Mataupu 12

Amio Sa’o

Ia tatou atiina ae i totonu o i tatou lava le amio sa’o—lena uiga taua tatou te matua faatauaina tele i isi.

Mai le Soifuaga o Spencer W. Kimball

Ao lei valaauina o ia e avea ma se Aposetolo, sa malosi tele Spencer W. Kimball i mea tau pisinisi ma mataupu tau i le lotoifale i Arisona. Sa avea o ia ma se tasi o pule i se paaga faapisinisi o inisiua ma fanua ma sa auai i faalapotopotoga fesoasoani o le aai faapea ma le lautele o le setete. I ia tulaga uma, sa lauiloa o ia i lona faamaoni ma le amio sa’o. Sa tusia e uiga ia te ia: “O le tauleleia o Spencer W. Kimball sa i ai lea i loto ma le vaai a isi. … Sa avea o ia ma se aū e sa’olele, i le tuuina atu o mea sa ia folafola ma faia feutagaiga ma le atoatoa e aunoa ma ni faiga faatogafiti.”¹

O le amio sa’o o se vaega o ona uiga mai aso o lona talavou e pei ona faaalia i le tala lenei: “Sa faaune mai e Spencer ma nisi o alii se solofanua ma se taavale solofanua tuai ina ua o atu le latou vasega faasaienisi i le aoga mo se malaga suesue. I luga o le auala gaoa sa motu ai se sipulini o le taavale solofanua. O le aso na sosoo ai sa faailoa atu ai e Spencer i ana uo e faapea, “E tatau ona tatou sao tupe e totogi ai le sipulini ua motu,’ ae sa leai se tasi na ofo atu se fesoasoani. Sa ia faatauanau atu ia i latou, i le faapea atu, ‘E tatau ona totogi le sipulini lena, e tusa lava pe ou te faia lava e au.’ ”²

I se saunoaga i le sauniga aoao a le au perisitua ia Oketopa 1974, na faailoa atu ai e Peresitene Marion G. Romney, Fesoasoani Lua i le Au Peresitene Sili, le faataitaiga a Peresitene Kimball “I le gasolo ai o tausaga sa avea lava o ia ma se faatusa o le amio sa’o. E leai se tasi e masalosalo o le a ia tuueseina le faatuatuaga paia ua tuuina i ona luga e le Alii i le taimi faigata o lona soifuaga. … E maeu le mamalu, alii e o le perisitua, pe a faapea tatou te taufai maua uma le amio sa’o e pei o Peresitene Kimball.”³

Aoaoga a Spencer W. Kimball

O le amio sa’o o le faavae lea o uiga lelei.

O le amio sa’o (o le naunautaiga ma le mafai ona ola i o tatou talitonuga ma tautinoga) o se tasi o maa faavae o uiga lelei, ma a aunoa ma uiga lelei e le mafai e se tasi ona faamoemoe e olioli i le afioaga o le Atua iinei po o le faavavau.⁴

O le amio sa’o o se tulaga po o se agavaa o le atoatoa, e le mavavaeeseina, pe motusia foi. E lelei atoatoa e leai se faaletonu. E mama ma logoleleia. E manino a’ia’i ma loloto le faamaoni. O le lototele, o se uiga paia faaletagata e le mafai ona faatusalia lona taua. O le faamaoni, amio solia, ma le amiotonu. Afai e aveese nei mea o le a totoe ai na o se atigi. …

O le amio sa’o i tagata taitoatasi ma faalapotopotoga e le fesili, “Po o le a se manatu o isi ia te a’u ma a’u mea e fai?” ae “O le a so’u manatu ia te au lava pe a ou faia lenei mea po o le le faia foi o lena mea?’ Pe sa’o ea? Pe faamaonia ea e le Matai? …

O le amio sa’o o le tagata e tatau ona aumai ai le filemu i totonu, faamautinoaina o le faamoemoega, ma le saogalemu i le faatinoina. O le le atoatoa o ia tulaga e aumaia ai le tulaga faafeagai: o le fevaevaeai, fefe, faanoanoa, ma le le mautonu.⁵

Atonu e lelei pe afai e faia soo e i tatou uma se iloiloga ina ia iloa ai pe le o nanaina i lalo o fala, po o tulimanu o o tatou olaga ia ni nai faaputuga o manatu pepelo ma le mataga po o ni mea sese. Pe le o natia i lalo o palanikete o ni sisi’o faaletagata lava ia ma ni ’alofaga o ni tamai faaletonu ma le le faamaoni? Pe le o i ai ni apogaleveleve i taualuga ma tulimanu tatou te manatu e le o mafai ona iloa? Pe tatou te le o taumafai ea e faaufiufi i tamai sese ma ni tamai tuinanau tatou te faatagaina faalilolilo mo i tatou lava—ma se manatu e tau faaufiufi ai faapea e laitiiti tele ma e le afaina? Pe o i ai ea ni vaega i o tatou mafaufauga ma gaoioiga ma amioga tatou te mananao e nana mai ia i latou e sili ona tatou faaaloalo tele i ai?⁶

Tatou te faaalia le amio sa’o e ala i le tausia ma le mamalu o a tatou feagaiga.

Afai tatou te osia ma faia se maliega ma le Atua, e tatau ona tatou tausia tusa lava po o le a se tau. Aua nei pei i tatou o le tamaitiiti a’oga sa malie e ola i tulaga faatulagaina o le amio ae ua ia solia lana tautoga ma taumafai sei vaai po o le a le umi e mafai ai ona le iloa e se isi lona taufaasese. Aua nei avea i tatou e pei o le faifeautalai sa malie e auauna i le Alii mo le lua tausaga, ae peitai ane ua faamaimau lona taimi i le paie ma le faia o ’alofaga. Aua nei pei i tatou o le tagata o le Ekalesia e ’ai i le faamanatuga i le taeao ae soli le Sapati i lena lava aoauli.⁷

O le manatu mama i a tatou feagaiga, o le a tatou faamanu’aina ai o tatou lava tagata e faavavau. … O le faafiaamiotonu e faigofie ae o le faafiapoto e taufaasee, ae o le Alii ua faamanino mai i nei ona po i se faaaliga e faapea “pe a tau ufiufi a tatou agasala, pe faamalie lo tatou loto maualuga [po o] lo tatou fia sili le aoga … e punitia lava le lagi; e tiga le Agaga o le Alii; ma … [o le tagata] ua tuu atu lava o ia ia te ia lava e aa i tui: (MFF 121:37–38).

E moni, e mafai ona tatou filifili; o le filifiliga saoloto e a tatou lea, ae le mafai ona tatou sosola ese mai taunuuga o a tatou filifiliga. Ma afai o i ai sina laulua itiiti i la tatou amio sa’o, o iina o le a faaautu i ai le osofaiga a le tiapolo.⁸

O le feagaiga ua tatou osia ma le Atua o loo iai le folafolaga e faia, e le na o le taofia mai le faia, ae ia galueaiina le amiotonu e faapea foi i le aloese mai le tiapolo. Sa osia e le fanauga a Isaraelu ia feagaiga faapena e ala atu ia Mose, e faapea, “O mea uma ua fetalai mai ai Ieova matou te faia” (Esoto 19:8 ua faaopoopo le faatusilima), e ui ina e le’i ata fuli atu le tua o Mose ae o latou solia la latou folafolaga e ala i le faia o mea sese. I le vai o le paptisoga ua tatou tuuina atu se tulaga tali tutusa faapena ma toe folafola i le sauniga o le faamanatuga. O le le faamamaluina o nei folafolaga, o le musu e auauna atu pe talia se tiutetauave ma faia ae le oo i le mea sili e mafaia e le tagata, o se agasala lea o le le faia. …

O i latou o umia le Perisitua Mekisateko ma i latou ua maua o latou faaeega paia o le malumalu ua latou osia nisi folafolaga patino e fai, ina ia galueaiina ai le amiotonu. Ua faailoa mai e le Alii ia le maliliega i le va o lo tatou Tama Faalelagi ma i latou ua umia le perisitua o le “tautoga ma le feagaiga.” [MFF 84:39.] … E solia e se tasi le feagaiga o le perisitua e ala i le solia o tulafono—faapea foi le tuua o ona tiute e le faia. O le mea lea, e le manaomia ona faia e se tasi se mea [o ia mea ua ta’ua] e soli ai lenei feagaiga.”⁹

Ia tausia au folafolaga. Faatumauina lou amio sa’o. Mulimuli i au feagaiga. Tuuina atu lou faamaoni silisili ma lou faatuatua atoatoa i le Alii i lenei tausaga ma tausaga uma lava. Ia faia ma “lou faamamalu i ai” ma o le a faamanuiaina oe nei ma le faavavau.¹⁰

Afai tatou te le faamaoni, ua tatou olegia i tatou lava.

E toetoe o le le faamaoni atoa lava ia, e mafua uma mai lava i le taufaasese faaletagata lava ia, lea ua tatou ta’ua o le faafiaamiotonu. O se tulaga muamua, matua leaga, ma o se ituaiga e sili ona taufaasese o le pepelo. Ua tatou pelogia i tatou lava.¹¹

O le faafiamiotonu o le fili lea o le salamo. E i ai pea lava le Agaga o le Atua i le tagata e faamaoni lona loto ina ia faamalosia, fesoasoani i ai, ma ia faasaoina, ae peitai, e le toe fianu le Agaga o le Atua ma le tagata na te faia ni ’alofaga mo ana mea sese.¹²

Na fetalai mai lo tatou Foafoa i le savali na vaneina i luga o Sinai, “Aua e te gaoi.”[Esoto 20:15.] Sa toe faaupu mai foi i le faavae o le Toefuataiga, “Aua e te gaoi.” (MFF 59:6.)

I totonu o ofisa lautele ma olaga taitasi, o loo gogolo mai e pei o se faititili le afioga a le Alii: “Aua e te gaoi; … pe faia foi soo se mea faapena.” (MFF 59:6.)

Tatou te taumafai lava i tatou e ta’uamiotonuina ituaiga eseese o le le faamaoni, e aofia ai le lima tagovale i faleoloa, o se aga maualalo tele o loo faia e le fia miliona o e ua fai mai o i latou o tagata taualoa ma le tauleleia.

E tele ituaiga o le le faamaoni: … o le taalo i le naunau ma lagona mo tupe eleelea; o le gaoi i masini talitupe po o le gaoi o oloa a i latou e pulea galuega; o le faia pepelo o teugatupe, … o le faaaoga o faamatalaga pepelo mo le toe faafo’i mai o lafoga; o le ta’u pepelo faapea ua gau le pisinisi ina ia le toe totogiina ai se faaunegatupe; o le faoa po o le gaoi o tupe ma isi mea taua i luga o le auala po o le aiga; o le gaoia o le taimi, o le tuuina atu o se aso e le atoa o galuega faamaoni ae o la e totogi mo le aso atoa; o le tietie i auala o femalagaiga lautele e aunoa ma le totogiina o se pasese; ma isi ituaiga uma o le le faamaoni i nofoaga uma ma tulaga uma. …

E masani ona fai ma ‘alofaga le faaupuga “o le la e fai e tagata uma.” E leai se sosaiete e mafai ona manuia e aunoa ma le faamaoni, faatuatuaina, ma le taofiofi o le tagata lava ia.¹³

E le faamaoni se tagata na te faia se faatau e sili atu nai lo le mea e mafai ona ia faamoemoe e totogi. O le taufaavalea lena mea. E tau leai sona mamalu pe afai na te le gafatia ona totogi ma le faamaoni lana aitalafu. E foliga mai ia te au o mea mananaia uma e sitifi ai se tasi ae maua mai i le faaaitalafu, e le o se faamaoni atoatoa lena. … E le faapea e leaga i taimi uma le nofo aitalafu, ae o le tulaga moni lava e sese pe leaga foi le faagalogalo [po o le le totogiina] o aitalafu.¹⁴

O le gaoia o sene po o nai tala po o oloa atonu e ono le mativa ai le e ona mea ua aveesea, ae o se tulaga e faatasina ai le ua gaoi.¹⁵

O lo tatou tulaga faatonuina o le amio sa’o e ta’a’ina ai o tatou aiga ma isi.

O se matua e ta’u faalaitiiti ia tausaga o se tamaitiiti ina ia aua ai ne’i totogiina le tau mo se tagata matua i faafiafiaga ma vaalele ma nofoaafi ma pasi, ua ia aoaoina faamalosi le tamaitiiti ina ia le faamaoni. O le a ia le faagaloina lava nei lesona. O nisi matua e faatagaina le tamaitiiti e soli le tulafono mo mea faapapa, o le faaaogaina o fana, fagogota ma tulimanu e aunoa ma ni laisene. Ua faataga fanau e aveina ia taavale e aunoa ma ni laisene po o le ta’ufaasese foi o o latou tausaga. O i latou o loo aveina nai mea laiti e aunoa ma le faailoaina atu o ia mea e pei o ni fualaau aina mai le fanua o le tuaoi, o se peni mai se laulau, o se pepa pululole mai le fata [o oloa] e te pule ai lava oe ia, o ia mea uma o loo aoaoina ai e aunoa ma se leo e faapea e le leaga tele nai gaoi laiti ma nai le faamaoni laiti.¹⁶

O matua e “faaufiufi” ia latou fanau, e faia ’alofaga mo [a latou fanau] ma totogi a latou mea na gaoi, ua latou misia se avanoa taua e aoao atu ai se lesona ma o lea ua tele atu ai se faatama’iga ua latou faia i a latou fanau. Afai e moomia ona toe faafoi e le tamaitiiti le tupe po o le penitala po o le fualaau aina faatasi ai ma se faatoesega talafeagai, e le taumateina o le a tuu ona faamoemoega e gaoi. Ae peitai afai e faatauaina o ia ma avea o se toa laitiiti, ma afai foi e avea ona faaletonu ma se mea ula, o le a faapea ona faaauau pea le faateteleina o le gaoi.¹⁷

E mafai e matua ona atiina ae i a latou fanau o loo tutupu ae le faaaloalo mo meatotino a isi ma aia tatau e ala i faataitaiga ma aoaoga. O matua e faatonu a latou fanau iti e faatoese ma totogi ma toe faafoi—atonu pe faaluaina pe faatoluina foi—ia mea ua latou aveina, talepe, pe faaleaga—o le a avea na fanau ma ni tagatanuu viia ma o le a aumaia le mamalu ma le faaeaea i o latou matua. O matua foi latou te faaaloalogia le tulafono ma usitaia uma aiaiga, e mafai, e ala i lena faatulagaga ma le ala latou te talia pe le taliaina ai, ona aoaiina ma puipuia a latou fanau mai amio le taupulea ma le fouvale.¹⁸

Matou te fautuaina outou e aoao atu i a outou fanau le mamalu ma le amio sa’o ma le faamaoni. Mata e mafai e nisi o a tatou fanau ona latou le iloa o se agasala le gaoi? O se mea e le talitonuina—o le faateleina o le faaleagamea, tagovale, faomea, gaoi. Puipui lou aiga mai ia mea e ala i aoaoga tatau.¹⁹

Ia tatou mautinoa ua aofia ai i totonu o afiafi faaleaiga se lesona o le faamaoni ma le amio sa’o.²⁰

Atonu e mafai ona tatou fetaiai ma se osofaiga malosi, ae e tatau ona tatou aoaoina a tatou fanau, o le agasala lava o le agasala. E faatagaina fanau e le faasalaina ona o ni nai sasi i faagatama ma nai faimamago foi i taaloga. O nei pepelo po o faimamago e faaauau atu lava i kolisi ma oo atu ai i le galuega ma totonu o pisinisi. E le gata ina sese, ae e matua sese lava, e manifinifi ai le fausaga faavae o la latou aganuu ma o latou uiga.²¹

I le nofoaafi mai Niu Ioka e agai atu i Baltimore sa matou nonofo faafesagai ai i le taavale e fai ai taumafataga, ma se alii faipisinisi ma sa ou faapea atu, “E seasea ona timu faapenei i le Aai o Sate Leki.”

E lei pine ae oo atu le talanoaga i le fesili faaauro: “O le a le tele o lou silafia e uiga i le Ekalesia?”

“E le tele so’u iloa e uiga i le Ekalesia,” o lana tala lea, “ae ou te iloa se tasi o ona tagata.” Sa ia atiina ae ni vaega o fanua i Niu Ioka. “O loo iai se soa-konekarate o loo galue mo au,” sa ia faaauau ai. “O ia e ese le faamaoni ma tumu i le amio sa’o ma ou te le tau [manaomia] lona tauofo mo se galuega. O ia o se faataitaiga o le mamalu. Afai e pei uma tagata Mamona o lenei alii, ou te fia iloa e uiga i se ekalesia e maua ai ni alii faamamaluina faapena.” Sa matou tuuina atu ia te ia ni tusi ma auina atu faifeautalai e aoao ia te ia.²²

O tusitusiga paia e maua ai faataitaiga maoae o le loto tele ma le amio sa’o.

E matua maoae lava le maofa o se tagata ona o Peteru … a o vaaia o ia o tu faasasa’o ma le toa ma le malosi i luma o na alii sili ma pulega o e sa mafai ona faafalepuipuiina o ia, sasaina o ia, po o le aveeseina foi o lona ola. Tatou te ono faalogoina na upu lē fefe a o faafesaga’i o ia ma ona fili ma faapea atu: “E tusa ona sili o lo matou anaana i le Atua i lo matou anaana i tagata.” (Galuega 5:29.)

Sa vaai atu Peteru i mata o le aofia ma tuuina atu lana molimau ia i latou e uiga i le Atua sa latou faasatauroina [tagai Galuega 3:13–15]. …

O i latou sa faalogo i lenei molimau ma le aoaoga, e 5,000 alii na vaai i lenei lototele maoae ma le amio sa’o uiga ese! Ma e 5,000 alii sa talitonu.

Toe manatu i tua ia Tanielu, o le sa pueina faapagota ma faapologaina ae o se perofeta foi a le Atua o le sa naunau e oti mo ona talitonunga maumaututu. Pe sa faatietie ea le amio sa’o i se tulaga maualuga? O le talalelei o le soifuaga lena o Tanielu. … I totonu o le maota o le tupu, sa tau le mafai ona faitioina, e oo foi lava i se tasi sa avea ma pule, e lei mafai lava ona ia inu i le uaina a le tupu pe ‘ai foi i aano o manu ma meaai ga’oa. O lona faautauta ma lona faatuatua mama na maua ai e ia le soifua maloloina ma le atamai ma le poto ma le tomai ma le malamalama, ma o lona faatuatua na fesootai vavalalata ai o ia i lona Tama oi le lagi, ma sa oo mai ai faaaliga ia te ia i soo se taimi e manaomia ai. O lona faamatalaina o miti a le tupu ma lona faaliliuina na aumaia ai le mamalu ma le logologoa ma meaalofa ma se tulaga maualuga e pei o le tele o alii o e na latou faatauina o latou ola ina ia maua ai. Ae peitai ina ua tuuina atu ia te ia le filifiliga ia taofia ai le faia o ana tatalo po o le lafoina i le lua o leona, sa ia tatalo faaaliali ma tuuina atu o ia i le faasalaga. [Tagai Tanielu 1–2, 6.]

Tatou te toe manatua ai le amio sa’o o le au Eperu e toatolu, o Sataraka, Mesako ma Apeteniko, o e sa pei o Tanielu sa tetee i tagata ma pulega, ae ia tumau faamaoni ia i latou lava ma tausisia pea lo latou faatuatua. Sa moomia ona latou faia e pei ona poloaiina ai e le tulafono a le taitaiau ina ia tootutuli i lalo ma tapuai atu i se faatagata auro sa faia e le tupu. E le gata i le aveeseina o lo latou faasinomaga, ae o le aveesea o tulaga, ma le faaoso o le ita o le tupu, ae sa [sili foi lo] latou faafesagai ma le ogaumu aasa nai lo le faafitia o lo latou Atua.

… Ina ua faalogoina le leo sa fuafuaina o foafoa, fagufagu, napeli, ma isi mea fai faaili ua taalililili i le ea ma le anoanoai o alii ma tamaitai i soo se mea ua faatumulia ai o latou fale ma magaala i le au tapuai sa tootutuli i le faatagata auro tele, e toatolu ni alii sa mumusu e faatiga i lo latou Atua moni. Sa latou tatalo i le Atua, ma ina ua latou fetaia’i ma le tupu ma’ema’ea ma le ita tele, sa latou tali atu ma le totoa i se tali e mautinoa lava e oti ai:

“Afai o lea, ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi, na te laveaiina mai lava i matou ai lau pule le tupu.

“A e peitai, a le o lea, ia e silafia e oe le tupu e, matou te le auauna i ou atua; o le tupu auro foi ua e faatuina, matou te le ifo i ai.” (Tanielu 3:17–18.)

Amio sa’o! O le folafolaga mo le ola e faavavau mai le Atua e sili atu i folafolaga uma i tagata mo le ta’uta’ua, mafanafana, ma tuusaunoaga faapitoa. O nei tagata totoa ma amio sa’o sa latou fai mai, “Tusa lava pe matou te le ola, ae e tatau ona matou faamaoni ia i matou lava ma le Atua.” …

E leai ni uiga tauleleia o le faaatoatoaina o loo tatou tauivi ia maua, e sili atu ona taua nai lo le amio sa’o ma le faamaoni. O lea ia tatou atoatoa ai, ia le mavaevae, ia mama, ma faamaoni, ia atiina ae i totonu ia i tatou lava lena uiga taua o le agaga, lea e sili ona tatou faatauaina i isi.²³

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Toe iloilo le parakalafa lona lua i le itulau e 141. O a ni uiga sa faaalia e le alii talavou o Spencer? O a ni aafiaga faapena o loo mafai ona maua ia i tatou i aso nei?
Suesue ia parakalafa muamua e fa i le itulau 143, vaai mo upu na faaaoga e Peresitene Kimball e faamatala ai le amio sa’o. O anafea ua e vaai ai ua aumaia e le amio sa’o le “filemu i totonu, mautinoa o le faamoemoe, ma le saogalemu i gaoioiga”? O anafea na e vaai ai i vaivaiga o le amio sa’o ua aumaia ai le “le fevaevaeai, fefe, faanoanoa, ma le le mautonu”?
O a ni nisi o uiga e faatatau i feagaiga lea e taofia ai se tagata mai le mauaina o le amio sa’o? (Mo ni faataitaiga, tagai i itulau 144–145.) E mafai faapefea ona tatou faatoilaloina nei amioga? Mafaufau i le amio sa’o o loo e tausia ai au feagaiga.
O a ni auala o loo tatou “pelogia ai i tatou lava” pe afai tatou te le o faamaoni? (Mo nisi faataitaiga, tagai i itulau 145–146.)
Toe iloilo faataitaiga a Peresitene Kimball o le le faamaoni ma le faamaoni i matua (itulau 147–148). Manatunatu i mea o loo e faia e aoao ai fanau i le amio sa’o.
Faitau le tala lena e amata i le parakalafa mulimuli o loo i le itulau e 148. O faapefea ona aafia lou olaga i le amio sa’o a isi?
Suesue le parakalafa lona lima i le itulau e 143. Mafaufau i le faia o se iloiloga o lou lava olaga, e pei ona fautua mai ai Peresitene Kimball. Ia fesili ifo ia te oe lava ia fesili sa ia fesili ai.

Mau e Faatatau I Ai: Iopu 27:5–6; Faataoto 20:7; Alema 53:20–21; MFF 97:8; 136:20, 25–26

Daniel in lion’s den — O Tanielu sa “pueina faapagota ma faapologaina ae o se perofeta foi a le Atua o le sa naunau e oti mo ona talitonunga maumaututu. Pe sa tuuina ea le amio sa’o i se tulaga maualuga?”

members partaking of sacrament — “O feagaiga ua tatou osia ma le Atua e aofia ai folafolaga e faia, e le na o le aloese mai le faia, ia galueaiina le amiotonu faatasi ai ma le aloese mai le tiapolo.”

men in fiery furnace — O Sataraka, Mesako, ma Apeteniko “faafesagai ma le ogaumu aasa nai lo le faafitia o lo latou Atua.” O le Alii sa faasaoina i latou mai le afi.