“Ko Hono Fakatupulaki ʻEku Pisinisí: Ko Hoku Fakavaʻé: Fekumi ki he ʻIló: Fakapapauʻi Hoʻo Taumuʻá mo e Founga Ke Aʻusia Aí,” Ko Hono Kamata mo Hono Fakatupulaki ʻEku Pisinisí ke Moʻui Fakafalala pē Kiate Aú (2017)
11. “Ko Hono Fakatupulaki ʻo ʻEku Pisinisí: Ko Hoku Fakavaʻé: Fekumi ki he ʻIló: Fakapapauʻi Hoʻo Taumuʻá mo e Founga Ke Aʻusia Aí”
ʻOku fakatupu fēfē ʻe he ʻiló ʻa e faingamālié?
“Education for a Better Life,” ʻoku maʻu ʻi he srs.lds.org/videos (ʻIkai ha vitiō? Lau e fakamatala ʻi he fakaʻosinga ʻo e konga ko ʻení.)
Ko e hā naʻe fie maʻu ʻe ʻEletā Siosefa W. Sitati ʻi hono taʻu 13? Ko e hā naʻá ne fai ki aí?
Tokāteline mo e Ngaahi Fuakava 88:118–19 mo e lea ʻa Palesiteni Kōtoni B. Hingikelī.
Sitepu 1: Lau e lea ʻa Palesiteni Henelī B. ʻAealingí.
“Kole ke fakahā atu ʻe he Laumālié e finangalo ʻo e ʻEikí kiate koe. Palani ke fakahoko ia. Palōmesi kiate Ia te ke talangofua. Ngāue loto fakamātoato kae ʻoua kuó ke fai Hono finangaló. Hili ia peá ke lotu … ke ʻilo ʻa e meʻa hono hoko ke ke faí.”
“Ngāue Faivelenga Kakato,” Ensign pe Liahona , Mē 2010, 63
ʻOku ʻi ai ha palani ʻa e ʻEikí maʻau. Kuó ne tāpuekina ʻaki koe ha ngaahi meʻafoaki makehe mo ha ngaahi talēniti ʻe lava ʻo tokoni atu ke ke aʻusia e meʻa ʻokú Ne finangalo ki aí. Te ke lava ʻo fakakakato hoʻo misiona he māmaní kapau ʻokú ke fekumi faivelenga ke mahino kiate koe mo ke talangofua ki Hono finangalo kiate koé.
Sitepu 2: Tali e ngaahi fehuʻi ʻi laló ke kamataʻi ʻaki hono faʻu hoʻo vīsoné pe “misiona ʻo e moʻuí.” He ʻikai ke ke maʻu ha taimi ke fakaʻosi ʻeni he taimí ni, kehe pē ke ke hiki ʻa e ngaahi tefitoʻi fakakaukaú. Te ke lava ʻo fakatonutonu mo fakaleleiʻi e “misiona hoʻo moʻuí” ʻi he kahaʻú.
Ko e Misiona ʻo ʻEku Moʻuí
Ko e fē tuʻunga ʻoku ou fie ʻi ai ʻi ha taʻu ʻe nima mei heni?
Ko e hā hono ʻuhingá?
Ko e hā ha ngaahi potoʻi ngāue, ʻilo, pe aʻusia ʻoku ou fie maʻu ke u aʻu ai ki ai?
Tukupā ke fakahoko ʻa e ngaahi ngāue ko ʻení he lolotonga ʻo e uiké.
Fakakakato ʻa e ongo ʻekitivitī ʻo e “Ko Hono Fokotuʻu ʻo ʻEku Ngaahi Taumuʻá” mo e “Ko Hono Kumi ha Taha Faifakahinohino” ʻi laló.
Fakaʻosi hono tohi hoʻo palani “misiona ʻo e moʻuí” pea aleaʻi ia mo ho fāmilí pe kaungāmeʻá.
Kole ha taha ke hoko ko ha tokotaha fai fakahinohino kiate koe pea fokotuʻu ha taimi ke mo fakataha ai.
Sitepu 1: Lau e lea ʻa Palesiteni Hauati W. Hanitaá. ʻOku tau fulihi ʻa e fakaʻānauá ko e ngāue ʻi heʻetau ngāueʻi e ngaahi taumuʻá.
“Ko e ongoongolelei ʻeni ʻo e fakatomala, pea ʻoku fie maʻu ke tau fakatomala mo faʻa fakalelei. Ko hono moʻoní, ʻoku totonu ke hoko maʻu pē ʻa e fakatomalá, fokotuʻu tukupaá, mo e fokotuʻu taumuʻá ko ha meʻa ʻoku toutou fakahoko. … ʻOku ou fakaongoongoleleiʻi ʻa e foungá ni.”
“The Dauntless Spirit of Resolution,” (Brigham Young University devotional, Jan. 5, 1992), 2, speeches.byu.edu
Ko e ngaahi taumuʻá ʻoku totonu ke:
Mahino mo lava ke fuatautau.
Tohi pea fakapipiki ia ʻi ha feituʻu te ke lava ʻo sio fakaʻaho ki ai.
ʻOsi fokotuʻu e taimi ke fakakakato ai.
Fie maʻu ki ai ha ngaahi ngaue pau ke fakahoko
Toutou vakaiʻi, lipooti, mo fakatonutonu.
Sitepu 2: Hiki ʻi ha laʻi pepa makehe, ha taumuʻa ʻe ua pe tolu ʻe tokoni ke ke aʻusia ho “misiona ʻo e moʻuí.” Muimui he sīpinga ʻi laló. Fakapipiki ʻa e laʻipepá ʻi ha feituʻu te ke lava ʻo sio fakaʻaho ki ai.
Taumuʻá
Ko e hā hono ʻuhingá?
Ngaahi Sitepu Pau ke Aʻusia ai e Taumuʻá
Taimi Tēpilé
Ko Hai Te u Lipooti Ki Ai ʻEku Fakalakalaká?
SĪPINGÁ:
Lau e Tohi ʻa Molomoná miniti ʻe 30 he ʻaho kotoa.
Koeʻuhí ke u lava ʻo maʻu ha fakahinohino fakaʻaho mei he Laumālie Māʻoniʻoní.
1. ʻĀ he 6:30 pongipongi he ʻaho kotoa pē.
2. Laukonga kimuʻa he kai pongipongí.
3. Lekooti ʻeku fakalakalaká ʻi ha laʻi saati.
Te u vakaiʻi ʻeku fakalakalaká he pō kotoa kimuʻa peá u mohé.
Te u vahevahe ʻeku saati fakalakalaká mo ha mēmipa ʻo e fāmilí he Sāpate kotoa.
Sitepu 1: Lau e lea ʻa ʻEletā Lōpeti D. Heilí.
“ʻI heʻeku kei talavoú, ne u kumi faleʻi mei heʻeku mātuʻá mo ha kau faiako faivelenga mo falalaʻanga. Ko e taha, ko ha taki lakanga fakataulaʻeiki; ko e taha ko ha faiako naʻe falala kiate au. … Filifili ʻi he faʻa lotu ha kau faifaleʻi ʻoku ʻi honau lotó hoʻo lelei fakalaumālié.”
“Ko e Fehangahangai mo e Faingataʻa ʻo e Māmani ʻo e ʻAho Ní,” Ensign pe Liahona, Nōvema 2015, 46
Te ke ala fie maʻu ha taha ʻoku lahi ʻene taukeí ke ne tali hoʻo ngaahi fehuʻí—ha taha kuó ne ʻosi fai ʻa ia ʻokú ke fie fakahokó. Ko hono toe ʻo e kau faifakahinohinó ʻe lava pē ko ha ngaahi kaungāmeʻa angatonu pe kau mēmipa ʻo e fāmilí. Ko ha kakai ʻeni ʻoku nau loto lelei ke fakamoleki ha taimi ke fakalotolahiʻi koe ke ke fai ha ngaahi liliu ʻi hoʻo moʻuí mo ʻai ke ke haʻisia ki hoʻo fakalakalaká.
Sitepu 2: Fakakaukau ki he faʻahinga tokoni ʻokú ke fie maʻú. Hiki ha lisi ʻo e kakai te nau lava ʻo hoko ko ho kau faifakahinohinó. Fakalaulauloto mo lotua e ngaahi hingoa ʻi hoʻo lisí.
Sitepu 3: Tali ʻa e ngaahi fehuʻi ʻi laló ke kamata ʻaki hoʻo fetuʻutaki mo e fai fakahinohinó. Ke fakaafeʻi ha taha ke hoko ko ho fai fakahinohinó, te ke lava pē ke pehē ange, “ʻOku ou feinga ke fai ha liliu ʻi heʻeku moʻuí. Te ke loto fiemālie ke tokoniʻi au?”
Ko Hoku Faifakahinohinó
Ko hai ʻokú ke loto ke hoko ko ho faifakahinohinó?
Ko e fē taimi te ke kole ange ai ke hoko ko ho faifakahinohinó.
Ko e fē ha taimi te mo lava ai ʻo talanoa ke vahevahe “misiona ʻo e moʻuí” mo e ngaahi taumuʻá?
Ko e hā e tuʻo lahi ʻokú ke loto ke talanoa ai mo ho faifakahinohinó?
Sitepu 4: Manatuʻi ʻokú ke fatongiaʻaki hoʻo “misiona ʻo e moʻuí.” Ko e taimi te ke talanoa ai mo ho faifakahinohinó:
Vakaiʻi hoʻo fakalakalaká.
Vakaiʻi e ngaahi maka tūkiaʻanga ki hoʻo fakalakalaká mo e meʻa ʻokú ke fai ke ikunaʻi ai kinautolú.
To e vakaiʻi fakapatonu e meʻa ʻokú ke palani ke faí, kimuʻa peá ke toe talanoa mo ho faifakahinohinó.
Kapau ʻoku ʻikai ke ke lava ʻo mamata ʻi he foʻi vitioó, fili ha mēmipa ʻo e kulupú ke ne lau ʻa e fakamatala ko ʻení.
ʻEletā Siosefa W. Sitati: ʻI hoku taʻu 13, naʻá ku nofo ʻi ha potu tukuʻuta ʻo Keniā. Naʻe fuʻu masiva ʻaupito ʻa e kakaí. Ka ko kinautolu naʻe hangē ne nau lava ke maʻu ʻa e ngaahi meʻa naʻe fakaʻamua ʻe he niʻihi kehé, ko kinautolu ia ne nau maʻu ha ako leleí. Naʻe mahino kiate au ko e akó ko ha kī ia ki ha tuʻunga moʻui lelei ange.
Naʻe toutou haʻu ha fakakaukau ke u ʻalu ʻo talanoa mo e puleako ʻi ha taha ʻo e ngaahi ʻapiako naʻá ku fuʻu fie ako aí. Naʻá ku fie maʻu e pasikala ʻa ʻeku tangataʻeikí ki he fononga ko ʻení, ʻa ia naʻe feʻunga mo ha vaeuaʻi ʻaho. Naʻe teʻeki tuʻo taha haʻaku mavahe mei hoku koló. Naʻe ʻikai ke u poto ʻi he lea faka-Pilitāniá, pea ko e puleakó ko ʻení ko e pālangi. Ne teʻeki ke u fetaulaki pe talanoa hangatonu mo ha pālangi kimuʻa, pea naʻe hoko ʻeni ko ha fakakaukau fakalotofoʻi.
Ne ʻi ai ha meʻa ʻiate au naʻá ne toutou ueʻi au mo talamai ke u fai ʻeni, ko ia ai naʻá ku fononga atu ke sio ki he puleakó. ʻI heʻeku vakai ki aí, naʻe lava ke u tala naʻe fuʻu ʻohovale ke sio ki ha kiʻi tamasiʻi ʻoku tuʻu hangē ha sōtiá ʻi hono ʻaó. Naʻe fofonga ʻofa, peá u maʻu ai ha loto lahi. Naʻá ku talaange ʻoku ou fuʻu fie hū ki heʻene ʻapiakó pea te u fiefia lahi kapau te ne tali au. Peá ne pehē mai leva, “Sai, ta toki vakai he taimi ʻe maʻu ai e ola ʻo e siví.” Ne u pehē ange ai, “Mālō, tangataʻeiki.” Naʻe ʻikai aʻu ʻo miniti ʻe fā kuó u ʻosi ʻi tuʻa mei he ʻōfisí.
Ko e miniti ʻe fā naʻá ku ʻi he ʻōfisí aí ko e ngaahi miniti mahuʻinga taha ʻi heʻeku moʻuí. Ko au tokotaha pē mei hoku ʻapiako lautohí naʻe fili ki he taha ʻo e ngaahi akoʻanga lelei taha ʻi homau feituʻú. Koeʻuhí ko hono ʻomi ʻe he tangata leleí ni e faingamālié ni, naʻá ku houngaʻia ai, mo ne ueʻi au ke u feinga ke hoko ko e taha ako lelei taha ʻi heʻeku kalasí.
Naʻe fakaava ai ha ngaahi faingamālie foʻou ke u hū ki ha toe ʻapiako lelei ʻe taha pea teuteu ai ki he ʻunivēsití. Naʻe lava ʻi heʻeku akó ke u feʻiloaki mo hoku uaifí ʻi he ʻunivēsití. Naʻá ku lava ai ke maʻu ha ngāue ʻi he koló. Lolotonga ʻema nofo ʻi Nailopí, ne ma fetaulaki ai mo ha ongomātuʻa faifekau naʻá na fakaafeʻi kimaua ki hona ʻapí, ʻa ia naʻe fai ai e lotu mo kinautolu ko e kāingalotu ʻo e Siasí. Kapau naʻe ʻikai ke u ʻi Nailopi he taimi ko iá, naʻe ʻikai ke u mei maʻu ʻa e ongoongoleleí. Koeʻuhí naʻe ʻi ai ʻeku ngāue pau, naʻá ku lava ai ʻo ngāue ʻi he Siasí.
ʻOku ou fakamoʻoni ko e akó ko ha kī ia ki he moʻui fakafalala pē kiate kitá. Te ne fakaava ha ngaahi founga lahi kiate koe ke ke lava ai ʻo tokonaki fakatuʻasino maʻau pē mo ke moʻui fakafalala fakalaumālie foki kiate koe.