“Leksiyon 6 Materyal sa Pagpangandam sa Klase: Kaminyoon tali sa usa ka Lalaki ug usa ka Babaye Gi-orden sa Dios,” Materyal sa Magtutudlo sa Ang Mahangtoron nga Pamilya (2002)
“Leksiyon 6 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Leksiyon 6 Materyal sa Pagpangandam sa Klase
Kaminyoon tali sa usa ka Lalaki ug usa ka Babaye Gi-orden sa Dios
Ang pamahayag sa pamilya nagsugod uban sa ligdong nga paagi nga pagpahayag nga ang “kaminyoon tali sa usa ka lalaki ug usa ka babaye giorden sa Dios” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Nakahunahuna ba kamo nganong ang mga propeta, apostoles, ug ubang mga lider sa Simbahan nagpadayon sa pagtudlo niini nga kamatuoran? Samtang kamo magtuon niini nga leksiyon, hunahunaa kon unsaon nga ang paggamit sa hugot nga pagtuo diha sa Langitnong Amahan ug ni Jesukristo makatabang kaninyo sa inyong pagkigharong sa kaminyoon.
Seksiyon 1
Sa unsang paagi nga ang pagkasayod sa panglantaw sa Langitnong Amahan sa kaminyoon makatabang kanako sa pagsabot sa Iyang plano alang kanako?
Sa bag-ohay nga mga katuigan, ang panan-aw sa kaminyoon nausab diha sa daghang mga katilingban. Unsa nga mga opinyon ang inyong nadungog karong bag-o?
Wala madugay human ang Simbahan natukod, si Leman Copley gusto nga ang mga misyonaryo magsangyaw sa ebanghelyo ngadto sa mga miyembro sa iyang kanhi relihiyosong grupo, ang mga Shaker. Ang mga Shaker midumili sa kaminyoon, hinoon nagtuo sa usa ka kinabuhi nga hingpit nga dili minyo. Nangutana si Propeta Joseph Smith sa Ginoo mahitungod niini ug sa ubang mga tinuohan ug nakadawat og pagpadayag.
Pagtuon agi og Pagpangandam alang sa Klase
Basaha ang Doktrina ug mga Pakigsaad 49:15–16, mangita sa unsay gipadayag sa Ginoo mahitungod sa kaminyoon.
Ingon nga gigamit diha sa bersikulo 15, ang orden nagpasabot og gisugo, gitukod, o gitudlo pinaagi sa labaw nga awtoridad (tan-awa sa Merriam-Webster.com Dictionary, “ordain”; hunahunaa ang paghimo og mubo nga sulat niini nga pagpatin-aw diha sa inyong mga kasulatan). Si Elder D. Todd Christofferson sa Korum sa Napulog Duha ka Apostoles mihatag og gibug-aton sa importansya sa kaminyoon tali sa usa ka lalaki ug usa ka babaye sa dihang siya mitudlo:
Ang pamilya nga gitukod diha sa kaminyoon sa lalaki ug babaye nagsangkap sa labing maayo nga kahimtang aron ang plano sa Dios molambo—ang kahimtang alang sa pagkatawo sa mga anak, nga moab[o]t diha sa kaputli ug kawalay sala gikan sa Dios, ug ang palibot alang sa pagkat-on ug pagpangandam nga ilang gikinahanglan sa malampuson nga mortal nga kinabuhi ug kinabuhing dayon sa kalib[o]tan nga moab[o]t. …
Siya mao kinsa sa sinugdanan milalang kang Adan ug Eva diha sa Iyang hitsura, lalaki ug babaye, ug mihiusa kanila isip bana ug asawa. … Ang matag indibidwal nagdala sa balaang hitsura, apan diha kini sa panaghiusa sa kaminyoon sa lalaki ug babaye isip usa nga atong makab-ot tingali ang labing kompleto nga kahul[o]gan sa atong pagkalalang diha sa hitsura sa Dios—lalaki ug babaye. Ni kita o laing mortal makausab niining balaan nga han-ay sa kaminyoon. Dili kini inimbento sa tawo. Ang ingon nga kaminyoon sa pagkatinuod “gikan sa kahitas-an, gikan sa Dios” [tan-awa sa Dietrich Bonhoeffer, Letters and Papers from Prison, ed. Eberhard Bethge (1953), 42–43] ug ingon ka dakong bahin sa plano sa kalipay sama sa Pagkapukan ug Pag-ula. (“Nganong Kaminyoon, Nganong Pamilya,” Liahona, Mayo 2015, 52)
Ang kaminyoon sumala sa balaod sa Dios mao ang labing sagrado nga pakigrelasyon nga mahimong anaa tali sa usa ka lalaki ug sa usa ka babaye. Si Presidente Howard W. Hunter mipasabot:
Ang lalaki dili hingpit nga walay babaye. Ni makatuman sa katuyoan sa ilang pagkalalang nga wala ang usa [tan-awa sa 1 Mga Taga-Cor.11:11; Moises 3:18]. Ang kaminyoon tali sa usa ka lalaki ug usa ka babaye gi-orden sa Dios [tan-awa sa Doktrina ug mga Pakigsaad 49:15–17]. Pinaagi lamang sa bag-o ug walay katap[o]sang pakigsaad sa kaminyoon nga sila makaamgo sa kahingpitan sa walay katap[o]sang mga panalangin [tan-awa sa Doktrina ug mga Pakigsaad 131:1–4; Doktrina ug mga Pakigsaad 132: 15–19]. (“Being a Righteous Husband and Father,” Ensign, Nob. 1994, 49)
Kadtong kinsa mosulod ug mosunod sa bag-o ug walay kataposang pakigsaad sa kaminyoon makabaton sa labing taas nga ang-ang sa gingharian sa celestial nga himaya (tan-awa sa Doktrina ug mga Pakigsaad 131:1–4). Dinhi kita diin “makaamgo sa kahingpitan sa walay katap[o]sang mga panalangin,” nga nailhan usab og kahimayaan o kinabuhing dayon. (Kamo makakat-on pa og dugang mahitungod sa bag-o ug walay kataposang pakigsaad sa kaminyoon diha sa leksiyon 10.)
Hinumdomi unsay inyong nakat-onan sa miaging mga leksiyon mahitungod sa kinaiyahan sa kinabuhing dayon. Si Elder Robert D. Hales sa Korum sa Napulog Duha ka Apostoles mitudlo:
Ang plano sa Amahan naghatag kanato og agianan aron mapanunod ang kinabuhing dayon, ang kinabuhi nga gipamunoan sa atong langitnong mga ginikanan. Diha sa plano, “diha sa Ginoo, ang babaye dili gawas sa lalaki, [ni] ang lalaki gawas sa babaye, diha sa Ginoo” [1 Mga Taga-Corinto 11:11]. Ang labing mahinungdanon sa kinabuhing dayon naglakip sa mahangturong kaminyoon sa lalaki ug sa babaye, nga maoy mahinungdanon nga bahin sa pagkahimong sama sa atong langitnong mga ginikanan. (“Ang Plano sa Kaluwasan: Usa ka Sagradong Bahandi sa Kahibalo sa Paggiya Kanato,” Liahona, Okt. 2015, 29)
Pamalandong agi og Pagpangandam alang sa Klase
Unsaon nimo sa pagpasabot ngano nga ang kaminyoon tali sa usa ka lalaki ug usa ka babaye giorden sa Dios ug importante ngadto sa Iyang mahangturong plano?
Seksiyon 2
Unsa kaha kon ako dili magminyo niini nga kinabuhi o ang akong kaminyoon natapos?
Tungod sa nagkalain-laing mga kahimtang, pipila ka mga tawo dili gayod magminyo niini nga kinabuhi bisan pa sa ilang matarong nga mga tinguha. Alang sa uban kinsa nagminyo, ang ilang kaminyoon natapos sa diborsyo. Si Presidente Dallin H. Oaks sa Unang Kapangulohan namulong niini nga mga kahimtang sa dihang siya mitudlo:
Ang pipila kinsa naminaw niini nga mensahe tingali nanag-ingon, “Pero unsa na man lang ko?” Nasayod kita nga daghang takos ug talagsaong mga Santos sa Ulahing mga Adlaw ang kasamtangang nagkulang sa sulundon nga mga oportunidad ug mahinungdanong mga gikinahanglan alang sa ilang pag-uswag. Ang pagkawala maminyo, pagkawalay anak, kamatayon, ug diborsyo nagkawang sa mga sulundon ug naglangan sa katumanan sa gisaad nga mga panalangin. … Apan kini nga mga pagkawang temporaryo lamang. Ang Ginoo misaad nga sa kahangtoran walay panalangin nga ihikaw sa iyang mga anak kinsa nagsunod sa mga sugo, mga matinuoron sa ilang mga pakigsaad, ug nagtinguha sa unsay matarong. (“The Great Plan of Happiness,” Ensign, Nob. 1993, 75)
Bisan tuod ang pipila sa walay kataposang mga panalangin wala masinati sa hingpit niini nga kinabuhi, ang kalipay ug katumanan dili pinugngan alang niadtong kinsa wala maminyo. (Kini nga hilisgutan pagahisgotan pa og dugang sa umaabot nga leksiyon.) Ang tanan makasinati og walay katapusan nga hingpit nga kalipay ug makahuluganong paglambo ug makahimo sa gikinahanglang mga pagtampo karon isip hingpit nga aktibong mga dumuduyog sa plano ug sa gingharian sa Dios.
Pamalandong agi og Pagpangandam alang sa Klase
Unsa ang inyong ipakigbahin uban niadtong kinsa mibati nga ang ilang mga oportunidad alang sa kalipay ug kinabuhing dayon nawala tungod kay sila dili minyo?
Seksiyon 3
Sa unsang paagi ang paggamit sa hugot nga pagtuo diha sa Langitnong Amahan ug ni Jesukristo makatabang kanako sa pagbuntog sa kahadlok ug pagsinati og hingpit nga kalipay diha sa kaminyoon?
Paghunahuna mahitungod sa mga pangutana o mga kabalaka nga kamo o kadtong naglibot kaninyo aduna mahitungod sa pagminyo. Si Elder Quentin L. Cook sa Korum sa Napulog Duha ka Apostoles mihatag og usa ka rason nga ang pipila sa mga tawo naglangan sa ilang mga paninguha sa pagminyo:
Ang uban naglangan sa ilang pagminyo hangtud matiwas ang pag-eskwela ug makatrabaho. Samtang gidawat pag-ayo sa kalib[o]tan, kini nga pangatar[o]ngan wala magpakita og hugot nga pagtuo, wala magtuman sa tambag sa mga propeta karong panahona, ug wala mahiuyon sa husto nga doktrina. (“Maalamong Mopili,” Liahona, Nob. 2014, 47)
Ang kaaway sa kasagaran nagpadako sa mga kahadlok, mortal nga pangatarongan, o mga kalinga nga makapugong sa mga tawo gikan sa pagpadayon sa kaminyoon. Ang pipila sa mga tawo nagsinati og kahadlok sa wala pa o sa panahon sa kaminyoon tungod kay sila nakasaksi og mga hagit nga nagagikan sa diborsyo. (Sa umaabot nga mga leksiyon, inyong makat-onan ang mga baroganan nga makatabang kaninyo sa paglig-on sa inyong kaminyoon ug pagpugong sa diborsyo.)
Unsa ang makatabang kanimo sa pagharong sa kaminyoon uban ang pagsalig?
Pagtuon agi og Pagpangandam alang sa Klase
Basaha ang Mga Proverbio 3:5–6; 2 Timoteo 1:7; ug Doktrina ug mga Pakigsaad 6:36. Hunahunaa kon unsaon niini nga mga pagtulon-an nga magamit ngadto sa unsaon pagharong sa kaminyoon.
Si Presidente Jean B. Bingham, Kinatibuk-ang Presidente sa Relief Society, mitudlo:
Usahay mahadlok kita nga mosalig tungod kay wala kita makasabot sa hingpit nga gugma sa Dios ug sa tinguha nga motabang kanato. Apan kon atong tun-an ang plano sa Langitnong Amahan ug ang misyon ni Jesukristo, atong masabtan nga ang Ilang katuyoan lamang mao ang atong mahangturong kalipay ug pag-uswag [tan-awa sa Moises 1:39]. (“Nga ang Imong Hingpit nga Kalipay Mapuno,” Liahona, Nob. 2017, 85)
Samtang ang mga indibidwal nagminyo ug samtang ang magtiayon nagpadayon sa paggamit sa hugot nga pagtuo, ang Langitnong Amahan ug si Jesukristo mopadayon sa paggiya ug pagpanalangin kanila. Si Elder Hugh W. Pinnock mitudlo samtang nagserbisyo isip usa ka sakop sa Seventy, “Ang Dios mahinungdanong miapil sa [kang Adan ug Eva] nga kaminyoon, ug siya ingon lamang ka nabalaka ug ka kinahanglan nga maapil usab sa tanang kaminyoon karon” (“Making a Marriage Work,” Ensign, Sept. 1981, 37). Ang Langitnong Amahan ug si Jesukristo gusto nga motabang kaninyo nga molampos sa pagtukod og usa ka mahangturon nga kaminyoon.
Irekord ang Imong mga Hunahuna
Si Presidente Bonnie H. Cordon, Kinatibuk-ang Prersidente sa Young Women, mitimaan, “Ang matag usa kanato kinahanglan nga mangutana: Unsaon nako nga kanunay masentro ug dili mosalig sa akong kaugalingong salabutan? Unsaon nako sa pag-ila ug pagsunod sa tingog sa Manluluwas kon ang mga tingog sa kalib[o]tan maagnihon kaayo? Unsaon nako sa pag-ugmad og pagsalig sa Manluluwas?” (“Salig sa Ginoo ug Ayaw Pagsalig sa Kaugalingong Salab[o]tan,” Liahona,, Mayo 2017, 6). Irekord ang inyong mga hunahuna mahitungod sa pangutana ni Presidente Cordon ingon nga kini may kalabotan sa kaminyoon. Hunahunaa usab kon aduna bay bisan unsa nga nagpugong kaninyo gikan sa pagpadayon (o mas aktibong nagpadayon) og mahangturong kaminyoon.