Leksiyon 20 Materyal sa Pagpangandam sa Klase

Ang Sagrado nga mga Responsibilidad sa mga Amahan

Ang Langitnong Amahan mitugyan ngadto sa Iyang mga anak nga lalaki sa mga responsibilidad nga “mao ang mangulo sa ilang mga pamilya diha sa gugma ug sa pagkamatar[o]ng ug … sa pagsangkap sa mga kinahanglanon sa kinabuhi ug sa pagpanalipod sa ilang mga pamilya” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Samtang magtuon ka niini nga leksiyon, paghunahuna kon sa unsang paagi nga napanalanginan ka sa mga amahan ug sa ubang mga lalaki nga nagtinguha sa pagtuman sa ilang sagrado nga mga responsibilidad.

Pahinumdom: Niini nga leksiyon, mopukos kita sa responsibilidad sa pagpanalipod. Ang mga hilisgotan sa pagpangulo ug pagsangkap gihisgotan sa miaging mga leksiyon.

Seksiyon 1

Sa unsang paagi nga ang mga lalaki isip mga amahan mohimo sa Langitnong Amahan ug ni Jesukristo nga sumbanan sa ilang mga paningkamot?

Samtang nagserbisyo sa Kinatibuk-ang Kapangulohan sa Relief Society, si Presidente Linda K. Burton namulong mahitungod sa pipila ka hagit nga giatubang sa mga lalaki:

Kini tingali malis[o]d, gani imposible, alang sa mga tawo nga may pakigsaad sa Dios sa pagpuyo sa kalib[o]tan nga wala lamang maghatag og bili sa ilang balaan nga mga responsibilidad apan nagpadala usab og bakak nga mga mensahe kon unsay buot ipasab[o]t sa pagkahimong usa ka “tinuod nga tawo.” Ang usa ka bakak nga mensahe mao ang “Para nako ang importante ako.” Sa laing bahin adunay makauulaw ug mabiay-biayong mensahe nga ang mga bana ug mga amahan wala na kinahanglana. Naghangyo ako kaninyo sa dili pagpaminaw sa mga bakak ni Satanas! Siya nawad-an sa sagradong pribilehiyo nga mahimong bana o amahan. Tungod kay siya nasina niadtong kinsa may sagradong mga tahas nga dili maiya, siya nagtinguha nga ang “tanan nga mga tawo … mahimo nga mauyamot sama ngadto kaniya” [2 Nephi 2:27]! (“Magdungan Kita’g Saka,” Liahona, Mayo 2015, 30)

Masugakod nato ang sayop nga mga mensahe mahitungod sa pagkaamahan pinaagi sa pagtan-aw sa Langitnong Amahan isip usa ka hingpit nga ehemplo sa matarong nga pagkaamahan. Si Elder D. Todd Christofferson sa Korum sa Napulog Duha ka Apostoles mitudlo:

Ang hingpit, balaanong pagpahayag sa pagkaamahan mao ang atong Langitnong Amahan. Ang Iyang kinaiya ug mga hiyas naglakip sa abunda nga kaayo ug hingpit nga gugma. Ang Iyang buhat ug himaya mao ang kalamboan, kalipay, ug kinabuhing dayon sa Iyang mga anak [tan-awa sa Moises 1:39]. Ang mga amahan niining napukan nga kalib[o]tan walay ikatandi sa Kahalangdon sa Itaas, apan sa ilang labing maayo, sila naningkamot sa pagsunod Kaniya, ug sila sa pagkatinuod naghago sa Iyang buhat. Gipasidunggan sila og usa ka talagsaon ug bug-at nga pagsalig. (“Mga Amahan,” Liahona, Mayo 2016, 94)

Nakat-onan usab nato ang mga baroganan bahin sa matarong nga pagkaamahan gikan sa ehemplo ni Jesukristo. Kon kita natawo pag-usab sa espirituhanong paagi, nahimo Siya nga Amahan sa atong bag-ong kinabuhi (tan-awa sa Mosiah 5:7; Ether 3:14; Doktrina ug mga Pakigsaad 25:1).

Pagtuon agi og Pagpangandam alang sa Klase

Atol sa Iyang mortal nga pangalagad, ang Manluluwas mitudlo sa Iyang mga sumusunod mahitungod sa Iyang tahas isip ang Maayong Magbalantay. Basaha ang Juan 10:11–15, ug hunahunaa kon sa unsang paagi nga ang ehemplo sa Manluluwas isip ang Maayong Magbalantay ikakomparar ngadto sa mga paningkamot sa matarong nga mga amahan diha sa usa ka pamilya.

Irekord ang Inyong mga Hunahuna

Pangita og tudling sa kasulatan o asoy nga nagtudlo sa mga baroganan bahin sa matarong nga pagkaamahan gikan sa mga ehemplo sa Langitnong Amahan o ni Jesukristo. Irekord ang mga baroganan nga imong makit-an, ug isulat kon sa unsang paagi nga ang mga lalaki makagamit niini nga mga baroganan sa atong panahon karon. Pag-andam sa pagpaambit sa imong mga hunahuna diha sa klase.

Seksiyon 2

Sa unsang paagi nga ang pagkamahigugmaon ug ang pagkaanaa gayod kanunay makatabang sa mga amahan nga mapanalipdan ang ilang mga pamilya?

Si Presidente M. Russell Ballard sa Korum sa Napulog Duha ka Apostoles mitudlo nga ang responsibilidad sa usa ka amahan sa pagpanalipod sa iyang pamilya naglakip sa pisikal ug espirituhanon nga pagpanalipod:

Ang mga amahan gila[o]man sa Dios ug sa Iyang mga propeta nga dili lamang magsangkap alang sa ilang mga pamilya kondili sa pagpanalipod usab kanila. Ang mga kakuyaw sa tanang matang anaa sa kalib[o]tan diin kita nagpuyo. Ang pisikal nga pagpanalipod batok sa natural o binuhat sa mga tawo nga piligro importante. Ang moral nga mga kakuyaw anaa usab sa atong palib[o]t, nga giatubang sa atong mga anak gikan sa ilang sayo nga pangidaron. Ang mga amahan adunay mahinungdanong tahas sa pagpanalipod sa mga anak batok sa maong mga panlit-ag. (“Ang Sagradong mga Responsibilidad sa Pagkaginikanan,” Liahona, Mar. 2006, 14)

Dugang ngadto sa mga paagi nga ang mga amahan makapanalipod sa ilang mga anak, si Presidente Howard W. Hunter mitudlo:

Ang usa ka matarong nga amahan makapanalipod sa iyang mga anak pinaagi sa iyang panahon ug presensya diha sa ilang sosyal, pang-edukasyon, ug espirituhanon nga mga kalihokan ug mga responsibilidad. Ang malumong mga pagpahayag sa gugma ug pagbati ngadto sa mga anak responsibilidad usab sa amahan sama sa inahan. Sultihi ang inyong mga anak nga gihigugma ninyo sila. (“Being a Righteous Husband and Father,” Ensign, Nob. 1994, 51)

Ang pagkahimong usa ka amahan kinsa mahigugmaon ug anaa gayod kanunay nagkinahanglan og tinuyo ug mapadayonon nga paningkamot. Ikonsiderar kon unsa ang imong makat-onan gikan sa mosunod nga ehemplo ni Presidente Russell M. Nelson:

Ang akong trabaho mao ang pagsuporta sa akong asawa ug akong mga anak, ug dili ang sukwahi niini. … Kon kamo anaa sa balay, magpukos kamo sa balay. Kalimti ang mahitungod sa katrapik. Ihatag nila ang 100 porsiyento sa imong atensiyon kon anaa na kamo diha. Kanunay nakong ingnon ang akong kaugalingon, “Ayaw pagsulod diha sa balay, Russell, hangtod nga ikaw makapanalangin sa kinabuhi sa imong mga anak ug asawa.” (Sa Vivian S. Lee, “Elder Russell M. Nelson, M.D., ’47,” Good Notes (blog), University of Utah Health, Sept. 12, 2014, uofuhealth.utah.edu/notes)

Ang positibong impluwensiya sa usa ka amahan nganha sa iyang mga anak adunay talagsaong mga epekto sa ilang paglambo. Pananglitan, ang pagsiksik nagsugyot nga ang mahigugmaon ug manggilabot nga amahan:

• Makapasiugda og kalamboan sa pagtahod sa kaugalingon, pagkontrolar sa kaugalingon, pagsugakod sa kakapoy, ug pagkamasinabtanon sa gender (dinhi, nagpasabot nga biological nga sekso sa pagkatawo) sa iyang mga anak nga lalaki ug mga anak nga babaye.

• Makapalambo og posibilidad nga ang iyang mga anak mahimong luwas ug adunay pagsalig sa emosyonal nga paagi ug makaugmad og mas maayong relasyon sa uban.

• Makapakunhod sa pagkatap sa kakabos, krimen, ug pag-abuso sa drugas. (Tan-awa sa James E. Faust, “Fathers, Mothers, Marriage,” Ensign, Ago. 2004, 3–7; Sarah Keenan, “Elephants, Fathers, and Families,” Ensign, Sept. 2018, 54–58; tan-awa usab sa mga pakisayran nga gikutlo niini nga mga artikulo.)

Ang makapanalipod nga impluwensiya sa usa ka amahan usa ka lig-on nga katugbang ngadto sa mahinungdanong pag-amuma sa usa ka inahan. Isip katimbang nga kauban diha sa kaminyoon, ang mga asawa ug mga inahan moambit sa responsibilidad sa pagpanalipod sa ilang mga pamilya. Ang mga bana ug mga asawa mahimong magtinabangay ug magtinambagay samtang nagtuman sila niining sagrado nga katungdanan.

Ang tahas sa pagkaamahan ug ang sagrado nga responsibilidad sa pagpanalipod magamit sa tanang anak nga lalaki sa Langitnong Amahan pinaagi sa katungod sa ilang balaanong mahangtoron nga kinaiyahan ug kapalaran. Bisan kon ang mga lalaki nagtuman niini nga responsibilidad ilabi na diha sa ilang kaugalingong pamilya, sila makatuman usab niini nga responsibilidad diha sa laing mga sitwasyon. Ikonsiderar ang mga ehemplo ni Jetro ngadto sa iyang umagad nga si Moises (tan-awa sa Exodo 18) ug ni Helaman ngadto sa batan-ong mga manggugubat (tan-awa sa Alma 56–57). Unsa pa ang mga ehemplo gikan sa kasulatan nga imong mahunahunaan?

Pamalandong agi og Pagpangandam alang sa Klase

Sa unsang mga paagi nga ikaw napanalanginan ug napanalipdan pinaagi sa gugma ug pagpanggilabot sa matarong nga amahan o gipakasama nga amahan diha sa imong kinabuhi?

Seksiyon 3

Sa unsang paagi nga ang balaanong pagpadayag ug gahom sa pagkapari makatabang sa mga amahan sa pagpanalipod sa ilang mga pamilya?

Gikan sa kasinatian ni Jose sa Nazaret, makakat-on kita og importante nga baroganan kon unsaon sa pagpanalipod sa atong mga pamilya.

Pagtuon agi og Pagpangandam alang sa Klase

Basaha ang Mateo 2:13–15, ug mangita kon unsay nakatabang ni Jose nga mapanalipdan ang bata nga Kristo ug si Maria gikan sa kakuyaw.

Ang pagpadayag sa susamang paagi makatabang sa mga amahan sa atong panahon karon nga mapanalipdan ug mapanalanginan ang ilang mga pamilya. Sama sa gitambag ni Presidente Ballard, “Ang mga amahan kinahanglang magtinguha kanunay alang sa paggiya gikan sa Espiritu Santo aron masay[o]d sila kon unsay buhaton, unsay isulti, ug masay[o]d usab kon unsay dili angayng buhaton ug unsay dili angayng isulti” (“Ang Sagradong mga Responsibilidad sa Pagkaginikanan,” 12).

Ang mga lalaki nga nagtuman sa mga pakigsaad nga mga sumusunod ni Jesukristo adunay laing sagrado nga gasa nga mahimo nilang gamiton sa pagpanalipod sa ilang mga pamilya. Namulong ngadto sa mga lalaki, si Presidente Boyd K. Packer sa Korum sa Napulog Duka ka Apostoles mitudlo mahitungod niini nga gasa:

Kamo adunay gah[o]m sa priesthood nga gikan gay[o]d sa Ginoo aron sa pagpanalip[o]d sa inyong panimalay. Adunay mga higayon sa dihang ang tanan nga nagbar[o]g isip panalip[o]d tali sa inyong pamilya ug sa pagsamok sa kaaway mao kana nga gah[o]m. (“Ang Gah[o]m sa Priesthood,” Liahona, Mayo 2010, 9)

Si Presidente Nelson mitudlo sa mga lalaki kon sa unsang paagi nga mapalambo nila ang ilang gahom sa pagkapari aron sa pagpanalipod sa ilang mga pamilya:

Himoa nga ang pagpunting sa adlaw-adlaw nga paghinulsol importante kaayo sa inyong kinabuhi aron nga kamo makagamit sa pagkapari nga mas gamhanan pa sukad masukad. Mao ra kini ang bugtong paagi nga magpabilin kamo ug ang inyong pamilya nga luwas sa espirit[u]wal nga paagi sa malis[o]d nga mga adlaw nga umaab[o]t. (“Kita Makabuhat og Mas Maayo pa ug Mahimong mas Maayo,” Liahona, Mayo 2019, 69)

Paglihok

Ikonsiderar ang pagsulat ug pagpadala og mubo nga sulat sa pasalamat ngadto sa imong amahan o sa usa ka lalaki nga nahimong impluwensiya sa pagpanalipod ug paglig-on sa imong kinabuhi.

Gusto pa og Dugang? (Opsiyonal)

Asa ko makakat-on pa og dugang mahitungod sa matarong nga pagkaamahan?

Ang pakigpulong ni Elder Christofferson nga “Mga Amahan” (mga pahina 93–97) naghatag og labing maayong tambag kon unsaon aron mahimong usa ka matarong, mahigugmaon nga amahan.

Sa unsang paagi nga ang mga lalaki makapalambo sa gahom sa pagkapari?

Diha sa iyang pakigpulong nga “Ang Bugti sa Gah[o]m sa Priesthood” (Liahona, Mayo 2016, 66–69), si Presidente Nelson mitudlo mahitungod sa pipila ka paagi nga ang mga lalaki makapalambo sa ilang gahom sa pagkapari.