Nāhea vau e ’ite ai e homo’āpeni au ?

Te mau mea e feruri

Mai te peu tē uiui ra ’outou e homo’āpeni ānei ’outou, e riro paha tei roto ’outou i te fa’ahina’arora’a ta’ata nō tō ’outou iho ’āpeni ’e tē uiui nei ’outou nāhea i te fa’ata’a i teie mau ’āehuehura’a. E ’ohipa ’ātitirau te māramaramara’a i te mau hia’ai pae tino ’e ’ua fa’atupuhia nā roto e rave rau tumu. E nehenehe te fa’ahina’arora’a moemoeā, te fa’ahina’arora’a pae ’āehuehu ’aore rā te hia’ai pae ’āpeni e fa’a’ite mai i te huru hia’ai pae tino, ’eiaha rā ’outou e mana’o vave ē ’o te reira mau. E mea tāuiui haere te hia’ai pae tino. Mai te peu tē uiui ra te mana’o, ’eiaha e mana’o fa’ahepo tō ’outou ’aore rā e mana’o rū nō te fa’aoti i tō ’outou orara’a ’āpeni.

E mea ta’a ’ē te aura’a o te hō’ē parau nō terā ’e terā ta’ata, ’e e nehenehe ato’a te aura’a o te parau e taui i te roara’a o te orara’a. E aha te aura’a o te parau homo’āpeni nō ’outou ? E mana’o ānei te reira ? E hīro’a ānei ? E huru orara’a ānei ? ’Ua tāuiui te aura’a o te parau homo’āpeni ’a tāuiui ato’a ai te tōtaiete ’e te ta’ere. ’Ia parauhia ’outou e homo’āpeni, penei a’e tē vai ra terā fa’ahina’arora’a ta’ata nō tō ’outou iho ’āpeni ’aita rā i hina’aro e rave mai te au i te reira. ’Aore rā penei a’e e i’oa te reira e fa’a’ite ra i te huru i roto ia ’outou, tō ’outou huru pae tino, pae ’āpeni ’aore rā pae politita. Mai te peu tē uiui ra ’outou e aha te aura’a ’ia parau te hō’ē ta’ata ē, « e homo’āpeni au », ’a ani atu ia rātou.