Ang Ika-duha nga Libro ni Nefi

1 Kag karon natabo ini nga sang ako, si Nefi, nakatapos sang pagpanudlo sa akon mga kauturan, ang amon amay, nga si Lehi, naghambal man sang madamo nga butang sa ila, kag ginsaysay sa ila, kon daw ano kadako nga mga butang ang ginhimo sang Ginuo para sa ila sa pagdala sa ila pagwa sa duta sang Jerusalem.

2 Kag naghambal sia sa ila parte sang ila mga pagrebelde samtang yara sa mga tubig, kag sang mga kaluoy sang Dios sa pagluwas sang ila mga kabuhi, sa bagay nga wala sila nalamon sa dagat.

3 Kag naghambal man sia sa ila parte sa duta sang panaad nga ila naangkon—daw ano kamaluluy-on ang Ginuo sa pagpaandam sa amon nga magpalagyo kami sa duta sang Jerusalem.

4 Kay, tan-awa, siling niya, nakakita ako sing isa ka panan-awon nga sa diin nahibal-an ko nga ang Jerusalem nalaglag na; kag kon nagpabilin kami sa Jerusalem nagkalamatay man kami kuntani.

5 Apang, siling niya, sa pihak sang amon mga pag-antos, nakaangkon kami sing isa ka duta sang panaad, isa ka duta nga pinili labaw sa tanan nga iban pa nga mga kadutaan; isa ka duta nga ang Ginuong Dios nakighisugot sa akon nga mangin duta nga palanublion sang akon kaliwatan. Huo, ang Ginuo nakighisugot sini nga duta sa akon, kag sa akon mga anak sa wala’y katapusan, kag amo man sa tanan sinang mga pagatuytuyan halin sa iban nga mga pungsod paagi sa kamot sang Ginuo.

6 Gani, ako, si Lehi, nagapropesiya suno sa mga paghikot sang Espiritu nga yari sa akon, nga wala sing bisan sin-o nga magakadto sa sini nga duta luwas lang nga pagadal-on sila sang kamot sang Ginuo.

7 Gani, ini nga duta ginkonsagrar sa iya nga iya pagadal-on. Kag kon lamang nga mag-alagad sila sa iya suno sa mga kasugoan nga iya ginhatag, mangin isa ini ka duta sang kahilwayan sa ila; gani, indi gid sila madala sa pagkabihag; kay kon amo sini, ini mangin tungod sang kalainan; kay kon ang kalainan magadamo pagasumpaon ang duta tungod sa ila, apang sa mga matarong pagapakamaayohon ini sa wala’y katapusan.

8 Kag tan-awa, kinaalam ini nga ini nga duta pagataguon anay sa ihibalo sing iban nga mga nasyon; kay tan-awa, madamo nga nasyon ang magasalakay sa duta, sa bagay nga wala na sing lugar nga palanublion.

9 Gani, ako, si Lehi, nakaangkon sing isa ka promisa, nga kon inang mga pagadal-on sang Ginuong Dios pagwa sa duta sang Jerusalem magatuman sang iya mga kasugoan, magauswag sila sa ibabaw sini nga duta; kag pagataguon sila halin sa tanan nga iban pa nga mga nasyon, agud nga mapanag-iyahan nila ini nga duta para sa ila mga kaugalingon. Kag kon lamang nga magtuman sila sang iya mga kasugoan pagapakamaayohon sila sa ibabaw sini nga duta, kag wala sing bisan sin-o nga magahilabot sa ila, ukon magaagaw sang duta nga ila palanublion; kag magapuyo sila nga hilway sa wala’y katapusan.

10 Apang tan-awa, kon mag-abot ang tion nga magausmod sila sa pagkawala’y pagtuo, pagkatapos nga nakabaton sila sang dalagko kaayo nga mga bugay halin sa kamot sang Ginuo—nga nakaangkon sing ihibalo parte sang pagtuga sang duta, kag sang tanan nga tawo, nga nakahibalo sang dako kag dalayawon nga mga binuhatan sang Ginuo halin pa sa pagtuga sang kalibutan; nga may gahum nga ginhatag sa ila sa paghimo sang tanan nga butang paagi sa pagtuo; nga nakabaton sang tanan nga kasugoan halin sa ginsuguran, kag gindala sang iya wala’y dulonan nga kaayo sa sining hamili nga duta sang panaad—tan-awa, ginasiling ko, kon magaabot ang adlaw nga isikway nila ang Balaan sang Israel, ang matuod nga Mesias, nga ila Manunubos kag ila Dios, tan-awa, ang mga paghukom niya nga matarong magatupa sa ila.

11 Huo, dal-on niya ang iban nga mga nasyon sa ila, kag hatagan niya sila sing gahum, kag kuhaon niya sa ila ang mga duta nga ila mga ginapanag-iyahan, kag ipahanabo niya nga magalinapta sila kag malupig.

12 Huo, sa pag-ilis sing isa ka henerasyon padulong sa isa may mga pagpaagay sang dugo, kag dalagko nga mga pagsilot sa tunga nila; gani, mga anak ko, luyag ko nga inyo dumdumon; huo, luyag ko nga mamati kamo sa akon mga pulong.

13 O, kabay kuntani nga magbugtaw kamo; magbugtaw halin sa isa ka mahamuok nga pagtulog, huo, bisan pa halin sa katulogon nga iya sang impiyerno, kag iwaslik ang makahaladlok nga mga kadena nga nagagapos sa inyo, nga amo ang mga kadena nga nagagapos sang mga anak sang katawhan, agud nga madala sila nga bihag paidalom sa wala’y katapusan nga kadadalman sang kalisud kag kasubo.

14 Magbugtaw! Kag magbangon halin sa yab-ok, kag mamati sa mga pulong sing isa ka nagakurog nga ginikanan, nga ang iya mga butkon kag mga tiil sa indi madugay pat-od gid nga igahamyang ninyo sa matugnaw kag malinong nga lulubngan, nga halin didto wala sing biyahero nga makabalik; pila pa ka adlaw kag magalakat ako sa alagyan sang bug-os nga duta.

15 Apang tan-awa, gintubos sang Ginuo ang akon kalag halin sa impiyerno; nakita ko ang iya himaya, kag wala’y katapusan ako nga nalikupan sa mga butkon sang iya gugma.

16 Kag ginapangabay ko nga inyo dumdumon ang pagtuman sang mga pagsulundan kag mga paghukom sang Ginuo; tan-awa, amo ini ang ginakabalakhan sang akon kalag halin pa sa ginsuguran.

17 Ang akon tagipusuon ginpabug-atan sang kasubo sa nagkalain-lain nga tion, kay nahadlok ako, nga basi tungod sa katig-a sang inyo mga tagipusuon ang Ginuo nga inyo Dios magakari sa kabug-osan sang iya kaakig sa inyo, nga isikway kamo kag malaglag sa wala’y katapusan;

18 Ukon, nga isa ka sumpa ang magaabot sa inyo sa sulod sang madamo nga henerasyon; kag bisitahan kamo paagi sa espada, kag paagi sa gutom, kag kaugtan, kag guyuron suno sa kabubut-on kag pagkabihag sang yawa.

19 O, mga anak ko, kabay nga ining mga butang indi mag-abot sa inyo, kundi nga mangin isa kamo ka pinili kag isa ka pinasulabi nga katawhan sang Ginuo. Apang tan-awa, matuman ang iya pagbuot; kay ang iya mga gawi amo ang pagkamatarong sa wala’y katapusan.

20 Kag nagsiling sia nga: Kon magtuman kamo sang akon mga kasugoan magauswag kamo sa duta; apang kon indi kamo magtuman sang akon mga kasugoan pagasikwayon kamo sa akon presensya.

21 Kag karon agud ang akon kalag magkalipay sa inyo, kag agud ang akon tagipusuon magbiya sining kalibutan nga may kalipay tungod sa inyo, agud nga indi ako pagdal-on paidalom nga may kalisud kag kasubo sa lulubngan, magbangon halin sa yab-ok, mga anak ko, kag magpakalalaki, kag magpakalig-on sa isa ka panghunahuna kag sa isa ka tagipusuon, nga nagaisa sa tanan nga butang, agud nga indi kamo mahulog sa pagkabihag;

22 Agud indi kamo pagsumpaon sa isa ka masakit nga sumpa; kag amo man, nga indi ninyo maangkon ang kasaklaw sing isa ka matarong nga Dios sa inyo padulong sa kalaglagan, huo, ang wala’y katapusan nga kalaglagan sang pareho nga kalag kag lawas.

23 Magbugtaw, mga anak ko; isul-ob ang hinganib sang pagkamatarong. Iwaslik ang mga kadena nga nagagapos sa inyo, kag maggwa halin sa kadulom, kag magbangon halin sa yab-ok.

24 Indi na kamo magrebelde sa inyo utod, nga ang iya mga panan-awan nangin mahimayaon, kag nagtuman sang mga kasugoan halin sa tion nga nagbiya kita sa Jerusalem; kag sia nangin isa ka galamiton sa mga kamot sang Dios sa pagdala sa aton sa duta sang panaad; kay kon indi pa tungod sa iya, ayhan nagkalamatay kita sa gutom sa kamingawan; bisan pa amo sini, nagtinguha kamo nga kuhaon ang iya kabuhi; huo, kag nag-antos sia sing tuman nga kasubo tungod sa inyo.

25 Kag tuman ako nga nagakahadlok kag nagapalangurog tungod sa inyo kay basi magaantos sia liwat; kay tan-awa, ginabutang-butangan ninyo sia nga nagahangad sia sang gahum kag awtoridad sa pagpangibabaw sa inyo; apang nahibal-an ko nga wala sia nagahangad sang gahum ukon awtoridad sa pagpangibabaw sa inyo, kundi nga nagahangad sia sang himaya sang Dios, kag sang inyo kaugalingon nga wala’y katapusan nga kaayohan.

26 Kag nagkulomod kamo tungod nangin prangka sia sa inyo. Nagasiling kamo nga nagagamit sia sang katalom; nagasiling kamo nga naakig sia sa inyo; apang tan-awa, ang iya katalom amo ang katalom sang gahum sang pulong sang Dios nga yara sa iya; kag nga inang ginatawag ninyo nga kaakig amo ang kamatuoran, suno sa sinang yara sa Dios, nga indi niya mapunggan, nga nagapakita sing may kaisog parte sang inyo mga kalainan.

27 Kag kinahanglanon nga ang gahum sang Dios pat-od gid nga yara sa iya, bisan tuhoy sa iya pagsugo sa inyo nga kinahanglan gid kamo nga magtuman. Apang tan-awa, indi sia, kundi ini ang Espiritu sang Ginuo nga yara sa iya nga nagbukas sang iya baba sa pagtikab sa bagay nga indi niya ini makipot.

28 Kag karon Laman, anak ko, kag kamo man Lemuel kag Sam, kag kamo man mga anak ko nga mga anak nga lalaki ni Ismael, tan-awa, kon magpamati kamo sa tingug ni Nefi indi kamo mawala. Kag kon magpamati kamo sa iya ginabilin ko sa inyo ang isa ka pagpakamaayo, huo, bisan ang akon una nga pagpakamaayo.

29 Apang kon indi kamo magpamati sa iya bawion ko ang akon una nga pagpakamaayo, huo, bisan ang akon pagpakamaayo, kag ini magakadto sa iya.

30 Kag karon, Zoram, nagahambal ako sa imo: Tan-awa, suloguon ka ni Laban; apang, ginpagwa ka sa duta sang Jerusalem, kag nahibal-an ko nga isa ikaw ka matuod nga abyan sang akon anak nga si Nefi sa wala’y katapusan.

31 Gani, tungod nangin tampad ka ang imo kaliwatan pagapakamaayohon upod sa iya kaliwatan, agud nga magpuyo sila sing malawig sa kabuganaan sa ibabaw sining duta; kag wala, luwas lamang sa kalainan sa tunga nila, sing magahalit ukon magatublag sang ila kabuganaan sa ibabaw sining duta sa wala’y katapusan.

32 Gani, kon magtuman kamo sang mga kasugoan sang Ginuo, ang Ginuo magakonsagrar sining duta para sa kasigurohan sang imo kaliwatan upod sa kaliwatan sang akon anak.