Leksiyon 5 Materyal sa Pagpangandam sa Klase

Atong Mortal nga Kasinatian ug ang Gasa sa Pisikal nga Lawas

Kamo ba nahibulong sukad sa milagro sa inyong pisikal nga lawas ug sa tanan nga mabuhat niini? Sa laing bahin, diha bay mga panahon nga gibati ninyo ang kahigawad pinaagi sa mga hagit nga inyong nasinati tungod sa inyong lawas? Samtang kamo magtuon, hunahunaa kon sa unsang paagi ang atong pisikal nga mga lawas sumpay ngadto sa katuyoan sa atong mortal nga kasinatian diha sa plano sa Dios sa kalipay.

Seksiyon 1

Sa unsang paagi ang akong pisikal nga lawas importante sa akong mahangturon nga pag-uswag?

Ang atong pisikal nga mga lawas gilalang diha sa panagway sa Dios (tan-awa sa Genesis 1:26–27). Si Presidente Dallin H. Oaks sa Unang Kapangulohan mipasabot, “Ang katuyoan sa mortal nga kinabuhi ug sa postmortal nga paglambo nga mahimong mosunod niini mao ang alang sa anak sa Dios nga mahimong sama Kaniya” (“Ang Dako nga Laraw,” Liahona, Mayo 2020, 94).

Busa, unsa ang atong gikinahanglan nga sination sa mortal nga kinabuhi nga mahimong sama sa Dios? Duha ka importanting mga elemento ang gihisgotan sa mosunod nga pahayag gikan sa pamahayag sa pamilya: “Sa kinabuhi nga wala pa dinhi sa yuta, [kita] … midawat sa plano sa [Dios] nga ang Iyang mga anak nga makaangkon og pisikal nga lawas ug makaangkon og yutan-ong kasinatian sa paglambo ngadto sa kahingpitan” (“Ang Pamilya: Usa ka Pamahayag ngadto sa Kalibotan,” ChurchofJesusChrist.org).

Sa usa ka pagpadayag mahitungod sa kinabuhi nga wala pa dinhi sa yuta, si Abraham gipakita sa Konseho sa Langit (tan-awa sa Abraham 3:22–28). Niana nga panahon nakakat-on siya og usa ka importante nga kamatuoran mahitungod sa atong mortal nga kinabuhi.

Pagtuon agi og Pagpangandam alang sa Klase

Basaha ang Abraham 3:24–26, ug pangitaa ang unsay nakat-onan ni Abraham mahitungod sa usa sa mga katuyoan alang kanato sa pag-anhi sa yuta ug pagdawat og pisikal nga lawas. (Mahimo kining makatabang nga mahibalo nga ang atong “unang kahimtang” nagpasabot ngadto sa atong kinabuhi sa wala pa dinhi sa yuta, ug ang atong “ikaduhang kahimtang” nagpasabot ngadto sa panahon tali sa atong mortal nga pagkatawo ug sa Kataposang Paghukom.)

Si Elder D. Todd Christofferson sa Korum sa Napulog Duha ka Apostoles mitudlo mahitungod kon sa unsang paagi nga ang pagbaton og pisikal nga lawas usa ka bahin sa atong pagkamapamatud-an, o pagkamasulayan, sa mortalidad:

Kon, mahitabo samtang anaa sa mortal nga kasinatian, kita mopili nga “mobuhat sa tanan nga mga butang bisan unsa ang isugo sa Ginoo nga [atong] Dios ngari [kanato]” [Abraham 3:25], atong mapabilin ang atong “kinabuhi dinhi sa yuta” [Abraham 3:26]. Nagpasab[o]t kini nga pinaagi sa atong mga pagpili atong mapakita sa Dios (ug sa atong kaugalingon) ang atong pasalig ug kapasidad nga mosunod sa Iyang celestial nga balaod samtang anaa sa gawas sa Iyang presensya ug diha sa pisikal nga lawas inubanan sa tanan niining gah[o]m, kahinam, ug pagbati. Mahimo ba natong makontrolar ang unod aron mahimo kining instrumento imbis nga agalon sa espiritu? Masaligan ba kita dinhi ug sa kahangt[o]ran sa diosnong gah[o]m, lakip na ang gah[o]m sa paglalang og kinabuhi? Mabuntog ba nato sa tinagsa-tagsa ang da[o]tan? Kadtong nakahimo “adunay himaya nga idugang diha sa ilang mga ulo hangt[o]d sa kahangt[o]ran” [Abraham 3:26]––usa ka talagsaong aspeto nianang himaya ang pagkahimong nabanhaw, imortal, ug nahimaya nga pisikal nga lawas. Dili ikatingala nga kita “misinggit sa kalipay” niining talagsaong mga posibilidad ug mga saad [Job 38:7]. (“Nganong Kaminyoon, Nganong Pamilya?,” Liahona, Mayo 2015, 51)

Tungod ni Jesukristo, kita makahimo usa ka adlaw niana sa pagdawat og imortal, hingpit nga lawas sama nga ang atong Amahan sa Langit aduna (tan-awa sa Doktrina ug mga Pakigsaad 130:22). Kini mao lamang ang matang sa lawas diin kita “makadawat sa kahingpitan sa himaya” (Doktrina ug mga Pakigsaad 93:33–34; 138:17). Si Propeta Joseph Smith mitudlo usab nga ang tinuod nga kalipay naglakip og pagbaton sa usa ka pisikal nga lawas:

Kita mianhi dinhi sa yuta aron kita makaangkon og lawas ug dad-on kini nga putli sa atubangan sa Dios sa celestial nga gingharian. Ang dakong bar[o]ganan sa ebanghelyo naglangkob sa pag-angkon og usa ka lawas. Ang yawa walay lawas, ug kini mao ang iyang silot. (Mga Pagtul[o]n-an sa mga Presidente sa Simbahan: Joseph Smith [2007], 252)

Ingon nga gitataw og mas una diha sa pamahayag nga gipakigbahin gikan sa pamahayag sa pamilya, ang pag-angkon og yutan-ong kasinatian importante usab sa pag-uswag ngadto sa kahingpitan ug pagkahimo nga sama sa Dios. Si Elder David A. Bednar sa Korum sa Napulog Duha ka Apostoles mipasabot sa unsang paagi ang atong pisikal nga mga lawas mopadako sa atong mortal nga kasinatian:

Ang atong pisikal nga lawas nakapahimong posible sa kalapad, kaladmon, ug sa kadaghan sa kasinatian nga dili mahitabo didto sa kinabuhi sa wala pa dinhi sa yuta. Sa ingon, ang atong relasyon sa ubang mga tawo, atong kapasidad sa pag-ila ug paglihok sumala sa kamatuoran, ug atong abilidad sa pagsunod sa mga bar[o]ganan ug mga ordinansa sa ebanghelyo ni Jesukristo mapalambo pinaagi sa atong pisikal nga lawas. Sa eskwelahan sa mortalidad, kita makasinati og kalumo, gugma, kamabination, kalipay, kaguol, kasagmuyo, kasakit, ug gani mga hagit sa pisikal nga limitasyon sa paagi nga makaandam nato sa kahangt[o]ran. Sa yano nga pagkasulti, adunay mga leksiyon nga kinahanglan natong makat-[o]nan ug mga kasinatian nga kinahanglan natong maangkon, sama sa gihulagway sa mga kasulatan, “sumala sa unod” (1 Nephi 19:6; Alma 7:12–13). (“Kita Nagtuo sa Pagkaputli,” Liahona, Mayo 2013, 41)

Pamalandong agi og Pagpangandam alang sa Klase

Unsaon nimo sa pagpasabot kon ngano nga ang atong pisikal nga mga lawas importante sa plano sa Langitnong Amahan sa kalipay?

Seksiyon 2

Nganong malisod ang kahanas sa pagpugong sa pipila sa akong pisikal nga mga tinguha ug mga kagana?

Nagbutang ang atong Langitnong Amahan og piho nga mga kagana sa atong mga lawas sa pagpalungtad sa kinabuhi ug pagtabang sa pagtuman sa Iyang plano. Kabahin sa atong mortal nga pagsulay mao “ang pagtino kon ang mga kagana sa [atong] lawas mahimong mapugngan pinaagi sa espiritu nga nagpuyo sulod niini” (Russell M. Nelson, “Your Body: A Magnificent Gift to Cherish,” New Era, Ago. 2019, 5).

Matag usa kanato naimpluwensya sa kinaiyanhong tawo. (Hinumdomi nga ang kinaiyanhon nga tawo usa ka pulong nga nagpasabot ngadto sa lalaki ug babaye.) Kini mao ang atong mortal nga bahin nga nagtugot sa atong pisikal nga mga kagana ug kalibotanong mga tinguha nga dili masumpot ug sa pagbuntog sa atong mga tinguha ug mga paninguha nga mahimong sama sa Dios (tan-awa sa Giya ngadto sa mga Kasulatan, “Kinaiyanhon nga Tawo,” scriptures.ChurchofJesusChrist.org).

Pagtuon agi og Pagpangandam alang sa Klase

Basaha ang Alma 41:11 ug 1 Mga Taga-Corinto 2:14, ug hunahunaa ang pagmarka sa mga pulong o mga hugpong sa mga pulong nga naghulagway sa pagnunot ngadto sa kinaiyanhon nga tawo diha kanato.

Midugang si Elder Bednar ngadto sa atong pagsabot sa kinaiyanhong tawo sa dihang iyang gitudlo ang:

Sa pipila ka matang, ang kinaiyanhon nga tawo … buhi ug maayo diha sa matag usa kanato (tan-awa sa Mosiah 3:19). Ang kinaiyanhong lalaki o babaye dili mahinuls[o]lon, kalib[o]tanon ug mahilayon (tan-awa sa Mosiah 16:5; Alma 42:10; Moises 5:13), mapatuyangon ug mapasulabihon, ug puno sa garbo ug hakog. …

Isip mga anak sa Dios, kita nakapanunod og balaang mga kapasidad gikan Kaniya. Apan kita nagpuyo karon sa usa ka napukan nga kalib[o]tan. Ang mga elemento diin gilalang ang atong lawas sa kinaiyanhon napukan ug kanunay nga maimpluwensyahan sa sala, kadaot, ug kamatayon. Mao nga, ang Pagkapukan ni Adan ug ang espiritwal ug temporal nga mga sangpotanan niini nakaapekto kaayo kanato pinaagi sa atong pisikal nga mga lawas. (“Kita Nagtuo sa Pagkaputli,” 42–43)

Pamalandong agi og Pagpangandam alang sa Klase

Pagpili og usa sa mga kinaiya sa kinaiyanhong tawo nga gihulagway sa Alma 41:11 o sa 1 Mga Taga-Corinto 2:14 o diha sa pamahayag ni Elder Bednar. Unsaon niana nga kinaiya pag-apekto sa usa ka panag-date o pamilya nga relasyon?

Seksiyon 3

Sa unsa nga paagi nga si Jesukristo makatabang kanako sa pagbuntog sa kinaiyanhon nga tawo?

Atol sa sermon ni Hari Benjamin ngadto sa iyang mga katawhan, mipakigbahin siya unsay gitudlo sa anghel kaniya mahitungod sa pangalagad ug Pag-ula ni Jesukristo (tan-awa sa Mosiah 3:5–19).

Pagtuon agi og Pagpangandam alang sa Klase

Basaha ang Mosiah 3:19, ug pangitaa ang unsaon nga kita makabuntog sa kinaiyanhon nga tawo. (Timan-i nga niining kinatibuk-ang kahulogan, ang tugyan nagpasabot sa pagnunot ngadto sa mga pag-aghat sa Balaang Espiritu, ug ang santos nagpasabot sa usa ka tawo kinsa nabalaan o nasantos––usa ka tawo kinsa maunungon ngadto sa Dios.)

Basaha ang mosunod nga mga pamahayag ni Elder Bednar ug Bishop Gérald Caussé sa Kapangulohang Bishopric ug hunahunaa kon unsaon pagtabang ni Jesukristo kanimo sa pagbuntog sa kinaiyanhon nga tawo ug mahimong sama Kaniya:

Ang tanang gana, tinguha, kahilig, ug diha-diha nga gusto sa kinaiyanhon nga tawo mabuntog pinaagi sa Pag-ula ni Jesukristo. Kita ania sa yuta aron sa pagpalambo og diosnong kinaiya ug pagpugong sa tanang kahigal sa unod. (“Kita Nagtuo sa Pagkaputli,” 43)

Pinaagi sa Iyang Pag-ula, wala lamang hugasi ni Jesukristo ang atong mga sala, apan misangkap usab Siya og makahatag og katakos nga gahum nga pinaagi niini ang Iyang mga disipulo mahimong “[mosalikway sa] kinaiyanhon nga tawo,” [Mosiah 3:19], mouswag “pagtulun-an human sa usa ka pagtulun-an,”[2 Nephi 28:30], ug molambo sa pagkabalaan aron usa ka adlaw mahimo silang hingpit nga mga binuhat diha sa imahe ni Kristo [tan-awa sa Moroni 10:32–33], mahimong sarang nga mopuyo pag-usab uban sa Dios ug mapanunod ang tanang panalangin sa gingharian sa langit. (“Usa ka Buhi nga Saksi sa Buhi nga Kristo,” Liahona, Mayo 2020, 40)

Irekord ang Imong mga Hunahuna

Paghunahuna mahitungod sa usa ka relasyon sa pamilya nga gusto nimo nga palamboon. Unsa nga mga kinaiya sa kinaiyanhon nga tawo ang nagpugong niana nga relasyon? Unsaon nimo pagkab-ot sa mga panalangin sa Pag-ula sa Manluluwas ug monunot ngadto sa Balaang Espiritu sa pagsalikway niadtong mga kinaiya ug mahimong mas sama sa Manluluwas?

Gusto pa og Dugang? (Mahimong tubagon o dili)

Asa pa ako dugang nga makakat-on mahitungod sa mortal nga lawas?

Sa iyang pakigpulong “Ang Kabalaan sa Lawas” (Liahona, Nob. 2005, 13–15), si Presidente Susan W. Tanner, kanhi Presidente sa Kinatibuk-ang Young Women, mitudlo mahitungod sa importansya sa lawas.

Unsaon nako sa pagkat-on nga mas maayong “[motugyan] ngadto sa mga pagdani sa Balaang Espirtu” (Mosiah 3:19)?

Sa iyang pakigpulong “Unsa Pa May Akong Kulang?” (Liahona, Nov 2015, 33–35), si Elder Larry R. Lawrence sa Seventy mihulagway kon unsaon nga ang Balaang Espiritu makahatag kanato og personal nga giya sa pagtabang kanato sa pagsalikway sa kinaiyanhong tawo ug mahimong mas sama ni Jesukristo.