17. Bungtod sa Gerizim ug Bungtod sa Ebal

Magtan-aw paingon sa kasadpan. Ang Bungtod sa Gerizim anaa sa wala, ug ang Bungtod sa Ebal anaa sa tuo. Ang moderno nga Nablus gihulagway dinhi. Ang karaang dakbayan sa Sichem nahimutang taliwala niining duha ka mga bungtod diha sa walog sa ubos (diha lamang sa tuo niini nga hulagway).

Mahinungdanon nga mga Hitabo: Si Abraham mikampo sa Sichem (Gen. 12:6–7). Si Jacob mikampo dinhi ug mipalit og usa ka parcela sa luna (Gen. 33:18–20). Ang Bungtod sa Gerizim mao ang bungtod sa panalangin, samtang ang Bungtod sa Ebal mao ang bungtod sa tunglo (Deut. 27–28). Sa Bungtod sa Ebal, si Josue mipatindog og usa ka halaran nga bato diin nahisulat ang balaod ni Moises ug dayon mibasa sa balaod ngadto sa mga Israelita (Jos. 8:30–35). Ang mga bukog ni Jose gilubong sa Sichem (Jos. 24:32).