Mataupu 16

O Le Sapati—O se Aso Fiafia

O le Sapati o se aso e taua mo tapuaiga atoatoa lelei ma le olioli.

Mai le Soifuaga o Spencer W. Kimball

Ao malaga asiasi Peresitene Spencer W. Kimball i le Ekalesia atoa, sa fiafia o ia ina ua maua atu le Au Paia o faamamaluina le aso Sapati. Sa ia faamatala lona feiloai atu i ni alii faapitoa se toalua o e na faamanuiaina mo a la’ua taumafaiga ia faapaiaina le aso Sapati:

“I se konafesi faalesiteki talu ai nei, sa ou faatalanoaina ai se alii mo se valaauga taua i le toe faatulagaina o le siteki. Ma sa ou fai atu ia te ia, ‘O le a lau galuega?’ Sa ia fai mai, ‘E fai la’u pamu penisini.’ Ma sa ou faapea atu, ‘E tatala i le Sapati?’ O lana tali sa faapea mai, ‘E leai, e le tatalaina.’ ‘Ia, ae mafai faapefea ona e ola? O le toatele o le aufai pamu penisini e foliga mai ua manatu i latou e tatau ona tatala i le Sapati.’ O loo mafai lava ona ou ola lelei,’ o lana tala lea. ‘O loo agalelei mai lava le Alii ia te au.’ ‘Pe le o i ai nisi o loo faatautava ma oe? sa ou fesili ai. ‘Ioe, e sao,’ o lana tali mai lea. ‘O le isi ituala e i ai se alii e tatala lana pisinisi i le Aso Sa atoa.’ ‘Ae e le tatalaina lava la lau pisinisi?’ na ou fesili atu ai. ‘Lau susuga, e leai,’ na ia tali mai ai, ‘ma ou te faafetai ai, o loo agalelei pea le Alii, ma ua lava mea o ia te au mo mea ou te manaomia.’

“Sa ou i ai foi i se isi siteki, o se polokalama foi e toe faatulagaina ai, ma sa iloiloina ai se tasi o uso mo se tasi o tofiga maualuga; ma ina ua matou fesiligia o ia mo lana galuega, sa ia faapea mai o lana galuega o le faatauoloa. ‘Ae, o le tele o faleoloa e tatala i le Sapati. Ae a outou?’ ‘E tapuni lo matou faleoloa i le Aso Sa,’ o lana tala mai lea. ‘Ae mafai faapefea ona outou tauva ma nei tagata o loo tatala o latou fale i aso e fitu o le vaiaso?’ ‘Matou te tauva lava. O le mea sili o loo matou ola lelei pea,’ o lana tali mai lea. ‘Ae le o le Sapati o se aso sili lea [mo faatauga]?’ ‘Ioe,’ sa tali mai ai, ‘masalo e faaluaina a matou faatau e faia i le Sapati nai lo se aso e masani ai, ae o loo matou ola lelei pea lava, ma e agalelei mai lava le Alii; e alofa mai lava o ia; aua e lelei lava o ia.’ … Ma sa le mafai ona taofia lo’u faapea atu, ‘Ia faamanuia le Atua ia te oe, lo’u uso faamaoni. O le a le faagaloina e le Alii ia nei osigataulaga. E mama au tupe. O le a mautinoa lava le le taofia ai o oe mai le mauaina o lou auala i le malo o le Atua.’ ”¹

Sa silafia e Peresitene Kimball o le Sapati o se aso mo tapuaiga atoatoa ma le olioli—o se taimi e tuu ese ai mea o le lalolagi ma faatumuina le aso i gaoioiga amiotonu. Na ia sii maia mau, sa ia faamalosiauina ai le Au Paia ina ia faia le Sapati “o le aso fiafia” ma tulimatai atu i lea aso ma ni “loto olioli, ma mata fiafia” (Isaia 58:13; MFF 59:15).²

Aoaoga a Spencer W. Kimball

Ua poloaiina pea lava e le Alii Ona tagata ina ia faamamalu le aso Sapati.

Na foi ifo Mose mai le gatete ma le asu o le Mauga o Sinai ma aumai i le fanauga femoumouai a Isaraelu ia Tulafono e Sefulu, o tulafono faavae mo amioga o le olaga. Peitai, o nei tulafono e le o ni tulafono fou. Sa iloa e Atamu ma ana fanau, o e na poloaiina ia ola ai mai le amataga, ma sa toe fofogaina mai e le Alii ia Mose. Ma sa muamua mai tulafono i le soifuaga faalelalolagi ma sa avea o se vaega o le tofotofoga o le tagata sa faatulagaina i le fono i le lagi.

O le tulafono muamua o Tulafono e Sefulu e tatau i tagata ona tapuai i le Alii; o lona fa ua atofaina ai le aso Sapati e faapitoa mo ia tapuaiga:

“Aua nei fai mo oe ni atua ese i o’u luma. […]

“Ia e manatua le aso sapati e te faapaiaina.

“O aso e ono e te galue ai, ma fai ai au galuega uma lava:

“A o le aso fitu o le sapati lea ia Ieova lou Atua: aua e te faia ai se galuega e tasi, o oe, ma lou atalii, ma lou afafine, o lau auauna tane, ma lau auauna fafine, o au manu foi, ma le tagata ese o loo mau ma oe:

“Aua na faia e Ieova i aso e ono o le lagi ma le lalolagi, atoa ma le sami, ma mea uma lava o i ai, ona malolo ai lea o ia i le aso fitu: o le mea foi lea na faamanuia ai e Ieova le aso sapati, ma na faapaiaina ai.” (Esoto 20:3, 8–11.)

I manatu o le toatele, o le solia o le sapati o se mea e faatauvaa, ae i lo tatou Tama Faalelagi o se le usitai lea i se tasi o tulafono autu. O se faamaoniga lea o le toilalo o le tagata e ausia le suega mo le tagata lava ia, ua faatulagaina mo i tatou taitoatasi ao lei faia le lalolagi, “ia iloa ai, pe latou te faia mea uma e poloaiina ai i latou e le Alii lo latou Atua.” (Aperaamo 3:25.) …

O le tulafono paia sa aumaia mai le taalililili o le Mauga o Sinai “Ia e manatua le aso sapati e te faapaiaina.” O lena tulafono e lei toe aveeseina lava pe toe faafouina. Ae peitai, ua toe faamalosia i nei ona po:

“A ia manatua i lenei aso, o le aso o le Alii, ia e avatu au taulaga ma au faamanatuga i Le Silisili, ma ta’uta’u atu au agasala i ou uso, ma luma foi o le Alii.

“Aua foi e te faia se isi mea i lenei aso, ae tau o le saunia o au meaai i le loto e tasi ina ia … atoatoa ona lelei lou olioli.” (MFF 59:12–13.)³

O le Sapati e le o se aso mo pisinisi po o faafiafiaga.

Ou te … fia uunaia le Au Paia i soo se mea, ia matuai tausia le aso Sapati. O le aso paia o le Alii, ua televave ona leiloa le taua o lona paia i le lalolagi atoa. … Ua atili toatele tagata ua faaleagaina ia faamoemoega paia o le Sapati i le sailia o oa, o tuinanau, o faafiafiaga, ma le tapuai i atua ese ma mea faalelalolagi. Matou te uunaia pea lava pea le Au Paia uma ma tagata matata’u i le Atua i soo se mea, ina ia faamamalu le aso Sapati ma tausia ia paia. O le a le tatalaina ia pisinisi i le aso Sapati pe a [tatou] le faatauaina i lena aso paia. E tutusa foi lena ma mataaga mo tafaoga, gaoioiga o taaloga, ma soo se ituaiga o gaoioiga faafiafia. E foliga mai ua sili atu le sailia o tupe, nai lo le tulafono a le Alii, “Ia outou tausiusi i o’u sapati, ma ia matatau i lo’u malumalu” (Levitiko 19:30).⁴

Ua matou matauina i lo tatou lalolagi Kerisiano, i le tele o nofoaga, e tatalaina ai lava ia pisinisi mo faatauga i le Sapati paia. Matou te mautinoa o le fofo o lenei mea o loo ia i tatou lava, o le lautele o tagata faatau. E mautinoa lava o faleoloa ma pisinisi o le a le tatalaina pe afai o i tatou, o tagata, tatou te le o atu e faatau mai ai. Pe mafai lava faamolemole, ona outou toe iloiloina lenei mataupu. Ave i a outou afiafi faaleaiga ma talanoaina ai ma lau fanau. O se mea matagofie pe afai e fuafua aiga uma e amata atu nei, e le toe faia ai se faatau i le Sapati.⁵

I se tulaga lautele, ua avea i tatou ma se lalolagi o [tagata] soli Sapati. I aso Sapati e tumu ai vaituloto i vaa, e tumutumu matafaga, e sili atu ona toatele tagata e maimoaina faaaliga, e faatumulia ia malae tapolo i tagata taaalo. Ua sili i tagata ona avea le Sapati e fai ai tietiega faakaupoe, o mafutaga, tafaoga faaleaiga; e oo foi i taaloga lakapi ua faia i le aso paia. “O pisinisi masani lava” o se anaga lea a le toatele, ma o lo tatou aso paia ua avea o se aso mo gaoioiga faafiafia. Ma talu ai ona o le toatele o tagata ua latou faia le aso e pei o se aso o gaoioiga faafiafia, ua toatele foi isi ua taumafai e faataunuu ia manaoga o tagata fiafia e tafafao ma le au sue tupe.…

O le tutuli manu ma le fagogota i le aso o le Alii o le le tausia lea ia paia. O le totoina po o le tausia po o le seleseleina o faatoaga i le Sapati, o le le tausia lea o le aso o le Alii ia paia. O le o atu i atumauga mo ni tafaoga, o le auai i taaloga po o tietiega faakaupoe po o tuuga po o faaaliga po o nisi mea faafiafia i lena aso, o le le tausia lena o le faamanatuina o le paia.

E foliga mai o se mea ua ese ai, ia nisi o le Au Paia o Aso e Gata Ai, e faamaoni i isi mea uma, e taumafai e tauamiotonuina i latou lava i le le auai i a latou sauniga lotu i nisi taimi, ona o gaoioiga faafiafia, ma ua manatu o le a misia ia le faiva sili ona lelei pe afai o le a le i ai se tasi i le vai i le aso muamua, pe o le a le lava foi le umi o le tafao pe afai e le amataina i le Aso Sa, pe o le a misi foi e se tagata le ata tifaga sa ia manao e matamata ai pe a le alu i le Sapati. Ma i lo latou solia o le Sapati, e masani ona o faatasi ai ma o latou aiga.…

E le faitioina ia gaoioiga talafeagai—o taaloga, tafaoga, tala faatino, ma ata tifaga. O ia mea uma e i ai le aoga mo le toe faafouina o le olaga, ma o le Ekalesia o se faalapotopotoga lea e fiafia e lagolagoina ia gaoioiga. Ae peitai e i ai le taimi ma le nofoaga tatau mo mea lelei uma—o le taimi mo le galue, o le taimi mo le taalo, o le taimi foi mo le tapuai. …

E moni, e tatau ona faigaluega nisi tagata i le Sapati. Ma, o le mea moni, o nisi o galuega e alagatatau lava—mo se faataitaiga, o le tausia o e mamai—e tatau lava ona galulue e faapaia le Sapati. Ae ui i lea, o ia gaoioiga o o tatou faamoemoega o se manatu sili lea ona taua.⁶

O nisi taimi o le tausia o le Sapati e faamatalaina o se tulaga o le ositaulaga ma le faagaloina o le tagata lava ia, ae e leai. Ua na o se tulaga o le faatulagaina o taimi ma le filifilia o mea o le a tatou faia. O loo lava le taimi, aemaise lava i lo tatou vaitaimi o le talafaasolopito o le lalolagi, i le ono o aso o le vaiaso e faia ai a tatou galuega ma tafaoga. E tele mea e mafai ona faia e faatulaga ma uunaia ai gaoioiga o aso o le vaiaso, e aloese mai ai i le Sapati.⁷

O le Sapati o se aso mo i tatou e faatamaoaigaina ai faaleagaga e ala i le tapuai ma faatinoga lelei.

O le Sapati o se aso paia e faia ai mea lelei ma le paia. O le aloese mai galuega ma faafiafiaga e taua, ae ua le lava lena. O le Sapati e manaomia ai mafaufauga ma galuega aoga, ma afai e na o le nofonofo o se tasi e le faia se mea i le Sapati, ua ia solia lava. O le tausia [o le sapati], o le a alu ifo ai se tagata i ona tulivae i le tatalo, saunia lesona, suesue i le talalelei, mafaufau loloto, asiasi i e mamai ma mafatia, tusiina o tusi i faifeautalai, faia o sina malologa puupuu, faitauina o tusi aoga, ma le auai i sauniga uma e tatau ona auai i lena aso.⁸

Ia i ai se taimi [o le Sapati] e faatasitasi ai o se aiga ma talatalanoa le tasi i le isi, e suesue ai tusitusiga paia, asiasi i uo, aiga, ma e mamai ma tuua toatasi. O le taimi lelei foi lena e te galue ai i au api o talaaga ma gafa.⁹

I le faa Eperu o le Sapati o lona uiga o le “malolo.” E mafaufau loloto ai ma le toafilemu, filemu le mafaufau ma le agaga. O se aso e lafoai ai lagona manatu faapito ma gaoioiga faatosina.

O le aso Sapati ua tuuina mai i augatupulaga uma o tagata mo se feagaiga faaauauina [tagai Esoto 31:16]. O se faailoga i le va o le Alii ma lana fanau e faavavau [tagai Esoto 31:17]. O se aso e tapuai ai ma faaali atu lo tatou agaga faafetai ma le talisapaia i le Alii. O le aso tatou te tuuese ai manatu uma faalelalolagi ma vivii atu ai i le Alii i le lotomaulalo, aua o le lotomaulalo o le amataga lea o le faaeaina. E le o se aso mo puapuaga ma avega, ae o se aso mo malologa ma fesagisagiaiga amiotonu. E le o se aso mo ni faiga toonai tetele, ae o se aso mo sina meaai faigofie ma se taumafataga faaleagaga. … O se aso ua tuuina mai ma le agalelei ia i tatou e lo tatou Tama Faalelagi. O se aso e tuuina atu ai manu e tataa ma malolo; e teu ai le suotosina i le fale e teu ai mea faigaluega ma faamalolo ai isi masini; o le aso e saoloto ai le pule o le galuega ma le tagata faigaluega, o le matai ma le auauna, mai le suaina, eliina, ma le faamaluina [o le eleele]. O se aso e loka ai le ofisa ma toe tolopoina pisinisi, ma galo ai faafitauli; o se aso e mafai ona malolo ai le tagata mo sina taimi mai lena uluai poloaiga, “E te ai foi au mea e ai ma le afu o ou mata, seia e toe foi atu i le eleele. … ” [tagai Kenese 3:19.] O se aso e mafai ona malolo ai le tino, faamalolo ai le mafaufau, ma tuputupu ae ai le agaga. O se aso e mafai ona lagiina ai viiga, tuuina atu ai tatalo, laugaina ai lauga, ma tuuina atu ai molimau, ma mafai ai ona a’e maualuga ai le tagata, e toetoe lava a soloiesea ai le taimi, vanimonimo, ma le mamao o lona va ma lona Foafoa.

O le Sapati o le aso e faia ai suesuega—e iloiloina ai o tatou vaivaiga, e ta’uta’u atu ai a tatou agasala i a tatou paaga ma lo tatou Alii. O se aso e anapopogi ai i “ofu talatala ma le efuefu.” O se aso e faitau ai i tusi lelei, o se aso e manatunatu ma mafaufau loloto ai, o se aso e aoao ai i lesona mo le perisitua ma faalapotopotoga o ausilali, o se aso e suesue ai tusitusiga paia ma saunia ai lauga, o le aso e fai ai sina moe laitiiti ma malolo ma saoloto, o se aso e asiasi ai i e mamai, o se aso e talai ai le talalelei, o se aso o le talaiga, o se aso e talatalanoa filemu ai ma le aiga ma faamasani ma a tatou fanau, o se aso mo faamasaniga tatau, o se aso e faia ai mea lelei, o se aso e inu ai mai le punavai o le atamai ma faatonuga, o se aso e saili ai mo le faamagaloga o a tatou agasala, o se aso mo le faatamaoaigaina o o tatou agaga ma o tatou loto, o se aso e toefuatai ai i tatou i o tatou tulaga faaleagaga, o se aso e taumamafa ai i faatusa o le osigataulaga ma le togiola [a le Alii], o se aso e manatunatu ai i le matagofie o le talalelei ma e uiga i malo e faavavau, o se aso e a’e maualuga ai i le ala e agai atu i lo tatou Tama Faalelagi.¹⁰

Matou te faamoemoe… pe lei amataina a outou sauniga o le Aso Sa, pe o le tuua foi, e fuafua lava i le faasologa … o a outou sauniga, o le a e faia le mea sa fetalai atu ai le Faaola i le au soo sa Nifae e fai: Ina ua uma ona ia aoaoina i latou, sa ia fetalai atu ia i latou e o atu i o latou aiga ma mafaufau loloto ma tatalo i mea sa ia ta’ua (tagai 3 Nifae 17:3). Ia tatou manatua lena faatulagaga i o tatou mafaufau.¹¹

O se Sapati atoatoa ma le faamalieina, e aofia ai le auai i sauniga lotu ma le aai ma feinu i le faamanatuga.

E foliga mai o le finagalo o le Alii e uiga i se Sapati atoatoa ma le faamalieina, o le tapuai ma le aoao lea e uiga ia te ia ma le taumafa i lana faamanatuga. E finagalo o ia ina ia tatou faatumuina le aso i gaoioiga aoga ma le faaleagaga. E finagalo o ia ina ia tatou faia nei mea i le agaga faafetai ma le loto atoa, ma foliga fiafia, ae le o le ata leoleoa. E finagalo i o tatou tama ma alii talavou e auai i a latou sauniga faaleperisitua ma saunia a latou lesona ma le loto fiafia. E finagalo i ona tagata ina ia auai i le Aoga Sa ma aoao ai iina e uiga i lana ata o le faaolataga. E finagalo i ona tagata ina ia auai i sauniga faamanatuga e vivii faatasi ma le Au Paia ma tatalo i le agaga ma le o loo fai ma fofoga taumomoli, ma taumamafa i faatusa o le faamanatuga, e toe folafola atu ma le faamaoni a’ia’i, gauai atu atoa, o galuega o le faavavau, ia manatua ai pea o ia.¹²

O ai e tatau ona auai i sauniga faamanatuga? Sa tuuina atu le tulafono e ala i le Perofeta ia i latou “o e ua tu vae i luga o laueleele o Siona,” o tagata auai o lana ekalesia [tagai MFF 59:3, 9]. O tulaga e manaomia e le na o tagata matutua e faatatau i ai ae ua aofia ai uma ai e laiti ma e matutua. … O le a se mea e mafai ona fai e matua e fesoasoani lelei ai i le faamautuina o le aiga, nai lo le aiga atoa, toatele pe laitiiti, e o atu faatasi i le falelotu i sauniga faamanatuga? O iina o le a aoaoina ai e le fanau le masani o le auai soo [i le lotu], o le a taofia ai mai le solia o le Sapati, ma e ui lava ina laiti, o le a latou malamalama i aoaoga ma molimau, ma le agaga iina. E tatau ona avea taitai o le siteki ma uarota ma korama, ma faataitaiga o lenei tulaga i tagata.¹³

A o avea au o se tamaitiiti, sa aoaoina au i le masani o le alu i sauniga faamanatuga. O taimi uma lava ma te o ai ma lo’u tina. O na aoauli mafanafana e le umi ae ou fia moe ma faalagolago atu i ona vae [ou] te moe ai. Atonu e lei tele se mea sa ou aoaoina mai lauga, ae sa ou aoaoina le masani o le “alu i sauniga.” O lea masani sa tumau ia te au i lo’u olaga atoa.¹⁴

E leai se tamaitiiti na te faaaogaina ma le iloa le susulu o le la; ae le malamalama e aumaia e le malamalama le malosi i si ona tamai tino. E leai se tamaitiiti na te iloa le taua o le suasusu o lona tina po o meaai tuu apa, e mafai ona maua ai e ia le tino malosi. Ae, o iina na te maua mai ai lona malosiaga ma le malosi e tuputupu ae ai ma iu ai ina avea ma se alii matua. …

Ma o tamaiti uma, e aunoa ma le iloaina o le taua o se mea e mulimuli mai, e mafai ona aoaoina ni mea se tele mai le sauniga faamanatuga. O le a latou aoaoina se mea i taimi uma lava.¹⁵

Pe le o le maumauina ea o se taimi ma taumafaiga e tele, pe afai o taeao uma o Aso Sa tatou te tutu ai ma faapea ifo, “E tatau ea ona ou alu i le sauniga a le au perisitua pe leai? E tatau ea ona ou alu i le sauniga faamanatuga i le aso pe leai? E tatau ea ona tatou o pe leai?” Oka se maimau o na taumafaiga. … Ia faamautu nei loa.¹⁶

O se alii ou te masani ai e nofo i le fale i aso Sapati uma lava ma taumafai e tauamiotonuina ia lava i le faapea mai, e sili atu le aoga ia te ia o le nofo i le fale ma faitau se tusi lelei nai lo le auai atu i le sauniga faamanatuga ma faalogo i se lauga e le lelei. Ae peitai, o le aiga po o le a lava le paia e tatau ona i ai, e le o se fale o le tatalo. E le faia ai i totonu se faamanatuga; e le maua ai ni fegalegaleaiga ma tagata o le ekalesia, pe ta’uta’ atu ai foi agasala i taitai. Atonu e ta’ua ia mauga o malumalu o le Atua ma o le vaomatua ma vaitafe o galuega a ona aao, ae ua na o le falelotu, po o le fale tatalo, e mafai ona faataunuuina uma ai ia tulaga manaomia mo le Alii. Ma o lea ua ia faamamafaina mai ai ia i tatou e faapea: “E tatau ona potopoto soo le ekalesia e [taumamafa] i le areto ma le uaina i le faamanatuga o le Alii o Iesu.” (MFF 20:75.)¹⁷

Tatou te le o i sauniga o le Sapati ina ia faafiafiaina pe na o le aoaoina. Tatou te o e tapuai i le Alii. O se matafaioi faaletagata lava ia, ma e tusa lava po o le a se saunoaga mai le pulelaa, afai e manao se tasi e tapuai i le Alii i le agaga ma le upu moni, e mafai ona ia faia e ala i le auai i sauniga, taumafa i le faamanatuga, ma mafaufau i le matagofie o le talalelei. Afai ua le aoga ia te oe le sauniga, ua e toilalo. E le mafai ona tapuai se isi mo oe, e tatau ona e faatali lava oe mo le Alii.¹⁸

Ua folafola mai e le Alii ia faamanuiaga ia i latou o e faamaoni i le tausia o le Sapati.

O le mafuaaga o le poloaiga [ia tausia le aso Sapati ia paia] e le o le taofia mai o se mea mai tagata. O poloaiga uma e tuuina atu e le Atua i ana auauna, e mo le manuia o i latou o e mauaina ma usitai i ai. E faamanuiaina le tagata i le tausia ma le faaeteete ma le faamaoni; e mafatia foi le tagata i le solia o tulafono a le Atua. …

Ou te maua i a’u femalagaiga ia ni tagata faamaoni latou te faataatia ese le sailia o ni tupe mama i le Sapati ma le taulimaina o mea ua faasaina. Sa ou maua ni alii fai lafumanu latou te le tasuia a latou lafu i le Sapati; o laulau faatau fualaau aina i tafaala, e masani ona tatala i ao ma po i le vaitaimi o le tau o fualaau aina, ua tapunia i le Sapati; o fale talavai, o fale aiga ma tulaga i tafaala ua tapunia i le aso o le Alii—ma e foliga mai e manuia lava i latou e umiaina, ae o le taimi lava foi lea, e maua ai le faamalieina moni i le usitaia o le tulafono. Ma o taimi uma ou te vaai ai i tagata lelei ua latou le manatu i nei ituaiga o alagatupe maua, ou te fiafia ma lagonaina i lo’u lava loto e faamanuiaina i latou mo lo latou faatuatua ma le tumau mausali.¹⁹

Ou te iloa o le a le tigaina ia tagata, i le taimi mulimuli, i soo se osigataulaga lava e faia i mea tau tupe, aua o le [Atua] ua poloaiina i tatou e tausi ana tulafono ma ua luitauina foi i tatou:

“… ma ia outou tofotofo mai ai ia te au i lenei mea, ua fetalai mai ai Ieova o au, pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele.” (Malaki 3:10.)²⁰

E faatatau i lenei poloaiga, faapea ma isi, ia tatou mulimuli i le perofeta o Iosua: “O lenei, ia outou matatau ia Ieova, ma auauna ia te ia ma le loto sa’o ma le faamaoni: … ina filifili ia o outou i le aso nei, po o ai tou te auauna i ai; … a o au nei ma lo’u aiga matou te auauna ia Ieova.” (Iosua 24:14–15.)

Ona mafai lea ona tatou faamoemoe mo faamanuiaga sa folafola mai i le fanauga a Isaraelu: “Ia outou tausiusi i o’u sapati ma outou matatau i lo’u malumalu: O au o Ieova.”

“Afai tou se savavali i au tulafono, ma tausi i au poloaiga, ma fai ai;

“Ona ou avatu ai lea o le ua ia te outou i ona po e tatau ai, e fua mai foi le laueleele i ona lava fua, o laau foi o i le fanua e fua mai ai i o latou fua.

“E aulia le taugavine e le soligasaito; e aulia foi le tau e lulu ai saito e le taugavine, tou te aai foi ia outou mea e ai, ma maoona ai; tou te nonofo foi i lo outou nuu ma le filemu.

“Ou te avatu le filemu i le nuu, tou te taooto foi, e leai se tasi e faamatau ia te outou.” (Lev. 26:2–6.)²¹

Afai tatou te alolofa i le Alii, o le a tatou tausia le aso Sapati ma faapaiaina.

E foliga mai o le mafuaaga e faigata ai ona tausia e le toatele o tagata le aso Sapati, ona o loo tusia pea i luga o papatusi maa ae le o tusia i o latou loto. …

… I o tatou lava aso e foliga mai [o le Alii] e silafia le atamai o ona tagata, ma manatu ai latou te mauaina le agaga atoa o le tapuaiga ma le tausia o le Sapati ina ua ia fetalai atu ia i latou:

“Ia e osia le taulaga i le Alii lou Atua i le amiotonu, o le loto momomo ma le agaga maulalo lava lea.” (MFF 59:8.)

… Sa ia tuuina mai ia i tatou le tulafono muamua ma le sili:

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” (Mataio 22:37.)

[Ou te] le malamalama i se tasi e alofa i le Alii ma lona loto atoa ma lona agaga atoa, ma le ua i ai le loto momomo ma le agaga salamo, e iloa meaalofa le mafaitaulia ua tuuina atu e le Alii ia te ia, ae le mafai ona faaaluina le aso e tasi mai aso e fitu i le agaga faafetai ma le faamalo, ma le faataunuuina o galuega lelei a le Alii. O le tausia o le Sapati o se faaalia lea o le fuataga o lo tatou alofa mo lo tatou Tama Faalelagi.²²

E masani ona manatunatu le tagata po o fea e tosi ai le laina: po o le a le mea e tatau ma le mea e le tatau ona fai i le Sapati. Ae afai e alofa se tasi i le Alii ma lona loto atoa, manatu, mafaufau, ma le malosi atoa; afai e mafai e se tasi ona tuuese le manatu faapito ma taulimaina manaoga; afai e mafai e se tasi ona fuaina ia gaoioiga taitasi o le Sapati i se fua masani o le agaga tapuai; afai e faamaoni se tasi i le Alii ma ia lava; afai e ofoina atu e se tasi le “loto momomo ma le agaga salamo,” e ono tulai mai e le i ai se soli Sapati i le olaga o lena tagata.²³

Fautuaga mo Suesuega ma Aoaoga

Mafaufau i manatu nei a o e suesueina le mataupu po o lou saunia foi e aoao atu. Mo nisi fesoasoaniga faaopoopo, tagai i itulau v–ix.

Toe suesue itulau 187–189. Mafaufau i le tulaga taua ua tuuina e le Alii i le Sapati ma aisea ua ese ai le Sapati mai isi aso o le vaiaso. O le a le mea e avea ai le Sapati “o se fiafia”?
Toe suesue itulau 188–191, ma vaai mo mea e le tatau ona tatou faia i le Sapati. Aisea e le talafeagai ai ia gaoioiga i le Sapati? I le itulau 170–74, o loo tauina mai ai e Peresitene Kimball ni faataitaiga o “gaoioiga tatau faaleagaga” mo le Sapati. O a ni mea ua outou faia ma lo outou aiga e faateleina ai lou tausia o le Sapati?
Na saunoa Peresitene Kimball “o mafuaaga e sili ona taua mo le iloiloina” mo i latou e manaomia e galulue i le Sapati (itulau 189). O a mea e mafai ona faia e tagata ina ia faatumauina ai le agaga tapuai i le Sapati pe afai e moomia ona latou galulue?
O le a le uiga pe a tatou faapea atu o le Sapati o se aso e malolo ai? (Mo nisi o faataitaiga, tagai i itulau 189–190.) Aisea e leaga ai le na o le nofonofo ma malolo, e leai se mea e faia i le Sapati?
Toe iloilo ia mafuaaga e auai atu ai i sauniga a le Ekalesia i itulau 191–193. O anafea se taimi lata mai na e lagonaina ai le fia tapuai i se sauniga lotu ae aisea foi? E mafai faapefea ona e avea lou auai i sauniga lotu ma tapuaiga ia faateleina le aoga?
Ua molimau mai Peresitene Kimball i faamanuiaga tatou te maua pe a tatou tausia le aso Sapati ia paia (itulau 195–197; tagai foi i tala i le itulau 187, 188). O a nisi o faamanuiaga ua e maua i lou tausia o lenei tulafono?
I se afiafi faaleaiga po o se fono faaleaiga, iloilo po o le a se mea e mafai ona faia e lou aiga e fesoasoani ai le tasi i le tasi e tausia le Sapati ia paia.

Mau e Faatatau i Ai: Kenese 2:1–3; Mareko 2:23–28; 3:1–5; Mosaea 13:16–19; MFF 68:29

Sunday School — “E ta’ua le sapati o le aso fiafia, le aso ua sa ia Ieova” (Isaia 58:13).

family entering Church — O le Sapati “o se aso e tapuai ai ma faailoa atu le agaga faafetai ma le agaga talisapaia i le Alii.”

family — “Ua aoao mai Peresitene Kimball, o le Sapati o se aso “e talatalanoa filemu ai ma le aiga.”