Yaco Me iVakabula ena Ulunivanua ko Saioni

“Era na yaco vakacava me ivakabula ena Ulunivanua ko Saioni? Ena nodra tara na nodra valetabu, vakaduria na nodra tobu ni veipapitaisotaki, ka lako yani ka ciqoma na veicakacakatabu kece sara vakalotu… ena vukudra kece sara na tubudra era sa mate.”

Na Bula nei Josefa Simici

Me baleti ira na lewe ni Lotu era vakaitikotiko e Nauvoo ena 1840 vakacaca, sa dua na ka era vakanamata kina vakalevu sara na nodra cakacaka vakaveisosomitaki vei ira na nodra era sa mate. Me tekivu mai na gauna e vakayacori kina na papitaiso vakaveisosomitaki ena itabagauna oqo ena 1840, era sa vakasaqara na itukutuku e baleta na tubudra o ira na Yalododonu, ka vuqa era sa curuma kina na wai ni veipapitaisotaki vakaveisosomitaki me baleti ira na nodra daulomani era sa takali yani.

Taumada, sa dau vakayacori na veipapitaisotaki ena vukudra na mate ena Uciwai na Mississippi se ena veiuciwai lalai ena veivanua eso. Ia ena Janueri ni 1841, ni ra tuvatuva ka tiko na Yalododonu me baleta na Valetabu e Nauvoo, e qai kaya na Turaga: “Sa sega tu e vuravura na tobu ni papitaiso me baleta na nodra papitaisotaki ko ira sa mate; io me ra papitaisotaki na lewenilotu ena vukudra na sa mate—sa rawa walega ni vakayacori na cakacakatabu vakalotu oqo ena noqu vale; ia au na qai vakadonuya walega me caka tani, kevaka dou sa rui dravudravua ka sega ni tara rawa e dua na noqu vale” (V&V 124:29–30).

Sa mai muduki tu na veipapitaisotaki e uciwai ena ika 3 ni Okotova, 1841, ena gauna e kacivaka kina na Parofita: “Sa na sega tale ni dua na veipapitaisotaki ena vukudra na mate, me yacova na gauna sa rawa ni qai qaravi kina na cakacakatabu vakalotu oqo ena Vale ni Turaga. … Ni sa kaya na Turaga!”¹ Era sa qai tara vakatotolo na Yalododonu e dua na tobu kau ena itabavale e ra se qai tauyavu ena Valetabu e Nauvoo. Na tobu, ka caka ena paini ni Wisconsin, e dabe toka ena deladratou e tinikarua na bulumakau tagane caka ena kau. A vakatabui ena ika 8 ni Noveba, me vakayagataki “me yacova ni sa qai vakacavari na Valetabu, ni sa na qai sosomitaka e dua na ka tudei.”² Ena ika 21 ni Noveba, 1841, eratou a papitaisotaki e lewe ono ena Kuoramu ni iApositolo Le Tinikarua ena vukudra e 40 na tamata era sa mate, na imatai ni papitaiso me vakayacori ena tobu.

Na veika era sotava taumada na Yalododonu ena vuku ni papitaiso me baleti ira na mate sa vakavulica vei ira na bibi ni maroroi itukutuku ena nona Lotu na Turaga. E dina ni sa vakayacori ena kena dodonu kei na kaukauwa na veipapitaisotaki vakaveisosomitaki a vakayacori e uciwai ga ekea, era a sega ni volaitukutukutaki. Oqori na vuna, me ra sa vakayacori tale kina na papitaiso oqori. Ena dua na vosa ena ika 31 ni Okosita, 1842, a vakamacalataka kina na parofita: “Na tamata kece sara me papitaisotaki ena vukudra na mate me na dau tiko e dua na vunivola, me na raica sara ga e matana ka volaitukutukutaka ka vakadinadinataka na dina kei na dodonu ni ivolatukutuku o ya. … O koya me na dau qarauni sara vakavinaka mai na gauna oqo ka lako yani na volaitukutukutaki kei na vakadinadinataki ni nodra papitaisotaki na mate.”³ A vosa tiko vakabalavu ena vuku ni tikina oqo na parofita ena dua na nona ivola ka a vola vei ira na Yalododonu ena siga ka tarava, kei na dua tale na ivola a volai ena ika 6 ni Sepiteba. Na ivola e rua erau sa wase 127 kei na 128 ni Vunau kei na Veiyalayalati ena gauna oqo.

Ena wase 127, a vola kina na Parofita na idusidusi eso oqo mai vua na Turaga: “Kevaka e dua vei kemudou sa papitaisotaki ena vukudra na nomudou mate, sa kilikili me volai vakaivola na kena itukutuku; ia me vola ko koya a raica ka vakadinadinataka na nomudou papitaisotaki; io me rogoca e daligana na kena vosa ka tukuna na ka dina, sa kaya na Turaga; ia na veika dou sa vola, sa volai talega mai lomalagi. … Raica me volai vakavinaka na kena itukutuku kece, ka karoni ena vanua sa dau maroroi kina na ivola talei ena noqu valetabu, io me tu kina me ivakananumi ena veitabatamata kecega” (V&V 127:6–7, 9).

Ni ra sa toso ki liu na Yalododonu ena cakacaka tabu oqo, “sa yaco me votu mai, ni so e balavu sara tu na ivolatukutuku me baleta na nodra mate, era vinakata me ra qarava na kena cakacaka,” e nanuma lesu o Elder George A. Smith, e dua na lewe ni Kuoramu ni Le Tinikarua. “Sa laurai oqo me itekivu ni dua na cakacaka vakaitamera, ka me qaravi kina na veicakacaka tabu vakalotu kece sara ni Kosipeli vei ira na lewevuqa era sa mate, e sega ni cakacaka rawarawa. Eso vei ira na Le Tinikarua era a tarogi Josefa kevaka e rawa ni dua na iwalewale lekaleka ni veiqaravi me baleti ira na lewevuqa vakaoqo. A sauma kina vakaoqo ko Josefa: ‘na lawa ni Turaga e sega ni veiveisau; me da ivalavala me vaka sara ga na veika sa vakatakilai vei keda. Me da kakua ni namaka me da cakava na cakacaka vakaitamera oqo me baleti ira na mate ena dua na gauna lekaleka; au namaka me na taura, kevaka e lailai sara.’ ”⁴

iVakavuvuli nei Josefa Simici

Na ivunau ni veivakabulai me baleti ira na mate e vakaraitaka na cecere ni nona yalomatua kei na loloma na Kalou.

“O ira kece a sega ni dua na gauna me ra rogoca kina na kosipeli, ka qaravi mai vua e dua na tamata vakauqeti ena bula oqo, sa dodonu me ra na qai rogoca ni oti eke, ni bera ni ra qai lewai.”⁵

“E sega ni uasivi cake na nona vakabulai ira na mate na Kalou mai na nona vakaturi ira cake tale na mate.

“E sega vakadua ni dua na gauna me sa sega kina ni rawa ni toro yani vua na Kalou na yalo ni sa rui qase. E rawa ni tarai ira kece na loloma vakalou ni veivosoti, o ira kece era sega ni cakava na ivalavala ca e sega ni vosoti rawa, ka na sega sara ni vosoti rawa, e sega ena vuravura oqo, ka sega talega ena vuravura sa bera mai. E tiko e dua na sala me vagalalataki kina na yalodra era sa mate; oqori mai na kaukauwa kei na dodonu ni Matabete—ena nodra vauci ka sereki e vuravura. E rairai lagilagi na ivunau oqo, kevaka e vakaraitaka tu na cecere ni yalololoma vakalou ka lomasoli ena vakasama ni ituvatuva ni vakabulai ni kawatamata.

“Na dina lagilagi sa kena inaki vakatabakidua me vakalevutaka na kila ka, ka tokona na yalo e vakaleqai, sotava na dredre kei na yaluma. Me kena ivakaraitaki mada, e rua na tagane, erau veitacini, e tautauvata na nodrau vuku, kila ka, bula savasava ka taleitaki, dau lako voli ena dodonu kei na yalo vinaka, ena veigauna kece erau raica ka kila tiko kina na itavi mai na waidrodro dukadukali ni itovo vakavanua, se na draunipepa katabokoboko ni vakasama vakatamata.

“Sa mate e dua ka bulu, ka sega mada ni se bau rogoca na Kosipeli ni veivakaduavatataki; vua na kena ikarua sa vakau kina na itukutuku ni veivakabulai, sa rogoca ka ciqoma sara, ka sa yaco me nona na isolisoli ni bula tawamudu. Me sa vakaivotavota beka ga o koya na dua ena lagilagi ka lesi na kena ikarua ki na cudruvi ni yalo ka sega kina na inuinui? Ena sega beka ni soli e dua na gauna me segata me dro tani mai kina? Era kaya eso na matavakabauta ni ‘sega ni rawa.’ …

“E vakaraitaka vakamatata sara na ivunau oqo na vuku kei na loloma ni Kalou ena nona vakarautaka e dua na cakacakatabu vakalotu me baleta na nodra vakabulai na mate, na papitaiso vakaveisosomitaki, me volai mai lagi na yacadra ka ra lewai me vaka na ivalavala ni yago. Na ivunau oqo e icolacola ni ivolanikalou. O ira na Yalododonu era vakaweleweletaka me ra qarava ena vukudra na wekana era sa mate, era vakayacora vakakina ka biuta na nodra vakabulai ena dua na itutu rerevaki.”⁶

Ena Tiseba ni 1840 a volavola kina ko Josefa Simici vei ira na lewe ni Kuoramu ni Le Tinikarua kei ira na veiliutaki vakabete tale eso era a kaulotu tiko mai Peritania: “Au vakabauta ni ivunau ni ‘papitaiso me baleti ira na mate’ dou sa rogoca oti ni bera ni dou qai taura na ivola oqo, ka na vakavuna beka eso na lomatarotaro e lomamudou ena vuku ni tikina oqo. Au na sega ni rawa ni tukuna kece yani vei kemuni ena ivola oqo na veika ko ni na gadreva ena vuku ni iulutaga oqo; ia … au na kaya ni a dau vakayacori ena veimatalotu makawa; ni a segata ko Paula me vakadinadinataka na ivunau ni tucaketale mai na ka vata oqo, ka kaya kina, ‘Kevaka sa sega ni vakaoqo, era na vakaevei ko ira sa papitaisotaki ena vukudra na mate, kevaka sa sega sara ni tucaketale ko ira na mate, a cava era sa papitaisotaki kina ena vukudra na mate?’ [1 Korinica 15:29.]

“Au a tukuna ena imatai ni gauna e matanalevu na ivunau oqo ena noqu a vunau ena lotu ni veibulu vei Baraca Seymour Brunson; ka tekivu mai na gauna ko ya sa tekivu meu dau veidusimaki vakararaba ena Lotu ena vuku ni iulutaga oqo. Sa soli kina na galala vei ira na Yalododonu me ra papitaiso ena vukudra na wekadra era sa mate. … Au na sega ni vakamacala tale vakalevu ena iulutaga, ko ni na raica na kena dodonu ka vakaibalebale; ka tevuka na Kosipeli i Jisu Karisito ena dua na kena irairai levu mai na veika era nanuma tu eso.”⁷

Eda sa yaco me ivakabula ena Ulunivanua ko Saioni ena noda qarava na veicakacakatabu vakalotu me baleti ira na mate.

“Kevaka e rawa vei keda, ena dodonu ni nona Matabete na Luve ni Kalou, me da papitaisotaka e dua na tamata ena yaca ni Tamana, na Luvena, kei na Yalo Tabu, me baleta na bokoci ni ivalavala ca, sa noda vakatalega kina na noda galala me da veiqaravi vakaitini, ka papitaiso me baleta na bokoci ni ivalavala ca me baleti ira kei na vukudra na noda era sa mate, ka ra se bera ni rogoca na kosipeli, se na kena taucoko.”⁸

“E kaya na iVolatabu, ‘Raica au na talai Ilaija na Parofita vei kemudou e liu, ena qai lako mai e muri na siga i Jiova e levu ka rerevaki; ia ena vagolea ko koya na lomadra na qase vei ira na gone, kei na lomadra na gone vei ira na nodra qase, deu na lako mai ka cudruva na vanua ena veivakarusai.’ [Malakai 4:5–6.]

“Ia, na vosa vagolea eke e dodonu me vakadewataki me vauci se dregati. Ia na cava na inaki ni sasaga bibi oqo? Se na sala cava me vakayacori kina? Me soli na idola, me na lako mai na yaloi Ilaija, me tauyavutaki na Kosipeli, vakasoqoni vata na Yalododonu ni Kalou, tarai cake ko Saioni, ka ra yaco na Yalododonu me ivakabula ena Ulunivanua ko Saioni [raica Opetaia 1:21].

“Ia na sala cava era na yaco kina me ivakabula ena Ulunivanua ko Saioni? Ena nodra tara na nodra valetabu, vakaduria na nodra tobu ni veipapitaisotaki, ka lako yani ka ciqoma na veicakacakatabu kecega vakalotu, na papitaiso, veivakadeitaki, veisavai, veilumuti, veitabaki ka vauca na kaukauwa e uludra, ena vukudra kece sara na tubudra era sa mate, ka vueti ira me rawa ni ra tucake mai ena imatai ni tucaketale ka vakacerecerei ena veidabedabe vakatui ni lagilagi vata kei ira; sa koto kina na sinucodo ka na vauca na yalodra na qase vei ira na gone, kei ira na gone vei ira na qase, ka vakataucokotaka na itavi nei Ilaija… .

“Sa sega soti ni levu sara na nodra gauna na Yalododonu me ra vakabulai ira ka vueti ira na nodra mate, ni bera ni qai vakanakuitataki ko vuravura, ka lutuki vuravura na veivakarusai sa lesi tu kina.

“Au na vakasalataki ira kece sara na Yalododonu me ra segata ena nodra igu taucoko ka vakasokumuni ira vata na wekadra kece sara era se bula tiko ki na (valetabu), me rawa kina ni ra vauci ka vakabulai, me ra na vakarautaki kina ki na siga ena lako yani kina na agilosi dau veivakarusai; ia kevaka era sa segata ena nodra igu na lewe ni Lotu kece sara me ra vakabulai ira na nodra mate, vauci ira na nodra kawa, ka vakasokumuni ira na nodra itokani era bula tiko, ka kakua ni vakayagataka e dua na nodra gauna ena vukui vuravura, ena dredre sara me ra vakaotia rawa ni se bera ni yaco mai na bogi, ka sa sega kina ni cakacaka rawa na tamata.”⁹

“Sa tu na papitaiso, kvv, me ra qarava ko ira era se bula tiko, kei na papitaiso me baleti ira na mate vei ira era a sega ni kila na Kosipeli. … E sega walega ni yaga me da papitaiso me baleti ira na mate, ia mo na cakava na veicakacakatabu vakalotu kece sara me baleti ira, na kena vata o a cakava mo vakabulai iko kina… .

“… Sa dodonu me dua na vanua me ra na lako kece kina na veimatanitu me ra ciqoma kina na nodra edaumeni; ka sa kaya na Turaga ni oqori na vanua me ra papitaisotaki kina na mate. Na tamata kecega sa papitaiso ka sa lewe ni matanitu sa tu vua na dodonu me papitaiso ena vukudra era sa liu yani, ia ni sa vakamuri ga eke na lawa ni Kosipeli mai vei ira na nodra itokani o ira era na vakaisosomitaki ira, sa vakarautaka tu na Turaga na dauveiqaravi mai kea me vagalalataki ira. Me na veisosomitaki vua na wekana e dua na tamata; na cakacakatabu vakalotu ni Kosipeli a vakarautaki tu ni se bera ni tauyavu na vuravura sa vakataucokotaki vakaoqo mai vei ira, ka na rawa ni da papitaiso vei ira eda veitokani vakalevu vata kaya.”¹⁰

“O ira kece era mate ena vakabauta era na lako ki na valeniveivesu ni yalo me ra vunau vei ira era sa mate e yagodra, ia sa bula tu na yalodra; ia o ira na yalo oqori era na vunau vei ira na yalo [era tu ena valeniveivesu] me ra na bula me vaka na Kalou ena yalo;… ka ra na vakamarautaki ena iwalewale oqo [raica 1 Pita 4:6]. O koya era sa ivakabula kina ena Ulunivanua ko Saioni ko ira era sa papitaiso ena vukudra na nodra mate, ka sa dodonu me ra savai ka lumuti ena vukudra na nodra mate me tautauvata kei na kena a vakayacori vei ira.”¹¹

Sa biuta koto vei keda e dua na itavi levu na Kalou me da vakasaqarai ira na noda era sa mate.

“Au na dolava na matamu me baleti ira na mate. Na veika kece sara sa raica na Kalou ena nona vuku tawayalani ni dodonu me vakatakila vei keda, ni da bula tiko ena bula oqo, me baleta na yagoda oqo, sa vakatakilai vei keda ena vakasama, ena veiwekani voleka ni yago oqo, ia sa vakatakilai vakadodonu sara ki yaloda me vaka beka ni sega tu na yagoda; ia na ivakatakila oqori ka na vakabula na yagoda. Sa vakatakila vei keda na Kalou ka sega ni nanumi ni na vakarusai na yago, se na vale. Ia na itavi, na itavi rerevaki, ka koto vei keda me baleti ira na noda mate; o ira kece na yalo era a sega ni talairawarawa ki na Kosipeli ena yagodra sa dodonu me ra na talairawarawa kina ena yalo se era na cudruvi. Sa dua na vakasama bibi!—sa dua na vakasama ca! E sega beka ni dua na ka me caka?—sega ni dua na vakavakarau—sega ni dua na veivakabulai me baleti ira na noda qase kei na noda itokani era sa mate ka sega ni dua na gauna me ra talairawarawa kina ki na lawa ni Luve ni Tamata? …

“Na yalayala cava beka a caka me baleta na vakasama oqo ni nodra vakabulai na mate? Kei na ivakarau ni bula vakacava ena rawa ni vakabulai, e dina ni sa kasere ka vuca yani na yagodra ena ibulubulu? Ni vakavulici keda na Nona ivakaro, e vakasamataki tiko kina na tawamudu; ni Kalou e raici keda tiko me vaka ga ni da sa tiko ena tawamudu, na Kalou e bula tiko ena tawamudu, ka sega ni raica na ka me vakataki keda.

“Na itavi bibi duadua ena vuravura oqo sa solia vei keda na Kalou sai koya me da vakasaqarai ira na noda era sa mate. E kaya na iapositolo, ‘Me ra kakua kina ni vakavinakataki sara duadua ga’ [raica Iperiu 11:40]; ni sa yaga me tu vei keda na kaukauwa ni veivauci me da vauci ira na luveda kei ira na noda mate me baleta na taucoko ni itabagauna—e dua na itabagauna me da sotava kina na yalayala sa vakayacora ko Jisu Karisito ni bera na tauyavu ni vuravura me baleta na nodra vakabulai na tamata.

“… Sa yaga me ra vakabulai ko ira era liu kei ira era muri mai vei keda me tautauvata kei keda; o koya oqo sa vakacolata kina na Kalou vua na tamata. Sa kaya kina na Kalou, ‘Raica au na talai Ilaija na parofita vei kemudou e liu, ena qai lako mai e muri na siga i Jiova e levu ka rerevaki: ia ena vagolea ko koya na lomadra na qase vei ira na gone, kei na lomadra na gone vei ira na nodra qase, deu lako mai ka cudruva na vanua ena veivakarusai.’ [Malakai 4:5–6.]”¹²

A vola na veika oqo na Parofita ko Josefa Simici ena dua na ivola vei ira na Yalododonu, a qai volai e muri ena Vunau kei na Veiyalayalati 128:15–18, 22, 24: “Oi kemudou na wekaqu lomani; au sa vakadeitaka oqo vei kemudou mo dou kakua ni nanuma ni sa ka mamada ga na ivakaro me baleti ira na sa mate kei ira sa bula, me baleta na noda vakabulai. Raica sa kilikili sara ka yaga na nodra vakabulai me da bula kina, ia me vaka a kaya ko Paula ena vukudra na noda qase—ni na sega ni rawa me ra vakavinakataki sara ko ira ke sega koi keda; io ena sega talega ni rawa me da vakavinakataki sara koi keda ke sega ko ira.

“Ia oqo, me baleta na nodra papitaisotaki ena vukudra na mate, au na tukuna tale vei kemuni e dua na vosa cavuti mai vei Paula, ena 1 Korinica 15:29: Kevaka sa sega ni vakaoqo, era na vakaevei ko ira sa papitaisotaki ena vukudra na mate, kevaka sa sega sara ni tucaketale ko ira na mate? A cava era sa papitaisotaki kina ena vukudra na mate?

“Ka dua tale, me baleta na vosacavuti oqo au na solia vei kemuni e dua na vosacavuti mai vei ira na parofita, ka coba dei toka na matana ki na vakalesui mai ni matabete, na lagilagi me na qai vakatakilai mai ena iotioti ni gauna, ia ena dua na kena ivakarau duatani na iulutaga lagilagi duadua beka vei ira kecega ena kosipeli tawamudu, na papitaisotaki ena vukudra na mate; ni tukuna ko Malakai, ena iotioti ni iwase, tikina e 5 kei na 6: Raica au na talai Ilaija na parofita vei kemudou e liu, ena qai lako mai e muri na siga i Jiova e levu ka rerevaki: ia ena vagolea ko koya na lomadra na qase vei ira na gone, kei na lomadra na gone vei ira na nodra qase, deu lako mai ka cudruva na vanua ena veivakarusai.

“A dodonu beka meu solia e dua na ivakavakadewa rawarawa cake ena tikina oqo, ia sa rauta na kena matata oqo me veisotari kei na noqu inaki. Sa rauta me da kila, ena tikina oqo, ni na vakanakuitataki na vuravura ena dua na cudru vakavo kevaka e dua na mataqali isema tudei vei ira na qase kei ira na gone, ena dua na iulutaga se dua tale—ia raica na cava na iulutaga oqori? Sai koya na papitaisotaki ena vukudra na mate. Ni da na sega ni vakavinakataki sara o keda ke sega o ira; ka sega talega ni rawa ni vakavinakataki sara o ira ke sega o keda… .

“… Me reki na yalomudou, ka marau vakalevu. Me lagalagasere ko vuravura. Me ra cavuta mai na mate na sere ni vanua ni veivakacaucautaki tawamudu vua na Tui ko Imanueli, o koya sa lesia oti, ni se bera ni buli ko vuravura, na veika ena rawa kina me da vueti ira tani mai na nodra valeniveivesu; ni ra na lako ena galala na kaivesu… .

“… O koya me da cabora kina vua na Turaga ena bula dodonu, me vaka e dua na Lotu kei na dua na kawatamata, ka me vaka ni da Yalododonu Edaidai; ka me da vakaraitaka ena nona Valetabu, ni sa vakacavari, e dua na ivola ka tu kina na kedra itukutuku na noda mate, ka na kilikili me ciqomi ena veisala kece sara.”¹³

Vakatutu ni Vuli kei na Veituberi

Taurivaka na veivakasama oqo ni ko vulica na iwase ni ivola oqo se ni ko vakavakarau mo veivakavulici. Raica na tabana e vii–xii, me ikuri ni veivuke.

Raica lesu natabana e 541–43, ka raica na sala era tubu kina ena nodra kila o Josefa Simici kei ira na Yalododonu Edaidai taumada na ivunau ni papitaisotaki ena vukudra na mate. Vakasamataka mada na ivakarau ni nodra nanuma na Yalododonu ena imatai ni gauna era vulica kina na nodra vakabulai na mate. A vakacava na ivakarau ni lomamu ena imatai ni gauna o vakaitavi kina ena cakacakatabu vakalotu me baleti ira na mate?
Wilika na ikatolu kei na ikava ni parakaravu ena tabana e 543–44. Ena sala cava e vakaraitaka kina na ivunau me baleti ira na mate na nona yalololoma kei na loloma na Kalou? Ena sala cava beka ena rawa kina ena ivunau oqo me “vakalevutaka na kila ka” ka “tokona na yalo”?
Na cava na kena ibalebale me da ivakabula ena Ulunivanua ko Saioni? (Me baleta eso na kena ivakaraitaki, raica na tabana e 545–47.) Na cava na vuna o nanuma kina ni na dredre me ra vakavinakataki sara o ira na tubuda era sa mate ke sega o keda? Na cava na vuna o nanuma ni na dredre kina me da vakavinakataki sara o keda ke sega o ira?
Raica lesu eso na nona ivakavuvuli na Parofita o Josefa Simici me baleta na noda itavi cecere me da “vakasaqarai ira na noda mate” (tabana e 548–50). Na veika cava soti o sa bau sotava ena nomu sa vulica na veika me baleti ira na tubumu? Na veisala cava beka sa vakauqeti kina na lomamu me baleti ira na tubumu, ena nomu qarava na veicakacakatabu vakalotu ni valetabu ena vukudra?
Na cava e rawa ni da cakava me da vukei ira kina na gone me ra taleitaka me ra dau vakaitavi ena cakacaka ni valetabu kei na tuvakawa ni matavuvale?

iVolanikalou ni veisemati: Roma 14:9; V&V 128:8–11

Nauvoo Temple baptistry — Na vanua ni papitaiso ena Valetabu e Nauvoo ka se tara tiko. Ena tobu ni papitaiso me vakataka na kena oqo, era ciqoma kina na Yalododonu na cakacakatabu vakalotu ni papitaisotaki ena vukudra na sa mate.

family doing genealogy — “Na itavi cecere duadua ena vuravura oqo ka sa vakataqara vei keda na Kalou sai koya me da vakasaqarai ira na noda mate.”