E tā’amura’a ānei tō’u ’ei melo nō te ’Ēkālesia ?

Tē vai ra hō’ē pārahira’a nō ’oe

Māta’ita’i i te video a Elder Christofferson « Is There a Place for Me ? [E pārahira’a ānei tō’u ?] »

Tē hina’aro nei mātou ia ’oe i’ō nei

« ’Ua feruri rahi mātou ’e ’ua ha’apa’o rahi mau mātou nō te māramarama maita’i a’e i te parau nō te fa’ahina’arora’a ta’ata nō tōna iho ’āpeni. ’E ’ia ha’apāpū i te mau ta’ata e fa’atupu nei i te reira huru fa’ahina’arora’a, ’e tō rātou mau ’utuāfare, e fāri’i-maita’i-hia rātou ’e e tuha’a ho’i rātou nō te ’utuāfare rahi ’ati a’e te ao nei ’oia ho’i Te ’Ēkālesia a Iesu Mesia i te Feiā Mo’a i te mau Mahana Hope’a nei.

« Tē parau ti’a atu nei au i teienei i te mau melo o te ’Ēkālesia e nā roto nei i te fa’ahina’arora’a ta’ata nō tōna iho ’āpeni ’aore rā ’o tei parauhia ’ei tāneātāne, ’ei hineāhine, ’aore rā ’ei ’airua. Tē hina’aro nei mātou ’ia ’ite ’outou ē ’ua here mātou ia ’outou. E fāri’i poupouhia ’outou. Tē hina’aro nei mātou ’ia riro ’outou ’ei tuha’a nō tā mātou mau ’āmuira’a. E mau tārēni ’e e mau ’aravihi rahi tō ’outou nō te pūpū atu i te bāsileia ’o te Atua i ni’a i te fenua nei, ’e ’ua ’ite mātou e rave rahi tauturura’a faufa’a rahi tā ’outou e hōro’a nei. Mai te mea tē vai rā te hō’ē o ’outou ’aita i māramarama nō ni’a i te ti’ara’a o te ’Ēkālesia nō ni’a i teie mau fifi, tē ani atu nei mātou ia ’outou ’ia rave i te taime nō te hi’o i te mau mātēria i nene’ihia i ni’a [Tauturu i te orara’a ’e Te fa’arava’ira’a iāna iho i ni’a ChurchofJesusChrist.org ’aore rā i roto i Te fa’anahora’a Vaira’a buka ’evanelia ’āfa’ifa’i]. ’A ’imi i te Vārua nā roto i te pure nō te hōro’a mai i te mau pāhonora’a ’o tā ’outou e ’imi ra. ’E ’ia pāpū ia ’outou ē ’ua here te Atua i tāna mau tamari’i » (L. Whitney Clayton, « God Loveth His Children », ChurchofJesusChrist.org).

Nāhea vau ’ia fa’aō atu ?

Tē parau fafau nei te Atua ē mai te mea e ha’apa’o tātou i tāna mau ture, e ’oa’oa tātou e a muri noa atu, ’e e tāpe’a noa ’oia i tāna mau parau fafau. Te mau ta’ata e nā roto nei i te fa’ahina’arora’a ta’ata nō tōna iho ’āpeni ’aore rā tei parauhia ’ei homo’āpeni e nehenehe rātou e rave ’e e ha’apa’o i te mau fafaura’a i te Atua. E nehenehe rātou e haere nā roto i tōna māramarama. E nehenehe rātou e ’āmui tā’āto’a mai i roto i te ’Ēkālesia.

« Mai te mea e tupu te fa’ahina’arora’a ta’ata nō tōna iho ’āpeni i roto i te mau melo ’e tē tūtava ra i te ora i te ture nō te vi’ivi’i ’ore, e pāturu ’e e fa’aitoito te feiā fa’atere ia rātou i roto i tā rātou fa’aotira’a. E nehenehe teie mau melo e fāri’i i te mau pi’ira’a i roto i te ’Ēkālesia, e mau i te hō’ē parau fa’ati’a nō te hiero, ’e e fāri’i i te mau ’ōro’a o te hiero mai te mea e mea ti’amā rātou. E nehenehe te mau melo tāne e fāri’i ’e e fa’a’ohipa i te autahu’ara’a » (« Te fa’ahina’arora’a ta’ata nō tōna iho ’āpeni ’e Te huru homo’āpeni », Buka arata’i rahi : Tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 38.6.12).

’Ua parau te peresideni Gordon B. Hinckley ē :

« ’Ua here mātou ia rātou ’ei mau tamāroa ’e ’ei mau tamāhine nā te Atua. Tē vai ra paha te tahi mau hia’ai pūai tō rātou e ’ere i te mea ’ōhie ’ia ha’avī. Te rahira’a o te ta’ata e mau hia’ai rau tō roto ia rātou i terā ’e terā taime. ’Ia ’ore rātou e pe’e i taua mau hia’ai ra, e nehenehe rātou e haere i mua mai te mau melo ato’a o te ’Ēkālesia. Mai te peu e ’ōfati rātou i te ture nō te vi’ivi’i ’ore ’e te mau fa’aturera’a mōrare a te ’Ēkālesia, e topa ïa rātou i raro a’e i te fa’atītī’aifarora’a a te ’Ēkālesia, mai te tahi atu mau pu’era’a » (« What Are People Asking about Us ? » Ensign, Novema 1998, 71).

Fa’ateitei ia vetahi ’ē

’A māta’ita’i i te video a Carol F. McConkie « Lifting Others [Fa’ateitei ia vetahi ’ē] ».

E mau hōro’a tō te mau ta’ata ato’a

Noa atu te vaira’a o te hō’ē ta’ata, e nehenehe ’oia e tauturu i te ’ohipa a te Fatu i teienei ’e ma te tīa’i ’ia tae mai tōna ha’apa’o maita’i i te hō’ē ā mau ha’amaita’ira’a, i teienei ’e i tera pae mai, mai tei parau-fafau-hia e te Atua i te ta’ata e ha’apa’o maita’i ato’a. ’Ua fa’a’ite Elder D. Todd Christofferson ē :

« E mau hōro’a tō te mau ta’ata ato’a ; e mau tārēni tō te mau ta’ata ato’a ; e nehenehe tā te mau ta’ata ato’a e tauturu i te fa’atupura’a i te ’ōpuara’a a te Atua i roto i te mau u’i tāta’itahi. Te rahira’a o te mau mea maita’i, te rahira’a o te mau mea faufa’a—’e i te tahi taime te mau mea ato’a e hina’arohia i teienei—e nehenehe ïa e fa’atupuhia i roto i te hō’ē orara’a e ’ere i te mea au roa. E rave rahi o ’outou tē fa’aitoito maita’i nei. ’E ’ia ti’a mai ’outou ’o tē fāri’i nei i te mau fifi rahi o te orara’a tāhuti, nō te pāruru i te ’ōpuara’a a te Atua nō te fa’ateitei i tāna mau tamari’i, ’ua ineine pā’āto’a ïa mātou nō te ta’ahi. Tē fa’a’ite pāpū nei mātou ē ’ua ’ite ātea ’e i te pae hope’a, e ho’ona roa te tāra’ehara a Iesu Mesia i te mea tei ’erehia ’e tei mo’ehia i te feiā tei fāriu atu iāna ra. ’Aore e ta’ata i fa’ata’a-ātea-hia ’ia fāri’i i te iti i te mea ato’a tā te Metua i fa’aineine nō tāna mau tamari’i » (« Nō te aha te faʼaipoiporaʼa, nō te aha te ʼutuāfare », Liahona, Mē 2015, 52).