Leksiyon 28 Materyal sa Pagpangandam sa Klase

Mobati og Paglaom alang sa Pagtukod og Mahangtoron nga Pamilya

Hunahunaa unsay inyong nakat-onan ug nasinati sa inyong pagtuon sa mahangtoron nga pamilya atol niini nga kurso. Sa unsa nga paagi nga kini nga mga pagtulon-an nakaimpluwensya sa inyong pagpamatuod, mga tinguha, ug mga aksyon? Samtang magtuon ka niining kataposan nga leksiyon, ikonsiderar kon unsa kaha ang gusto sa Ginoo nga inyong buhaton aron kamo magpakabuhi uban sa mas dakong paglaom samtang maningkamot ka sa pagtukod ug pagpalig-on sa inyong kaugalingong mahangtoron nga pamilya.

Seksiyon 1

Ngano nga ako makabaton og paglaom sa pagtukod og usa ka mahangtoron nga pamilya?

Si Presidente Henry B. Eyring sa Unang Kapangulohan mitudlo nga kita makabaton og paglaom alang sa pagtukod og usa ka mahigugmaong mahangtoron nga pamilya:

Kitang tanan nagla[o]m alang sa kalipay sa pagpuyo diha sa mahigugmaong mga pamilya. Para sa pipila kanato, mao kini ang pagbati nga wala pa nato nasinati—usa ka pagbati nga nasay[o]d kita nga posible apan wala pa maamguhi. Mahimong makita kini diha sa kinabuhi sa uban. Alang sa uban nato, ang gugma sa pamilya nga ingon og mas tinuod ug bililhon kon ang kamatayon mobulag kanato gikan sa usa ka anak, inahan, amahan, igsoon nga lalaki, igsoon nga babaye, o usa ka mahigugmaon ug mapinanggaon nga apohan. …

… Kon kita napanalanginan nga makaplagan ang gipahiuli nga ebanghelyo, makapili kita sa paghimo ug paghupot sa mga pakigsaad uban sa Dios nga mokwalipay nato sa kinabuhing dayon. Sa atong paglahutay diha sa kamatinud-anon, ang Espiritu Santo mok[o]mpirmar sa atong pagla[o]m ug pagsalig nga kita anaa sa dalan sa kinabuhing dayon, aron makapuyo diha sa mga pamilya sa kahangt[o]ran sa celestial nga gingharian. (“Ang Pagla[o]m nga adunay Gugma sa Mahangt[o]rong Pamilya,” Liahona, Ago. 2016, 4)

Ang atong hugot nga pagtuo sa plano sa atong Langitnong Amahan ug sa Iyang Anak, si Jesukristo, makahatag nato og paglaom nga kita makatukod og mahangtoron nga pamilya. Ang Ginoo gustong motabang kanato, ug pinaagi sa Iyang gahom kita makabuntog sa mga hagit. Sa Bag-ong Tugon mabasa nato kon sa unsa nga paagi si Elisabet mimabdos nga lapas na kaayo sa pangidaron nga manganak pa ug si Maria, usa ka birhen, nahimong inahan sa Anak sa Dios. Ang matag usa niini nga babaye nag-atubang og lain-laing mga sirkumstansiya, apan silang duha nakasabot nga “alang sa Dios walay dili mahimo” (Lucas 1:37).

Irekord ang Inyong mga Hunahuna

Pangita og usa ka ehemplo gikan sa mga kasulatan o sa imong kaugalingon nga kasinatian sa pamilya kon sa unsa nga paagi ang Ginoo motabang niadtong kinsa mosalig Kaniya ug magtinguha sa Iyang tabang. Paggahin og pipila ka minuto sa pagrekord sa imong mga tubag sa mosunod nga mga pangutana diha sa usa ka notebook o sa note-taking app:

• Unsa kaha nga mga kamatuoran mahitungod sa Ginoo ang itambag sa indibidwal (o mga indibidwal) niini nga asoy nga imong hinumdoman?

• Unsa kaha ang itambag sa indibidwal (o mga indibidwal) nga imong buhaton sa imong mga paningkamot sa pagtukod og mahangtoron nga pamilya?

Seksiyon 2

Sa unsa nga paagi nga ako makabaton og paglaom sa pagtukod og mahangtoron nga pamilya kon ako wala magagikan sa usa ka pamilya nga lig-on sa pagsunod sa Manluluwas?

Pipila sa mga young adult wala makasinati o makasaksi og matarong nga mga sumbanan sa pamilya sa ilang mga pamilya. Ang pipila nakasaksi nga ang mga kaminyoon sa ilang mga ginikanan natapos sa diborsyo. Kadtong kinsa nakasinati niini o sa ubang malisod nga mga sirkumstansiya tingali maghunahuna kon sila makatukod ba gayod og mahangtoron nga pamilya.

Si Elder Yoon Hwan Choi sa Seventy mitudlo mahitungod sa kalainan nga mahimo sa atong mga pagpili alang sa atong mahangtoron nga pamilya:

Tanan kita kabahin sa usa ka mahangt[o]rong pamilya. Ang atong tahas mao ang importanting bahin diin ang makahul[o]ganong mga kausaban mahitabo sa positibo o negatibong mga paagi. …

… Dunay mga henerasyon nga nanag-una ug nanagsunod kanato nga nag-agad kanato nga mosunod kang Kristo aron mahimo kitang mahangt[o]ron nga pamilya sa Dios. (“Ayaw Pagtan-aw sa Palib[o]t, Hangad!” Liahona, Mayo 2017, 91, 92.)

Si propeta Abraham usa ka gamhanan nga ehemplo kon unsaon nato nga mopili nga mahimong positibo nga “mahinungdanon nga kausaban” alang sa atong kaugalingon nga pamilya. Pipila sa pamilya ni Abraham, lakip sa kaugalingon niya nga amahan, mipahilayo gikan sa mga sugo sa Ginoo. Sila mipili hinoon nga mosimba sa mini nga mga dios. (Tan-awa sa Abraham 1:5–6.)

Pagtuon agi og Pagpangandam alang sa Klase

Basaha ang Abraham 1:2, ug pangitaa unsa ang gitinguha ug gipili ni Abraham bisan pa sa iyang mga sirkumstansiya.

Sa dihang ang daotan nga mga pari misulay sa pagsakripisyo kang Abraham ngadto sa ilang mini nga mga dios, ang Ginoo milagrosong miluwas ni Abraham. Unya, Siya migiya ni Abraham ug pipila sa iyang kabanay ngadto sa laing yuta. Samtang anaa sila didto, ang Ginoo misaad ni Abraham og importante nga mga panalangin, lakip sa panalangin sa usa ka mahangtoron nga pamilya. (Tan-awa sa Abraham 1:7–18; 2:3–4, 8–11.)

Sama ni Abraham, kita mahimong magtinguha sa mga panalangin sa usa ka mahangtoron nga pamilya ug modawat sa tabang sa Ginoo sa pagtukod og mahangtoron nga pamilya, bisan unsa pa ang mga sirkumstansiya sa atong pamilya kaniadto.

Si Elder D. Todd Christofferson sa Korum sa Napulog Duha ka Apostoles mipamatuod:

Ngadto sa mga anak nga dunay lis[o]d nga sitwasyon sa pamilya, moingon kami, dili ubos ang inyong bili tungod niana. Ang mga hagit usahay usa ka timailhan sa pagsalig sa Ginoo diha kaninyo. Makatabang Siya kaninyo, direkta ug pinaagi sa uban, aron sa pagsagubang sa inyong giatubang. Mamahimo kamong henerasyon, tingali ang una sa inyong pamilya, diin ang balaanong mga sumbanan nga giorden sa Dios alang sa mga pamilya tinuoray nga mamugna ug mopanalangin sa tanan nga nagsunod ninyo nga mga kaliwatan. (“Mga Amahan,” Liahona, Mayo 2016, 96)

Si Elder David A. Bednar sa Korum sa Napulog Duha ka Apostoles mipaambit sa iyang kaugalingon nga kasinatian sa pagpili sa pagtukod og usa ka mahangtoron nga pamilya. Basaha ang pamahayag sa ubos o paminaw niini, sugod sa time code nga 25:47 ug mahuman sa 28:15.

Uban sa tabang sa Ginoo, makahimo kamo og mahangt[o]rong pamilya, bisan kon dili kamo gikan sa matang sa Santos sa Ulahing mga Adlaw nga panimalay nga usahay ipakita diha sa mga hapin sa mga magasin sa [Simbahan]. Palih[o]g hinumd[o]mi kanunay: kini magsugod diha kaninyo!

Ang kamatuoran nga wala nako masinati ang mga sumbanan sa matar[o]ng nga pamilya sa panimalay sa akong kabatan-on nakamugna kanako og dakong tinguha sa pagtrabaho nga makugihon uban ni Susan sa pagsiguro nga ang ingon nga mga sumbanan kanunay nga parte sa panimalay nga among gimugna. Samtang nakigtambag kami sa usag usa ug nangayo og tabang sa among mga pag-ampo, kami nadasig ug napanalanginan sa pagtabang sa among mga anak nga makakat-on sa mga bar[o]ganan sa gipahiuli nga ebanghelyo sa Manluluwas. Sigurado nga dili kami hingpit nga mga ginikanan, apan nadawat namo ang espirituhanong mga gasa nga among gikinahanglan ug nakakita og “tabang … lapas sa [among] kaugalingon.” [“Sundon Ko IKaw Ginoo,” Mga Himno, no. 133].

Kamo ug ako wala malit-ag sa atong nangagi nga mga kasinatian. Dili kita hingpit nga mga biktima sa atong kasamtangang mga kahimtang o mga bihag sa atong palib[o]t. Ang Espiritu Santo motudlo kanato sa tanang butang nga atong buhaton, lakip ang mga sumbanan sa pagkamatar[o]ng sa pamilya diin wala kita makaapil kaniadto. Kini magsugod diha kaninyo! Ug uban sa tabang sa Ginoo, makahimo kamo niini.

Ang pipila kaninyo napasakitan sa mga sakop sa pamilya o tinah[o]d nga mga lider kinsa wala motah[o]d sa sagradong pakigsaad sa kaminyoon. Tingali mangutana kamo sa kaugalingon, “Kon ang akong mga ginikanan o ubang magtiayon nga akong kaila nasilyo sa templo ug wala magmalamp[o]son ang ilang kaminyoon, makala[o]m ba ko nga ang akong kaminyoon molungtad sa kahangt[o]ran?”

Kaninyo nga nakasinati sa kagul-anan sa diborsyo sa inyong pamilya o mibati sa kasakit sa pagkapakyas sa pagsalig, palih[o]g hinumd[o]mi nga kini magsugod pag-usab diha kaninyo! Usa ka sumpay sa kadena sa inyong mga henerasyon tingali naputol, apan ang ubang matar[o]ng nga mga sumpay ug ang nahabilin sa kadena importante gihapon sa kahangt[o]ran. Makadugang kamo og kalig-on sa inyong kadena ug tingali gani makatabang sa pagpahiuli sa naputol nga mga sumpay. Kana nga buhat matuman sa tagsa-tagsa. (“Usa ka Lig-on nga Sumpay” [tibuok kalibotan nga debosyonal alang sa mga young adult, Sept. 10, 2017], broadcasts.ChurchofJesusChrist.org)

Pamalandong agi og Pagpangandam alang sa Klase

Hunahunaa ang imong umaabot (o kasamtangan) nga mga anak. Unsa nga matarong nga mga sumbanan sa pamilya ang tingali gusto nila nga imong sugdan o padayonon? Aduna bay bisan unsa nga mga sumbanan sa dili matarong nga kinaiya nga gusto nila nga imong undangon? Sa unsa nga paagi ang Ginoo makatabang nimo samtang imong buhaton?

Seksiyon 3

Unsay imong nakat-onan ug nasinati sa imong pagtuon sa mahangtoron nga pamilya?

Sa imong pag-abot sa kataposan niini nga kurso, ikonsiderar kon unsay imong nakat-onan mahitungod sa kaimportante sa pamilya diha sa plano sa atong Langitnong Amahan sa kaluwasan ug sa imong kaugalingon nga kinabuhi.

Kabahin sa kaimportante sa mga pamilya, si Presidente M. Russell Ballard sa Korum sa Napulog Duha ka Apostoles mitudlo:

Mga kaigsoonan, ang labing importanting hinungdan sa atong kinabuhi mao ang atong pamilya. Kon atong igahin ang atong kaugalingon niini nga hinungdan, molambo ang matag aspeto sa atong kinabuhi ug mamahimong ehemplo ug kahayag sa tanang tawo sa yuta, isip katawhan ug isip simbahan. (“Unta Makit-an ang Nawala,” Liahona, Mayo 2012, 98)

Pamalandong agi og Pagpangandam alang sa Klase

Tan-awa pag-usab ang mga ulohan sa mga leksiyon niini nga kurso. Samtang imo kining buhaton, pamalandongi ang mosunod nga mga pangutana:

• Sa unsa nga paagi nga kini nga kurso nakaimpluwensya sa inyong pagsabot ug pagpamatuod sa mga pagtulon-an sa Ginoo bahin sa kaminyoon ug pamilya?

• Unsa ang usa sa inyong labing importante nga mga nakat-onan gikan niini nga kurso?

• Unsa ang inyong nakat-onan mahitungod sa Langitnong Amahan ug ni Jesukristo sa kinatibuk-an niini nga kurso? Sa unsa nga paagi nga nalig-on ang inyong relasyon uban Kanila?

Gusto pa og Dugang? (Mahimong sundon o dili)

Unsaon nako sa paggamit ang mga kamatuoran nga gitudlo sa pamahayag sa pamilya aron makakita og mas dako nga kalipay sa akong kinabuhi?

Rebyoha ang artikulo “Pagbutang sa Imong Kaugalingon diha sa Pamahayag sa Pamilya” (Liahona, Sept. 2020, 12–23) aron mas masabtan kon sa unsa nga paagi nga ang mga baroganan sa pamahayag sa pamilya makapanalangin sa imong kinabuhi.

Unsaon nako sa pagpadayon sa akong pagtuon sa pipila sa mga hilisgotan nga atong nahisgotan niini nga kurso?

Ikonsiderar ang pagkuha sa usa o dugang pa sa mosunod nga mga kurso sa institute kon kini gitanyag sa inyong dapit:

• Si Jesukristo ug ang Walay Katap[o]sang Ebanghelyo (REL 250)