Nodra iVakavuvuli na Peresitedi ni Lotu
iVakaleleka ni iTukutuku Makawa

iVakaleleka ni iTukutuku Makawa

Na itukutuku tuvani oqo e vakarautaka e dua na ivakaleka ni itukutuku makawa me baleta na ivakavuvuli nei Parofita Josefa Simici sa vakarautaki tu ena ivola oqo.

1805, 23 ni Tiseba:

Sucu e Sharon, Windsor County, Vermont, na ika lima ni tinikadua na gone ena matavuvale nei Josefa Simici Levu (Sr.) kei Lucy Mack Simici.

Rauta na (ca.) 1813: (yabaki 7)

Tauvi koya na taivoti; ena vuku ni mate a sele kina na yavana imawi. Ena gauna oqo, eratou vakaitikotiko na matavuvale na Simici ena Ra kei Lepanoni e New Hampshire, e dua vei ira na vanua eratou a toki kina na matavuvale ena loma ni 1808 kei na 1816 ni ratou vakasaqara tiko na gauna donu ni cakacaka.

1816: (yabaki 10)

Toki kei na nona matavuvale ki na koro o Palmyra, Niu Ioka.

Rauta na 1818–19: (yabaki 12 se 13)

Toki kei na nona matavuvale mai na koro o Palmyra ki na dua na vale kau ena itikotiko vakavalagi e Palmyra, Niu Ioka.

1820, tekivu ni vula itubutubu: (yabaki 14)

Masu ena loma ni veikau e volekata ga na nona vale. Rairai mai vua na Kalou na Tamana kei Jisu Karisito. E a taroga na lotu cava me lewena. A tukuna vua na iVakabula ni lotu kece o ya era cala ka me kakua ni lewena e dua vei ira.

1823, 21–22: ni Sepiteba: (yabaki 17)

Sikovi mai vei Moronai, ka tukuna vua na cakacaka ni Turaga ena vuravura oqo ena iotioti ni gauna kei na iVola i Momani. A raica rawa na peleti koula, e a bulu tu ena dua na delana e voleka ga e kea, ia e a sega ni vakatarai me taura.

1825: (yabaki 19)

Toki kei na nona matavuvale mai na vale kau o ya ki na dua na vale vou vakaferemi ena nodratou qele mai na itikotiko vakavalagi mai Manchester e Niu Ioka.

1827, 18 ni Janueri: (yabaki 21)

Vakamautaki Ema Hale na marama ni Harmony, Pennsylvania; erau vakamau mai South Bainbridge e Niu Ioka.

1827, 22 ni Sepiteba:

Taura na peleti mai vei Moronai, ni oti na nodrau sota kei Moronai ena ika 22 ni Sepiteba ni veiyabaki vakatekivu mai na 1823.

1827, Tiseba: (yabaki 22)

Toki ki Harmony e Pennsylvania, ni dro tani mai vei ira na ilawalawa ca e Palmyra kei Manchester ka ra saga me ra butakoca na peleti. Ni oti ga o ya, sa tekivu vakadewataka na iVola i Momani.

1828, Feperueri:

Vakaraitaka o Martin Harris eso na yaca ni tamata mai na peleti koula kivei ira eso na tamata vuku, okati kina o Charles Anthon kei Samuel L. Mitchill ena Siti o Niu Ioka.

1828, June–Julai:

Yali tawa macala mai vei Martin Harris e 116 na draunipepa vakadewataki ni iVola i Momani.

1829, 5 ni Epereli: (yabaki 23)

Tadu yani ki Harmony o Oliver Cowdery me laki vunivola ni iVola i Momani; tekivutaki tale na vakavakadewa ena ika 7 ni Epereli.

1829, 15 ni Me:

Ciqoma vata kei Oliver Cowdery na Matabete i Eroni mai vei Joni na Dauveipapitaiso. Erau a qai veipapitaisotaki vakairau o Josefa kei Oliver ena Uciwai na Susquehanna.

1829, Me–June:

Ciqoma vata kei Oliver Cowdery na Matabete i Melikiseteki mai vei iratou na iApositolo taumada o Pita, Jemesa, kei Joni volekata na Uciwai na Susquehanna ena tadrua kei Harmony e Pennsylvania, vata kei Colesville e Niu Ioka.

1829, June:

Vakacavara na vakadewataki ni iVola i Momani ena qele nei Peter Whitmer Levu (Sr.) mai na itikotiko vakavalagi o Fayette e Niu Ioka. Eratou sa raica na Tolu na iVakadinadina na peleti kei na agilosi o Moronai e Fayette; ka ratou raica ka tara na peleti o iratou na lewe Walu na iVakadinadina ena itikotiko vakavalagi o Palmyra.

1830, 26 ni Maji: (yabaki 24)

Vakatakilaitaki na imatai ni ilavelave eso ni iVola i Momani vei ira na lewenivanua ena sitoa ni ivola nei E. B. Grandin e Palmyra.

1830, 6 ni Epereli:

Tauyavutaka na Lotu ena vale nei Peter Whitmer Levu (Sr.) e Fayette (raica V&V 20:1). Taumada sa isevu ni yaca ni Lotu na Lotu i Karisito. Ena ika 3 ni Me, 1834, sa veisautaki na yacana me Na Lotu ni Yalododonu Edaidai. Ena ika 26 ni Epereli, 1838, ena ivakatakila sa veisautaki na yacana me Na Lotu i Jisu Karisito ni Yalododonu Edaidai (raica V&V 115:4).

1830, June:

Ena ivakaro ni Turaga, sa tekivutaka na vakadewataki vakalou na iVolatabu, ka sa kilai tu oqo me iVakadewa ni iVolatabu nei Josefa Simici.

1830, 9 ni June:

Vakayacora na imatai ni koniferedi ni Lotu e Fayette.

1830, Sepiteba:

Toki mai Harmony, Pennsylvania, ki Fayette, Niu Ioka. Ena maliwa ni Tiseba 1827 kei na gauna vata oqo, erau a vakaitikotiko kina ko Josefa kei Ema e Harmony, ia e dau veilakoyaki vagauna ki Manchester, Fayette, kei Palmyra ko Josefa me laki cakacaka ena veika me baleta na vakadewataki ni iVola i Momani, ka vakarautaka na tabaki ni iVola i Momani, tauyavutaki ni Lotu, dabe vakatulewa ena imatai ni koniferedi ni Lotu, ka tiko talega ena veitavi vaka-Lotu tale eso.

1830, Sepiteba:

Ciqoma e dua na ivakatakila me ra “lako vei ira na Leimami” o ira na daukaulotu me ra laki vunautaka na kosipeli (V&V 28:8; raica talega 30:5–6; 32:1–3). Ena Okotova eratou a biubiu e va na italatala qase ki na ilesilesi me ratou laki veivakavulici ki na vanua ni kai Idia damudamu ena ra ni vanua o Missouri.

1830, Tiseba: (yabaki 25)

Ciqoma e dua na ivakatakila me ra laki soqoni na Yalododonu ki Ohio (raica V&V 37).

1831, itekivu ni Feperueri:

E sa lakova oti mai e 250 na maile mai Niu Ioka ka yaco yani ki Kirtland e Ohio.

1831, 20 ni Julai:

E Independence, Jackson County e Missouri, e ciqoma kina e dua na ivakatakila ka sa vakatakilai kina o Independence me “loma donu” kei Saioni (raica V&V 57:1–3).

1831, 2 ni Okosita:

Dabe vakatulewa ena gauna e vakatabuya kina o Sidney Rigdon na vanua o Jackson County, Missouri me vanua kei Saioni.

1831, 3 ni Okosita:

Vakatabuya na qele ni valetabu e Independence.

1832, 25 ni Janueri: (yabaki 26)

Tokoni me Peresitedi ni Matabete Cecere e Amherst, Ohio.

1832, 8 ni Maji:

Tauyavutaka na Mataveiliutaki Taumada ka rau daunivakasala o Sidney Rigdon kei Jesse Gause e Kirtland. Ena ika 18 ni Maji, 1833 sa sosomitaki Jesse Gause o Frederick G. Williams.

1832, 27–28 ni Tiseba: (yabaki 27)

Ciqoma e dua na ivakaro me tara e dua na valetabu e Kirtland (raica V&V 88:119–20).

1833, Janueri:

Tekivutaka na Koronivuli ni Parofita.

1833, 2 ni Julai:

Vakacavara na nona cakacaka taumada ni vakadewataki vakalou na iVolatabu, ka sa kilai tu oqo me iVakadewa ni iVola Tabu nei Josefa Simici. Mai na cakacaka oqo a tadu mai kina na ivola i Mosese kei Josefa Simici—Maciu, ka sa lewe tu oqo ni Mataniciva Talei.

1833, 20 ni Julai:

Era vakarusa na ilawalawa ca na vale ni tabaivola e Independence, Missouri, ka tabaki tiko kina na iVola ni Vunau, ka vakakina e levu sara draunipepa sa tabaki oti. Na ivakatakila mai na iVola ni Vunau ka vakatalega kina na veivakatakila tale eso, a tabaki mai Kirtland me imatai ni ilavelave ni Vunau kei na Veiyalayalati ena Sepiteba ni 1835.

1833, 23 ni Julai:

Sa vakaduri na vatuivakadei ni valetabu e Kirtland.

1833, 18 ni Tiseba:

Sa tabaki o Josefa Simici Levu (Sr.) me Peteriaki ki na Lotu.

1834, Me–Julai: (yabaki 28)

Liutaka na iLawalawa mai Saioni e Kirtland, Ohio, ki Clay County e Missouri, me ra kauta yani na veivukei vei ira na Yalododonu ka ra sa vakasavi tani mai na nodra veivale e Jackson County, Missouri. Lesu ki Kirtland ni ciqoma oti e dua na ivakatakila ni sa dodonu vei ira na yalododonu “me ra waraka vakalailai tale mada na noqu tamata na vakabulai kei Saioni” (V&V 105:9).

1835, 14 ni Feperueri: (yabaki 29)

Tauyavutaka na Kuoramu ni iApositolo Le Tinikarua.

1835, 28 ni Feperueri:

Tauyavutaka e dua na Kuoramu ni Vitusagavulu.

1835, Julai:

Taura rawa o koya na pepari ni Ijipita ka volai tu kina na veika a vola tu ko Eparaama.

1836, 27 ni Maji: (yabaki 30)

Vakatabuya na Valetabu e Kirtland (raica V&V 109).

1836, 3 ni Epereli:

Rairai o Jisu Karisito vei Josefa Simici kei Oliver Cowdery ena Valetabu e Kirtland ka sa vakadonuya na valetabu. Eratou a rairai talega mai o Mosese, Ilaisa kei Ilaija ka vakatikora na idola ni matabete vei Josefa kei Oliver. (Raica V&V 110.)

1837, June: (yabaki 31)

Vakauti ira na italatala qase mai Kirtland kei na Colo kei Kenada (Upper Canada) me ra laki veiqaravi vakadaukaulotu e Igiladi, na imatai ni kaulotu ena taudaku ni Vualiku kei Amerika.

1838, 12 ni Janueri: (yabaki 32)

Biuti Kirtland ka lako ki Far West, Missouri, ni drotaka na nodra vakacaca na ilawalawa ca.

1838, 14 ni Maji:

Yaco yani e Far West ka tauyavutaka e kea na itikotiko liu ni Lotu.

1838, 27 ni Epereli:

Tauyavutaka na kena volai na kena tukutuku, tabaki vakaituvatuva me “iVolatukutuku kei Josefa Simici” ena itekitekivu ni gauna eso ni Lotu ena 1842; ka qai tabaki e muri me History of the Church.

1838, 27 ni Okotova:

Solia o Lilburn W. Boggs na kovana kei Missouri na “iVakaro ni Kawaboko” vakatani. Na ivakaro oqo kei na veivakamatei a vakavuna me ra biuti Missouri na Yalododonu ka lako ki Illionois ena vula ibatabata kei na vula itubutubu ni 1838–39.

1838, 1 ni Tiseba:

Tiko vakavesu e Liberty, Missouri vata kei ira tale eso na iliuliu ni Lotu.

1839, 20 ni Maji: (yabaki 33)

Mai na Valeniveivesu na Liberty, a vola mai kina e dua na ivakaro vei ira na Yalododonu, e vica na kena iwase sa volai tu oqo ena Vunau kei na Veiyalayalati 121, 122, kei na 123.

1839, veimama ni Epereli:

Ena nona tokitaki mai Gallatin ki Columbia, Missouri me baleta e dua na veisau, era a vakalaivi koya na yadra me dro.

1839, 22 ni Epereli:

Duavata tale kei na nona matavuvale e Quincy, Illinois.

1839, 10 ni Me:

Toki kei na nona matavuvale ki na dua na vale kau lailai e Commerce, Illinois. E muri a qai vakatoka na korolevu o ya me o Nauvoo.

1839, 29 ni Noveba:

Laki raici Martin Van Buren, na peresitedi kei Amerika e Washington, D.C., me kerea na veivakameautaki ki na vakacaca e Missouri. Mai kea, a kerea talega ki na Matanitu Veiliutaki e Amerika na veivuke.

1840, 15 ni Okosita: (yabaki 34)

A vakatakila raraba na ivakavuvuli ni nodra papitaisotaki na mate ena dua na veibulu e Nauvoo. E vakayacori na isevu ni nodra papitaisotaki na mate ena Uciwai na Mississippi kei na veidreke ni wai e kea.

1840, Sepiteba:

Ena dua na nodratou vosa ki na Lotu na Mataveiliutaki Taumada, a vakaraitaka kina ni sa kena gauna me sa tekivu tara e dua na valetabu e Nauvoo.

1841, 4 ni Feperueri: (yabaki 35)

Digitaki me iliuliu levu vakaivalu (Lt-Gen) ni Nauvoo Legion sa tauyavutaki vou, e dua na tabana ni mataivalu ni vanua o Illinois.

1841, 6 ni Epereli:

Sa vakatikori na vatuivakadei ni Valetabu e Nauvoo.

1841, 21 ni Noveba:

Na isevu ni nodra papitaisotaki na mate ena Valetabu e Nauvoo e a vakayacori ena dua na tobu kau ka a tara ka vakatabui ni bera ni vakacavari taucoko na valetabu.

1842, Feperueri–Okotova: (yabaki 36)

Cakacaka vaka-edita ni Times and Seasons, na niusipepa tabaki vagauna ni Lotu e Nauvoo.

1842, 1 ni Maji:

Tabaka na iVola nei Wentworth ena Times and Seasons; ena Maji kei na Me a tabaka talega na ivola i Eparaama ena Times and Seasons.

1842, 17 ni Maji:

Tauyavutaka na iSoqosoqo ni Veivukei ni Marama e Nauvoo, ka kena peresitedi o Ema Simici.

1842, 4 ni Maji:

Qarava na isevu ni cakacakatabu vakalotu ni edaumeni ena dua na rumu e cake ena nona Sitoa Vatu Damudamu.

1842, 19 ni Me:

Digitaki me turaganikoro (mayor)kei Nauvoo.

1843, 12 ni Julai: (yabaki 37)

Vola e dua na ivakatakila ena veiyalayalati vou ka tawamudu, okati kina na inaki tawamudu ni veiyalayalati ni vakamau (raica V&V 132).

1844, 29 ni Janueri: (yabaki 38)

Vakaraitaka ni sa na tu tiko ki na itutu ni peresitedi kei Amerika.

1844, Maji:

Ena dua na bose vata kei iratou na iApositolo Le Tinikarua kei na so tale, ka lesi iratou na Le Tinikarua me ratou liutaka na Lotu ena gauna e mate kina, ka vakamacalataka ni sa vakatikora vei iratou na cakacaka tabu vakalotu, lewa, kei na idola kece sara me ratou vakayacora vakakina.

1844, 27 ni June:

Vakamatei vata kei Hyrum na tuakana ena valeniveivesu e Carthage, Illinois.

1844, 29 ni June:

Bulu vata kei Hyrum e Nauvoo, Illinois.