usa ka pamilya nga magkaubang nanglakaw

Leksiyon 27 Materyal sa Pagpangandam sa Klase

Ang Pagpauswag ug Pagpanalipod sa Pamilya isip ang Sukaranan nga Yunit sa Katilingban

Si Presidente M. Russell Ballard sa Korum sa Napulog Duha ka Apostoles miingon, “Ang kalib[o]tan kinahanglan [nga] masay[o]d unsa ang gitudlo sa pamahayag [sa pamilya], tungod kay ang pamilya mao ang sukaranang yunit sa katilingban, sa ekonomiya, sa atong kultura, ug sa atong gobyenro. Ug ingon sa nahibaloan sa mga Santos sa Ulahing mga Adlaw, ang pamilya mao usab ang sukaranang yunit sa celestial nga gingharian” (“Ang Pinakamahinungdanon Mao ang Molungtad og Dugay,” Liahona, Nob. 2005, 42). Samtang maghunahuna kamo mahitungod sa sukaranan nga tahas nga buhaton sa pamilya diha sa katilingban ug sa kahangtoran, ikonsiderar unsay inyong mahimo sa pagtuboy ug pagpanalipod niini.

Seksiyon 1

Unsa nga mga impluwensya ang nakatampo sa pagkabungkag sa pamilya?

Daghang mga hinungdan ang nakapahuyang sa pamilya sa bag-ong mga katilingban. Tungod kay ang Ginoo nahigugma ug gusto nga mopanalangin kanato, Siya namulong pinaagi sa mga propeta aron sa pagpasidaan nato niini ug sa ubang mga kakuyaw. Ang mga propeta sa ulahing mga adlaw mipasidaan nga “ang pagkabungkag sa pamilya makadala sa tagsa-tagsa, sa mga komunidad, ug sa nas[o]d sa mga katalagman nga gipanagna sa karaan ug sa bag-o nga mga propeta” (Ang Pamilya: Usa ka Pamahayag ngadto sa Kalib[o]tan,”,” ChurchofJesusChrist.org).

Ang ebidensya sa “pagkabungkag sa pamilya” naglibot kanato. Sama pananglit, makita nato

• nagkadaghan nga panagtipon nga wala maminyo, sa mga bata nga natawo sa gawas sa kaminyoon, ug mga pamilya nga usa ra ang ginikanan,

• pagkunhod sa mga kaminyoon ug mga pagkahimugso sa mga bata,

• ang pagkakomon sa aborsyon, diborsyo, pang-abuso, ug ang wala matarong nga kinabuhi sa pamilya, ug

• mga polisiya sa publiko ug sa media nga nagpahuyang sa pamilya.

(Tan-awa sa Bruce C. Hafen, “Ang Pamahayag sa Pamilya: Mopaibabaw sa Kalib[o]g sa Kultura,” Liahona, Ago. 2015, 29; Dallin H. Oaks, “Panalipdi ang mga Bata,” Liahona, Nob. 2012, 43; “Diborsyo,” Liahona, Mayo 2007, 70; Julie B. Beck, “Pagtudlo sa Doktrina kabahin sa Pamilya,” Liahona, Mar. 2011, 32.)

nagisi nga litrato sa usa ka lalaki ug babaye

Si Apostol Pablo mipasidaan sa mga kakuyaw nga moabot sa kataposan nga mga adlaw.

icon, pagtuon

Pagtuon agi og Pagpangandam alang sa Klase

Basaha ang 2 Timoteo 3:1–6, 13, ug pamalandong kon sa unsa nga paagi nga ang mga kondisyon nga gihulagway ni Pablo nakatampo sa pagkabungkag sa pamilya. Ikonsiderar usab kon sa unsa nga paagi nga ang pagkabungkag sa pamilya makapadugang niini nga mga kinaiya diha sa katilingban. (Mahimo nimong basahon ang mga footnote o mangita sa dili pamilyar nga mga pulong diha sa diksyonaryo aron sa pagpalawom sa imong pagsabot niini nga tudling.)

Si Elder Bruce D. Porter, kanhi Seventy, mihisgot sa usa ka rason nga ang mga lalaki ug ang mga babaye “maghunahuna lamang sa ilang kaugalingon” (2 Timoteo 3:2):

Elder Bruce D. Porter

Ang pagkabungkag sa minilyon ka pamilya nahitabo tungod sa popular nga media ug kultura nga mihimaya sa paghimo og butang alang lang sa kaugalingon: sa indibidwal nga independente sa kinatibuk-an nga wala makakonektar sa sosyal o moral nga mga obligasyon, libre nga mopadayon bisan unsa pay iyang gipili basta dili kini makahimo og direkta nga pisikal nga kadaot sa ubang nagpalabaw sa kaugalingon. (“Defending the Family in a Troubled World,” Ensign, Hunyo 2011, 15)

icon, pamalandong

Pamalandong agi og Pagpangandam alang sa Klase

Unsa sa inyong hunahuna ang mga epekto sa pagkabungkag sa pamilya diha sa katilingban? Unsa nga mga ehemplo ang inyong nakita niini nga mga epekto?

Seksiyon 2

Unsay akong responsibilidad sa pagtuboy ug pagpanalipod sa pamilya?

Ang Unang Kapangulohan ug Korum sa Napulog Duha ka Apostoles mihatag niini nga mando: “Kami nagtawag sa may kapangakohan nga mga lumulupyo ug mga opisyal sa gobyerno bisan asa sa pag-awhag sa mga tawo sa paghimo niadtong mga butang nga gihimo sa pagpadayon ug sa paglig-on sa pamilya isip sukaranan nga yunit sa katilingban” (“Ang Pamilya: Usa ka Pamahayag ngadto sa Kalib[o]tan”).

Adunay daghan nga mga paagi nga atong matuman kini nga mapanagnaon nga mando. Ikonsiderar ang pipila sa mosunod nga mga ideya:

• Paningkamot sa pagpalig-on sa inyong kaugalingon nga pamilya.

• Pagkat-on sa mga isyu nga nakahulga sa pamilya diin kamo nagpuyo.

• Suportahi o panalipdi ang politikanhon nga mga lider, mga organisasyon, ug mga polisiya sa publiko nga motuboy sa pamilya.

• Gamita ang social media sa pagtuboy sa positibo nga mga hiyas sa pamilya.

• Pangita og mga oportunidad sa pagpaambit sa mga pagtulon-an sa ebanghelyo ug sa imong mga pagbati mahitungod sa pamilya.

mga young adult nag-istoryahanay

Ang mga sirkumstansiya sa atong pamilya dili kinahanglang hingpit aron kita makatuboy o makapanalipod sa pamilya. Ang atong mga tingog gikinahanglan, bisan unsa pa ang mga sirkumstansiya sa atong pamilya.

Samtang nagserbisyo diha sa Kinatibuk-ang Kapangulohan sa Young Women, si Presidente Bonnie L. Oscarson mitudlo:

Presidente Bonnie L. Oscarson

Kinahanglan kitang maisog[o]n nga mopanalipod sa gipadayag sa Ginoo nga mga doktrina nga naghulagway sa kaminyoon, mga pamilya, sa balaang tahas sa kalalakin-an ug kababayen-an, ug sa importansya sa mga panimalay isip sagradong mga dapit—bisan kon ang kalib[o]tan nagsinggit diha sa atong mga dunggan nga kini nga mga bar[o]ganan kinaraan, pinugngan, ug dili na angay. Ang tanan, sa walay pagsapayan sa ilang sitwasyon sa kaminyoon o gidaghanon sa mga anak, makapanalipod sa plano sa Ginoo nga gihulagway diha sa pamahayag bahin sa pamilya. (“Mga Tigpanalipod sa Pamahayag bahin sa Pamilya,” Liahona, Mayo 2015, 15)

Tingali adunay mga panahon kon ikaw mobati og kahadlok sa pagtuboy o pagpanalipod sa pamilya tungod sa oposisyon nga imong nasinati. Ikonsiderar unsaon nimo nga makakuha og kalig-on gikan sa mga aksyon ni Kapitan Moroni ug sa mga Nephite, kinsa maisogon nga mibatok sa agresyon sa Lamanite aron “sa pagbulig sa ilang mga yuta, ug sa ilang mga balay, ug sa ilang mga asawa, ug sa ilang mga anak” (Alma 43:9).

icon, lihok

Lihok

Paghimo og yanong plano sa mga aksyon nga imong mahimo aron mas matuboy o mapanalipdan ang pamilya. Pag-andam sa pagpaambit diha sa klase og labing menos usa ka ideya gikan sa imong plano.

Seksiyon 3

Unsaon nga mahimo akong mas masaligon sa pagpakigsulti sa uban mahitungod sa mga pagtulon-an sa Ginoo bahin sa pamilya?

Si Presidente Dallin H. Oaks sa Unang Kapangulohan miingon nga ang mga pagtul-on-an sa pamahayag sa pamilya “klaro kaayo nga lahi gikan sa kasamtangan nga mga balaod, binuhatan, ug adbokasiya sa kalib[o]tan diin kita nagpuyo” (“Ang Plano ug ang Pamahayag,” Liahona, Nob. 2017, 30). Sa dagan sa imong kinabuhi, ikaw tingali mohisgot sa mga hilisgotan kalabot sa kaminyoon ug sa pamilya uban sa mga tawo kinsa adunay mga panglantaw nga lahi sa imoha. Sa maong mga panahon, likaye ang pakigkompronta (tan-awa sa Doktrina ug mga Pakigsaad 19:30). Hinoon, paningkamot nga mahimong usa sa “malinawon nga mga sakop ni Kristo” (Moroni 7:3; tan-awa usab sa mga bersikulo 4–5) ug sa “[pagsulti] sa kamatuoran uban ang gugma” (Mga Taga-Efeso 4:15).

ang Manluluwas nakigsulti sa usa ka escriba

Si Elder Robert D. Hales sa Korum sa Napulog Duha ka Apostoles mitudlo sa mosunod nga ehemplo ni Jesukristo kon unsaon sa pagtubag sa mga indibidwal kinsa mosupak sa atong mga pagtuo:

Elder Robert D. Hales

Ang pagtubag sa paagi nga sama kang Kristo dili kahimoan og tamdanan o pinasikad sa usa ka pormula. Ang Manluluwas mitubag sa lahing paagi sa matag sitwasyon. Dihang Siya miatubang sa da[o]tan nga si Haring Herod, pabilin Siyang nagpakahil[o]um. Dihang Siya miatubang ni Pilato, Siya mihatag og yano ug talagsaon nga pagpamatuod sa Iyang kabalaan ug tumong. Sa pag-atubang sa tigpangilis og mga kwarta kinsa naghugaw-hugaw sa templo, gigamit Niya ang Iyang balaan nga responsibilidad sa pagpabilin ug pagpanalipod nianang butang nga sagrado. Gilansang sa krus, Siya miluwat sa walay sama nga Kristohanong tubag: “Amahan, pasayloa sila; kay wala sila makasab[o]t sa ilang gibuhat” (Lucas 23:34).

“Ang uban nga mga tawo nagtuo nga ang mga tubag sama sa pagpakahilom, kamapuanguron, pagpasaylo, ug paghatag og yano nga pagpamatuod mao ang mga tubag nga uyon-uyon lang o huyang. Apan, ang “paghigugma sa [atong] mga kaaway, pagpanalangin kanila nga nanghimara[o]t [kanato], pagbuhat og maayo kanila nga nasilag [kanato], ug pag-ampo alang sa magalutos [kanato],” (Mateo 5:44) nagkinahanglan og hugot nga pagtuo, kalig-on, ug, labaw sa tanan, Kristohanong kais[o]g. (“Kristohanong Kais[o]g: Ang Bugti sa Pagkadisipulo,” Liahona, Nob. 2008, 72)

usa ka young adult naminaw

Ikonsiderar kon sa unsang paagi ang mosunod nga mga baroganan makatabang kanimo samtang makigsulti ka sa uban mahitungod sa kaminyoon ug sa pamilya:

• Sunda ang Espiritu. Ang Espiritu makatabang kanimo nga masayod unsay isulti ug unsay dili isulti (tan-awa sa Doktrina ug mga Pakigsaad 100:5–6). Ang Iyang impluwensya makatabang usab kanimo sa pagkontrol sa imong mga emosyon (tan-awa sa Mga Taga-Galacia 5:22–23).

• Himoa ang aktibong pagpaminaw. Ihatag ang imong hingpit nga pagtagad ngadto sa uban kon sila nagsulti. Likaye ang pagbalda kanila o mohatag og tubag sa imong hunahuna kon sila nagsulti. Aron masiguro nga ikaw nakasabot sa unsay ilang gisulti, makapangutana ka og mga pangutana nga makapaklaro o i-summarize unsay imong nadungog nga ilang gisulti.

• Paningkamot nga makasabot sa panglantaw sa usag usa. Ayaw itugot ang inyong mga kalainan nga mopatigbabaw sa unsay komon nga anaa ninyo. Samtang mag-istorya kamo, pangita og mga butang nga komon ninyo ug paghisgot pa og dugang bahin niini.

• Ipaambit ang mga pagtulon-an sa Ginoo sa yano, klaro, ug dili maawayon nga pinulongan. Likaye ang pinulongan nga alang lang sa mga miyembro sa Simbahan (tan-awa sa David A. Edwards, “Communication Breakdown,” New Era, Okt. 2012, 32–33). Hinoon, gamit og mga pulong ug hugpong sa mga pulong nga sakto, motuboy og pagsabot, ug moawhag og maayong kabubut-on. Himoa ang imong mga tubag nga mubo. Himoa nga ang gugma mopuno sa imong kasingkasing aron ang imong tono mabination.

• Pagpakigbahin og lunsay ug yano nga pagpamatuod. Ang imong pagpamatuod dili kinahanglan nga unhan pinaagi sa pag-ingon, “Ako mopamatuod …” Hinoon, ikaw makasulti og mga butang sama sa, “Ang akong kinabuhi napanalanginan tungod kay … ,” “Akong gibati … ,” o “Importante kini kanako tungod kay …”

• Kon ikaw dili mouyon, pagpili nga dili magmasinupakon. Pabilin nga kalma ug matinahoron aron ikaw makapasiugda og panaghigalaay ug dili makahimo og kaaway. Ikaw makapadayag nga ikaw nagtahod sa panglantaw sa laing tawo, samtang moila nga kamong duha dili magkauyon sa usa ka piho nga hilisgotan. Hinumdomi nga ang bisan unsa nga espiritu sa panagbingkil makapahawa sa Espiritu Santo (tan-awa sa 3 Nephi 11:29).

icon, pamalandong

Pamalandong agi og Pagpangandam alang sa Klase

Unsa ang usa ka paagi nga imong mapalambo ang imong abilidad nga makapahigayon og Kristohanon nga mga panagsultihanay sa uban mahitungod sa kaminyoon ug pamilya?

Gusto pa og Dugang? (Mahimong sundon o dili)

Asa ako makakita og dugang nga mga ideya kon unsaon sa pagpanalipod sa pamilya?

President Bonnie L. Oscarson

Sa iyang pakigpulong “Mga Tigpanalipod sa Pamahayag sa Pamilya” (Liahona, Mayo 2015, 14–17), si Presidente Oscarson mitudlo og importante nga mga baroganan nga mogiya nato sa pagpanalipod sa kaminyoon ug sa pamilya.