E tano ānei te fa’anahora’a nō te fa’aorara’a nō te mau homo’āpeni ?

E ’ōpuara’a tā te Atua nō tō ’outou ’oa’oa

E mea maita’i hope roa te fa’anahora’a a te Atua, noa atu ’aita tō tātou hāro’aro’ara’a i teie taime nō ni’a i tāna fa’anahora’a i tuea roa. Nā roto i te Fa’aora ’o Iesu Mesia, e nehenehe tātou e ’ite mai i te tīa’ira’a ’e te fa’aorara’a noa atu te mau tāmatara’a e rave rahi o te orara’a.

E ’ōpuara’a tā te Atua nō tō tātou ’oa’oa. ’Ua tono mai ’oia ia tātou i te fenua nei nō te ha’api’i mai nā roto i tō tātou huru orara’a. ’Ua tono mai ’oia ia tātou i’ō nei nō te rave i te mau mā’itira’a.

I ora nā tātou i pīha’i iho i te Atua hou tātou ’a fānauhia mai ai. ’Ua mātau tātou iāna, ’e ’ua mātau ’oia ia tātou. ’Ua ’ite ’oia i tō tātou mau pūai ’e tō tātou mau paruparu, tā tātou mau moemoeā ’e tō tātou mau mata’u. ’Ua riro te orara’a tāhuti nei ’ei tere nō te ta’ata hō’ē nō te ’ite fa’ahou i te Atua. ’Ua ’ite ’oia i tō tātou fāito pūai ’e ’o vai tā tātou e nehenehe e riro mai. Hau atu i te mau mea ato’a, ’ua here te Atua ia tātou (hi’o 2 Nephi 2:25).

’Ua mo’ehia paha ia tātou te taime ’a fa’aea ai tātou i pīha’i iho i te Atua, ’aita rā tātou i mo’ehia iāna. ’Ua pi’i ’oia i te mau peropheta nō te fa’aha’amana’o ia tātou nō te aha tei i’ō nei tātou e nāhea i te riro mai iāna te huru (hi’o Luka 11:49).

Tei i’ō nei tātou nō te hō’ē ’ōpuara’a rahi. ’Ua tono mai te Atua ia tātou i teie taime ’e i teie vāhi. ’Ua ’ite ’oia i te mau tāmatara’a tā tātou e fa’aruru, te mau mā’itira’a e tītauhia ia tātou ’ia rave. E’ita te Atua e fa’ahepo i te hō’ē o tāna mau tamari’i ’ia ha’apa’o i tāna mau ture. Tē hina’aro nei ’oia ’ia mā’iti tātou nā roto ia tātou iho, noa atu te huru o tō tātou orara’a, ’ia ha’api’i mai nā roto i te ’itera’a ’e ’ia riro mai iāna te huru. E’ita rā te Atua e fa’ahepo ia tātou ’ia fa’aro’o iāna. (Hi’o 2 Nephi 2:16.)

’Ei feiā pe’e nō Iesu Mesia, e ha’api’i mai tātou ’ia fa’aro’o i te Vārua ’e ’ia haere nā roto i te māramarama o te Mesia. E nehenehe tātou e ’ite e aha te maita’i ’aore rā te ’ino noa atu te mau hia’amu pae tino ’e te mau fa’ahemara’a e pāto’i nei i te mau parau tumu mau. ’E nā roto i te mā’itira’a i te maita’i, e pūai rahi mai tātou. I te tahi taime, e au ra ē tē ’aro nei tātou ia tātou iho, terā rā te upo’oti’ara’a i ni’a i te pāto’ira’a e tuha’a ïa nō te ’ōpuara’a ’ia pūai atu ā tātou. E ’ere te pāto’ira’a i te mea au roa, e mea tītauhia rā te reira.

« E mea ti’a ’ia vai te pāto’ira’a i roto i te mau mea ato’a. ’Ahiri ’aita te reira… e ’ore ïa e ti’a ’ia fa’atupu i te parauti’a, e ’ore ato’a i te parau ’ino ; ’e e ’ore i te parau mo’a, e ’ore ato’a i te ’ati ; ’e e ’ore i te maita’i, e ’ore ato’a i te ’ino » (2 Nephi 2:11).

’Ia hara ana’e tātou—’e e nā reira nei tātou pā’āto’a—e nehenehe tātou e tātarahapa. E tauturu te fa’anahora’a nō te tātarahapara’a ’ia tāmā i tō tātou vārua ’e ’ia fa’ati’a ia tātou ’ia ha’afātata atu ā i te Atua. E ’ere te tātarahapa i te fa’autu’ara’a. E tao’a aroha teie, tei ho’ohia i Getesemane ’e i Golagota nā tō tātou Fa’aora o Iesu Mesia.

« I paruparu rā ’oia i tā tātou nei hara, i tā’irihia ’oia i tō tātou nei ’ino : e te a’o i hauhia ai tō tātou, tei ni’a ïa iāna, ’e nō tōna paruparu e ora ai tātou » (Isaia 53:5).

Te tūsia a tō tātou Fa’aora—tā tātou e parau nei, te Tāra’ehara a Iesu Mesia—’ua hau atu ïa i te ’aufaura’a i tā tātou mau hara. E nehenehe tātou e fāriu atu i ni’a i te Fa’aora ’ia fa’aora i tō tātou ’ā’au, ’ia ha’apūai i tō tātou vārua, ’ia ’ite mai i te hau. E nehenehe tā tātou e vaiiho i tā tātou mau hōpoi’a teimaha i tōna ra ’āvae, ’e e rave mai ’oia i te reira. ’O ’oia tō tātou Fa’aora. ’Ua ’ite maita’i ’oia ia tātou.

« ’E e rave ’oia i tō rātou paruparu i ni’a iāna iho ’ia fa’a’īhia tōna ra ’ā’au i te aroha i au i te tino, ’ia ’ite ’oia nā roto i te tino i te rāve’a e fa’aora ai i tōna mau ta’ata i tō rātou paruparura’a ra ». (Alama 7:12).