’Ua here ānei te Atua iā’u ?

’Ua here roa te Atua ia ’oe

’Ua fa’ata’a mai te peresideni Dieter F. Uchtdorf i te here o te Atua :

« E ’ore ho’i te Atua e hi’o i te rāpae o te ta’ata. Tē ti’aturi nei au ē ’aita roa atu ’oia e ha’afifi nei mai te mea tē ora nei tātou i roto i te hō’ē aora’i ’aore rā i roto i te hō’ē fare ha’iha’i, e ta’ata hāviti ānei ’aore rā e ta’ata purotu ’ore, e ta’ata tuiro’o ānei ’aore rā ’ua mo’e ’ē roa. Noa atu ’aita tō tātou huru i maita’i hope roa, ’ua here roa te Atua ia tātou. Noa atu tō tātou mau hapehape, ’ua here hope roa ’oia ia tātou. Noa atu tē mana’o nei tātou ē ’ua mo’e tātou ’e ’aita e ’avei’a, e pū’ohu hope roa te here ’o te Atua ia tātou.

« ’Ua here ’oia ia tātou nō te mea ’ua ’ī ’oia i te mo’a, te vi’ivi’i ’ore ’e te here fāito ’ore. E faufa’a rahi tō tātou i mua i te Atua ’eiaha nō tō tātou parau fa’ata’ara’a nō te mea rā e mau tamari’i tātou nāna. ’Ua here ’oia ia tātou tāta’itahi » (« Te here ’o te Atua », Liahona, Novema. 2009, 22–23).

’Ua here te Atua ia tātou pā’āto’a. ’Ua here ’oia i te ta’ata nō terā ’e terā ha’apa’ora’a fa’aro’o ’e ia rātou ’aita e ha’apa’ora’a fa’aro’o. ’Ua here ’oia i te feiā e māuiui nei. ’Ua here ’oia i te ta’ata moni ’e te ta’ata veve. ’Ua here ’oia i te ta’ata nō te huru taura ato’a ’e te peu tumu, te ta’ata fa’aipoipo ’e te ta’ata ’ōtahi, ’e te feiā e nā roto nei i te fa’ahina’arora’a ta’ata nō tō rātou iho ’āpeni ’aore rā tei parauhia e tāneātāne, e pā’i’a ’aore rā e ’airua. ’E tē tīa’i nei te Atua ’ia pe’e tātou i tōna hi’ora’a.

’Ua hōro’a mai te Atua i tāna Tamaiti nō ’outou

« I aroha mai te Atua i tō te ao, ’e ’ua tae roa i te hōro’a mai i tāna Tamaiti Fānau Tahi, ia ’ore ’ia pohe tē fa’aro’o iāna ra, ’ia roa’a rā te ora mure ’ore » (Ioane 3:16).

’Aita atu e ha’apāpūra’a hope te hōhonu ’e te rahi o te here ’o te Atua maori rā tōna hina’aro ’ia fa’atusia i tāna Tamaiti ’ia ti’a ia tātou, tāna mau tamari’i, ’ia upo’oti’a i ni’a i te pohe ’e ’ia pūpūhia mai te ora mure ’ore.

’Aita atu e fa’a’itera’a nō te here ’o Iesu Mesia maori rā tōna hina’aro ’ia hōro’a i tōna ora ’ei ’aufau nō te hara a te ta’ata nei, ’ei ho’ona i te mau māuiui ato’a ’e te mau mea ti’a ’ore ’e ’ei ’ōfati i te mau tā’amura’a o te pohe nō tātou pā’āto’a nei (hi’o Alama 7:11–13).