Mai te peu e nava’i tō’u ha’apa’o maita’i, e ’ore ānei tō’u fa’ahina’arora’a ta’ata nō tō’u iho ’āpeni ?

E ’ere te pūai o te fa’ahina’arora’a ta’ata nō tō ’outou iho ’āpeni i te fāito nō tō ’outou ha’apa’o maita’i. E rave rahi ta’ata e pure nei e rave rahi matahiti ma te tauto’o rahi ’ia ha’apa’o, tē vai noa ra rā terā fa’ahina’arora’a ta’ata nō tō rātou iho ’āpeni. E pūai ta’a ’ē ’e te rau e ’āpe’e i te fa’ahina’arora’a ta’ata nō tōna iho ’āpeni, e mea ta’a ’ē ra nō terā ’e terā ta’ata. Tē vai ra e fa’ahina’arora’a ta’ata nō nā ’āpeni e piti, ’e tē vai ra e fa’ahina’arora’a ta’ata nō tō rātou iho ’āpeni. Nō vetahi, e iti mai te fa’ahina’arora’a ta’ata nō tōna iho ’āpeni, ’aore rā te pūai iho ā ra o te reira mau mana’o, i roto i te tau. ’Ātīrā noa atu, ’eiaha te tauira’a o te fa’ahina’arora’a ’ia tīa’ihia ’aore rā ’ia tītauhia ’ei hope’ara’a e nā metua ’aore rā e te feiā fa’atere.

’Aita paha ’outou e nehenehe e mā’iti i te pūai o tō ’outou fa’ahina’arora’a ; e nehenehe rā ’outou e mā’iti e nāhea i te pāhono i te reira. E nehenehe te anira’a i te Fatu e aha tā ’outou e ti’a ’ia ha’api’i mai nā roto mai i teie ’ite rau nō te fa’atumu i tō ’outou fa’aro’o i ni’a i te hope’a o tā ’outou e nehenehe e ha’avī. ’Ua riro te fāriura’a i tō ’outou ora i te Atua ’ei ’ohipa nō te fa’aro’o faufa’a rahi ’o tē fa’atae mai i te mau ha’amaita’ira’a rahi i teienei ’e te mau ha’amaita’ira’a rahi atu ā i te ao a muri a’e.