1 Kag karon, ako, si Jacob, nagahambal sa inyo liwat, pinalangga kong mga kauturan, parte sining matarong nga sanga nga akon ginahambal.

2 Kay tan-awa, ang mga promisa nga aton naangkon amo ang mga promisa sa aton suno sa unod; gani, pareho sang ginpakita sa akon nga madamo sa aton mga anak ang mawala sa unod tungod sang pagkawala’y pagtuo, bisan pa amo sini, ang Dios mangin maluluy-on sa madamo; kag ang aton mga anak igapanumbalik agud nga makaabot sila sa sinang magahatag sa ila sang matuod nga ihibalo parte sa ila Manunubos.

3 Gani, pareho sang akon ginsiling sa inyo, kinahanglanon gid nga si Cristo—kay sang nagligad nga gab-i ang anghel naghambal sa akon nga amo ini ang iya mangin ngalan—magakari sa tunga sang mga Judio, sa tunga sinang mga mas malain nga bahin sang kalibutan; kag igalansang nila sia sa krus—kay pagbuot ini sang aton Dios, kag wala sing iban pa nga nasyon sa duta nga magalansang sang ila Dios sa krus.

4 Kay kon ang dalagko nga mga milagro kuntani ginhikot sa tunga sang iban nga mga nasyon magahinulsol sila, kag makahibalo nga sia ang ila Dios.

5 Apang tungod sang mga butig nga pagkapari kag mga kalainan, sila nga didto sa Jerusalem magapakatig-a batok sa iya agud nga malansang sia sa krus.

6 Gani, tungod sang ila mga kalainan, ang mga kalaglagan, mga gutom, mga peste, kag pagpaagay sang dugo magatupa sa ila; kag sila nga indi malaglag pagalaptahon sa tunga sang tanan nga nasyon.

7 Apang tan-awa, amo ini ang ginasiling sang Ginuong Dios: Kon mag-abot ina nga adlaw nga magapati sila sa akon, nga ako si Cristo, sa sina nakapakighisugot ako sa ila mga amay nga igapanumbalik sila sa unod, sa duta, sa mga duta nga ila palanublion.

8 Kag matabo ini nga pagatiponon sila halin sa ila malawig nga pagkalapta, halin sa mga pulo sang dagat, kag halin sa apat ka pamusod sang duta; kag ang mga nasyon sang mga Gentil mangin dako sa akon panulok, ginasiling sang Dios, sa pagdala sa ila sa mga duta nga ila palanublion.

9 Huo, ang mga hari sang mga Gentil mangin ang ila manug-atipan nga mga amay, kag ang ila mga reyna mangin ang ila manug-atipan nga mga iloy; gani, ang mga promisa sang Ginuo dako sa mga Gentil, kay iya ini ginhambal, kag sin-o ang makabais?

10 Apang tan-awa, ini nga duta, siling sang Dios, mangin isa ka duta nga inyo palanublion, kag ang mga Gentil pagapakamaayohon sa duta.

11 Kag ini nga duta mangin isa ka duta sang kahilwayan sa mga Gentil, kag mangin wala sing mga hari sa duta nga magagahum sa mga Gentil.

12 Kag pabakuron ko ini nga duta batok sa tanan nga iban pa nga mga nasyon.

13 Kag sia nga magapakig-away batok sa Sion mawala, siling sang Dios.

14 Kay sia nga magabangon sing isa ka hari batok sa akon mawala, kay ako, nga Ginuo, ang hari sang langit, ang mangin ila hari, kag ako ang mangin kasanag sa ila sa wala’y katapusan, nga nagapamati sa akon mga pulong.

15 Gani, sa sini nga kabangdanan, agud mahimo nga matuman ang akon mga kasugtanan nga akon ginhimo sa mga anak sang katawhan, nga akon himuon sa ila samtang yara sila sa unod, kinahanglan gid nga laglagon ko ang sekreto nga mga buhat sang kadulom, kag sang mga pagpamatay, kag sang mga kangil-aran.

16 Gani, sia nga nagapakig-away batok sa Sion, pareho Judio kag Gentil, pareho ulipon kag hilway, pareho lalaki kag babayi, mawala; kay sila inang mga makihilawason sang bug-os nga duta; kay sila nga indi para sa akon batok sa akon, siling sang aton Dios.

17 Kay pagatumanon ko ang akon mga promisa nga ginhimo ko sa mga anak sang katawhan, nga akon himuon sa ila samtang yara sila sa unod—

18 Gani, pinalangga kong mga kauturan, amo ini ang ginasiling sang aton Dios: Sakiton ko ang imo kaliwatan paagi sa kamot sang mga Gentil; apang, pahumokon ko ang mga tagipusuon sang mga Gentil, agud nga mangin pareho sila sing isa ka amay sa ila; gani, ang mga Gentil pagapakamaayohon kag isipon sa tunga sang panimalay ni Israel.

19 Gani, ikonsagrar ko ini nga duta sa imo kaliwatan, kag sa ila nga pagaisipon sa tunga sang imo kaliwatan, sa wala’y katapusan, agud mangin duta nga ila palanublion; kay isa ini ka pinili nga duta, siling sang Dios sa akon, labaw sa tanan nga iban pa nga mga duta, gani luyag ko nga ang tanan nga tawo nga magapuyo sa sini nga duta nga magasimba sila sa akon, siling sang Dios.

20 Kag karon, pinalangga kong mga kauturan, tungod nakita nga ang aton maluluy-on nga Dios naghatag sa aton sang pagkadako nga ihibalo parte sining mga butang, dumdumon naton sia, kag ipahigad ang aton mga sala, kag indi pag-iduko ang aton mga ulo, kay wala kita ginsikway; kundi, ginpanabog kita halin sa duta nga aton palanublion; apang gintuytuyan kita sa isa ka mas maayo nga duta, kay ang Ginuo naghimo sang dagat nga aton banas, kag yara kita sa isa ka pulo sang dagat.

21 Apang dalagko ang mga promisa sang Ginuo sa ila nga yara sa mga pulo sang dagat; gani bangod ini nagasiling mga pulo, pat-od gid nga may labaw pa sangsa ini, kag ginapuy-an man ang mga ini sang aton mga kauturan.

22 Kay tan-awa, ginatuytuyan palayo sang Ginuong Dios ang mga tawo halin sa panimalay ni Israel kon san-o nga nagakaigo suno sa iya kabubut-on kag ikalipay. Kag karon, tan-awa, ang Ginuo nagadumdum sa ila tanan nga ginbanggi, gani ginadumdum man niya kita.

23 Gani, magkasadya ang inyo mga tagipusuon, kag dumduma nga hilway kamo sa paghulag para sa inyo mga kaugalingon—sa pagpili sang dalan sang kamatayon nga wala’y katubtuban ukon sang dalan sang kabuhi nga wala’y katapusan.

24 Gani, pinalangga kong mga kauturan, ipakig-uli ang inyo mga kaugalingon sa kabubut-on sang Dios, kag indi sa kabubut-on sang yawa kag sang unod; kag dumduma, pagkatapos nga nakapakig-uli na kamo sa Dios, nga tungod lamang kag paagi sa grasya sang Dios nga kamo maluwas.

25 Gani, kabay nga bangonon kamo sang Dios halin sa kamatayon paagi sa gahum sang pagkabanhaw, kag halin man sa kamatayon nga wala’y katubtuban paagi sa gahum sang pagbayad-sala, agud mahimo kamo nga mabaton sa wala’y katapusan nga ginharian sang Dios, agud mahimo ninyo nga dayawon sia paagi sa grasya nga diosnon. Amen.