’ata ato’a ’ia ha’apa’o maita’i rātou. Mai te mea e fa’a’oroma’i noa ’outou e tae noa atu i te hope’a, e ha’amaita’ihia ’outou. E mea fifi paha i teie mahana ’e ’ananahi ’e i te ’āva’e i muri nei, e ’ere rā i te mea pa’ari i te mau taime ato’a. E nehenehe tā ’outou e rave i te reira ’a fa’a’ohipa ai ’outou i tō ’outou fa’aro’o ia Iesu Mesia i roto i tāna Tāra’ehara.

« I te tahi taime e tupu mai te ’ati ’e te mau tāmatara’a ’o te tae mai i ni’a ia tātou mai te huru ra e mea pa’ari roa ’ia fa’a’oroma’i. ’Are’a rā tē parau nei ’oia, ‘noa atu i te reira, ’a ’oa’oa maita’i na, nō te mea e arata’i atu nā vau ia ’outou.’ E fafaura’a teie nō ’ō mai i te Fatu ra. ʼA ʼoaʼoa. I rotopū i tō ’outou mau tāmatara’a, ’a ’oa’oa maita’i na, nō te mea e arata’i atu nā vau ia ’outou. ’E tē fa’a’ite pāpū nei au ē e arata’i Iesu Mesia ia ’outou i roto i tō ’outou mau huru ’ati ato’a » (Gary E. Stevenson, « No Blessings Denied the Faithful », ChurchofJesusChrist.org).