Leksiyon 8 Materyal sa Pagpangandam sa Klase: Pagtinguha sa Pagsabot sa Pagkaibog sa Managsama og Sekso ug sa Paghigugma sa Atong LGBT nga mga Kaigsoonan
“Leksiyon 8 Materyal sa Pagpangandam sa Klase: Pagtinguha sa Pagsabot sa Pagkaibog sa Managsama og Sekso ug sa Paghigugma sa Atong LGBT nga mga Kaigsoonan,” Materyal sa Magtutudlo sa Ang Mahangtoron nga Pamilya (2022)
“Leksiyon 8 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Imahe
grupo sa mga batan-ong hamtong [young adults] nga naglakaw sa baybayon
Leksiyon 8 Materyal sa Pagpangandam sa Klase
Pagtinguha sa Pagsabot sa Pagkaibog sa Managsama og Sekso ug sa Paghigugma sa Atong LGBT nga mga Kaigsoonan
Kitang tanan hinigugma nga mga anak sa langitnong mga ginikanan. Kita usab mga indibidwal nga adunay talagsaon nga mga talento, mga abilidad, ug mga kasinatian. Ang pipila sa mga anak sa Dios makasinati og pagkaibog sa managsama og sekso o magpaila nga usa ka lesbian [tomboy], gay [bayot], bisexual, o transgender, nga sa kasagaran giminubo nga LGBT. (Ang hilisgotan sa transgender gihisgotan sa leksiyon 7.) Giunsa nimo pagtubag sa uban kinsa nakasinati og pagkaibog sa managsama og sekso o nagpaila nga LGBT? Kon ikaw nakasinati og pagkaibog sa managsama og sekso, unsa may imong kasinatian uban sa pamilya, mga higala, ug mga miyembro sa Simbahan? Samtang imong tun-an kini nga materyal, ikonsiderar unsay imong mabuhat nga mahimong mas sama sa Manluluwas ug motagad sa tanang mga anak sa Langitnong Amahan uban sa gugma, pagpahilakip, ug pagtahod.
Seksiyon 1
Sa unsang paagi ang Manluluwas makatabang nako nga mopakita og gugma ug pagtahod alang niadtong kinsa nakasinati og pagkaibog sa managsama og sekso?
Si Presidente Thomas S. Monson mitudlo nga “ang gugma mao ang kahulogan sa ebanghelyo, ug si Jesukristo mao ang atong Ehemplo” (“Gugma—ang Kahulogan sa Ebanghelyo,” Liahona, Mayo 2014, 91). Sa hapit na mahuman ang Iyang mortal nga pangalagad, ang Manluluwas mihatag og gibug-aton sa kaimportante sa tinud-anay nga paghigugma sa tanan pinaagi sa paghatag sa Iyang mga disipulo og “usa ka bag-ong sugo.”
Imahe
icon, pagtuon
Pagtuon agi og Pagpangandam alang sa Klase
Basaha ang Juan 13:34–35, ug pamalandongi kon sa unsa nga paagi nga kini nga sugo makagiya nimo isip usa ka disipulo ni Jesukristo.
Sama sa ubang miyembro sa Simbahan, kadtong kinsa nakasinati og pagkaibog sa managsama og sekso adunay mga higala ug mga pamilya, mga paglaom ug mga damgo, ug mga kalig-on ug mga kahuyang, ug sila naningkamot sa pagpakigbisog sa mga hagit sa kinabuhi kutob sa ilang mahimo. Subo lang, ang pipila kinsa nakasinati og pagkaibog sa managsama og sekso o nagpaila isip LGBT mibati nga sila walay lugar diha sa Simbahan sa Ginoo. Imbis nga mobati nga gihigugma ug gisuportahan, daghan ang mibati nga gisalikway, gibiyaan, naglibog, ug nahadlok.
Samtang nagserbisyo isip magtatambag diha sa Kinatibuk-ang Kapangulohan sa Young Women, si Sister Carol F. McConkie mitudlo:
Imahe
Sister Carol F. McConkie
Kita dili lang o bisan motawag sa atong kaugalingon nga usa ka disipulo ni Kristo kon kita wala motabang sa uban subay nianang dalan [sa pakigsaad]. Ang ebanghelyo ni Jesukristo wala mopabati sa mga tawo nga dili sila importante. Ang mga tawo mopabati sa mga tawo nga dili sila importante. …
Kon kita motukod sa gingharian sa Dios dinhi sa yuta, kita nagkinahanglan sa tanan nga moduol, nga moduol ug mohimo sa ilang bahin. (“Lifting Others” [2:49], ChurchofJesusChrist.org)
Paghunahuna sa makadiyot mahitungod sa kinabuhi sa Manluluwas. Kanus-a Siya mipakita og gugma alang niadtong kinsa nakigbisog nga mobati nga gidawat? Ikonsiderar kon sa unsa nga paagi nga ang paghimo sa mosunod nga mga sugyot makatabang nimo nga mas makasunod sa ehemplo sa gugma sa Manluluwas kon maghisgot ug kon mag-istorya sa mga indibidwal kinsa nakasinati og pagkaibog sa managsama og sekso:
Sulti ug lihok uban ang tinuod nga pag-amuma, pagpakabana, ug kalooy. Si Elder Quentin L. Cook sa Korum sa Napulog Duha ka Apostoles mitudlo: “Isip usa ka simbahan, kinahanglang walay laing mas mahigugmaon ug maloloy-on. … Kinahanglan nga kita ang mag-una kabahin sa pagpadayag og gugma, kalooy, ug pagtabang.” (“Let Us Be at the Forefront” [0:59], ChurchofJesusChrist.org; tan-awa ang video aron makat-on pa og dugang.)
Lig-ona ang pagsabot pinaagi sa pagpaminaw nga dili mohukom. Si Presidente Jean B. Bingham sa Kinatibuk-ang Kapangulohan sa Relief Society mipaambit, “Usa sa labing maayong mga paagi sa paghimo og maayo nga relasyon mao ang dili magdahom o magbaton og gihunahuna na nga mga ideya, magbaton og bukas nga hunahuna ug bukas nga kasingkasing.” (Sa pagkat-on og dugang, tan-awa ang “Focus on the One” [2:32], ChurchofJesusChrist.org.)
Moila nga ang pagkaibog ug mga pagbati sa managsama og sekso tinuod. Si Elder D. Todd Christofferson sa Korum sa Napulog Duha ka Apostoles mitambag: “Usa sa butang nga importante kanunay mao ang pag-ila sa mga pagbati sa usa ka tawo, nga kini tinuod. Nga kini tiunay. Nga kita dili molimod nga adunay tawo nga mobati niana.” (Sa pagkat-on pa og dugang, tan-awa ang “Feelings Are Real and Authentic” [0:47], ChurchofJesusChrist.org.)
Pagpunting sa mahangtorong pagkatawo. Si Presidente Russell M. Nelson misulti: “Dili tanang timaan ang managsama og bili. Apan kon ang bisan unsang timaan ang mohulip sa inyong labing importante nga mga timailhan, ang mga resulta mahimong espirituhanon nga makapeligro. … Walay timailhan ang motangtang, mohulip, o mag-una sa prayoridad niining tulo ka malahutayon nga mga titulo: ‘anak sa Dios,’ ‘anak sa pakigsaad,’ ug ‘disipulo ni Jesukristo.’” (“Mga Pagpili alang sa Kahangtoran” [tibuok kalibotan nga debosyonal alang sa mga young adult, Mayo 15, 2022], ChurchofJesusChrist.org).
Tahura ang mga sugo ug mga pakigsaad si Dios. Ang paghigugma sa uban sama sa paghigugma sa Manluluwas kanato wala magpasabot nga kita mouyon nila, moendorso, o moawhag og mga kinaiya nga supak sa mga sugo sa Dios. Si Jesukristo nagtudlo, “Kon nahigugma kamo kanako, tumana ninyo ang akong mga sugo” (Juan 14:15). Si Elder D. Todd Christofferson mipasabot nga ang unang sugo, ang paghigugma sa dios, mao ang unang rason: “Ang pagbutang og una sa unang sugo dili makapawala o makalimita sa atong abilidad sa pagtuman sa ikaduha nga sugo [paghigugma sa atong silingan]. Hinuon, kini nagpadako ug nagpalig-on niini. … Ang atong gugma sa Dios makapataas sa atong abilidad sa paghigugma sa uban nga mas tukma ug mas hingpit tungod kita sa diwa nakig-uban sa Dios diha sa pag-amuma sa Iyang mga anak” (The First Commandment First [Ang Unang mga Sugo Una]” [debosyonal sa Brigham Young University, Mar. 22, 2022], 2, speeches.byu.edu).
Mapakita nato ang gugma ngadto sa Dios ug sa uban kon kita klaro nga mopadangat sa Iyang doktrina ug mga sugo sa sensitibo nga mga paagi. Sumala sa gipahayag sa mga kapanguhaan sa Pagkaibog sa Managsama og Sekso nga gimantala sa Simbahan:
Walay kausaban sa posisyon sa Simbahan sa unsay matarong sa moral nga paagi. Apan unsa ang nausab—ug unsay kinahanglan nga usbon—mao ang pagtabang sa mga miyembro sa Simbahan nga motubag sa sensitibo ug sa mahunahunaon nga paagi kon sila makasugat og pagkaibog sa managsama og sekso sa ilang kaugalingon nga mga pamilya, sa ubang mga miyembro sa Simbahan, o bisan asa. (Sa Same-Sex Attraction: Church Leaders, “Communicate Doctrine with Love,” ChurchofJesusChrist.org; tan-awa usab sa Dallin H. Oaks, “What Needs to Change” [video], ChurchofJesusChrist.org)
Imahe
icon, pamalandong
Pamalandong agi og Pagpangandam alang sa Klase
Paggahin og pipila ka minuto sa pagpamalandong sa imong kinaiya ug mga aksyon ngadto niadtong kinsa nakasinati og pagkaibog sa managsama og sekso o nagpaila nga LGBT. Makasulti ka ba nga ang imong mga hunahuna, mga pulong, ug mga binuhatan nagsubay sa sugo sa Ginoo nga “maghigugmaay kamo ang usa sa usa; maingon nga Ako nahigugma kaninyo”? (Juan 13:34). Kon ikaw nakasinati sa pagkaibog sa managsama og sekso, ikonsiderar kon unsaon nimo sa pagpakita og gugma ngadto niadtong kulang sa pagsabot ug kalooy alang sa imong kasinatian.
Seksiyon 2
Unsa ang pipila ka butang nga kinahanglan akong mahibaloan mahitungod sa pagkaibog sa managsama og sekso?
Ang mga pulong sama sa gay [bayot] (usahay gigamit sa kasagaran sa pagpasabot sa usa ka tawo nga nagkagusto sa laing tawo nga kapareha nila og sekso, ug gigamit ilabi na sa pagpasabot sa usa ka lalaki nga nakagusto sa mga lalaki), lesbian [tomboy] (usa ka babaye nga nakagusto sa mga babaye), o bisexual (usa ka lalaki o babaye nga nakagusto sa duha sa mga sekso) mahimong gamiton sa pagpakita og pagbati, pagkatawo, o estilo sa kinabuhi. Hinumdomi nga bisan pa sa pulong o mga pulong nga gamiton sa usa ka tawo sa pagpaila sa iyang sekswal nga mga pagbati o hilig, ang atong labing importante nga pagkatawo mao nga usa ka “hinigugmang espiritu nga anak nga lalaki o babaye sa langitnong mga ginikanan” (“Ang Pamilya: Usa ka Pamahayag ngadto sa Kalibotan,” ChurchofJesusChrist.org).
Ang kalamboan sa atong sekswalidad komplikado ug naimpluwensyahan sa daghan nga mga hinungdan. Ang mga pagbati sa pagkaibog sa managsama nga sekso magkalahi sa kakusog, mag-usab-usab sa paglabay sa panahon, ug dili parehas alang sa tanan. Ang Simbahan walay opisyal nga posisyon sa unsay hinungdan sa pagkaibog sa managsama og sekso. (Tan-awa sa “Same-Sex Attraction: Individuals,” ChurchofJesusChrist.org.)
Tungod sa lawom nga gugma alang sa Iyang mga anak, ang Langitnong Amahan mihatag nato sa balaod sa kaputli ug mimando nga ang sekswal nga relasyon mahitabo “lamang tali sa lalaki ug babaye, kinsa legal nga naminyo isip bana ug asawa” (“Ang Pamilya: Usa ka Pamahayag ngadto sa Kalibotan”). Kini nga balaod nanalipod sa sagrado nga mga katuyoan sa sekswalidad diha sa plano sa Dios ug magamit alang sa tanang mga anak sa Dios. Ang Langitnong Amahan miorden sa sekswal nga mga relasyon nga mahitabo tali sa usa ka lalaki ug usa ka babaye sulod sa pakigsaad sa kaminyoon “alang sa paglalang sa mga bata ug alang sa pagpadayag og gugma” (Gospel Topics, “Chastity,” topics.ChurchofJesusChrist.org).
Agig tubag sa sosyal nga pagpamugos sa pag-usab sa mga pagtulon-an kabahin sa balaod sa kaputli, si Elder D. Todd Christofferson mipahayag:
Imahe
Elder D. Todd Christofferson
Ang balaod sa kaputli gigamit na sukad pa sa sinugdanan. … Ang atong doktrina—dili lang pagtuo, apan doktrina—nga ang sekswal nga mga relasyon angay lamang ug pinasubay sa balaod sa mga mata sa Ginoo tali sa lalaki ug babaye nga legal ug pinasubay sa balaod nga naminyo wala mausab ug dili gayod mausab. (Sa Sarah Jane Weaver, “Church’s Doctrine on Chastity Will Never Change, Says Elder Christofferson,” Church News, Peb. 5, 2015, ChurchofJesusChrist.org)
Importante ang pag-ila tali sa mga pagbati ug mga kinaiya. Ang pagsinati sa pagkaibog sa managsama og sekso o ang pagka-bayot, pagka-tomboy, o pagka-bisexual wala makahimo sa tawo nga makasasala, daotan, o masinupakon; hinoon, ang pagbuhat niini nga mga pagbati pinaagi sa pagsupak sa balaod sa kaputli usa ka pagsupak sa mga sugo sa Langitnong Amahan.
Naghisgot sa posisyon sa Simbahan bahin sa pagkaibog sa managsama og sekso, si Presidente M. Russell Ballard sa Korum sa Napulog Duha ka Apostoles mitudlo:
Imahe
Presidente M. Russell Ballard
Ang Simbahan ni Jesukristo sa mga Santos sa Ulahing mga Adlaw nagtuo nga “ang kasinatian sa samang sekso nga kaibog usa ka lisod nga kamatuoran alang sa daghang mga tawo. Ang kaibog mismo dili sala, apan ang paglihok sumala niana nga kaibog usa ka sala. Bisan tuod og ang mga indibidwal wala magpili sa pagbaton niana nga [mga] kaibog, sila makapili unsaon pagresponde niana nga kaibog” [tan-awa sa Same-Sex Attraction: Individuals, “Is Feeling Same-Sex Attraction a Sin?” nga seksiyon, ChurchofJesusChrist.org]. (“Ang Ginoo Nagkinahanglan Kaninyo Karon!,” Liahona, Sept. 2015, 15)
Ang kalooy sa Ginoo anaa alang ni bisan kinsa nga nakasupak sa balaod sa kaputli. Kon sila mopili nga moduol ngadto Kaniya ug maghinulsol, Siya mopasaylo kanila.
Kon ang mga miyembro sa Simbahan kinsa nakasinati sa pagkaibog sa managsama og sekso o nagpaila isip LGBT motuman sa ilang mga pakigsaad, sila hingpit nga makaapil sa Simbahan, maghupot og mga calling, ug makasimba sa templo (tan-awa sa D. Todd Christofferson, “LGBT People Who Live God’s Laws Can Fully Participate in the Church” [0:48], ChurchofJesusChrist.org; tan-awa usab sa Doktrina ug mga Pakigsaad 97:8).
Kon ikaw nakasinati og pagkaibog sa managsama og sekso, ikonsiderar kon sa unsa nga paagi nga ang kapanguhaan nga gihisgotan diha sa seksiyon sa “Gusto Pa og Dugang?” makapanalangin sa imong kinabuhi. Usab, kon ikaw mobati nga komportable, ikonsiderar ang pagpaambit sa imong kasinatian uban sa gisaligan nga sakop sa pamilya, higala, o lider sa Simbahan. Pagmabinantayon sa pag-label sa imong kaugalingon diha sa publiko sa mga paagi nga makabalda gikan sa imong mahangtoron nga mga tumong.
Imahe
icon, pamalandong
Pamalandong agi og Pagpangandam alang sa Klase
Sa unsa nga paagi nga ikaw mapanalanginan pinaagi sa pagbaton og mas maayong pagsabot kon unsa ang gitudlo sa mga lider sa Simbahan mahitungod sa pagkaibog sa managsama og sekso?
Seksiyon 3
Unsaon nako sa pagsabot ang tanang nag-indigay nga mga opinyon mahitungod sa pagkaibog sa managsama og sekso?
Karon adunay daghan nga nagkalainlaing mga panglantaw mahitungod sa kaminyoon, pamilya, pagkaibog sa managsama og sekso, ug sa mga hilisgotan bahin sa LGBT. Samtang kita makat-on mahitungod niini nga mga hilisgotan, importante ang pagtinguha og mas maayo nga pagsabot sa mahangtoron nga panglantaw sa Langitnong Amahan.
Si Presidente Bingham mitudlo sa mosunod:
Imahe
Presidente Jean B. Bingham
Ang punto nga nakapahimo sa tanang butang nga klaro mao ang mahangtoron nga panglantaw: ang hingpit, malukopon nga panglantaw sa atong Langitnong Amahan. …
Gikan sa Iyang nahimutangan, ang Dios nakakita nato ug sa tanan sa atong palibot “ingon nga sila gayod mao, ug … ingon nga sila gayod mahimo unya [Jacob 4:13]. Ang iyang punto taas og tagal kay sa limitado sa nganhi ug karon, magtugot Kaniya nga makakita sa atong balaan nga potensyal kay sa atong karon o nangagi nga kondisyon. Ug Siya motan-aw sa Iyang tanan nga mga nilalang pinaagi sa gugma. (“How to Be Happy Now—and Forever” [debosyonal sa Brigham Young University, Dis. 10, 2019], 2, speeches.byu.edu)
Samtang basahon nimo ang mosunod nga mga kamatuoran ug sa nagsuporta nga mga pamahayag sa mga propeta ug apostoles, ikonsiderar unsaon niini sa pagtabang kanimo nga dugang nga makapalambo og mahangtoron nga panglantaw bahin sa pagkaibog sa managsama og sekso.
“Ang inyong Langitnong Amahan nahigugma kaninyo—matag usa ninyo. Kana nga gugma dili gayod mausab. … Anaa kini alang kaninyo kon kamo naguol o malipayon, nawad-an sa paglaom o malaomon. Ang gugma sa Dios anaa alang kaninyo dili igsapayan kon mobati man kamo nga angayan o dili sa gugma. (“Wala Kita Mag-inusara,” Liahona, Nob. 2013, 124)
Ang Manluluwas adunay hingpit nga pagsabot sa atong mga kasinatian ug nasayod unsaon sa pagtabang ug pagpalig-on sa matag usa nato (tan-awa sa Alma 7:11–12).
Si Presidente Oaks miingon:
Imahe
Presidente Dallin H. Oaks
“Ang atong Manluluwas nakasinati ug nag-antos sa tanang hagit sa kinabuhi. … Busa Siya nasayod sa atong mga panlimbasog, mga kasubo, mga pagtintal, ug sa atong pag-antos, kay Siya andam nga misinati niining tanan isip mahinungdanong bahin sa Iyang Pag-ula. Ug tungod niini, ang Iyang Pag-ula nakahatag Kaniya og gahom sa pagtabang kanato—sa paghatag nato sa kalig-on aron makalahutay niining tanan. (“Nalig-on pinaagi sa Pag-ula ni Jesukristo,” Liahona, Nob. 2015, 61–62)
Gusto ko nga si bisan kinsa nga usa ka miyembro sa Simbahan kinsa usa ka bayot o tomboy nga makahibalo nga ako nagtuo nga kamo adunay luna diha sa gingharian ug ako nakahibalo nga usahay lisod alang kaninyo nga motan-aw asa kamo mohaom sa Simbahan sa Ginoo, apan kamo nihaom. (“Questions and Answers” [debosyonal sa Brigham Young University, Nob. 14, 2017], 3, speeches.byu.edu)
Ang uban nga nakasinati og pagkaibog sa managsama og sekso naghunahuna unsaon nila nga mohaom ngadto sa plano sa Langitnong Amahan sa kalipay human niini nga kinabuhi. Ang mga propeta mihatag nato og kasiguroan nga ang atong mahigugmaong Langitnong Amahan mopanalangin niadtong tanan kinsa moduol ug magpabilin nga matinud-anon ngadto Kaniya. Si Elder Ulisses Soares mitambag:
Imahe
Elder Ulisses Soares
Ang sama nga mga baroganan magamit niadtong kinsa kaninyo nga nagsinati og pagkadani sa managsama og sekso ug mibati nga walay paglaom ug walay mahimo. Ug tingali tungod niini nga rason ang pipila kaninyo mibati nga ang ebanghelyo ni Jesukristo dili na alang kaninyo. Kon mao kana ang nahitabo, ako mosiguro nga adunay paglaom kanunay diha sa Dios nga Amahan ug sa Iyang plano sa kalipay, diha ni Jesukristo ug sa Iyang maulaong sakripisyo, ug sa pagsunod sa Ilang mahigugmaong mga sugo. Sa Iyang hingpit nga kaalam, gahom, kaangayan, ug kalooy, ang Ginoo mahimong mosilyo nato nga Iyaha, aron kita madala ngadto sa Iyang atubangan ug makabaton og walay katap[o]san nga kaluwasan, kon kita makanunayon ug dili matarog sa paghupot sa mga sugo [tan-awa sa Alma 1:25] ug kanunay nga puno sa maayo nga mga buhat [tan-awa sa Mosiah 5:15]. (“Magpas-an sa Atong Krus,” Liahona, Nob. 2019, 114)
Samtang kita motutok diha sa Langitnong Amahan ug ni Jesukristo ug motuman sa atong mga pakigsaad uban Kanila, kita makalahutay pinaagi sa paglaom (tan-awa sa 2 Nephi 31:20).
Si Presidente Dieter F. Uchtdorf, sa Unang Kapangulohan kaniadto, mipamatuod:
Imahe
Presidente Dieter F. Uchtdorf
Kita naglaom diha ni Jesukristo, diha sa kamaayo sa Dios, diha sa mga pagpakita sa Balaang Espiritu, diha sa kahibalo nga ang mga pag-ampo pagadunggon ug pagatubagon. … Kini nga matang sa paglaom … makapadasig og balik kanato panahon sa malisod nga mga hagit ug maghatag og kalig-on niadtong kinsa mibati og kalisang tungod sa pagkabilanggo diha sa kahadlok, pagduhaduha, ug pagkawalay paglaom. (“Ang Walay Kinutoban nga Gahom sa Paglaom,” Liahona, Nob. 2008, 23)
Uban sa usa ka sakop sa pamilya o gisaligan nga higala, hisgoti unsay imong nakat-onan ug gibati samtang ikaw nagbasa niini nga materyal. Moabot sa klase nga andam nga mopaambit sa bisan unsa nga panabot nga imong naangkon gikan sa inyong panaghisgotan.
