Leksiyon 22 Materyal sa Pagpangandam sa Klase: Pag-amuma sa mga Anak diha sa Pagkamatarong
“Leksiyon 22 Materyal sa Pagpangandam sa Klase: Pag-amuma sa mga Anak diha sa Pagkamatarong,” Materyal sa Magtutudlo sa Ang Mahangtoron nga Pamilya (2022)
“Leksiyon 22 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
usa ka pamilya nga magkaubang nagtuon sa ebanghelyo
Leksiyon 22 Materyal sa Pagpangandam sa Klase
Pag-amuma sa mga Anak diha sa Pagkamatarong
Ang pagpadako sa mga anak nga magmalig-on sa espirituhanong paagi sa kalibotan karon murag lisod kaayo. Hinoon, ang usa ka saad nga gihatag sa Manluluwas ngadto sa mga Nephite magamit sa atong panahon karon: “Ang tanan ninyo nga mga anak pagatudloan mahitungod sa Ginoo; ug hilabihan ang kalinaw sa inyong mga anak” (3 Nephi 22:13). Samtang nagtuon ka niini nga lesksiyon, ikonsiderar kon unsaon nimo pagtuman ang imong “sagrado nga katungdanan sa pag-amuma sa [imong] mga anak … sa pagkamatar[o]ng” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).
Seksiyon 1
Unsa ang gilaoman sa Ginoo kanako isip usa ka ginikanan?
Sa pagsugod niini nga dispensasyon, si Jesukristo mitudlo sa mga ginikanan mahitungod sa ilang responsibilidad sa pagpadako sa ilang mga anak diha sa pagkamatarong. Siya mipahayag, “Ako nagsugo kaninyo sa pag-amuma sa inyong mga anak diha sa kahayag ug kamatuoran” (Doktrina ug mga Pakigsaad 93:40). Dayon ang Manluluwas miawhag ni Propeta Joseph Smith ug sa ubang mga lider sa Simbahan nga ipahimutang diha sa kahusay ang ilang mga panimalay ug magmahimong “labaw nga makugihon ug mabuhaton diha sa panimalay” (bersikulo 50; tan-awa sa mga bersikulo 41–50).
Ang mga propeta sa ulahing mga adlaw mipahayag usab nga ang mga ginikanan kinahanglang motuyo gayod sa paggahin sa ilang mga paningkamot sa pagtudlo sa ebanghelyo diha sa ilang mga panimalay. Gipasabot usab nila og maayo nga ang pagkat-on sa ebanghelyo kinahanglan nga “nakasentro sa pamilya ug gisuportahan sa Simbahan” (David A. Bednar, “Andam nga Makaangkon sa Matag Gikinahanglan nga Butang,” Liahona, Mayo 2019, 101; tan-awa usab sa mga pahina 102–4).
Samtang nagserbisyo sa Kinatibuk-ang Kapangulohan sa Sunday School, si Presidente Tad R. Callister mitudlo:
Imahe
Presidente Tad R. Callister
Isip mga ginikanan, kinahanglang kita ang nag-unang mga magtutudlo sa ebanghelyo ug mga ehemplo sa atong mga anak—dili ang bishop, Sunday School, Young Women o Young Men, apan ang mga ginikanan. Isip ilang nag-unang mga magtutudlo sa ebanghelyo, makatudlo kita kanila sa gah[o]m ug sa katinuod sa Pag-ula—sa ilang pagkatawo ug balaang padulngan—ug ang paghimo niini naghatag kanila og lig-ong pundasyon nga katuk[o]ran. Human sa tanan, ang panimalay mao ang labing nindot nga dapit alang sa pagtudlo sa ebanghelyo ni Jesukristo. (“Mga Ginikanan: Ang Nag-unang mga Magtutudlo sa Ebanghelyo sa Ilang mga Anak,” Liahona, Nob. 2014, 32–33)
Basaha ang Doktrina ug mga Pakigsaad 68:25, 28, ug ikonsiderar ang pagmarka sa mga kamatuoran nga ang mga ginikanan adunay tulubagon sa pagtabang sa ilang mga anak nga makasabot.
Human sa pagkutlo niini nga mga bersikulo, si Sister Cheryl A. Esplin, kanhi magtatambag sa Kinatibuk-ang Kapangulohan sa Primary, mikomentaryo:
Imahe
Sister Cheryl A. Esplin
Ang pagtudlo sa atong mga anak sa pagsab[o]t labaw pa kay sa paghatag lamang og impormasyon. Pagtabang kini sa atong mga anak nga ang doktrina makasulod sa ilang mga kasingkasing nga kini mahimong kabahin sa ilang pagkatawo ug makita sa ilang mga kinaiya ug pamatasan sa tibuok nilang kinabuhi. (“Pagtudlo sa Atong mga Anak nga Makasab[o]t,” Liahona, Mayo 2012, 10)
Samtang nagserbisyo sa Kinatibuk-ang Kapangulohan sa Primary, si Presidente Joy D. Jones mitudlo:
Imahe
Presidente Joy D. Jones
Dili kita makahulat alang sa pagkakabig nga mahitabo lamang ngadto sa atong mga anak. Ang wala damha nga pagkakabig dili baroganan sa ebanghelyo ni Jesukristo. Ang mahisama sa atong Manluluwas dili mahitabo sa sulagma nga paagi. Ang tinuyo nga pagmahal, pagtudlo, ug pagpamatuod makatabang sa mga bata sa pagsugod sa batan-ong edad nga mobati sa impluwensya sa Espiritu Santo. Ang Espiritu Santo importante ngadto sa pagpamatuod ug pagkakabig sa atong mga anak ngadto ni Jesukristo; nagtinguha kita kanila nga sa “kanunay mahinumdom kaniya, nga sila unta makabaton sa iyang Espiritu uban kanila” [Doktrina ug mga Pakigsaad 20:79]. (“Importanting mga Panag-istoryahay,” Liahona, Mayo 2021, 12–13)
Imahe
icon, pamalandong
Pamalandong agi og Pagpangandam alang sa Klase
Sa unsang paagi nga ang mga ginikanan makatabang sa ilang mga anak nga “ang doktrina makasulod sa ilang mga kasingkasing nga kini mahimong kabahin sa ilang pagkatawo”? Sa unsang paagi nga ang mga ginikanan makatabang sa ilang mga anak nga mobati ug makakat-on gikan sa Espiritu Santo?
Seksiyon 2
Unsa nga mga tulumanon ang makatabang nako sa paggiya sa akong mga anak ngadto sa Manluluwas?
Si Nephi ug ang iyang katawhan aktibong nagtinguha sa pagtabang sa ilang mga anak nga makakat-on bahin sa Manluluwas.
Imahe
icon, pagtuon
Pagtuon agi og Pagpangandam alang sa Klase
Basaha ang 2 Nephi 25:26, ug hunahunaa kon sa unsang paagi nga ang mga ginikanan sa atong panahon karon makasunod sa ehemplo niini nga mga Nephite.
Si Elder Neil L. Andersen sa Korum sa Napulog Duha ka Apostoles mihatag og tambag nga mogiya sa mga ginikanan sa pagtabang sa ilang mga anak nga makakat-on bahin sa Manluluwas ug gikan sa Manluluwas:
Imahe
Elder Neil L. Andersen
Aduna bay mga imahe sa Manluluwas sa atong mga panimalay? Naghisgot ba kita kanunay ngadto sa atong mga anak mahitungod sa mga sambingay ni Jesus? “Ang mga istorya [ka]bahin ni Jesus mahimong makatabang sa pagpalambo sa pagtuo diha sa mga kasingkasing sa atong mga anak” [Neil L. Andersen, “Suginli Ko sa mga Istorya ni Jesus,” Liahona, Mayo 2010, 108]. Kon ang inyong mga anak mangutana kaninyo, hunahunaa ang mahitungod sa pagtudlo unsay gitudlo sa Manluluwas. Pananglitan, kon ang imong anak mangutana, “ Papa, nganong mag-ampo man kita?” Mahimo kang motubag, “Nindot kana nga pangutana. Nakahinumdom ka ba sa dihang si Jesus nag-ampo? Hisg[o]tan nato ngano nga Siya nag-ampo ug giunsa Niya sa pag-ampo.” (“Kita Naghisgot kang Kristo,” Liahona, Nob. 2020, 89)
Ang tambag ni propeta Moises nga gihatag ngadto sa Israelita nga mga ginikanan mahimong magamit nato: “Itudlo [ninyo ang mga sugo] kanunay sa inyong kabataan. Hisgoti kini kon anaa kamo sa inyong balay o kon magpanaw kamo o sa dayon na ninyong katulog ug sa pagmata ninyo sa buntag.” (Deuteronomio 6:7).
Si Presidente Jones namalandong sa diwa sa tambag ni Moises sa dihang mitudlo siya:
Imahe
Presidente Joy D. Jones
[Usa ka] yawe sa pagtabang sa mga kabataan nga mahimong makabatok sa sala mao ang pagsugod sa sayo kaayo nga mga edad aron sa mapinanggaong paagi motudlo kanila sa nag-unang mga doktrina ug mga bar[o]ganan sa ebanghelyo—gikan sa mga kasulatan, sa Mga Artikulo sa Hugot nga Pagtuo, sa Alang sa Kalig-on sa mga Kabatan-onan nga booklet, mga awit sa Primary, mga himno, ug sa atong kaugalingong mga pagpamatuod—nga mogiya sa kabataan ngadto sa Manluluwas.
Ang pagmugna og makanunayon nga mga gawi sa pag-ampo, pagtuon sa kasulatan, family home evening, pagsimba ma-Dominggo naggiya ngadto sa bug-os, mapaday[o]non, ug lig-ong mga hiyas sa pamatasan—sa laing pagkasulti, espirituhanong kalig-on. …
Mga kaigsoonan, guniti og maayo ang inyong gagmay nga mga anak—maayo kaayo nga ilang makita ang inyong inadlaw nga relihiy[o]song kinaiya ug magtan-aw kaninyo nga nagtuman sa inyong mga saad ug mga pakigsaad. “Ang kabataan maayo kaayong mga tigsundog, busa hatagi sila og nindot kaayo nga sundugon” [anonymous]. (“Usa ka Henerasyon nga Makabatok sa Sala,” Liahona, Mayo 2017, 88–89)
Paggahin og pipila ka minuto sa pagrekord og mga kinaiya o mga gawi nga mahimo nimong sugdan o padayon nga palamboon karon nga maoy makadugang sa imong abilidad sa pagpadako sa imong mga anak diha sa pagkamatarong. Unsa nga espirituhanong mga tulumanon ang gusto nimong maestablisar sa imong pamilya sa umaabot?
Seksiyon 3
Unsa ang akong mahimong buhaton kon ang usa ka sakop sa pamilya mahisalaag gikan sa dalan sa ebanghelyo?
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar
Usa sa labing sakit nga alant[o]son sa usa ka buotang ginikanan sa Zion mao ang usa ka anak nga nahisalaag sa dalan sa ebanghelyo. Ang mga pangutana nga “Ngano man?” o “Unsay akong nahimong sayop?” ug “Unsaon nga matabangan karon kini nga anak?” mao ang kanunayng magbalik-balik sa hunahuna ug kasingkasing niana nga mga ginikanan. (“Matinud-anon nga mga Ginikanan ug Badl[o]ngon nga mga Anak: Pagpabilin sa Pagla[o]m Samtang Nakigbatok sa Dili Pagsinabtanay,” Liahona, Mar. 2014, 28)
Si Lehi ug Sariah nakasabot sa kasakit nga hinungdan sa pagkahisalaag sa mga anak gikan sa dalan sa ebanghelyo.
Imahe
icon, pagtuon
Pagtuon agi og Pagpangandam alang sa Klase
Basaha ang 1 Nephi 8:37–38, nga mangita kon giunsa ni Lehi sa pagpaningkamot sa pagtabang ni Laman ug Lemuel human niya makita diha sa iyang panan-awon ang ilang pagsalikway sa Ginoo.
Hibaloi kon giunsa ni Lehi sa pagsangyaw, o pagtudlo, ang iyang mga anak sa malumong paagi. Si Elder Ulisses Soares sa Korum sa Napulog Duha ka Apostoles mitudlo og mga paagi sa atong pagsanong kon ang usa ka sakop sa pamilya mahisalaag sa dalan sa ebanghelyo:
Imahe
Elder Ulisses Soares
Lis[o]d masabtan ang tanang rason nganong ang ubang mga tawo miagi sa laing dalan. Ang pinakamaayo natong mabuhat niining mga sitwasyon mao lamang ang paghigugma ug paghang[o]p kanila, pag-ampo alang sa ilang kaayohan, ug pagtinguha alang sa tabang sa Ginoo nga masay[o]d kon unsay buhaton ug isulti. Sinsero nga magmaya uban kanila diha sa ilang mga kalamp[o]san; mahimo nilang mga higala ug magtan-aw sa unsay maayo diha kanila. Dili gay[o]d nato sila talikdan apan mopabilin sa atong mga relasyon. Ayaw gay[o]d sila ibaliwala o hukmi sa sayop nga paagi. Higugmaa lamang sila! Ang sambingay sa nawala nga anak nagtudlo kanato nga kon mahigmata na ang mga anak, kasagaran magtinguha sila nga mopauli. Kon mahitabo kana sa inyong mga minahal sa kinabuhi, pun-a ang inyong kasingkasing og kalooy, dagan ngadto nila, gaksa sila, ug hal[o]ki sila, sama sa gibuhat sa amahan sa nawala nga anak [tan-awa sa Lucas 15:20].
Sa katap[o]san, padayon sa pagpakabuhi og tak[o]s nga kinabuhi, magmahimong usa ka maayong ehemplo ngadto nila kon unsay inyong gituohan, ug magpaduol sa atong Manluluwas, si Jesukristo. Nakaila ug nakasab[o]t Siya sa atong hilabihan nga kasub-anan ug mga kasakit, ug panalanginan Niya ang inyong mga paningkamot ug dedikasyon ngadto sa inyong mga minahal sa kinabuhi kon dili man niining kinabuhia, sa sunod nga kinabuhi. (“Unsaon Nako Pagkasab[o]t?,” Liahona, Mayo 2019, 8)
Unsa ang uban pang mga pananglitan gikan sa mga kasulatan bahin sa matarong nga mga ginikanan kansang anak o mga anak nahisalaag gikan sa dalan sa ebanghelyo? (Ikonsiderar, pananglitan, si Lehi ug ang iyang mga anak nga lalaki nga sila si Laman ug Lemuel o si Alma ug ang iyang anak nga lalaki nga si Alma nga Batan-on.) Unsa ang mahimo nimong makat-onan gikan sa mga tubag niini nga mga ginikanan nga makagiya nimo sa imong pagtubag ngadto sa mga sakop sa pamilya nga nahisalaag?
