Leksiyon 14 Materyal sa Pagpangandam sa Klase

Pagpanalipod sa Paggamit sa Pornograpiya

Ang atong Langitnong Amahan naghatag kanato sa atong pisikal nga mga lawas ug sekswal nga mga pagbati isip sagradong mga gasa sa pagtabang kanato sa pagtuman sa Iyang plano alang sa atong kalipay. Usa ka paagi nga si Satanas nagtintal kanato sa dili hustong paggamit niini nga mga gasa mao ang pagdani kanato sa pagtan-aw og pornograpiya, diin mao ang “bisan unsa nga pagpakita, sa hulagway o sinulat, nga gituyo aron sa pag-aghat sa dili angay nga paagi sa sekswal nga mga pagbati.” (Gospel Topics, “Pornography,” topics.ChurchofJesusChrist.org). Samtang inyong tun-an kini nga leksiyon, paghunahuna mahitungod kon sa unsang paagi ang Langitnong Amahan ug si Jesukristo makahatag og gahom kaninyo sa pagbatok o pag-ayo gikan sa makadaot nga mga impluwensya sa pornograpiya.

Seksiyon 1

Unsa ang gitudlo sa Ginoo mahitungod sa pagbatok sa pornograpiya?

Si Presidente Dallin H. Oaks sa Unang Kapangulohan mitudlo mahitungod sa nagkakusog nga pagkaylap sa pornograpiya:

Ang nag-unang rason sa nagkadakong problema sa pornograpiya mao nga sa kalib[o]tan karon, ang mga pulong ug mga hulagway nga dunay sekswal nga sulod ug impluwesya anaa bisan asa: makita kini sa mga sine, mga programa sa TV, social media, sa mga mensahe sa text, mga apps sa telepono, mga libro, musika, ug sa kada adlaw nga mga kokabildo. Agig sangp[o]tanan, dili kini malikayan nga kitang tanan regular na kaayo nga mabantang sa mga mesahe nga sekswal. (“Nagpaayo gikan sa Pagkalit-ag sa Pornograpiya,” Liahona, Okt. 2015, 50)

Ang pagbuhat ug paggamit sa pornograpiya naglapas sa kasagrado sa atong balaanong kinaiyahan, atong pisikal nga mga lawas, ug sa atong sekswalidad. Ang usa ka bag-ohay nga pamantala nagtala, “Ang pornograpiya nag-atake sa atong kalipay uban sa dili tinuod nga mga mensahe mahitungod sa pakighilawas. Ang maayo nga sekswalidad makagiya kanato sa pagkaplag og kalipay ug koneksyon, apan ang pornograpiya mopabulag kanato ug mohimo kanato nga makalolooy. Ang pornograpiya nagpaubos sa uban, nag-awhag og hinakog nga pagkatagbaw, ug sayop nga pagrepresentar sa sekswalidad. Kini nagdaot kanato sa pisikal, sikolohikal, sosyal, ug espirituwal nga paagi” (“How does Using Pornography affect Me?,” ChurchofJesusChrist.org).

Samtang naghatag sa Wali sa Bukid, ang Manluluwas mipasabot sa mas taas nga balaod nga Siya nagpaabot sa Iyang mga disipulo sa pagpuyo. Sa pagpasidaan batok sa sekswal nga sala, Siya mitudlo, “Bisan kadtong magatan-awg babaye uban sa pagkaibog kaniya, nakapanapaw na diha sa sulod sa iyang kaugalingong kasingkasing” (Mateo 5:28; tan-awa usab sa Doktrina ug mga Pakigsaad 63:16).

Si Elder Jeffrey R. Holland sa Korum sa Napulog Duha ka Apostoles migamit niini nga pakisayran gikan sa Mateo ug mitudlo mahitungod sa paggamit niini sa pagbatok sa pornograpiya:

Sa tinuod walay “sugo,” kon mahimo natong gamiton kana nga pinulongan, ang makahimo og mas diretso nga pagtubag ug pagsilot sa sala nga pornograpiya kay niana nga tudling! Dili kita makapugong apan maghunahuna kon si Kristo diha sa kinatung-an sa panahon nakakita ba kaha sa ingon nga hulga sa ulahing adlaw, dili lahi apan lapas kaayo sa bisan unsa nga malaw-ay o dili angay nga pagtinan-away sa usa ka lalaki o babaye sa usag usa sa mga gatusan sa wala pa ang mga litrato ug mga salida, sa wala pa ang Internet. (“The Plague of Pornography” [pakigpulong nga gihatag didto sa Utah Coalition against Pornography, Mar.12, 2016], utahcoalition.org)

Samtang kamo magbasa sa mosunod nga pamahayag ni Presidente Russell M. Nelson, pangitaa alang sa unsa siya nagdapit kanato sa pagsabot sa atong mga paningkamot sa pagpakigubat batok sa tentasyon sa pornograpiya:

Kon nakasabot kita sa atong kinaiya ug sa atong katuyoan dinhi sa yuta, ug nga ang atong mga lawas pisikal nga mga templo sa Dios, atong maamgohan nga usa ka pagpasipala ang pagpasulod sa lawas og bisan unsa nga makahugaw niini. Sa pagkatinuod walay balaan nga pagtahod ang pagpatan-aw sa atong bililhong mata o ang mga balatian sa atong paghikap o pangdungog nga mohatod ngadto sa utok og mga hand[o]manan nga dili limpyo o dili takos. Atong mahalon ang atong kaputli ug likayan ang “binoang ug makadaot nga mga pangibog, nga nagaunlod [kanato] ngadto sa kamatayon ug pagkalaglag.”[1 Timoteo 6:9]. Kita “mopahilayo niining tanan; maningkamot sa pagkamatarong, pagkadiosnon, pagtuo, paghigugma, pagkamapainubsanon, [ug] pagkaaghop” [1 Timoteo 6:11]–mga hiyas nga makaayo sa tibuok kalag. (“Ang Inyong Lawas: Usa ka Talagsaong Gasa nga angay Mahalon,” Liahona, Ago. 2019, 53–54)

Pamalandong agi og Pagpangandam alang sa Klase

Unsaon nga ang pagsabot sa atong kaugalingon ug sa uban nga balaanong kinaiyahan ug katuyoan nagtabang kanato sa pagbatok sa pornograpiya?

Seksiyon 2

Unsaon nako sa pagbatok sa tintasyon sa paggamit sa pornograpiya?

Tanan kanato nag-atubang og tintasyon samtang kita naningkamot sa pagpuyo og mahiyasong mga kinabuhi. Hinumdomi nga si Jesukristo “sa tanang paagi gitintal ingon kanato, hinoon [nagpabiling] wala makasala” (Mga Hebreohanon 4:15). Siya nakasabot kanato ug makatabang kanato sa pagbatok sa tentasyon.

Pagtuon agi og Pagpangandam alang sa Klase

Diha sa mga kasulatan, ang Ginoo naghatag og mga baroganan nga atong magamit sa pagpanalipod sa atong mga kaugalingon ug sa atong mga pamilya batok sa mga daotan sama sa pornograpiya (tan-awa sa Alma 39:8–10; Doktrina ug mga Pakigsaad 121:45–46). Sama pananglit, si Jose sa Ehipto ug si Hari David parehas nga nag-atubang og tentasyon sa paghimo og sekswal nga sala. Basaha ang usa o ang duha sa mosunod nga mga tudling, ug hunahunaa kon unsay inyong makat-onan gikan sa mga kasinatian niining duha ka mga lalaki: Genesis 39:7–12;2 Samuel 11:1–5. Hunahunaa ang pagbasa sa tanan sa 2 Samuel 11 ug 2 Samuel 12 1–10, ug paghunahuna mahitungod sa unsay inyong nakat-onan gikan sa napakyas nga tinguha ni Hari David sa pagtabon sa iyang sala.

Si Presidente Oaks mitambag:

Buhata ang tanan nga inyong mahimo sa paglikay sa pornograpiya. …

Ayaw hatagi og pagtagad ang tintasyon sa bisan unsang paagi. Sumpo-a ang sala ug likayi ang pag-atubang sa dili malikayan nga kadaot. Busa, pakganga kini! Lingiw sa layo! Likayi kini bisan unsa pa may mahitabo. Itunong ang inyong mga hunahuna diha sa maayong mga dalan. (“Pornography,” Ensign, Mayo 2005, 90)

Paghunahuna mahitungod kon unsaon sa inyong ginagmay nga mga desisyon pagbaton og gahom sa paghimo kaninyo nga mas daling mahulog sa tentasyon o matabangan kamo sa paglikay niini.

Ang pipila sa mga tawo maalamong naggamit og mga makapugong [filter] nga mabasa ang tanang sulod o ubang mga kapanguhaan sa pagtabang kanila sa paglikay sa pornograpiya. Si Sister Linda S. Reeves, kanhi sa Kinatibuk-ang Kapangulohan sa Relief Society] mitudlo mahitungod sa atong labing importanting makapugong:

Ang filter makatabang nga mga himan, apan ang pinakamaayong filter sa kalib[o]tan, ug ang pinakaepektibo, mao ang personal nga filter nga naggikan sa kahiladman ug sa malungtarong pagpamatuod sa gugma sa atong Langitnong Amahan ug sa maulaong sakripisyo sa atong Manluluwas sa matag usa kanato. (“Panalipod gikan sa Pornograpiya—usa ka Panimalay nga Nag-focus kang Kristo,” Liahona, Mayo 2014, 16)

Pamalandong agi og Pagpangandam alang sa Klase

Hunahunaa sa mainampoong paagi kon unsa nga mga lakang kamo makahimo sa paglig-on sa inyong pagbatok sa pornograpiya.

Seksiyon 3

Unsaon nako pagkadawat sa gahom sa Manluluwas nga mamaayo gikan sa makadaot nga mga epekto sa pornograpiya?

Ang mga lalaki ug mga babaye nalaang sa pornograpiya. Alang sa daghang mga tawo, ang paggamit sa pornograpiya dili lamang mahitungod sa makatagbaw nga sekswal nga mga tinguha. Hinoon, gigamit nila ang pornograpiya sa pagtubag ngadto sa mas lawom, nakatago nga mga panginahanglan. Mahimo nilang gamiton kini isip usa ka paagi sa pagsagubang sa kaugtas, kabalaka, kamingaw, kalaay, kakapoy, kakulba, depresyon, o mga pagbati nga gibale wala o dili importante.

Kon nabitik diha sa usa ka makadaot nga balik-balik nga paggamit sa pornograpiya, ang pipila sa mga tawo magsugod sa pagbati og kaulaw o mawad-an og paglaom sa ilang abilidad sa pag-usab ug mamaayo. Mahimong bation nila nga nalaang. Ang ubang mga tawo maninguha sa pagtago sa ilang mga sala. Ngadto niadtong kinsa nasakitan pinaagi sa paggamit sa pornograpiya sa laing tawo, ang mga pagbati nga gibudhian, nakasala, o nasuko mas mo-bugat.

Nagpasalig pag-usab, si Sister Reeves mitudlo mahitungod sa gahom sa Ginoo sa pag-ayo:

Kon nabitik mo ni Satanas sa pornograpiya, hinumdomi ang kamaloloy-on sa pinalangga natong Manluluwas. Nasayod ba kamo sa dakong gugma ug pagpangga ug pag-amuma sa Ginoo kaninyo, gani bisan karon? Ang atong Manluluwas dunay gahom sa paglimpyo ug pag-ayo kaninyo. (“Panalipod gikan sa Pornograpiya–usa ka Panimalay nga Nag-focus kang Kristo,” 15)

Pagtuon agi og Pagpangandam alang sa Klase

Diha sa basahon ni Lucas atong nakat-onan ang mahitungod sa usa ka babaye kinsa miantos sulod sa 12 ka tuig gikan sa “tinalinug-an” (Lucas 8:43), diin siya ug ang tanang mga doktor nga iyang giadto dili makaayo. Basaha ang Lucas 8:43–48, ug hunahunaa kon unsay atong makat-onan gikan niini nga babaye mahitungod sa pagpangita nga mamaayo pinaagi sa Manluluwas.

Naggamit niini nga asoy nga pakisayran, gitudlo ni Presidente Nelson:

Kining matinud-anon, nakatutok nga babaye kinahanglang maningkamot og maayo aron maka-access sa Iyang gah[o]m. …

Kon mokab-ot kamo alang sa gahom sa Ginoo diha sa inyong kinabuhi uban sa samang paningkamot sa tawo nga hapit na malumos nga naningkamot nga makaginhawa, ang gahom gikan ni Jesukristo inyong maangkon. Kon ang Manluluwas masayod nga gusto gayod ninyong modangop Kaniya—kon Iyang mabati nga ang inyong labing dakong tinguha mao ang pagdawat sa Iyang gahom nganha sa inyong kinabuhi—magiyahan kamo sa Espiritu Santo aron masayod kon unsa gayud ang kinahanglan ninyong buhaton [tan-awa sa Doktrina ug mga Pakigsaad 88:63].

Kon maningkamot kamo sa espirituhanong paagi nga labaw pa sa inyong nabuhat sukad, nan ang Iyang gahom modagayday nganha kaninyo. (“Pagdawat sa Gahom ni Jesukristo diha sa Atong Kinabuhi,” Liahona, Mayo 2017, 41–42)

Kon kamo nakigbisog sa paggamit sa pornograpiya o nasakitan pinaagi sa paggamit og pornograpiya sa lain nga tawo kamo magkinahanglan og mas labaw pa sa inyong kaugalingong gahom nga mamaayo gikan sa mga epekto niini. Nagkinahanglan kamo sa gahom sa Ginoo.

Pagtuon agi og Pagpangandam alang sa Klase

Paggahin og pipila ka panahon sa pagtuon og usa ka kapangohaan nga gusto nimo diha sa “Gusto Pa og Dugang?” nga seksiyon niini nga materyal sa pagpangandam. Pangandam sa pagpakigbahin unsay inyong nakat-onan diha sa klase.

Gusto pa og Dugang? (Mahimong gamiton o dili)

Sa unsang paagi ang pornograpiya nag-apekto niadtong kinsa naggamit niini?

Kanus-a masulti nga ang paggamit sa pornograpiya usa ka adiksyon?

Sa iyang artikulo “Nagpaayo gikan sa Pagkalit-ag sa Pornograpiya” (mga pahina 50–55), mihisgot si Presidente Oaks sa lain laing mga ang-ang sa paggamit sa pornograpiya ug sa mga paagi sa pagtubag ngadto sa matag ang-ang sa pagkalambigit.

Unsay kinahanglan kong buhaton kon ang usa ka tawo nga akong gika-date naapil sa paggamit sa pornograpiya?

Ang Oktubre 2019 nga Liahona naglangkob og daghang artikulo (lakip ang digital lamang ang sulod) alang sa mga young adult sa paggiya kanila sa pagtubag kon usa ka tawo nga ilang ka-date nanlimbasog uban sa paggamit sa pornograpiya. Sama pananglit, tan-awa ang artikulo “Pakipagdate ug Pornograpiya” (Ensign, Okt. 2019, 69–73).