E hara ānei te mana’o nō te fa’ahina’arora’a ta’ata nō tōna iho ’āpeni ?

E ’ere te fa’ahina’arora’a i te hara

’Ua parau te peresideni M. Russell Ballard :

« E parau pāpū tātou : Tē ti’aturi nei Te ’Ēkālesia a Iesu Mesia i te Feiā Mo’a i te mau Mahana Hope’a nei ē ‘te ’ohipa ’ātitirau pāpū nō te mau ta’ata e rave rahi e nā roto nei i te fa’ahina’arora’a ta’ata nō tōna iho ’āpeni. E ’ere te fa’ahina’arora’a i te hara, ’o te fa’a’ohipara’a rā i te reira e hara ïa. Noa atu ē ’aita te mau ta’ata i mā’iti e fa’atupu i te reira mau fa’ahina’arora’a, ’ua mā’iti rā rātou nāhea ’ia pāhono i te reira. Nā roto i te here ’e te hāro’aro’a, tē toro nei te ’Ēkālesia i tōna rima i te mau tamari’i ato’a a te Atua, e tae noa atu [ia rātou e fa’ahina’aro nei te ta’ata nō tō rātou iho ’āpeni]’ » (« Tē hina’aro nei te Fatu ia ’outou ! » Liahona, Tetepa 2015, 15).

Noa atu e ’ere te fa’ahina’arora’a ta’ata nō tōna iho ’āpeni i te hara, e nehenehe e riro ’ei tāmatara’a. Noa atu ’aita paha te hō’ē ta’ata i mā’iti ’ia roa’a te reira mau mana’o, e nehenehe tāna e fafau e ha’apa’o i te mau fa’auera’a a te Atua. Te metua e tamari’i tāna e fa’aruru nei i te fa’ahina’arora’a ta’ata nō tōna iho ’āpeni ’aore rā tē fa’a’ite ra iāna ’ei homo’āpeni, e ti’a iāna ’ia mā’iti ’ia here ’e ’ia tauahi i te reira tamari’i. ’Ei autahira’a melo nō te ’Ēkālesia, e ti’a ia tātou ’ia mā’iti ’ia fa’atupu i te hō’ē pupu fāri’i maita’i.