Leksiyon 2 Materyal sa Pagpangandam sa Klase: Ang Tahas sa mga Propeta sa Pagsangyaw sa Doktrina sa Mahangtoron nga Pamilya
“Leksiyon 2 Materyal sa Pagpangandam sa Klase: Ang Tahas sa mga Propeta sa Pagsangyaw sa Doktrina sa Mahangtoron nga Pamilya,” Materyal sa Magtutudlo sa Ang Mahangtoron nga Pamilya (2022)
“Leksiyon 2 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
magbalantay sa usa ka karaang tore nga bato
Leksiyon 2 Materyal sa Pagpangandam sa Klase
Ang Tahas sa mga Propeta sa Pagsangyaw sa Doktrina sa Mahangtoron nga Pamilya
Bulahan kita nga nagpuyo sa adlaw nga ang Ginoo mitawag pagbalik og buhing mga propeta sa paggiya ug pagpanalipod kanato. Sa unsang mga paagi ang mga propeta sa Ginoo mitabang kaninyo sa pagsabot sa doktrina sa mahangtoron nga pamilya? Samtang kamo magtuon niini nga leksiyon, hunahunaa kon unsaon ninyo nga makaangkon og mas mahinungdanon nga pagpamatuod sa buhing mga propeta ug sa mas hingpit nga mosalig diha sa ilang mga pulong sa inyong kinabuhi.
Seksiyon 1
Giunsa sa pagpakita ang gugma sa Dios diha sa konseho sa mga propeta?
Sa dihang gitawag sa Ginoo si Ezequiel nga mahimong usa ka propeta, siya mitandi sa bag-ong tahas ni Ezequiel ngadto sa usa ka magbalantay. Sa karaan, ang mga magbalantay magbarog sa mga paril o mga tore sa pagtabang og pagpanalipod sa mga siyudad, mga ubasan, o mga tugwayanan (tan-awa sa “Mga Magbalantay sa Tore,” Liahona, Abr. 2016, 28). Ang ilang paibabaw nga panan-aw naghimo kanila sa pagkakita sa mga butang nga ang uban dili makahimo ug sa paghatag og untop nga mga pasidaan sa nagsingabot nga mga kuyaw.
Imahe
icon, pagtuon
Pagtuon agi og Pagpangandam alang sa Klase
Basaha ang Ezequiel 3:17–19, ug paghunahuna mahitungod sa unsa nga paagi ang mga propeta sa Ginoo sama sa mga magbalantay sa tore.
Ang mga propeta nagtabang kanato sa pagkakita sa mga butang gikan sa mahangturon nga panglantaw sa Dios. Nagpanalangin Siya kanila isip mga manalagna nga adunay usa ka balaang pagtuga sa espirituhanong gasa. Sila mahimong “masayod sa mga butang diin nangagi na, ug usab sa mga butang nga umaabot” (Mosiah 8:17; tan-awa usab ang mga bersikulo 15–16). Ang Ginoo nagpahimutang kanila og dapit sa pagpanalipod kanato gikan sa espirituhanon ug pisikal nga kuyaw.
Gitudlo ni Presidente Russell M. Nelson ang mosunod mahitungod sa pag-awhag ug responsibilidad sa mga magbalantay sa Ginoo:
Imahe
Presidente Russell M. Nelson
Ang matag apostol sa Ginoo anaa sa kahimtang sa pagpaniid ug pagbati sa gugma nga ang Langitnong Amahan aduna alang sa Iyang mga anak, ilabi na alang niadtong kinsa nanlimbasog. …
Usahay kita isip mga lider sa Simbahan gisaway tungod sa hugot nga pagtuo sa mga balaod sa Dios, nagpanalipod sa doktrina sa Manluluwas, ug nagsalikway sa katilingbanong mga pamugos sa atong panahon. Apan ang atong sugo isip apostoles nga gi-orden mao “ang pagpanlakaw ngadto sa tibuok kalib[o]tan sa pagsangyaw sa [Iyang] ebanghelyo ngadto sa matag linalang” [Doktrina ug mga Pakigsaad 18:28]. Kana nagpasabot nga kita gimandoan sa pagtudlo sa kamatuoran.
Sa pagbuhat sa mao, usahay kita gipasanginlan sa pagkadili maamumahon samtang kita nagtudlo sa mga panginahanglanon sa Amahan alang sa kahimayaan didto sa celestial nga gingharian. Apan dili ba kini mas labaw ka dili maamumahon alang kanato sa dili pagsulti sa kamatuoran––sa dili pagtudlo sa unsay gipadayag sa Dios?
Kini eksakto tungod kay kita gusto sa labing maayo alang sa tanang mga anak sa Dios nga atong gisangyaw ang Iyang kamatuoran. Mahimong dili kita mosulti kanunay sa mga katawhan kon unsay ilang gusto nga paminawon. Ang mga propeta panagsa ra nga mailado. Apan kita sa kanunay nagtudlo sa kamatuoran! (“The Love and Laws of God [Ang Gugma ug mga Balaod sa Dios]” [debosyonal sa Brigham Young University, Sept. 17, 2019], 3, speeches.byu.edu)
Imahe
icon, pamalandong
Pamalandong agi og Pagpangandam alang sa Klase
Giunsa nimo pagbati ang gugma sa Dios pinaagi sa mga pasidaan, pagtudlo, ug pagtambag sa buhing mga propeta?
Seksiyon 2
Sa unsang paagi ang pamahayag sa pamilya ebidensya sa mga propeta sa Ginoo nga naglihok isip mga magbalantay karon?
Kaniadtong Septyembre 23, 1995, sa usa ka kinatibuk-ang miting sa Relief Society, si Presidente Gordon B. Hinckley mipaila sa “Ang Pamilya: Usa ka Pamahayag ngadto sa Kalib[o]tan.” Sa wala pa magbuhat sa mao, mipasabot siya kon nganong ang Unang Kapangulohan ug ang Korum sa Napulog Duha ka Apostoles mibati sa panginahanglan sa pag-isyu niini nga pamahayag:
Imahe
Presidente Gordon B. Hinckley
Uban sa daghang hiwi nga pangatarongan nga gipakatap nga maoy tinuod, uban sa daghang panglingla kabahin sa mga sumbanan ug mga hiyas, uban sa daghang pangdani ug tentasyon nga anam-anam nga nagmantsa sa kalibotan, among gibati nga mopasidaan ug mopahimangno. Sa pagpadayon niini kami sa Unang Kapangulohan ug sa Konseho sa Napulog Duha ka Apostoles karon mopagawas niini nga pamahayag ngadto sa Simbahan ug sa kalibotan isip usa ka pamahayag ug pagpalanog pag-usab sa mga sumbanan, mga doktrina, ug mga buhat nga may kalabotan sa pamilya diin ang mga propeta, mga manalagna, ug mga tigpadayag niini nga simbahan mibalik-balik sa pagpahayag niini sa tibuok kasaysayan. (“Stand Strong against the Wiles of the World,” Ensign, Nob. 1995, 100)
Ang mosunod nga mubong kinutlo gikan sa kasaysayan sa kinabuhi ni Presidente Nelson naghulagway kon unsay gihimo sa Ginoo sa pagpasabot sa Iyang Apostoles nga midangat ngadto sa pagmugna sa pamahayag sa pamilya:
Usa ka adlaw niadtong 1994, ang Korum sa Napulog Duha ka Apostoles migahin og usa ka adlaw sa ilang lawak sa konseho diha sa Templo sa Salt Lake naghisgot og mga isyu nga nagpalibot sa pamilya. Ilang gihunahuna ang tanan gikan sa nagkadaghang klase sa pornograpiya bisan asa ngadto sa kalagmitang nagkalain-laing pamalaod batok sa pamilya. Kini dili bag-o nga panaghisgotan, apan nianang adlawa ang tibuok tulumanon nagpunting diha niining usa ka importante nga hilisgotan.
Girebyo sa Napulog Duha ang doktrina ug ang mga palisiya, naghunahuna niadtong mga butang nga dili mausab—ang doktrina—ug kadtong mga butang nga posible nga mahimo—ang mga palisiya. Gihisgotan nila ang mga isyu nga ilang nakita nga moabot, lakip ang gipakusog nga pagpatuman sa katilingban alang sa kaminyoon sa managsama og sekso ug ang mga katungod sa transgender [pag-usab sa sekso nga natawhan sa tawo ngadto sa kaatbang nga sekso]. “Apan kana dili mao ang kataposan sa unsay among nakita,” mipasabot si Elder Nelson. “Among nakita ang mga paningkamot sa nagkalain-laing mga komunidad sa pagwagtang sa tanang mga sumbanan ug mga limitasyon kabahin sa sekswal nga kalihokan. Nakita namo ang kalibog kabahin sa mga gender [pagkalalaki o pagkababaye]. Makita namo nga kining tanan moabot.”
“Kining gipalugway nga panaghisgotan, dala sa uban sulod sa pipila ka gidugayon, migiya ngadto sa panapos nga ang Napulog Duha kinahanglang mag-andam og dokumento, gani tingali usa ka pamahayag, naglatid sa baroganan sa Simbahan kabahin sa pamilya nga ipakita ngadto sa Unang Kapangulohan alang sa ilang paghunahuna. (Sheri Dew, Insights from a Prophet’s Life: Russell M. Nelson [2019], 208)
Imahe
icon, pamalandong
Pamalandong agi og Pagpangandam alang sa Klase
Unsa ang importante kaninyo gikan sa pahayag ni Presidente Hinckley ug sa asoy mahitungod ni Presidente Nelson? Sa unsang paagi ang pag-isyu sa pamahayag sa pamilya naghulagway sa mga tahas sa mga propeta isip mga magbalantay diha sa tore?
Seksiyon 3
Unsaon nga ako matinud-anong makadawat ug makatubag sa mga pulong sa mga propeta sa Ginoo?
Sa Iyang lungsod nga natawhan sa Nazaret, gisalikway ang Manluluwas sa dihang Iyang gimantala nga Siya mao ang gisaad nga Mesiyas. Agi og tubag ngadto sa daghang mga pagduha-duha, ang Manluluwas mipahayag, “Walay propeta nga kahimut-an sa iyang kaugalingong lungsod” (Lucas 4:24).
Maingon usab, sa atong panahon pipila sa mga katawhan nagpili sa dili pagdawat sa mga propeta sa Ginoo. Usahay, mahimong malisod ninyo ang pagsabot o pagsunod sa tambag ug mga pagtulon-an sa mga propeta karong panahona.
Sa adlaw nga ang Simbahan ni Jesukristo sa mga Santos sa Ulahing mga Adlaw na-organisar, nadawat ni Propeta Joseph Smith ang pagpadayag gikan sa Ginoo nga naglangkob og sugo ug mga saad ngadto sa mga miyembro sa Iyang Simbahan.
Imahe
icon, pagtuon
Pagtuon agi og Pagpangandam alang sa Klase
Basaha ang Doktrina ug mga Pakigsaad 21:4–6 (timan-i nga kini nga mga bersikulo nagpasabot ngadto ni Joseph Smith ug, busa, mahimong magamit ngadto sa karon nga Presidente sa Simbahan sa Ginoo). Pangita alang sa unsaon sa mga miyembro sa Simbahan ang pagdawat sa mga pulong sa propeta ug ang mga panalangin nga ang Ginoo nagsaad samtang kita naghimo sa mao. (Pahinumdom: Usa ka kahulogan sa pulong nga kurog sa bersikulo 6 mao ang nagpagula o nagbuhi sa usa ka butang gikan sa usa ka suporta o sudlanan [tan-awa sa Merriam-Webster.com Dictionary, “shake”]. Busa, usa ka hubad niini nga bersikulo mao nga kon ang Ginoo naghimo “sa mga kalangitan sa pagkurog alang sa [atong] kaayohan,” Siya nagbuhi og mga pagpadayag ug mga panalangin, nagbu-bo niini diha niadtong kinsa nagsunod sa Iyang buhing mga propeta.)
Paghunahuna mahitungod kon unsa ang kahulogan sa pagdawat sa mga pulong sa Ginoo pinaagi sa mga propeta “sa tanang pagpailob ug hugot nga pagtuo” (bersikulo 5). Hunahunaa usab ang mga panalangin nga gisaad alang sa pagbuhat sa mao. Ang mga kasulatan naglangkob og daghang mga asoy sa mga katawhan nga nagpili sa paggamit sa pailob ug hugot nga pagtuo diha sa mga pulong sa mga propeta. Pagpili og usa o daghan pa sa mosunod nga mga tudling sa kasulatan nga tun-an:
1 Nephi 2:11–16 (Nephi mibiya sa Jerusalem ingon nga gisugo ni propeta Lehi)
1 Mga Hari 17:8–24 (Ang balo sa Sarepta nagtubag ngadto sa usa ka hangyo ni propeta Elias [Elijah] sa panahon sa kagutom)
2 Mga Hari 5:9–14 (Si Naaman, ang Sirianhon, nangita ni propeta Eliseo aron mamaayo sa sanla)
Imahe
icon, irekord
Irekord ang Imong mga Hunahuna
Naghunahuna sa unsay inyo pa lamang nga nabasa, i-rekord ang inyong mga tubag ngadto niini nga mga pangutana diha sa usa ka notebook o app sa pagsulat og mubo nga sulat:
Unsa ang inyong nakat-onan gikan sa pagpaninguha sa usa ka tawo nga makadawat og mga pulong sa propeta uban ang pailob ug hugot nga pagtuo?
Ngano kaha nga malisod ang pagdawat ug pagpatalinghog sa mga pulong sa mga propeta sa Ginoo niini nga mga kahimtang?
Unsa ang inyong nakat-onan mahitungod sa Ginoo pinaagi sa unsay Iyang gipangutana sa tawo nga inyo gibasa?
Samtang nagserbisyo isip magtatambag diha sa Kinatibuk-ang Kapangulohan sa Young Women, si Sister Carol F. McConkie mitimaan:
Imahe
Sister Carol F. McConkie
Sumala sa mga sumbanan sa kalib[o]tan, ang pagsunod sa propeta mahimong dili popular, sayop o dili madawat sa politikanhon o sosyal nga paagi. Apan ang pagsunod sa propeta kanunayng husto. (“Pagpuyo sumala sa mga Pulong sa mga Propeta,” Liahona,Nob. 2014, 78)
Kita makabaton og pagsalig sa pagsunod sa mga propeta sa Ginoo.