Nō te aha ’aita te Atua e pāhono i tā’u mau pure ?

Tē fa’aro’o nei te Atua i tā ’outou mau pure

E au ra ē mea tano ’ore te orara’a i te tahi taime. E au ra ē ’aita tā tātou mau pure ’ā’au e pāhonohia. Mai te huru ra ē tē ’ite ra tātou ia tātou iho i te pāto’ira’ahia i te ’īra’a o te mau rāve’a ’e te mau ha’amaita’ira’a hope a te Atua. ’Aita rā te pure ’ā’au e vai noa ma te pāhono ’ore. E fa’atupu te Atua i tāna mau fafaura’a ato’a. ’Aore roa e ha’amaita’ira’a e pāto’ihia nō tāna mau tamari’i ha’apa’o ’e tei ’ī i te fa’aro’o. Tō tātou fāito pūai hanahana ’o te orara’a ïa ’ei ’utuāfare mure ’ore ’e ’ia riro mai tō tātou mau Metua i te ao ra te huru.

I te tahi taime e riro paha tō tātou mau fē’a’ara’a, tō tātou mau mata’u ’e tō tātou mau mā’ino’ino ’ei mea teimaha. E nehenehe te orara’a e hōro’a mai i te mau uira’a huru fifi ’e e hōro’a mai i te mau ha’atāfifira’a rahi. Te noa’ara’a te fa’aro’o e ’ere ïa i te fāri’ira’a i te mau pāhonora’a ato’a, i te mā’itira’a rā i te fa’aro’o ’eiahia ra i te fē’a’a, ’o te mā’itira’a ’ia ti’aturi i te Atua. E mā’iti tātou e ti’aturi i tāna ’ōpuara’a ’e i tāna tārena, noa atu ē tē vai ra te tahi mau tuha’a o tō tātou orara’a tāhuti nei e ’aita e aura’a nō tātou i teie taime. ’A tu’u ai tātou i tō tātou fa’aro’o ’e tō tātou ti’aturi i te Atua ’e ’ia roa’a te fa’a’oroma’i nō te patu i tō tātou fa’aro’o i terā mahana ’e terā mahana, i reira tātou e ’ite māramarama ai i te mau mea. (Hi’o 1 Korinetia 13:12.)

E ’ere te ’ite māramaramara’a i te hō’ē ’ohipa e tupu ra. E fa’anahora’a te reira. E ’ite māramarama hau ā tātou ’ia ’ite mau tātou i tō tātou fāito pūai ’ei mau tamari’i nā te Atua. ’E e aha tō tātou fāito pūai ? Mai te mea e fa’aitoito noa tātou i te ha’apa’o i tāna mau fa’auera’a, ’ua fafau mai ’oia i te ’oa’oa mure ’ore—te ’oa’oa mau ’e te vai maoro.