8. Jerusalem

Lukluk i go Not ova, i go long Jerusalem. Long medel blong foto ia, i gat wan tabu haos blong ol Muslim, we ruf blong hem i raon mo oli kavremap long gol, we oli singaotem Dom blong Ston. Ol Jiu, long bifo, oli bin stap wosip long tempol we i bin stap long ples ia. Ol stonwol kolosap long Dom blong Ston oli raonem olfala siti blong Jerusalem. Long raet saed blong wol, i gat Kidron Vale i stap. Long raet saed evriwan, aotsaed long foto, i gat Hil blong Ol Olif Tri. Long Not saed, i go bitim Dom blong Ston, maet i ples ia Golgota, o Kalvari.

Ol Impoten Samting we oli bin Hapen: Long taem bifo, oli singaotem Jerusalem se, Salem. (Ol Sam 76:2). Ebraham i pem taeting long Melkesedek (Jen 14:18–20). Ebraham i kam blong givim Aesak olsem sakrifaes (Jen 22:2–14). King Deved i tekova long siti ia we ol man Jebus oli bin stap long hem (2 Saml 5:4–9). King Solomon i bildim wan tempol (1 King 6–7). Lihae i aot blong go long graon blong promes (1 Nif 1:4; 2). Sevya i bin givim seves, i pem praes from ol sin blong yumi, mo i laef bakegen long ded (Mat 21–28). Olsem we Sevya i bin profesae, ol man oli prapa spolem gud Jerusalem afta we Hem i ded (JS—M 1:3–20). Bae ol man oli tekova long Jerusalem long ol las dei (Esik 38–39; Joel 2–3; Rev 11; 16). Sevya bae i kamaot long ples ia nao olsem pat blong Seken Kaming blong Hem (Sek 12–14; D&K 45:48–53). (Luk long GS Jerusalem; Salem.)