“Ko Hono Fakatupulaki ʻEku Pisinisí: Ako,” Ko Hono Kamata mo Hono Fakatupulaki ʻEku Pisinisí ke Moʻui Fakafalala pē Kiate Aú (2017)
“Ko Hono Fakatupulaki ʻEku Pisinisí: Ako”
Ako
Taimi Lōloa Tahá: Miniti ʻe 60
1. Founga ʻe Tolu ke Fakatupulaki ʻEku Pisinisí
Lau:
Ko ʻene aʻusia pē ʻe hoʻo pisinisí ha tuʻunga lelei tuʻumaʻu ʻi hono fakahoko ha ngāue pe koloa ʻoku tupu, ʻe ala mateuteu leva ki ha ngaahi faingamālie ke tupulaki. Mahalo ko ha konga hoʻo palaní mei he kamataʻangá ke fakatupulaki hoʻo pisinisí, pe ko ha meʻa fakaʻohovale ʻi hoʻo ngāue mālohí pe vilitakí. Ko e tokolahi taha ʻo e kau maʻu pisinisí ʻoku nau fakatupulaki ʻenau pisinisí ʻaki ha taha ʻo e ngaahi founga ko ʻení ʻe tolu, hangē ko ʻene ʻasi atu ʻi laló. Te tau vakaiʻi fakaʻāuliliki takitaha ʻi he vahé ni ʻa e ngaahi founga ko ʻení.
2. Ko Hono Fakalahi ʻEku Ngaahi Ngāué pe Koloá
Lau:
Ko ha founga lelei ʻe taha ke fakatupulaki ai hoʻo pisinisí ko hano tuku atu ha ngaahi ngāue pe ngaahi koloa kehe ʻokú ne feau e ngaahi fiemaʻu hoʻo kau kasitomā ʻoku fakataumuʻa ki aí. ʻOku fakatupu ʻe he ngaahi ngāue mo e ngaahi koloa foʻoú ha ngaahi halanga paʻanga ʻoku tokoni ke tuʻu lelei ai hoʻo pisinisí. ʻE ala kau ʻi ha ngaahi sīpinga ʻa e ngaahi meʻa ko ʻeni ʻoku hā atu ʻi laló.
Fakatokangaʻi ange ko e ngaahi ngāue pe koloa ʻoku fakalahi ʻi he ngaahi sīpinga ko ʻení ko ha fakalahi pē ia ki he tefitoʻi pisinisí.
3. Ko Hono Fakalahi e Māketi ‘oku Ou Fakataumuʻa Ki aí
Lau:
Ko ha founga ʻe taha ke tokoni ke tupulaki hoʻo pisinisí ko haʻo fakalahi e māketi ʻokú ke fakataumuʻa ki aí. Te ke lava heni ke ke tokanga pea mo fetuʻutaki mo ha kau kasitomā tokolahi ange, ʻofa pē ʻe fakaiku ki ha pisinisi lahi ange. ʻOku hā atu ʻi lalo ha niʻihi e ngaahi founga te ke lava ʻo fakalahi ai e māketi ʻokú ke fakataumuʻa ki aí.
Aleaʻi:
-
Ko e hā ha ngaahi meʻa ʻokú ke fie fakatotoloʻi mo fakakaukauʻi kimuʻa peá ke toki fakahoko ha taha ʻo e ngaahi fili ko ʻení?
-
ʻE founga fēfē haʻo pukepuke e tuʻunga lelei ʻo e ngaahi ngāue pe koloa ʻi hoʻo tefitoʻi pisinisí ʻi hoʻo fakalahí?
4. Feʻauhi ki ha Pēseti Lahi Ange ʻo e Māketí
Lau:
Te ke toe lava foki ke fakatupulaki hoʻo pisinisí ʻaki haʻo feʻauhi ki he pēseti lahi ange ʻo e māketí. ʻOku fai ʻeni ʻe he kau maʻu pisinisí ʻaki haʻanau tokanga ki heʻenau tuʻunga lelei he feʻauhí mo fakalahi e lelei ʻo ʻenau ngaahi ngāué pe koloá koeʻuhí ke hiki mai ʻa e kau kasitomaá ki heʻenau pisinisí. Hangē ko ʻení, ʻe ala ʻinivesi ha taha ʻoku ʻi ai hano fale heleʻuhila ʻi ha ngaahi sea molū mo fakalahi e fakaneifua ke fili mei aí, ʻo ne ala tohoakiʻi ha niʻihi naʻe mei ō ki ha ngaahi fale heleʻuhila kehe.
5. Ko Hono Fakaʻaongaʻi Lelei Taha e Ngaahi Faingamālie ke Tupulakí
Lau:
Ne tau toki ako ki ha founga ʻe tolu ke fakatupulaki ai ha pisinisi. Kapau ʻokú ke fie fakatupulaki hoʻo pisinisí, ʻoku fie maʻu ke ke tokanga ʻaupito ki he ngaahi faingamālie ʻe ala tupulaki aí. ʻOku ako e kau maʻu pisinisí ʻaki ʻenau fakahoko e (vakai, T&F 58:26–28). ʻOku nau fakapotopoto ʻi he taimi ʻoku nau fakakaukauʻi ai ha ngaahi faingamālie foʻou ke fakalahi ʻenau pisinisí ʻaki haʻanau fakafuofuaʻi lelei ha ngaahi maʻuʻanga tokoni makehe pea mo e ngaahi pole ʻe ala hokó. Ka neongo ia, ʻoku ʻikai ke nau manavasiʻi ke ʻahiʻahi mo fakahoko ha ngaahi fehālaaki. ʻOku nau lau e fehālākí ko ha faingamālie ke fakavaveʻi ai ʻenau akó, he te ne lava ʻo ʻai ke nau mālohi ange mo ʻunuaki ke nau ofi ange ki heʻenau ngaahi taumuʻá. Kapau ʻoku fie maʻu, ʻoku nau lotolahi ke liliu e meʻa ʻoku tokanga ki ai ʻenau pisinisí, ke feau e feliliuaki ʻi he ngaahi fiemaʻu ʻa e kau kasitomaá.
Aleaʻi:
Fakakaukau ki ha taha maʻu pisinisi ʻokú ne vali e ngaahi tauʻanga meʻalelé. ʻOku fakakaukau te ne lava ʻo maʻu ha pisinisi lahi ange ʻaki haʻane liliu e taumuʻa ʻo ʻene pisinisí. Hili haʻane talanoa mo ʻene kau kasitomaá, ʻokú ne ʻilo ai te nau loto fiemālie ke totongi ha paʻanga lahi ange kapau ʻe tāmateʻi ʻe heʻene pisinisí ʻa e ngaahi fakaʻilonga motuʻá kae fokotuʻu ha ngaahi fakaʻilonga ki he pamupaá mo ha ngaahi hula (speed bumps) ke holoki e lele vavé. Kuó ne ʻosi ʻanalaiso fakaʻāuliliki ʻeni mo tui ʻoku tonu fakapisinisi, ko ia kuó ne pehē ke ʻahiʻahiʻi e ngaahi faingamālie foʻou ko ʻení.
-
Ko e hā ha ngaahi faingamālie pe palopalema kuó ke fakatokangaʻi te ne ala fakatupu ke liliu e taumuʻa hoʻo pisinisí?
6. Ko Hono Fakatupulaki Hono Angaʻaki e Fakahū ki he ʻAkauni Fakafoʻituituí
Lau:
ʻE lava ke faitokonia lahi hoʻo malava ke fakatupulaki hoʻo pisinisí kapau ʻoku ʻi ai haʻo ngaahi ʻakauni fakafoʻituitui ke ke ngāue ʻaki. Ko ha natula ʻe taha ʻokú ne fakafaikehekeheʻi ʻa e kau maʻu pisinisi leleí ko ʻenau fakahū maʻu pē ʻa e paʻangá. Kuo ʻosi faleʻi kitautolu ke ʻuluaki totongi ʻetau vahehongofulú mo e ngaahi foakí. Hili ia pea ʻoku totonu ke tau totongiʻi kitautolu ʻaki hano fakahū ha konga ʻo ʻetau paʻangá.
Ko e fakahū ko ia ʻo e paʻangá ʻokú ne tokonaki ai ha paʻanga ki ha ngaahi meʻa fakatuʻupakē mo ha ngaahi fiemaʻu taʻe-ʻamanekina. ʻOkú ne ʻomi foki ha ʻatamai nonga, feliliuaki ngofua ʻi he ngaahi fili ʻo e moʻuí, mo ha ngaahi maʻuʻangatokoni ki ha ngaahi faingamālie hangē ko e fakatupulaki ha pisinisi. Neongo ʻoku lahi ha ngaahi founga ke tānaki ai ha paʻanga, ko e meʻa ʻoku mahuʻinga tahá ke fakahū ha paʻanga ʻi he uike kotoa pē.
ʻE lava e tekinolosiá ʻo tokoni atu ke ke tānaki ha paʻanga. Te ke lava ‘o fokotuʻutuʻu ke fai ha toʻo fakahangatonu mei hoʻo sieke vahé pe ʻave fakahangatonu mei ha ʻakauni sieke ki ha ʻakauni fakahū paʻanga. ʻE lava ʻo tokoni ʻa e toʻo pe ʻave fakahangatonú ke ʻikai toe fakahela ʻa e fakahū paʻangá. ʻOku kau ʻi he ngaahi founga faingofua ʻo e fakahū ha paʻangá ʻa e:
-
Fokotuʻu ha sinoʻi paʻanga ki ha meʻa fakatuʻupakē.
-
Fokotuʻu ʻo ha patiseti.
-
Ngāueʻi ha taumuʻa fakahū paʻanga taimi-nounou.
-
Tipōsiti fakaʻangataha ha paʻanga hū mai, hangē ko e totongi fakafoki ha tukuhau, paʻanga ʻaho fāʻeleʻi, pōnasi, mo e paʻanga tuku fakaholo.
-
Ko hono fokotuʻu ha ngaahi ʻakauni ki ha ngāue fakafaifekau, ako, vāhenga mālōlō, ngaahi faingamālie fakapisinisi, pe ha ngaahi toe taumuʻa fakafoʻituitui kehe.
-
Ko hono fakahū hoʻo paʻangá pe silini maká.
Aleaʻi:
Ko hā ha ngaahi founga kuo lelei taha mo tokoni atu ke ke fakahū maʻu pē paʻangá?
7. Tuʻusi e Ngaahi Fakamole Taʻeʻaongá
Lau:
Kuo pau ke ako maʻu pē kau maʻu pisinisí ke nau ngāue ʻaki ha ngaahi maʻuʻanga tokoni siʻi ange, ke pukepuke ha tuʻunga tupu ʻoku lelei. Ko e kau maʻu pisinisi leleí ʻoku nau fakapotopoto mo poto ʻi hono fakafuofuaʻi pe ko e fē ʻa e ngaahi fakamole ʻoku mahuʻingá mo ia ʻoku ʻikaí. Ko e taimi ʻe niʻihi ʻoku nau fakahoko ha ngaahi meʻa fakahangatonu ʻaki haʻanau tukupā ke tuʻusi ha peseti pau ʻo ʻenau fakamolé mo kumi ha ngaahi founga faingofua mo mahino ke aʻusia e ngaahi fakahū paʻangá. ʻOku hā atu ʻi lalo ha niʻihi ʻo e ngaahi founga ʻoku puleʻi ʻaki ʻe he kau maʻu pisinisí ʻa e fakamolé.
|
Hoko ko ha Mohu Maʻuʻanga Tokoni: Vahevahe pe toe fakaʻaongaʻi ha meʻangāue mo ha ngaahi koloa motuʻa; loto fiemālie ke fakatau ha meʻa motuʻa kae ʻikai ke foʻou. Hangē ko ʻení, ko ha fale tā tisaini naʻe fili ke fakatau ha nāunau ʻōfisi motuʻa ʻokú ne feau ʻene ngaahi fiemaʻú. |
|
Tukutaha e tokangá: Fakaʻaongaʻi lelei ʻa e taimí ʻaki e tokanga ki he ngaahi meʻa ʻoku mahuʻinga tahá mo e ngaahi ngāue ʻokú ne ʻomi e paʻanga lahi tahá. Hangē ko ʻení, ko ha kautaha ʻenisinia ‘oku tokanga taha pē ki heʻene ngāue ʻe tolu ʻoku tupu lelei tahá. |
|
Fakaʻaongaʻi ʻa e tekinolosiá: Ngāueʻaki e tekinolosiá ke fakatupulaki e olá, fakaleleiʻi e fetuʻutakí, mo holoki e fakamolé. Hangē ko ʻení, ke holoki e fakamole he fefonongaʻakí, ʻe ngāueʻaki ʻe ha pisinisi faʻu polokalama fakakomipiuta ha konifelenisi vitiō mo e konifelenisi telefoni ʻoku totongi maʻamaʻá. |
|
Ngāueʻaki e ivi fakataú: Fakatau takai pe maʻu ha fakafuofua ki he mahuʻingá mei ha ngaahi maʻuʻanga tokoni kehekehe, aleaʻi ʻa e mahuʻingá ke maʻu e mahuʻinga maʻamaʻa taha ʻe lavá, pe fakatau lahi (bulk). Hangē ko ʻení, ne kole ʻe ha pisinisi ngaohi leta e fakafuofua ki he mahuʻingá mei ha ngaahi kautaha kehekehe te nau lava ke fakatau mai ki ai. |