Ko hoku Fakavaʻé: Fakatomala pea Talangofua

Taimi Lōloa Tahá: Miniti ʻe 20

Fakalaulauloto:

ʻOku fekauʻaki fēfē ʻa e fakatomala pea talangofuá mo e moʻui fakafalala pē kiate kitá?

Mamataʻi:

“Obedience Brings Blessings,” ʻoku maʻu ʻi he srs.lds.org/videos (ʻIkai ha vitiō? Lau e fakamatala ʻi he fakaʻosinga ʻo e konga ko ʻení.)

Aleaʻi:

Ko e hā ha ngaahi tāpuaki kuó ke maʻu ʻi hoʻo talangofua ki he ngaahi fono ʻa e ʻOtuá? ʻOku tokoniʻi fēfē kitautolu ʻe he fakatomalá ke tau fakalakalaka?

Lau:

Tokāteline mo e Ngaahi Fuakava 130:20–21 mo e lea naʻe fai ʻe he Palōfita ko Siosefa Sāmitá

Tokāteline mo e Ngaahi Fuakava 130:20–21

“ʻOku ʻi ai ha fono … ʻa ia ʻoku makatuʻunga ki ai ʻa e ngaahi tāpuaki kotoa pē—pea ʻo ka tau ka maʻu ha tāpuaki mei he ʻOtuá, ʻoku tupunga ia ʻi he talangofua ki he fono ʻa ia ʻoku makatuʻunga ia ki aí.”

Siosefa Sāmita

Naʻá ku fokotuʻu ʻeni ko ʻeku lao:Ko e taimi ʻoku fekau ai ʻe he ʻEikí, fai ia.”

Ngaahi Akonaki ʻa e Kau Palesiteni ʻo e Siasí: Siosefa Sāmita (2007), 160

ʻEkitivitī (miniti ʻe 5)

ʻOku iku ʻa e talangofua ki ha ngaahi fono paú ki ha ngaahi tāpuaki pau.

Sitepu 1: Hiki ha ngaahi tāpuaki ʻokú ke fie maʻu, ʻi he kōlomu toʻohema ʻi laló.

Sitepu 2: ʻI he kōlomu toʻomataʻu ʻi laló, fokotuʻu ai e ngaahi fono pe ngaahi tefitoʻi moʻoni ʻe fie maʻu ke ke talangofua ki ai ka ke maʻu e ngaahi tāpuaki ʻokú ke fie maʻú.

Aleaʻi:

Lau ʻa e Sosiua 3:5 mo e lea naʻe fai ʻe ʻEletā Sefilī R. Hōlani mo Palesiteni Sipenisā W. Kimipoló. Ko e hā ʻoku fie maʻu ai ke tau fakatomala, fakamaʻoniʻoniʻi kitautolu, mo tau feinga ke fai lelei ʻi heʻetau feinga ke moʻui fakafalala pē kiate kitautolú?

Sosiua 3:5

“Fakamāʻoniʻoniʻi ʻa kimoutolu: koeʻuhí ʻe fai ʻe he ʻEikí ʻapongipongi ʻa e ngaahi mana ʻiate kimoutolu.”

ʻEletā Jeffrey R. Holland

“ʻOku tāpuekina ʻe he ʻEikí ʻa kinautolu ʻoku fiefakalakalaká, ʻa kinautolu ʻoku nau tali ʻa e ngaahi fie maʻu ki he ngaahi fekaú mo feinga ke tauhi kinautolú. … Te ne tokoniʻi koe ke ke fakatomala, fakafoʻou, fakaleleiʻi ha meʻa pē kuo pau ke ke fakaleleiʻi, pea hoko atu. ʻE fāifai pē pea te ke maʻu ʻa e ikuna ʻokú ke fekumi ki aí.”

“ʻE Fai ʻe [he ʻEikí] ha Ngaahi Mana ʻIate Kimoutolu ʻApongipongí na,” Ensign pe Liahona, Mē 2016, 126

Palesiteni Spencer W. Kimball

“Kapau ʻoku tau saiʻia ʻi he koloá pe ngaahi meʻa ʻoku fie maʻú ʻo laka ange ʻi heʻetau saiʻia he talangofuá, ʻe mole ʻiate kitautolu ʻa e ngaahi tāpuaki ʻoku fie foaki ʻe he [ʻOtuá] kiate kitautolú.”

The Teachings of Spencer W. Kimball,ed. Edward L. Kimball (1982), 212

Tukupā:

Tukupā ke fakahoko ʻa e ngaahi ngāue ko ʻení he lolotonga ʻo e uiké.

• Talangofua ki he ngaahi fono pe ngaahi tefitoʻi moʻoni naʻá ke fili ʻi he ʻekitivitī ʻi ʻolungá.

• Vahevahe mo ho familí pe ngaahi kaungāmeʻá e meʻa kuó ke ako he ʻahó ni fekauʻaki mo e talangofuá.

ʻOku ʻOmi ʻe he Talangofuá ʻa e Ngaahi Tāpuakí

Kapau ʻoku ʻikai ke mou lava ʻo mamata ʻi he foʻi vitioó, fili ha mēmipa ʻo e kulupú ke ne lau ʻa e fakamatala ko ʻení.

Palesiteni Thomas S. Monson Ko ha talaʻofa nāunauʻia! “Ko ia ia ʻokú ne tauhi [e] ngaahi fekau [ʻa e ʻOtuá] ʻokú ne maʻu ʻa e moʻoní mo e māmá, kae ʻoua ke fakanāunauʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28]. …”

Kāinga, ko e sivi lahi taha ʻo e moʻui ní ko e talangofuá. Naʻe folofola ʻa e ʻEikí, “Pea te tau siviʻi ʻa kinautolu ʻi he meʻá ni, ke vakai pe te nau fai ʻa e ngaahi meʻa kotoa pē ʻe fekau ʻe he ʻEiki ko honau ʻOtuá kiate kinautolú” [ʻĒpalahame 3:25].

Naʻe fakahā ʻe he Fakamoʻuí: “He ko kinautolu kotoa pē ʻoku fie maʻu ha tāpuaki mei hoku nimá, te nau tauhi ʻa e fono ʻa ia naʻe fokotuʻu ki he tāpuaki ko iá, pea mo hono ngaahi tuʻunga ʻo iá, ʻo hangē ko ia naʻe fokotuʻu ʻi he teʻeki ai ke ʻai ʻa e tuʻunga ʻo e māmaní” [T&F 132:5].

ʻOku ʻikai ha faʻifaʻitakiʻanga maʻongoʻonga ange ʻi he faʻifaʻitakiʻanga hotau Fakamoʻuí. Naʻe pehē ʻe Paula fekauʻaki mo Ia:

“Neongo ko e ʻAló Ia, ka naʻe akoʻi ia ke talangofua ʻe he ngaahi meʻa naʻá Ne kātakiʻí;

“Pea kuo fakahaohaoa ia, peá ne hoko ko e tupuʻanga ʻo e moʻui taʻengatá kiate kinautolu kotoa pē ʻoku talangofua kiate iá” [Hepelū 5:8–9].

Naʻe fakahaaʻi ʻe he Fakamoʻuí ʻa e ʻofa moʻoni ki he ʻOtuá ʻaki ʻEne moʻui haohaoa, pea ʻaki ʻEne fakahoko e misiona toputapu naʻe ʻOʻoná. Naʻe ʻikai fie-māʻolunga. ʻIkai ʻulupupula ʻo hīkisia. Naʻe ʻikai teitei tuku ʻene faimāteakí. Naʻe loto fakatōkilalo maʻu ai pē. Naʻe loto fakamātoato maʻu pē. Naʻe talangofua maʻu ai pē.

Ko e taimi naʻe fehangahangai ai mo e mamahi ʻi Ketisemaní, ʻa ia naʻá Ne kātekina ai ʻa e mamahí pea ko ʻEne “tautaʻá ko e taʻataʻa naʻe tō ʻi he tulutā lalahi ki he kelekelé” [Luke 22:44], naʻá Ne fakafōtunga ʻa e ʻAlo talangofuá ʻaki ʻEne pehē, “ʻE Tamai, kapau ko ho finangaló, ʻave ʻa e ipú ni ʻiate au: kae ʻoua naʻa fai hoku lotó, ka ko e finangalo ʻoʻoú” [Luke 22:42].

ʻI hono fakahinohinoʻi ʻe he Fakamoʻuí ʻa ʻEne Kau ʻUluaki ʻAposetoló, ʻokú Ne fakahinohinoʻi pehē koe mo au: “Muimui ʻiate au” [Sione 21:22]. ʻOku tau loto fiemālie nai ke talangofua?

Ko e ʻilo ʻoku tau kumiá, ko e ngaahi tali ʻoku tau fakaʻamuá, pea mo e ivi ʻoku tau fie maʻu he ʻahó ni ke feau ʻaki e ngaahi faingataʻa ʻo e māmani fihituʻu mo faʻaliliuá, ʻe ʻatautolu ia ʻi he taimi te tau loto fiemālie ai ke talangofua ki he ngaahi fekau ʻa e ʻEikí. Te u toe lau mei he ngaahi folofola ʻa e ʻEikí: “Ko ia ia ʻokú ne tauhi [e] ngaahi fekau [ʻa e ʻOtuá] ʻokú ne maʻu ʻa e moʻoní mo e māmá, kae ʻoua ke fakanāunauʻiaʻi ia ʻi he moʻoní peá ne ʻiloʻi ʻa e ngaahi meʻa kotoa pē” [T&F 93:28].

ʻOku ou lotua ʻi he loto fakatōkilalo ke tāpuekina kitautolu ʻaki ʻa e ngaahi pale lelei kuo talaʻofa ki he talangofuá. ʻI he huafa ʻo Sīsū Kalaisi, ko hotau ʻEiki mo e Fakamoʻuí, ʻēmeni.

(“ʻOku ʻOmi ʻe he Talangofuá ʻa e Ngaahi Tāpuakí,” Ensign pe Liahona, Mē 2013, 89, 92)