23. Lagun blong Galili mo Hil blong Ol Eit Gudfala Toktok

Lukluk i go long Saot Is ova long Not Wes kona blong Lagun blong Galili, wan lek blong fres wota. Hil long fored we i stap long medel, i ples we oli talem se Hil blong Ol Eit Gudfala Toktok i stap long hem. Kapaneam i stap long lef saed, aotsaed long foto. Taebirias i go moa long Saot folem solwota long Wes.

Ol Impoten Samting we oli bin Hapen: Sevya i bin spenem plante taem blong seves blong Hem long wol, long ples ia. Long ples ia nao Hem i bin singaotem mo i bin odenem Olgeta Twelef Aposol (Mat 4:18–22; 10:1–4; Mak 1:16–20; 2:13–14; 3:7, 13–19; Luk 5:1–11), i bin tijim Toktok antap long Hil (Mat 5–7), mo i bin tij long parabol (Mat 13:1–52; Mak 4:1–34). Ol merikel we Hem i bin mekem i gat: taem Hem i mekem wan man we i gat leprosi i kam oraet bakegen (Mat 8:1–4); i mekem strong win i stop (Mat 8:23–27); i ronemaot plante devel spirit aot long wan yang man, mo sakemaot olgeta long wan pig we i ron i go long solwota (Mak 5:1–15); i fidim grup blong ol 5,000 man mo grup blong ol 4,000 man (Mat 14:14–21; 15:32–38); i givim oda long ol disaepol blong Hem blong sakem net blong olgeta long solwota, mo oli bin kasem plante fis (Luk 5:1–6); i mekem plante pipol oli kam oraet bakegen (Mat 15:29–31; Mak 3:7–12); mo Hem i bin kamaot afta we Hem i laef bakegen long ded blong tijim ol disaepol blong Hem (Mak 14:27–28; 16:7; Jon 21:1–23). (Luk long GS Galili.)