“Leksiyon 16 Materyal sa Pagpangandam sa Klase: Pagbaton og Kalipay sa Kinabuhi sa Pamilya pinaagi ni Jesukristo,” Materyal sa Magtutudlo sa Ang Mahangtoron nga Pamilya (2022)
“Leksiyon 16 Materyal sa Pagpangandam sa Klase,” Materyal sa Magtutudlo sa Ang Mahangtoron nga Pamilya
Leksiyon 16 Materyal sa Pagpangandam sa Klase
Pagbaton og Kalipay sa Kinabuhi sa Pamilya pinaagi ni Jesukristo
Pamalandongi sa makadiyot ang mga panahon nga gibati nimo ang kalipay ug kalinaw sa imong kinabuhi. Samtang nagserbisyo isip usa ka sakop sa Kapangulohan sa Seventy, si Elder Richard J. Maynes mitudlo, “Ang kalipay nga atong masinati niining kinabuhia maoy katugbang kon giunsa nato sa pagsentro ang atong pagpakabuhi sa mga pagtul[o]n-an, ehemplo, ug maulaong sakripisyo ni Jesukristo.” (“Ang Kalipay sa Pagpakabuhi nga Nakasentro kang Kristo,” Liahona, Nob. 2015, 28). Samtang ikaw magtuon agi og pagpangandam alang sa klase, ikonsiderar kon sa unsang paagi nga ang pag-establisar sa imong personal nga kinabuhi ug pamilya diha kang Jesukristo ug sa Iyang mga pagtulon-an makahatag kanimo og mas dakong kalipay, kalinaw, ug kaayohan, bisan unsa pa ang imong mga kahimtang.
Seksiyon 1
Sa unsang paagi nga ang akong pamilya ug ako makatukod og espirituhanong pundasyon diha kang Jesukristo?
Kon magtukod og usa ka gambalay, hatagan og mainampingong pagtagad ang pundasyon niini ug ang matang sa yuta nga butangan niini. Ang usa ka siguradong pundasyon mopalig-on sa gambalay ug mopanalipod niini batok sa mga puwersa sa kinaiyahan ug kabug-aton sa inadlaw-adlaw nga paggamit. Sa unsang paagi nga kini nga konsepto may kalabotan nimo samtang ikaw nag-ugmad sa imong personal nga kinabuhi ug pamilya?
Si propeta Helaman mitudlo sa iyang mga anak nga lalaki mahitungod sa panginahanglan sa pagtukod sa ilang espirituhanong pundasyon diha kang Jesukristo.
Pagtuon agi og Pagpangandam alang sa Klase
Basaha ang Helaman 5:12, ug pangitaa kon sa unsang paagi nga ang pagtukod diha sa “lig-on nga sukaranan sa atong Manunubos” makapalig-on nato batok sa mga impluwensiya nga naghulga sa atong personal nga kinabuhi ug pamilya.
Samtang imong basahon ang mosunod nga pamahayag ni Elder David A. Bednar sa Korum sa Napulog Duha ka Apostoles, pangitaa kon sa unsang paagi nga kita makatukod sa pundasyon sa atong personal nga kinabuhi ug pamilya diha kang Jesukristo:
Ang mga ordinansa ug mga pakigsaad mao ang mga sukaranan nga atong gamiton sa pagtukod sa atong kinabuhi diha sa tukuranan ni Kristo ug sa Iyang Pag-ula. Nasumpay kita pag-ayo sa Manluluwas samtang sa tak[o]s nagdawat sa atong mga ordinansa ug mosulod ngadto sa mga pakigsaad, matinud-anong mohinumdom ug mopasidungog niadtong sagradong mga pasalig, ug mohimo sa labing maayo sa pagpuyo sumala sa mga obligasyon nga atong gidawat. Ug kana nga higot mao ang tinubdan sa espiritwal nga kalig-on ug kamalungtaron sa tanang panahon sa atong kinabuhi. (“Busa Sila Mihupay sa Ilang mga Kahadlok,” Liahona, Mayo 2015, 48)
Samtang nagserbisyo sa kapangulohan sa Seventy, si Elder Donald L. Hallstrom mitudlo sa mosunod mahitungod sa pagtukod diha sa pundasyon ni Jesukristo:
Ang tanang himan nga inyong kinahanglan sa pagtukod, pag-ayo, o pagpalig-on sa inyong pundasyon anaa ra. … Naglakip kini sa makanunayon, tinuoray nga pag-ampo; inadlaw-adlaw nga pagtuon sa ebanghelyo pinaagi sa mga kasulatan; aktibong pag-apil sa mga miting sa Simbahan, ilabi na sa pag-ambit sa sakramento uban sa tinuod nga katuyoan; padayong dili hinakog nga pagserbisyo; ug makugihong pagtuman sa pakigsaad.
Ang laing mahinungdanong himan mao ang tambag sa buhi nga mga propeta. (“Jesus Christ: Our Firm Foundation,” Ensign, Abr. 2016, 61)
Irekord ang Imong mga Hunahuna
Paghunahuna og pipila ka labing epektibo nga mga paagi nga ikaw o imong pamilya natukod diha sa pundasyon ni Jesukristo. Ilista diha sa kwaderno o note-taking app ang pipila ka gawi o naandang binuhatan nga mahimo nimong ipaambit diha sa klase.
Seksiyon 2
Unsa nga mga panalangin ang magamit nako ug sa akong pamilya kon kami mopili sa pagtukod sa among pundayon diha kang Jesukristo ug sa Iyang mga pagtulon-an?
Ang mga propeta sa Ulahing mga Adlaw namahayag, “Ang kalipay sa kinabuhi sa pamilya mahimong maangkon kon gitukod diha sa mga pagtulon-an ni Ginoong Jesukristo” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org).
Pagtuon agi og Pagpangandam alang sa Klase
Paghunahuna og usa ka pagtulon-an ni Jesukristo nga nakahatag nimo og kalipay sa imong personal nga kinabuhi o pamilya samtang ikaw migamit niini. Pangita og usa ka tudling sa kasulatan nga naglangkob niini nga pagtulon-an. Motambong sa klase nga andam nga mopaambit sa unsay imong nakit-an.
Kon ang usa ka grupo sa mga tawo, sama sa pamilya, modesisyon sa pagtukod sa ilang kinabuhi diha sa Manluluwas ug sa Iyang mga pagtulon-an, sila makasinati og daghang panalangin. Mao kini ang usa ka rason nganong ang konsepto nga Zion, usa ka katawhan kinsa “usa sa kasingkasing ug usa sa hunahuna, ug nagpuyo diha sa pagkamatar[o]ng” (Moises 7:18), matahom ug gamhanan gayod kaayo. Ang usa ka pananglitan niini nga matang sa katawhan makita diha sa Basahon ni Mormon. Human sa pagbisita sa Manluluwas sa mga lumulupyo sa Amerika, ang mga tawo nagkahiusa sa pasalig nga mosunod sa Iyang mga pagtulon-an.
Pagtuon agi og Pagpangandam alang sa Klase
Pagtuon sa 4 Nephi 1:1, 11–13, 15–18, ug pangitaa kon unsa nga mga pagtulon-an ang gipili sa katawhan nga sundon ug kon sa unsang paagi nga ang pagsunod niini nga mga pagtulon-an nakaapekto nila.
Pamalandong agi og Pagpangandam alang sa Klase
Asa nimo makita ang mga pananglitan sa mga matang sa mga panalangin nga gihulagway niini nga tudling sa kasulatan? Unsa kaha kon ang usa ka pamilya magtinabangay sa pagtukod sa ilang kinabuhi diha kang Jesukristo ug sa Iyang mga pagtulon-an? Unsaon nimo pagsugod karon sa pagtinguha, o unsaon nimo nga mopadayon sa pagtinguha, niining sulundon nga buhat?
Seksiyon 3
Unsa nga mga babag ang makapugong nako ug sa akong pamilya sa pagtukod og pundasyon diha kang Jesukristo?
Si Elder Richard G. Scott sa Korum sa Napulog Duha ka Apostoles namulong bahin sa mga paagi nga ang kaaway mosulay sa pagpugong kanato gikan sa pagtukod sa atong kinabuhi diha sa Manluluwas ug sa Iyang mga pagtulon-an:
Buhaton ni Satanas ug sa iyang mga panon kutob sa ilang mahimo ang pagpugong nimo nga madawat ang mga ordinansa nga gikinahanglan alang sa sulundon nga pamilya. Mosulay siya sa pagbalda nimo gikan sa pagpokus sa imong hunahuna ug kasingkasing diha sa pag-ugmad og usa ka lig-ong pamilya pinaagi sa pag-amuma sa imong mga anak sama sa gipangayo sa Ginoo.
… Si Satanas adunay gamhanan nga himan nga gamiton batok sa buotan nga mga tawo. Kana mao ang pagbalda. Iyang himoon ang maayong mga tawo nga mopuno sa kinabuhi og ‘maanindot nga mga butang’ aron wala nay luna alang sa mahinungdanong mga butang. (“First Things First,” Ensign, Mayo 2001, 7)
Paghunahuna og pipila ka “maanindot nga mga butang” nga imong nakita nga nakabalda sa mga tawo sa pagpokus diha sa unsay mahinungdanon sa ilang personal nga kinabuhi o pamilya.
Ang uban nato tingali adunay mga tradisyon sa kultura o pamilya o mga binuhatan nga makapugong nato sa pagtukod sa atong lig-ong pundasyon diha kang Jesukristo ug sa Iyang ebanghelyo (tan-awa sa Doktrina ug mga Pakigsaad 93:39). Si Presidente Dallin H. Oaks sa Unang Kapangulohan mitudlo:
Aron sa pagtabang sa mga miyembro sa tibuok kalib[o]tan, ang Simbahan nagtudlo kanato nga hunongon ang bisan unsang tradisyon o naandang binuhatan sa personal o pamilya nga sukwahi sa mga pagtul[o]n-an sa Simbahan ni Jesukristo ug niining kultura sa ebanghelyo. (“Ang Kultura sa Ebanghelyo,” Liahona, Mar. 2012, 42)
Ikonsiderar kon unsa ang uban pang mga babag nga tingali makapugong nimo o sa imong pamilya nga mas hingpit nga matukod ang imong pundasyon diha sa Manluluwas.
Human sa panaghisgot sa trabaho nga gihimo sa mga trabahante sa konstruksiyon sa pagpalig-on ug pag-ayo sa pundasyon ug istruktura sa Templo sa Salt Lake, si Elder Gary E. Stevenson sa Korum sa Napulog Duha ka Apostoles misugyot sa mosunod:
Usa ka mahinuklugong pagsusi sa atong kaugalingon mahimong mopakita nga kita usab ug atong mga pamilya makabenepisyo sa atong paghimo sa gikinahanglan nga buhat sa pagmintinar ug pagbag-o, gani usa ka seismic nga pagpalambo! Mahimong sugdan nato kana nga proseso pinaagi sa pagpangutana:
“Unsay hitsura sa akong patuk[o]ranan?”
“Unsay gilangk[o]ban sa baga og bungbong, lig-ong mga bato sa pamag-ang nga parte sa akong personal nga patuk[o]ranan, diin anaa nahimutang ang akong pagpamatuod?”
“Unsay sukaranang mga elemento sa akong espirit[u]wal ug emosyonal nga kinaiya nga makapahimo nako ug sa akong pamilya nga magpabiling makanunayon ug dili matar[o]g, gani sa pagbuntog sa pagtay-og sa yuta ug sa kaguliyang sa seismic nga mga panghitabo nga siguradong mahitabo sa atong kinabuhi?” (“(Usa ka Maayong Patuk[o]ranan alang sa Umaab[o]t,” Liahona, Mayo 2020, 50)
Paglihok
Pamalandongi ang mga pangutana ni Elder Stevenson. Sa unsang paagi nga ikaw mas hingpit nga makaestablisar sa imong pundasyon—imong mga prayoridad, mga pamatasan, paghimo og mga desisyon, paggamit sa oras, ug uban pa—diha kang Jesukristo ug sa Iyang ebanghelyo? Pagrekord og usa ka tumong o plano nga mahimo nimong buhaton niining semanaha.