“Leksiyon 13 Materyal sa Pagpangandam sa Klase: Ang Balaanong Gasa ug Sagradong Responsibilidad sa Sekswal nga Kasuod,” Materyal sa Magtutudlo sa Ang Mahangtorong Pamilya (2022)
“Leksiyon 13 Materyal sa Pagpangandam sa Klase,” Materyal sa Magtutudlo sa Ang Mahangtorong Pamilya
Leksiyon 13 Materyal sa Pagpangandam sa Klase
Ang Balaanong Gasa ug Sagradong Responsibilidad sa Sekswal nga Kasuod
Ang tawhanong sekswalidad usa ka sagradong gasa nga importante sa plano sa kaluwasan. Bisan pa niana, sa kalibotan nga puno sa mga imahe sa sekswalidad ug nagkasukwahi nga mga mensahe, kini daling bation ang kawalay kasigurohan ug kalibog mahitungod sa kahulogan ug katuyoan sa sekswalidad. Samtang inyong tun-an, paninguhaa nga mas masabtan og maayo ang sagrado ug importante nga tahas sa sekswal nga kasuod diha sa plano sa Langitnong Amahan sa kalipay ug hunahunaa kon unsaon niini nga kahibalo nga makapanalangin sa inyong kinabuhi.
Seksiyon 1
Unsaon nga ako mapanalanginan pinaagi sa pagsabot nga ang sekswal nga kasuod mahimong maanindot ug sagrado nga bahin sa kaminyoon?
Ang atong Langitnong Amahan naghatag kanato og sekswal nga mga tinguha ug gahom sa paglalang. Si Presidente Dallin H. Oaks sa Unang Kapangulohan mipasabot, “Ang gahom sa paglalang og mortal nga kinabuhi maoy labing mahimayaong gahom nga gihatag sa Dios ngadto sa iyang mga anak” (“Ang Dako nga Laraw,” Liahona, Mayo 2020, 93). Si Elder Dale G. Renlund sa Korum sa Napulog Duha ka Apostoles ug si Sister Ruth Lybbert Renlund mitudlo, “Ang atong husto nga pagpahayag sa sekswalidad naghimong posible nga matuman ang plano sa Dios sa yuta ug sa kahangtoran, sa pagsarang kanato nga masama sa atong Langitnong Amahan” (“Ang Balaanong mga Katuyoan sa Sekswal nga Kasuod,” Liahona, Ago. 2020,14–15).
Sa plano sa Langitnong Amahan sa kalipay, “ang pisikal nga kasuod tali sa bana ug asawa gituyo nga maanindot ug sagrado. Kini gi-orden sa Dios aron malalang ang mga anak ug alang sa pagpadayag sa gugma tali sa bana ug asawa.”(Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 38.6.5, ChurchofJesusChrist.org). Si Elder David A. Bednar sa Korum sa Napulog Duha ka Apostoles mipasabot usab, “Suod nga mga relasyon maoy … usa sa dakong pagpahayag sa atong balaanong kinaiya ug potensyal ug paagi sa paglig-on sa emosyonal ug espiritwal nga kasuod sa bana ug asawa” (“Kita Nagtuo sa Pagkaputli,” Liahona, Mayo 2013, 42).
Ang sekswal nga kasuod maoy usa ka importanting paagi nga mas mabugkos pag-ayo ang asawa ug bana. Ang kasuod mahimo usab nga magpasabot ngadto sa intelektwal, emosyonal, ug espiritwal nga pagkasuod.
Didto sa tanaman sa Eden, misugod si Adan ug si Eva sa pagkat-on mahitungod sa importansya sa kaminyoon.
Pagtuon agi og Pagpangandam alang sa Klase
Basaha ang Genesis 2:18, 21–24, ug hunahunaa kon giunsa pagtuyo ang kaminyoon sa paghiusa sa usa ka bana ug asawa sa intelektwal, emosyonal, espiritwal ug pisikal nga paagi. (Mubo nga sulat: Niini nga kinatibuk-ang kahulogan ang gusok mahimong magsimbolo og kasuod ug panag-uban; unong nagpasabot og kabyon o magpabiling sikit ngadto; ug “usa ka unod” [bersikulo 24] mahimong magpasabot og intelektwal, emosyonal, espiritwal, ug sekswal nga panaghiusa.)
Si Elder Jeffrey R. Holland sa Korum sa Napulog Duha ka Apostoles nagtudlo sa mosunod mahitungod sa pagkahimong “usa ka unod” diha sa kaminyoon:
“Ang tawhanong kasuod gitagana alang sa mga minyo tungod kay mao kini ang kataposang simbolo sa kinatibuk-ang panaghiusa, kinatibuk-an ug usa ka panaghiusa nga gi-orden ug gipasabot sa Dios. Gikan sa Tanaman sa Eden nagpadayon hangtod karon, ang kaminyoon gituyo nga magpasabot sa hingpit nga panaghiusa sa usa ka lalaki ug sa usa ka babaye—ang ilang mga kasingkasing, mga paglaom, mga kinabuhi, gugma, pamilya, kaugmaon, tanan. Misulti si Adan kabahin ni Eva nga siya ang bukog sa iyang mga bukog ug unod sa iyang unod, ug kinahanglan nga sila mahimong “usa ka unod” sa ilang panag-uban sa kinabuhi [tan-awa sa Genesis 2:23–24]. (“Personal Purity,” Ensign, Nob. 1998, 76)
Pamalandong agi og Pagpangandam alang sa Klase
Unsaon nga ang usa ka bana ug asawa mapanalanginan pinaagi sa pagtan-aw sa sekswal nga kasuod isip usa ka simbolo sa paghiusa sa “ilang mga kasingkasing, mga paglaom, mga kinabuhi, gugma, kaugmaon, tanan”?
Seksiyon 2
Sa unsang paagi ang pagtan-aw sa pisikal nga lawas nga sama sa pagtan-aw sa Dios nagdugang sa akong tinguha ug pasalig sa pagpuyo sa balaod sa kaputli?
Tungod sa kanindot ug sa kasagrado sa tahas nga mabuhat sa sekswal nga kasuod nga giorden sa Dios diha sa kaminyoon, [Siya] misugo nga ang sagradong gahom sa paglalang pagagamiton lamang tali sa lalaki ug sa babaye, kinsa legal nga naminyo isip bana ug asawa” (“Ang Pamilya: Usa ka Pamahayag ngadto sa Kalib[o]tan,” ChurchofJesusChrist.org). Ang Ginoo nagmando kanato nga maglimpyo sa moral nga paagi sa atong mga hunahuna, mga tinguha, ug mga lihok. Kini naglakip sa paglikay gikan sa sekswal nga mga kalihokan sa dili pa minyo ug sa hingpit nga pagkamatinud-anon sulod sa kaminyoon (tan-awa sa Exodo 20:14; Alma 39:3–5; Doktrina ug mga Pakigsaad 59:6). Kini nga sugo gitawag isip ang balaod sa kaputli.
Importante kini nga hinumdoman nga ang atong mga lawas dili bulag sa atong mga espiritu. Ang Ginoo mitudlo nga “ang espiritu ug ang lawas mao ang kalag sa tawo” (Doktrina ug mga Pakigsaad 88:15). Kalabot sa pagkadugtong tali sa lawas ug espiritu, si Elder Holland mitudlo:
Ang lawas usa ka mahinungdanong bahin sa kalag. Kini nga tataw ug importante kaayo nga doktrina sa mga Santos sa Ulahing mga Adlaw nagpasabot nganong ang sekswal nga sala hilabihan sa kabug-at. Kami mipahayag nga ang usa ka tawo kinsa naggamit sa hinatag sa Dios nga lawas sa laing tawo nga walay balaanong pagtugot nag-abuso sa mismo nga kalag niana nga indibidwal, nag-abuso sa labing importanting katuyoan ug mga proseso sa kinabuhi. (“Personal Purity,” 76)
Si Apostol Pablo mihatag og dugang nga pagpasabot sa sagradong pagkadugtong tali sa lawas ug sa espiritu sa dihang iyang gitudlo nga “ang lawas dili alang sa panghilawas [sekswal nga kalihokan sa gawas sa kaminyoon], apan alang sa Ginoo; ug ang Ginoo alang sa lawas” (1 Mga Taga-Corinto 6:13).
Pagtuon agi og Pagpangandam alang sa Klase
Basaha ang 1 Mga Taga‑Corinto 6:19–20, ug pangitaa kon giunsa paghunahuna sa Ginoo ang atong pisikal nga mga lawas.
Pamalandong agi og Pagpangandam alang sa Klase
Nganong makadala og kasaypanan ang pagtan-aw sa sekswal nga kasuod isip usa lamang ka pisikal nga kasinatian nga gituyo sa paghatag og pisikal nga kalipay?
Seksiyon 3
Unsay akong mahimo sa pagdugang sa akong kapasidad sa pagpuyo sa balaod sa kaputli?
Sama sa tanang mga sugo sa Dios, ang balaod sa kaputli gituyo sa pagdala kanato og mas dako nga kalinaw ug kalipay. Sama pananglit, ang mga kasulatan nagtabang kanato sa pagsabot nga ang pagpuyo sa balaod sa kaputli makadugang sa atong pagsalig diha sa atubangan sa Dios, nagpanalipod kanato gikan sa emosyonal nga pag-antos ug pagkadaot sa mga relasyon, ug nagpugong nga mobiya ang Espiritu (tan-awa sa Doktrina ug mga Pakigsaad 121:45; Jacob 2:31–35; Doktrina ug mga Pakigsaad 42:23; 63:16). Ang pagsunod sa balaod sa kaputli makapanalipod usab kanato gikan sa pagkamatakdan og makadaot nga mga sakit ug makapaniguro nga ang mga bata matawo sulod sa kalig-onan sa kaminyoon.
Normal ang magsinati og sekswal nga mga pagbati. Importante kini nga makat-onan kon unsaon sa pagpasubay niini nga mga pagbati sa mga paagi nga gitugot sa Ginoo. Bisan pa kon anaa kanimo ang labing maayo nga mga katuyoan, tingali adunay mga higayon nga gibati nimo nga matintal sa dili angay nga pagsunod ngadto sa imong sekswal nga mga tinguha. Kon imong gibati nga natintal, duol ngadto sa Ginoo ug Siya “mohimo og lutsanan sa paglikay, aron kamo makahimo sa pag-antos niini” (1 Mga Taga–Corinto 10:13; tan-awa usab sa Alma 13:28).
Hinumdomi, “si Jesukristo … nasayod sa kahuyang sa tawo ug unsaon sa pagtabang kanila kinsa natintal” (Doktrina ug mga Pakigsaad 62:1). Samtang kamo moduol sa Ginoo alang sa panabang, pangayoa ang iyang paggiya kalabot sa mabuhat nga mga lakang nga kamo makagamit sa “[pagpugong] sa tanan [ninyo] nga mga mainit nga pagbati, nga [kamo] mapuno sa paghigugma” (Alma 38:12).
Si Sister Wendy W. Nelson, asawa ni Presidente Russell M. Nelson, mitudlo:
Ang personal nga kaputli mao ang labing importante nga butang sa tinuod nga gugma. Kon mas putli ang inyong hunahuna ug mga pagbati, inyong mga pulong ug mga buhat, mas modako ang inyong kapasidad sa paghatag ug pagdawat sa tinuod nga gugma. …
… Buhata ang bisan unsa nga magpabilin ang inyong mga hunahuna, mga pagbati, mga pulong ug mga lihok nga putli. Dapita ang Espiritu sa paggiya kaninyo. Motabang Siya kaninyo! …
… Ang kamatuoran mao, kon kamo mas putli, mas nindot nga mahimo ang inyong kasuod sa pagkamagtiayon. (“Love and Marriage” [tibuok kalibotan nga debosyonal alang sa mga young adult, Ene. 8, 2017], ChurchofJesusChrist.org)
Si Elder Neil L. Andersen sa Korum sa Napulog Duha ka Apostoles mihatag sa mosunod nga tambag ngadto sa mga indibidwal kansang mga relasyon nahimong mas seryoso:
Kamo nasayod nga kamo adunay kusog nga pisikal nga mga emosyon ug mainit nga mga pagbati nga kinahanglan gayud nga pugngan ug mabinantayon nga pagadumalaon. … Ihan-ay ang inyong mga limitasyon. Lig-ona pagpahimutang kadto nga mga limitasyon diha sa tanan ninyong buhaton nga mag-uban, aron kini dili malapas o mabali wala samtang gibati ninyo ang kusog nga emosyon alang sa usag usa. (“Complete Honesty, Unselfish Humility” [debosyonal sa Brigham Young University–Idaho, Peb. 14, 2017], byui.edu)
Kon kamo nakalapas sa balaod sa kaputli, hinumdomi nga pinaagi sa inyong hugot nga pagtuo diha ni Jesukristo ug sinsero nga paghinulsol, ang Ginoo makapasaylo kaninyo ug makahimo kaninyo nga limpyo pag-usab (tan-awa sa Isaias 1:16–18; Doktrina ug mga Pakigsaad 58:42–43). Gikinahanglan usab nga inyong bisitahon ang inyong bishop o presidente sa branch. Siya may awtoridad sa pagtabang kaninyo sa paghusay sa sala uban sa Ginoo, ug makahatag siya og dugang nga panabang ug suporta.
Irekord ang Inyong mga Hunahuna
Irekord diha sa usa ka notebook o note-taking nga app ang mga limitasyon ug mga kinutoban nga inyong gihan-ay, o kinahanglang ihan-ay, sa pagtabang nga magpabilin ang sekswal nga kaputli alang sa inyong kaugalingon ug kadtong kinsa inyong ika-date. Kon ikaw minyo, unsa nga mga utlanan ang inyong nahan-ay sa pagsiguro nga kamo magpabilin nga hingpit nga matinud-anon ngadto sa inyong kapikas?