Na iVola i Wentworth

Na iVola i Wentworth sai koya na itukutuku nei Parofita Josefa Simici me baleta na “nodra tauyavu mai, tubucake, vakacacani, kei na nodra vakabauta na Yalododonu Edaidai,” ka okati kina na itukutuku e vakatokai na Yavu ni Vakabauta.

Na Bula nei Josefa Simici

Me ikuri ni nona itutu vaka-Peresitedi ni Lotu, e a vuqa talega na ilesilesi nei Josefa Simici e Nauvoo. Ena Me ni 1842, a digitaki kina me Meya kei Nauvoo, ka sa kena ibalebale ni sa iliuliu ni turaganilewa ni Mataveilewai ni Vanua o Nauvoo. E a turaganivalu ka komada ni Mataivalu kei Nauvoo. Ia ena Feperueri ni 1842, e a taura na itutu ni edita ni Times and Seasons, na niusipepa vagauna ni Lotu, ka dau tabaki vakarua ena dua na vula. E sa vakarautaka na Times and Seasons e dua na sala vei ira na iliuliu ni Lotu me ra veitaratara kina vakavoleka kei ira na Yalododonu, tabaka vakaivola na ivakatakila kei na vunau bibi eso, ka wasea yani na itukutuku ni Lotu. E dua na lewe ni Kuoramu ni Le Tinikarua, o John Taylor, e a lesi me liutaka na cakacaka ni tabaivola ena nona veidusimaki na Parofita.

Ena imatai ni ilavelave ka a tabaki ni a se edita tiko, a vola kina na Parofita ni niusipepa vagauna oqo ena tabaki kina na veitukutuku e baleta na “veika ka bibi sa yaco vakavolivoliti keda tiko; na kena voqataki vakatotolo na ka dina; na vuqa ni cakacaka ni tauri itukutuku, ena veisiga, mai vei ira na daukaulotu era tiko mai vanua tani, ena vanua oqo, ka vakakina mai Igiladi, mai na vanua levu o Iurope, kei na veiyasai vuravura tale eso; na ituvaki voravora ni veimatanitu, na nodrtou ivola kei na vunau na Le Tinikarua; kei na ivakatakila kece ka sa soli tiko mai vei Koya sa Cecere Sara.”¹

Ni a taura tiko na itutu vakaedita na Parofita, e a tabaki tiko ena Times and Seasons na itukutuku e bibi sara. Na lewe ni ivola i Eparaama kei na rua na itukutuku vakatotolotaki a tabaki ena Maji ni 1842, kei na ikatolu ni itukutuku vakatotolotaki a tabaki ena vula o Me. E a tabaka talega na Parofita ena Maji na “History of Joseph Smith,” na itukutuku ka laki yaco e muri me History of the Church.

Na ilavelave ni Times and Seasons ena 1 ni Maji, 1842, a tabaka kina na Parofita na itukutuku ka sa laki vakatokai me iVola i Wentworth. Ena nona vakamacalataka na inaki ni nona tabaka na ivola oqo, e a kaya kina Parofita: “Ena kerekere nei Mr. John Wentworth, na Edita ka itaukei ni Chicago Democrat, au a vola kina na itukutuku vakaituvatuva ni nodra tauyavu mai, tubu cake, ka vakacacani, kei na nodra vakabauta na Yalododonu Edaidai, sa ka dokai kina vei au, ena veiliutaki ni Kalou, meu sa kena isevu. E kaya o Mr. Wentworth ni gadreva me solia na ivola tukutuku oqo kivei Mr. [George] Barstow, na nona itokani, o koya ka vola tiko na itukutuku makawa kei New Hampshire. Me vaka ga ni sa taurivaka o Mr. Barstow na ivakarau donu ni kena ciqomi na itukutuku dodonu vakaoqo, au a sa kerei koya ga, me, na tabaka taucoko na itukutuku, ka sega ni ukutaka, ka me kakua ni veivakacalai.”¹

E a qai sega ni okata o George Barstow na veika a vola na Parofita me baleta na kena itukutuku baleta ni gadreva walega me tabaka na itukutuku e kovuta na yabaki 1819 e tiko ena nona ivola.¹ Ia na iVola i Wentworth sa ka bibi dina sara kivei ira na Yalododonu Edaidai. Oqo na itukutuku dina taumada a vola o Josefa Simici ka vakadinadinataka tiko kina na veikacivi lagilagi ni Kalou ki vua, na nona raivotu, na nona cakacaka vakalotu kei na ivakavuvuli. E tukuni tale tiko kina na tauyavutaki kei na tubu cake ni Lotu kei na nodra vakararawataki na Yalododonu. E tiko talega kina na ivakaro raraba vakaparofita me baleta na rawa ka qaqa ni Lotu ena veisiga ni mataka e vuravura ena ruku ni nona veitaqomaki o Jiova sa Cecere Sara. E umani tale tikoga kina eso na itukutuku bibi e sega ni kune ena dua tale na ivola ni ivakavuvuli nei Parofita, ka oka kina na peleti koula kei na dua na ituvatuva ni lewe ni iVola i Momani. Sa ikoya talega oqo, na isevu ni gauna vei Josefa Simici me tabaka ga vakataki koya na itukutuku ni nona iMatai ni Raivotu.

Ena kena okati kina e 13 na ivakaro raraba ni vunau ni Lotu ka sa vakatokai tu oqo me Yavu ni Vakabauta, sa tu kina oqo me ivakadinadina kaukauwa ni nona sa kacivi vakalou o Parofita Josefa Simici.

iVakavuvuli nei Josefa Simici

Erau a rairai na Kalou na Tamana kei na Luvena o Jisu Karisito kivei Josefa Simici me isau ni nona masu.

“Au a sucu ena taoni o Sharon, mai na Yasana o Windsor e Vermont, ena ika 23 ni Tiseba, A. D. 1805. Niu sa yabaki tini, sa toki oi rau na noqu itubutubu ki Palmyra e Niu Ioka, ka keitou laki vakaitikotiko e kea ka volekata e va na yabaki, mai kea keitou a gole sara ki na taoni o Manchester. E a dauteitei o tamaqu ka vakavulica vei au na iwalewale ni qaravi iteitei. Niu sa volekata toka na yabaki tinikava, au sa dau tekivu vakasamataka na bibi ni bula vakavakarau ki na bula e tarava, kau sa dau vakataroga sara na veika e [baleta] na yavu ni veivakabulai, kau raica rawa na veisaqasaqa ni duidui ni vakabauta vakalotu; niu dau gole ki na dua na matalotu era na tukuna vei au e dua na yavu, mai na dua tale ki na kena e tarava; era sa dui dusimaka tikoga na nodra ivakavuvuli me sa kena ka dina duadua e uasivi. Niu sa kila ni sa sega ni rawa me ra dina kecega, ka sa sega ni vakavuna na Kalou me levu tu vakaoqo na veilecayaki, sa lomaqu sara meu vakasaqara vagumatua na iulutaga bibi oqo, kau vakabauta tiko ni kevaka e tiko na nona Lotu na Kalou ena sega ni tawase tu me vakaoqo, ni kevaka ena vakatavulica o Koya e dua na matatamata me ra lotu ena dua na kena ivakarau, ka veiqaravi ena dua na ituvatuva ni cakacakatabu vakalotu, ena sega ni laki vakavulica o Koya e dua tale na matatamata, e dua na ivakavuvuli ena veisaqasaqa ki na kena o ya.

“Ena noqu sa vakabauta tiko na vosa ni Kalou, au sa ququmi matua ki na vosa nei Jemesa—‘Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu vei ira kecega na tamata, a sa sega ni dauveivakadirideini; ka na solia ga vua.’ [Jemesa 1:5.] Au sa yaco sara ki na vanua vakatikitiki ki na loma ni veikau, kau laki cabora na noqu masu vua na Turaga; ena noqu sa masu vagumatua tiko, sa lako tani na noqu vakasama mai na veika era vakavolivoliti au tu, ka yaco meu sa solegi ena dua na raivotu vakalomalagi, kau sa raica e mataqu e rua na tamata sa ituvaki lagilagi, ka sa tautauvata na kedrau ituvaki kei na irairai, ka sa serauni rau wavoki tu na rarama sa ramase sara ka sa uasivia cake ena rarama ni matanisiga ena sigalevu tutu. Erau a qai tukuna vei au ni veimatalotu kece sara o ya era sa vakabauta tiko na ivakavuvuli cala, ka sega ni dua vei ira sa vakadonuya na Kalou me Nona Lotu kei na matanitu: ka sa vakamatatataki sara vei au ‘meu kakua ni vakamuri ira,’ kei na gauna vata talega o ya sa yalataki kina vei au ni taucoko ni Kosipeli ena vakatakilai vei au ena dua na ganua lekaleka mai muri.

Ena gauna makawa a volai taumada na iVola i Momani ena peleti koula ka laki solia vei Josefa Simici e dua na italai vakalomalagi.

“Ena yakavi bogi ni ika 21 ni Sepiteba, 1823, niu a masu tiko vua na Kalou, ka saga vagumatua tiko meu cokonaka na noqu vakabauta ena iyalayala taleitaki ni iVolanikalou, ni sa kabote yani ki na rumu e dua na rarama e vaka na siga, ia e savasava ka lagilagi cake; na imatai ni kena rairai sa vaka e sa kovuti tu na rumu ena dua na bukawaqa; na ituvaki oqo e vakarise kete kei na yago taucoko; ia ka sa tucake tu e mataqu e dua na tamata ka sa wavokiti koya tu na rarama lagilagi ka uasivia cake ena kena e vakavoliti au tu. Na italai oqo a qai vakaraitaka ni o koya e dua na agilosi ni Kalou, ka sa talai mai me kauta mai na itukutuku vinaka ni veiyalayalati ka a vakayacora na Kalou vata kei Isireli makawa ka sa tu oqo ka na yaco vakaidina, kei na cakacaka ni vakavakarau ni ikarua ni nona lesu mai na Mesaia, ka sa kena gauna donu oqo ki na taucoko ni Kosipeli me na kaburaki yani ena kaukauwa, kivei ira na veimatanitu kecega me ra vakarautaki kina e dua na kawatamata ki na bula veiliutaki ni Mileniumi. E a tukuni talega vei au niu sa digitaki meu iyaya ni cakacaka ena liga ni Kalou me vakayacori rawa kina eso na Nona inakinaki ena itabagauna lagilagi oqo.

“E a tukuni talega vei au na veika e baleti ira na itaukei dina ni vanua oqo ka vakatakilai talega kina vei au, kei na vanua era a tadu mai kina; kei na kedra itukutuku lekaleka ni nodra vanua taumada, itosotoso, tuvanaki ni kawa, na lawa, veika vakamatanitu, na nodra ivalavala dodonu kei na ivalavala ca, kei na kau tani vakadua mai vei ira ni ra sa tamata na veivakalougatataki ni Kalou, ni sa vakatakilai kina vei au; a tukuni talega vei au na vanua e buluti tiko kina eso na peleti ka ra sa ceuti tu kina na ivakaleka ni kedra itukutuku na Parofita makawa era a bula voli ena vanua levu oqo. E a sikovi au mai vakatolu na agilosi oqo ena bogi tikoga o ya me mai vakadeitaka tikoga vei au na itukutuku vata ga o ya. Ena noqu a sikovi vakavica mai vei ira na agilosi ni Kalou ka ra mai tukuna na veika qaqa ka lagilagi ena yaco tiko ena iotioti ni gauna oqo, ia ena mataka ni ika 22 ni Sepiteba, A.D. 1827, a qai solia vei au e ligaqu na agilosi na itukutuku o ya.

“Na itukutuku oqo era a ceuti tu e na peleti e koula na kena irairai; na peleti yadua oqo era ono na idi na kedra raba ka walu na idi na kedra balavu, ka sega sara ni ra vavaku me vaka na kava e dau vakayagataki raraba. Era sa ceuti tu kina na veimataqali vosa, ena matanivola vaka-Ijipita, ka ra sa veicevacevai tu me vaka na draunipepa ni dua na ivola, ka tolu toka na kena rigi e curumaki tu kina. Na peleti oqo e volekata toka na ono na idi na kena vavaku, ka dua na tikina e dregati tu. Na veivolavolai ka ra tu ena tikina ka dregati tu e ka lailai, ka ceuti sara tu vakatotoka. Na ivola oqo e caka maqosa tu kina e vuqa na cakacaka ni liga ni gauna makawa, ka ra duatani sara na ituvaki ni kena iceuceu. Era a kune vata kei na ivolatukutuku oqo e dua na iyaya ni cakacaka e veivakurabuitaki, ka vakatokai ena gauna e liu me ‘Urimi kei na Camimi’ o ya e rua na vatu makare erau qasoti vata kei na dua na iqaso e taubeni e sereda. Mai na veivuke ni Urimi kei na Camimi au sa vakadewataka rawa kina na itukutuku oqo ena kaukauwa ni Kalou.

“… Na ivola oqo … e tukuna vei keda ni a rairai talega na iVakabula ki na vanua oqo ni oti na Nona tucaketale; ka a mai vakatikora eke na kosipeli ena kena e taucoko, savasava, kei na kena kaukauwa, kei na veivakalougatataki; ka tu vata kei na kena iApositolo, Parofita, iTalatala, iVakavuvuli, kei na Dauvunau, na kena ituvatuva vata ga, na matabete vata ga o ya, na cakacakatabu vakalotu vata ga o ya, isolisoli, kaukauwa, ka a taurivaki voli mai na vanua ena tokalau; ka ra a muduki tani kina na kena tamata ena vuku ni nodra ivalavala ca; ni a vakaroti ki na iotioti ni nodra parofita era a bula vata voli me na vola vakalekaleka na veika sa parofisaitaki, itukutuku kei na veika tale eso e baleti ira ka qai buluta e loma ni qele, ka me na qai kau cake mai me na qai semati vata kei na iVolatabu me vakayacori kina na inakinaki ni Kalou ena iotioti ni siga oqo. Ena kedra itukutuku vakaoqo au na raica ga na iVola i Momani, ka rawa me na voli mai Nauvoo, se mai na dua vei ira na Daukaulotu Wavoki.

“Ena gauna ga sa rogovaki yani kina na itukutuku ni veika sa kunei oqo, sa vaka e vukataki yani ena taba ni cagi na kena vakalasui, itukutuku cala kei na veivakacacani, ki na veivanua kecega; ka sa tekivu me vakacacani na itikotiko mai vei ira na ilawalawa butobuto ka inaki ca. E vuqa na gauna au a lauvana, kau kalougata niu dro bula rawa, ka sa yaco na buki vere kecega me kau laivi kina mai vei au na peleti oqo; ia a vukei au na kaukauwa kei na veivakalougatataki ni Kalou, ka so era sa vakabauta na noqu ivakadinadina.

E dina ga ni na vorati na Lotu ena veivakacacani, ia ena sega ni dua na ka me na tarova rawa na toso ni dina.

“Ena ika 6 ni Epereli, 1830, na ‘Lotu i Jisu Karisito ni Yalododonu Edaidai’ a tauyavutaki ena imatai ni gauna ena taoni o Fayette mai na yasana o Seneca, ena vanua o Niu Ioka. Eso era a kacivi ka tabaki ivakatakila kei na parofisai ni Yalotabu, ka ra tekivu me ra vunau ena veivakauqeti ni Yalotabu, e dina ga ni ra malumalumu, ia era a vaqaqacotaki ena kaukauwa ni Kalou, ka vuqa era a veivutuni mai, era tabadromuci ena wai, ka ra vakasinaiti ena Yalo Tabu ena veitabaki ni liga. Era raica na raivotu eso ka ra parofisai, era vakasavi tani na tevoro, ka ra vakabulai na tauvimate ena veitabaki ni liga. Mai na gauna o ya sa toso yani ki liu na cakacaka oqo ena kena totolo e veivakurabuitaki, ka ra sa tekivu tauyavu na veitabanilotu ena veivanua e Niu Ioka, Pennsylvania, Ohio, Indiana, Illinois, kei Missouri; ena iotitoi ni vanua o ya a tauyavutaki kina e dua na mataitikotiko levu mai na yasana o Jackson: sa lewelevu era sa lewena na Lotu ka ra sa tubu cake tikoga vakatotolo; keimami sa tekivu volia vakalevu na qele, sa teivaki vakalevu na neimami qele, ka sa yaco na sautu kei na tiko marau ena neimami itikotiko, ka vakakina ena vanua raraba; ia me vaka ga ni keimami sega ni rawa ni veimaliwai vakavoleka kei ira oqo (ka vuqa vei ira era tamata butobuto, ka ra a dro mai na itikotiko vinaka, ki na iyalayala ni vanua ni ra drotaka mai na liga ni lawa), ka ra marau ena bogi taucoko, sega ni rokova na Siga ni Vakacecegu, veitau ose kei na veimau ilavo; era a tekivu toka ena veivakacudrui, ka laki veivakacacani sara, ka yacova sara me ra laki dua na ilawalawa vakatani ka vakama na veivale, era boroya ena kuluta kei na vuti ni manumanu ka vakanakuitataka e vuqa vei ira na neimami tagane lewenilotu, ka sa laki tini sara me ra voroka kina na lawa, na dodonu kei na bula ni tamata, ka ra vakatalai ira tani mai na nodra itikotiko; ka yaco me sa sega na nodra vale o ira oqo ka sega na nodra itikotiko ka ra sa laki tu ena bucabuca veico liwa lala ka ra sa mamavoavoa sara kina na gone ena buca veico oqo. Na veika oqo a yaco ena vula o Noveba, ka sa sega tale ni dua na ka me vakarurugi ira ia na delavuvu ga ni lomalagi, ka sa donumaka tu na draki ca batabata ni yabaki; na veivakacacani oqo a vakawalena tu ga na matanitu, ka dina ga ni keimami se taukena tu vakalawa na neimami qele, ka keimami sega ni voroka na lawa, keimami a sega ga ni vukei mai.

“Era lewevuqa sara era a tauvimate tu, era a vakatalai tani vakaukauwa mai na nodra veivale, ka ra vosota rarawa na veivakacacani kece oqo ka ra laki vakasaqara na veivale me ra laki tiko rawa kina. Sa kena itinitini vei ira e vuqa sa kau tani mai vei ira na nodra ituvaki ni bula marau vakaoqo, kei na kena vakavinakataki, me ra mate sara; ka vuqa na gone era sa luveniyali, era sa [laki yaco] me ra yada na marama, ka ra sa dawai na tagane vakawati; era sa taura vakaukauwa na neimami iteitei o ira na ilawalawa ca, era sa tauri talega e udolu na bulumakau, na sipi, ose kei na vuaka susu, ka ra vakacacani, tauri vakaukauwa se vakarusai na neimami iyaya ni vale, kakana maroroi, kei na vale kei na misini ni tabaivola.

“E vuqa vei ira na neimami tagane lewenilotu era sa laki vakaitikotiko tale ki na yasana o Clay, me yacova sara na 1836, ka sega na veivakacacani ekea me tolu na yabaki, ia sa yaco tiko na veivakarerei ni veivakacacani. Ni qai yaco mai na vulaikatakata ni 1836 sa vuki na veivakarerei oqo me vaka me sa ka dina mai, mai na veivakarerei oqo, sa kacivi kina na bose raraba, sa vakadonui kina na veika me vakayacori, sa na yaco dina na veiravuravuti kei na veivakarusai, ka sa ituvaki vakarerevaki na veika kecega; sa na vanua vinaka na yasana o Jackson me tekivu kina, ka ratou a sega ni via oka kina na veiliutaki ni matanitu e kea sa ratou kaya talega na [iliuliu vakamatanitu ena yasana o Clay] me ratou kakua ni oka kina; ka keimami raica ni dina na veika oqo ena kena a kau cake yani vei iratou na liuliu oqo, e a qai kau tani na veika ni bula ka vakayali na veika taukeni, keimami sa vakatalai tani tale mai na neimami itikotiko.

“Keimami a vakaitikotiko tarava sara ena yasana e rua o Caldwell kei Daviess, ka keimami vakatikora kina na veitikotiko lelevu ka vakaitamera, ka nanuma tiko me keimami sa sereki mai na kaukauwa ni veivakacacani, mai na neimami vakaitikotiko ena veiyasana vou vakaoqo, ka lewe vica ga era a toka taumada mai kina; ia eke keimami a qai sega ni kunea kina na bula vakacegu, ni yabaki 1838 keimami a ravuti tale mai vei ira na ilawalawa ca, ka ni sa solia mai e dua na ivakaro ni veivakamatei o Kovana Boggs, ka sa vakadonui vakalawa, ka sa tauyavutaki kina e dua na veiravuravuti ena loma ni vanua taucoko, ka ra tekivu me ra butakoca na neimami bulumakau, sipi, vuaka susu, kei na so tale, e vuqa vei keimami a vakamatei vakatawadodonu, era a vakaveitaliataki na neimami marama, ka keimami sa solia ga vakasaurara na neimami iyau taukeni ni keimami vakarerei ena iselewau; mai na neimami vosota na veika tawadodonu kecega e a rawa ni keimami qaqauraki kina mai na dua na ilawalawa ni veivakacacani butobuto ka veivakalolomataki, kivei keimami e lewe tinikarua ki na tinikalima na udolu na tamata, na tagane, yalewa, kei na gone, a vakatalai tani mai na nodra dui itikotiko ni bula, mai na qele era taukena tu vakalawa, sa sega oqo na vale, sega na veitokani, sa sega na itikotiko (ena loma donu ni vulaibatabata) ka lako tawamacala tu ena veivanua, se laki vakasaqara yani me laki taqomki toka ena dua na itikotiko e veivakabulai, ka ra sega ni tiko kina na tamata ca sara vaka o ya. E vuqa era a tauvimate ka mate sara ena vuku ni draki batabata kei na rarawa era a vosota tu mai; ka vuqa na marama vakawati era sa yada, ka ra sa [biu tu] vakaluveniyali na gone, ka sa sega me qaravi ira. Ena taura e levu na gauna mai na kena e soli vei au meu na vakamacalataka kece na veivakaduiduitaki, veika tawa dodonu, veivakamatei, na vakadavedra, na butako, na rarawa kei na vutugu e a vakayacora na yasana ivalavala vakatani, veivakalolomataki, o Missouri, kei na kena e voroka na lawa.

“Ni bera ni yaco tale na veika oqo, keimami a yaco sara yani ki na yasana o Illinois ena 1839, ka raica ni ra tamata veikauwaitaki ka dua na itikotiko vinaka: era tamata gugumatua ena vakamuria na lawa kei na veilomani. Keimami sa tekivu tara e dua na siti o ‘Nauvoo,’ ena yasana o Hancock. E ono ki na walu na udolu na keimami iwiliwili e kea, sega ni wili kina na iwiliwili levu era tiko ena veiyasana toka veitikivi, kei na so tale na yasana ni vanua o ya. Sa mai vakalawataki na neimami siti, ka tuvanaki e dua na Mataivalu, ka ra sa lewena e 1,500. Sa tuvanaki talega e dua na Univesiti, ni dua na iLawalawa ni iTeitei kei na Buli iYaya, ka keimami sa vakarautaka ga na neimami lawa kei ira me ra veiqaravi kina, ka taukena na dodonu era sa bula voli tiko kina na lewenivanua tale eso era tu galala ka bula vinaka tu.

“Na veivakacacani sa sega ni tarova rawa na cakacaka ni dina, ia e sa kai waqaca ga vakalevu na kena yameyame, ka sa totolo sara na kena tete yani. Mai na nodra sa vakalagilagia na veika era sa rawata rawa, ka keimami sa kila ni sa dodonu, ni sa dina na veika era vakayavutaka, ena loma ni veivakacacani kei na veisaqasaqa, era sa gu yani ki liu na Qase ni Lotu oqo, ka laki vakatikora yani na Kosipeli ki na volekata na yasana kece e na Vanua Raraba; sa curuma yani na neimami veisiti, sa teteva yani na neimami veikorokoro, ka sa yaco me ra vakabauta na kena ituvatuva vakalou o ira na udolu na lewenivanua vuku, dokai, kei ira na tutaka na vanua, ka ra sa vakarurugi ena kena dina sa vakalou. Sa tete sara yani ki Igiladi, Ireland, Sikoteladi, kei Welesi, ka ra vakau e kea, ena yabaki 1840, e vica na neimami daukalotu, ka sivia e lima na udolu era a lewena na iVakarau ni Dina; era sa curuvou tiko e lewe levu mai na veivanua kece sara.

“Era sa vakau yani na noda daukaulotu ki na duidui veimatanitu, ka vakakina e Jamani, Palesitaina, New Holland [Ositerelia], o East Indies, kei na veivanua tale eso, sa tauyavutaki na iVakarau ni Dina; sa sega ni rawa ki na dua na liga butobuto me tarova rawa na toso ni kena cakacaka; ena yaco na veivakacacani, era na veiravuti na ilawalawa ca, era na tuvaivalu na mataivalu, ena yaco na veivakacacani, ia ena toso ga vakaikoya ki liu ena qaqa na dina ni Kalou, ena dokai, me yacova ni sa curuma na veivanua lelevu kecega, ena veitikotiko yadua, drodrova yani na veimatanitu kecega, ka voqataki ki na daliga yadua, me yacova ni sa yaco kece na inaki ni Kalou, ka na kaya kina o Jiova sa Cecere ni sa vakacavari na cakacaka.

Na Yavu ni Vakabauta e vakamacalataka na vunau kei na ivakavuvuli bibi ni noda lotu.

“Keimami vakabauta na Kalou na Tamada Tawamudu, kei na Luvena ko Jisu Karisito, kei na Yalo Tabu.

“Keimami vakabauta ni na cudruvi na tamata ena vuku ga ni nona ivalavala ca, ka segai ena caka cala walega nei Atama.

“Keimami vakabauta ni na vakabulai na tamata kecega ena isoro nei Jisu Karisito, kevaka eda sa muria na ivunau kei na ivakavuvuli ni itukutuku vinaka.

“Keimami vakabauta ni sa yavu ni ivakavuvuli ni itukutuku vinaka na: ai matai: Mo vakabauta na Turaga ko Jisu Karisito; ai karua: Na veivutuni; ai katolu: Na papitaiso ena tabadromuci e wai me bokoci kina na ivalavala ca; ai kava: Na isolisoli ni Yalo Tabu ena veitabaki ni liga.

“Keimami vakabauta ni sa kilikili me lesia na tamata na Kalou ena parofisai, kei na veitabaki ni liga, me solia kina vua na kaukauwa me vunautaka na i tukutuku vinaka ka vakayacora na veicakacakatabu vakalotu.

“Keimami vakabauta na ivakarau e taurivaki tu e na Lotu Taumada, ka ra a vakaitavi kina na iapositolo, na parofita, na italatala, na ivakavuvuli, na dauvunau, kei na vakailesilesi vakalotu tale e so.

“Keimami vakabauta na isolisoli ni vosataka na vosa tani eso, na parofisai, na ivakatakila, na raivotu, na veivakabulai, na vakadewataki ni vosa kei na veika vakaoqori.

“Keimami vakabauta ni sa vosa ni Kalou na iVolatabu, kevaka sa vakadewataki vakadodonu; keimami vakabauta talega ni sa vosa ni Kalou na iVola i Momani.

“Keimami vakabauta na veika sa vakatakila oti na Kalou, na veika sa vakatakilai mai oqo, ka keimami vakabauta ni na levu tale na veika ena qai vakatakilai mai me baleta tikoga na matanitu ni Kalou.

“Keimami vakabauta ni ra na vakasoqoni vata tale na Isireli, kei na nodra vakalesui mai na Yavusa e Tini; ia ni na tara ko Saioni (Jerusalemi Vou) ena vanua ko Amerika; ni na mai veiliutaki sara ga e vuravura na Karisito; ka na vakavoui na vuravura oqo me na vaka sara na lagilagi kei parataisi.

“Keimami vakabauta ni dodonu me soli na galala me da dui qarava kina na Kalou Kaukauwa me vaka na dodonu ni tamata yadua; ia me soli ena galala oqori me dui lewa kina na ivakarau ni nodra lotu, na vanua me ra sokalou kina kei na kalou me ra lotu vua.

“Keimami vakabauta ni sa kilikili me da vakarorogo vei ira na tui, na peresitedi, na iliuliu kei ira na turaganilewa; io me da rokova ka muria na lawa.

“Keimami vakabauta ni sa kilikili me da yalododonu, yalodina, talairawarawa, lomasoli, ivalavala savasava, ka da caka vinaka vei ira na tamata kecega. Sa rawa ni tukuni ni keimami sa muria na vunau nei Paula, Keimami sa vakabauta na ka kecega, keimami vakanuinuitaka na ka kecega; keimami sa vosota oti na ka e vuqa, ka keimami nuitaka ni na rawa me keimami vosota na ka kecega. A ka kecega e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori. [Raica na Yavu ni Vakabauta 1:1–13.]

“Ena Veidokai, kei na veika tale eso,

“JOSEFA SIMICI.”⁴

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase ni ivola oqo se ni ko vakavakarau mo veivakavulici. Raica na tabana e vii–xii, me ikuri ni veivuke.

A vola o Josefa Simici na iVola i Wentworth me rogoci kina na nodrau kerekere o John Wentworth kei George Barstow (tabana e 501). Era sa taroga beka vei iko na tamata na itukutuku yavu se vakabauta ni Lotu oqo? Ni ko vulica se veivosakitaka na iwase oqo, mo vakasamataka tiko na veika mo na sauma ena vuku ni vakatataro ena yaco mai. Na cava e rawa ni da vulica mai na vosa nei Josefa Simici e volai tiko ena iVola i Wentworth me baleta na iwalewale ni kena dau saumi na veitaro vakaoqori?
Wilika na veika e tukuna na Parofita me baleta na iMatai ni Nona Raivotu (tabana e 504). Na gauna e tarava o na tukuna tale kina vua e dua na tamata na iMatai ni Raivotu, o na vukea vakacava na tamata o ya me na kila vakavinaka kina na iMatai ni Raivotu kei na kena ibalebale vei iko?
Wilika na nona ivakamacala na Parofita me baleta na kena tadu mai na iVola i Momani (tabana e 505–07). Na veisau cava sa vakayacora ki na nomu bula na iVola i Momani? Na sala cava eso e rawa ni da wasea kina na noda ivakadinadina me baleta na iVola i Momani?
Ena tabana e 507–11, e vakamacalataka kina o Josaefa Simici e dua na itukutuku lekaleka ni itekitekivu ni Lotu ka qai vakadinadinataka kina na icavacava ni inaki ni Lotu. Na cava na nomu nanuma ni ko vulica taucoko na ikarua ni parakaravu ena tabana e 512? Na cava o nanuma kina ni sa sega ni rawa ki na veivakacacani me na tarova rawa na toso ni Lotu? Na cava eso na ivakaraitaki ni tamata era sa toso cake tikoga veitalia ga na veivakacacani e yaco tiko? (Mo raica eso na ivakaraitaki ena ivolanikalou, iTukutuku Makawa ni Lotu, vata kei na nomu bula o iko.)
Raica lesu na Yavu ni Vakabauta (tabana e 512–13). Ena sala cava eso sa vukei iko kina na Yavu ni Vakabauta? Na cava o nanuma na vuna era kerei kina na gone ena Lalai me ra wiligusutaka na Yavu ni Vakabauta? Sa rawa mo tuvanaka e dua na gauna mo na vulica se wiligusutaka kina na Yavu ni Vakabauta.

iVolanikalou Veisemati: Josefa Simici—Ai Tukutuku 1:1–75

Prophet Joseph writing — “Ena kerekere nei Mr John Wentforth. … au a vola kina na itukutuku vakaituvatuva ni nodra tauyavu mai, tubu cake, vakacacani, kei na nodra vakabauta na Yalododonu Edaidai, ka sa ka dokai vei au, ena veiliutaki ni Kalou meu a kena isevu.”

Joseph receiving gold plates — “Ena mataka ni ika 22 ni Sepiteba, A. D. 1827, e a solia vei au na agilosi e ligaqu na peleti itukutuku.”