usa ka malipayong bana ug asawa

Leksiyon 12 Materyal sa Pagpangandam sa Klase

Pag-amuma sa Relasyon sa Kaminyoon

Nakakita ba kamo sukad og usa ka magtiayon nga adunay lig-on, malipayong kaminyoon ug naghunahuna unsa ang labing importante nga butang sa ilang kalamposan? Nag-obserbar si Presidente Gordon B. Hinckley, “Ang usa ka maayong kaminyoon nagkinahanglan og panahon. Nagkinahanglan kini og paningkamot. Kinahanglan inyo kining trabahoon. Kinahanglan inyo kining palamboon” (“Life’s Obligations [Mga Obligasyon sa Kinabuhi],” Ensign, Peb. 1999, 4). Samtang kamo magtuon sa doktrina ug sa mga baroganan dinhi niini nga leksiyon, hunahunaa unsay inyong mahimo sa pag-andam sa inyong mga kaugalingon alang sa usa ka malipayong kaminyoon o sa pag-amuma og mas maayo sa kaminyoon nga kamo aduna.

Seksiyon 1

Unsaon sa akong kapikas ug kanako sa pagtukod og usa ka malipayon, mahangtorong kaminyoon?

Sa usa ka kalibotan diin daghang mga kaminyoon nakita nga nakigbisog o natapos sa diborsyo, ang pipila mahimong maghunahuna kon ang kalipay sa kaminyoon tinuod ba nga posible alang kanila. Si Elder Jeffrey R. Holland sa Korum sa Napulog Duha ka Apostoles mitudlo sa mosunod nga mensahe sa paglaom:

Elder Jeffrey R. Holland

Tugoti akong mopahayag sa walay pagduha-duha, sa hingpit, sa walay pagsibog nga dili lamang nga adunay ingon og usa ka butang sama sa malipayong kaminyoon, apan ang malipayong mga kaminyoon mao ang lagda, dili ang nasukwahi.

Si Sister Holland ug ako mao ang buhing panghimatuod nga kamo dili lamang mahimong malipayon apan nga kamo mahimong maghingapin sa kamalipayon. …

Kinahanglan ninyo nga paningkamotan ang usa ka kaminyoon. Ang matag maayong butang nga akong nahibaloan niini nga kalibotan kinahanglan nga inyong paningkamotan.

Ang Dios motabang kaninyo. Sa tanang mga butang niining kalibotan nga Siya motabang kaninyo, Siya motabang kaninyo sa inyong mga kaminyoon ug sa inyong mga pamilya, tungod kay kini importante ngadto Kaniya sa labing minos gani sama nga kini importante nganha kaninyo. (“You Asked—They Answered: Marriage and Family,” New Era, Ago. 2016, 3)

usa ka magtiayon nagginunitay diha sa templo

Basaha ang mosunod nga pamahayag ni Elder L. Whitney Clayton, kinsa miserbisyo isip usa ka sakop sa Seventy, mahitungod sa unsay nagtampo ngadto sa usa ka malipayon ug mahangtorong kaminyoon. Hunahunaa ang pagmarka sa mga baroganan nga inyong makaplagan.

Elder L. Whitney Clayton

Akong nabantayan nga diha sa pinakamalipayong kaminyoon gikonsiderar sa bana og asawa ang ilang relasyon nga usa ka perlas nga bililhon kaayo, usa ka bahandi nga dili mapalit. … Nahibalo sila nga walay laing relasyon nga makahatag og dakong kalipay, momugna og kaayo, o dakong personal nga kalamboan. …

… Ang malampuson nga mahangtorong mga kaminyoon gipundar diha sa hugot nga pagtuo sa Ginoo nga si Jesukristo ug gipasikad sa Iyang mga pagtul[o]n-an [tan-awa sa “Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org]. …

… Ang malipayong mga kaminyoon nag-agad sa gasa sa paghinulsol. …

Ang pagpaubos maoy importante sa paghinulsol. Ang pagpaubos dili hinakog. … Ang pagpaubos nagpasabot nga ang magtiayon magtinguha sa pagpanalangin, pagtabang, ug pagbayaw, unahon ang usa sa matag desisyon. …

… Sa pinakamalipayong kaminyoon nga akong nakita ang kamasulundon diha sa usa sa makalipay nga kasugoan—nga kita “magpuyo nga maghiusa sa gugma” [Doktrina ug mga Pakigsaad 42:45]. (“Kaminyoon: Tan-awa ug Pagkat-on,” Liahona, Mayo 2013, 83, 84, 85)

icon, paghisgot

Paghisgot agi og Pagpangandam alang sa Klase

Paghunahuna og usa ka magtiayon nga inyong kaila nga adunay malipayong kaminyoon. Duol ngadto kanila ug hangyoa sila sa pagpakigbahin og mga baroganan nga importante sa ilang kalamposan. Samtang sila nagsulti, i-rekord unsay inyong nakat-onan ug pangandam sa pagpakigbahin atol sa klase.

Seksiyon 2

Sa unsang paagi nga ang pagsunod sa ehemplo ni Jesukristo nagtabang kanako sa pag-amuma sa akong kaminyoon?

Si Presidente Russell M. Nelson mitudlo mahitungod sa kaimportante sa pag-amuma sa kaminyoon:

Presidente Russell M. Nelson

Ang kaminyoon nagdala og dagkong mga kahigayonan sa kalipay kay sa bisan unsa pang laing tawhanong pakigrelasyon. Gani ang ubang managtiayon wala makakab-ot sa ilang hingpit nga potensyal. Gipasagdan nila ang ilang gugma nga mawalay pulos, nagbaliwala sa usag usa, gitug[o]tan ang laing tinguha o ang dag-om sa pagpasagad mopahanap sa panan-aw kon unsa ang angay sa ilang kaminyoon. Ang kaminyoon mas malipayon kon mas mabinantayon ang pag-amuma. (“Pag-amuma sa Kaminyoon,” Liahona, Mayo 2006, 36)

Uban sa mga panudlo nga gihatag ni Apostol Pablo ngadto sa mga miyembro sa Simbahan sa Efeso mao ang tambag kabahin sa kaminyoon.

icon, pagtuon

Pagtuon agi og Pagpangandam alang sa Klase

Basaha ang Mga Taga-Efeso 5:25, 28–31, ug paghunahuna mahitungod kon unsaon sa mosunod nga ehemplo ni Jesukristo nga makatabang sa usa ka bana ug asawa sa pag-amuma sa ilang kaminyoon.

Jesus Naghugas sa mga Tiil sa Apostoles, ni Del Parson

Ang pagsunod sa ehemplo sa Manluluwas makatabang sa usa ka bana ug asawa sa pagtuman sa ilang “ligdong nga kapangakohan sa paghigugma ug pag-amuma sa usag usa” (“Ang Pamilya: Usa ka Pamahayag ngadto sa Kalibutan,” ChurchofJesusChrist.org). Ang pipila ka paningkamot sa pag-amuma sa kaminyoon mahimong dako, apan ang pipila sa labing epektibo ug makahuloganong mga panglihok-lihok mao ang “gagmay ug yano” (Alma 37:6). Sumala sa gitudlo ni Presidente Dieter F. Uchtdorf, kanhi sa Unang Kapangulohan, “Ang talagsaong kaminyoon gitukod sa hinay-hinay, matag adlaw, sa tibuok kinabuhi” (“Agig Pagdayeg Niadtong Miluwas,” Liahona, Mayo 2016, 78).

Si Presidente Linda K. Burton, kanhi Kinatibuk-ang Presidente sa Relief Society, mihatag og yano nga mga pangutana nga kita makagamit sa paghatag og bili sa atong mga paningkamot sa pag-amuma sa atong mga kaminyoon:

Presidente Linda K. Burton

Uban sa gamay nga pagpahiangay, kini nga mga pangutana magamit kasagaran kanatong tanan, minyo o dili minyo, ug sa bisan unsa nga sitwasyon sa atong panimalay.

1. Kanus-a ang katap[o]sang higayon nga ako sinserong midayeg sa akong kapikas, nga ako ra o atubangan sa among mga anak?

2. Kanus-a ang katap[o]sang higayon nga ako mipasalamat, mipahayag og gugma, o sa kinasingkasing nangamuyo sa hugot nga pagtuo alang kaniya diha sa pag-ampo?

3. Kanus-a ang katap[o]sang higayon nga napugngan nako ang pagsulti og usa ka butang nga nahibaloan nakong makapasakit kaniya?

4. Kanus-a ang katap[o]sang higayon diin mapainubsanon akong nangayog pasaylo—nga wala magdugang og mga pulong nga “apan kon ikaw lang unta” o “apan kon wala ka lang unta”?

5. Kanus-a ang katap[o]sang higayon nga ako mipili nga malipay kay sa mamugos nga “moda[o]g”? …

Mouban ba kamo kanako sa pagtinguha sa panabang sa Espiritu Santo sa pagtudlo kanato unsaon nga kita makabayaw sa usag usa diha sa atong nagkauyon nga mga tahas isip may pakigsaad nga anak nga mga lalaki ug mga babaye sa atong langitnong mga ginikanan? (“Magdungan Kita’g Saka,” Liahona, Mayo 2015, 31–32)

icon, pamalandong

Pamalandong agi og Pagpangandam alang sa Klase

Paghunahuna og piho nga ehemplo o pagtulon-an gikan sa kinabuhi sa Manluluwas nga makatabang og usa ka tawo sa pagpangandam o pag-amuma sa iyang kaminyoon.

Seksiyon 3

Unsaon nako pag-unong ngadto sa akong kapikas?

Sa usa ka pagpadayag nga gihatag kaniadtong 1831, mihatag ang Ginoo og pipila ka kinatibuk-ang mga balaod sa pamatasan alang sa mga miyembro sa Simbahan. Gilakip niini mao ang sugo “higugmaa ang inyong asawa sa inyong tibuok nga kasingkasing ug unong ngadto kaniya ug wala nay lain” (Doktrina ug mga Pakigsaad 42:22; tan-awa usab sa Genesis 2:24; Mateo 19:5).

Diha sa mga kasulatan ang pulong nga unong nagpasabot og kabyon, tapot, dikit, pilit, o lambigit. “Pinaagi sa eskriptuhanon nga pagpatin-aw, niana, atong nahibaloan nga ang Dios nagpaabot kanato nga ‘mokabyon’ ngadto sa atong kapikas o sa ‘pagdikit’ ngadto kaniya” (Matthew O. Richardson, “Three Principles of Marriage,” Ensign, Abr. 2005, 22).

Si Presidente Spencer W. Kimball mitudlo sa mosunod mahitungod sa hugpong sa mga pulong “wala nay lain” (Doktrina ug mga Pakigsaad 42:22):

Presidente Spencer W. Kimball

“Ang mga pulong wala nay lain nagpapha sa tanang tawo ug sa tanang butang. Niana ang kapikas mahimo nga labing importante diha sa kinabuhi sa bana o asawa ug ni sosyal nga kinabuhi ni pagpanarbaho nga kinabuhi ni pulitikanhong kinabuhi ni bisag unsang uban nga interes ni tawo ni butang ang mas importante kay sa kaubang kapikas. (The Miracle of Forgiveness [1969], 250)

Mipasabot si Elder Clayton kon unsaon ang pag-unong ngadto sa kapikas magamit samtang kita naggamit og social media:

Elder L. Whitney Clayton

Ang mga propeta nagtudlo nga ang malamposong mga pares sa kaminyoon “maun[o]ngon gay[o]d” ngadto sa usag usa [tan-awa sa Thomas S. Monson, “Gah[o]m sa Pagkapari,” Liahona, Mayo 2011, 68; Gordon B. Hinckley, “Mga Obligasyon sa Kinabuhi,” 4]. Gamiton lang nila ang social media sa pinakamaayong paagi. Wala silay itago sa mga paggamit sa Internet. Maghibaloay sila sa mga password sa ilang social network. Dili sila motan-aw sa mga profile sa internet ni bisan kinsa nga tingali makaguba sa sagradong pagsalig sa ilang kapikas. Dili gay[o]d sila mohimo ug mosulti bisan unsa nga may pagkabastos, sa internet man o sa pisikal. (“Kaminyoon: Tan-awa ug Pagkat-on,” 84)

usa ka batan-ong magtiayon nagkuyog og panlakaw

Kabahin sa kaimportante sa paghimo sa imong kapikas nga imong labing importante nga prayoridad, mitudlo si Presidente Nelson sa mosunod diha sa usa ka sesyon sa pagkapari sa kinatibuk-ang komperensiya. Bisan tuod og kini nga tambag gipakigpulong ngadto sa mga bana, kini sama ka magamit ngadto sa mga magtiayon.

Presidente Russell M. Nelson

Paghigugma ug pag-amuma sa inyong asawa. Pakighiusa kaniya. Himoa siyang kaabag. … Walay laing kalihokan sa inyong kinabuhi ang mas importante kay sa magpalig-on og mahangt[o]rong relasyon uban kaniya. Walay naa sa TV, sa mobile device, o sa computer ang mas importante kay sa iyang kaayohan. Subaya kon giunsa ninyo paggahin ang inyong oras ug asa ninyo gipahinungod ang inyong kusog. Kana magsulti kaninyo kon asa ang inyong kasingkasing. Pag-ampo nga ang inyong kasingkasing nahiangay sa kasingkasing sa inyong asawa. Pagtinguha sa paghatag kaniya og kalipay. (“Kita Makabuhat og Mas Maayo pa ug Mahimong Mas Maayo,” Liahona, Mayo 2019, 68–69)

icon, lihok

Lihok

Sunda ang pagdapit ni Presidente Nelson nga “subaya kon giunsa ninyo paggahin ang inyong oras ug asa ninyo gipahinungod ang inyong kusog” (“Kita Makabuhat og Mas Maayo pa ug Mahimong Mas Maayo,” 68). Unsang mga pagpahiangay ang inyong gikinahanglan sa paghimo sa karon nga mas maandam sa pag-unong ngadto sa inyong umaabot nga kapikas o sa mas hingpit nga paagi mounong ngadto sa inyong kapikas kon kamo minyo na? Pagrekord og usa ka plano o usa ka tumong nga kamo makabuhat niini nga semana.

Gusto pa og Dugang? (Mahimong sundon o dili)

Asa ako makakat-on pa og dugang mahitungod kon unsaon pagtukod ug pagpatunhay sa usa ka malipayon ug mahangtorong kaminyoon?

Unsaon nako sa pagpanalipod ang akong kaminyoon gikan sa tanang matang sa pagluib?

usa ka screen sa computer ug usa ka screen sa smartphone nga ang duha nagpakita og usa ka kasingkasing, usa ka kandado, ug usa ka panimalay