1 Karon ako, si Nefi, nagahambal parte sa mga pulong nga akon ginsulat, nga ginhambal sang baba ni Isaias. Kay tan-awa, si Isaias naghambal sang madamo nga butang nga mabudlay hangpon para sa madamo sang akon katawhan; kay wala sila nakahibalo parte sa mga paagi sang pagpropesiya sa tunga sang mga Judio.

2 Kay ako, si Nefi, wala nakatudlo sa ila sang madamo nga butang parte sa paagi sang mga Judio; kay ang ila mga buhat mga buhat sang kadulom, kag ang ila mga kahimoan mga kahimoan sang mga kangil-aran.

3 Gani, nagasulat ako sa akon katawhan, sa tanan sinang magabaton sining mga butang nga akon ginasulat, agud mahibal-an nila ang mga paghukom sang Dios nga magaabot ang mga ini sa tanan nga pungsod suno sa pulong nga iya ginhambal.

4 Gani, dungga, O katawhan ko, nga iya sang panimalay ni Israel, kag magpamati sa akon mga pulong; kay bisan pa nga ang mga pulong ni Isaias indi maathag sa inyo, apang maathag ang mga ini sa tanan sinang napuno sang espiritu sang propesiya. Apang ginahatag ko sa inyo ang isa ka propesiya, suno sa espiritu nga yari sa akon; gani magapropesiya ako suno sa kaathagan nga yara na sa akon halin sa tion nga naggwa ako sa Jerusalem upod sa akon amay; kay tan-awa, ang akon kalag nagakalipay sa kaathagan sa akon katawhan, agud nga makatuon sila.

5 Huo, kag ang akon kalag nagakalipay sa mga pulong ni Isaias, kay naggwa ako halin sa Jerusalem, kag ang akon mga mata nakakita sang mga butang sang mga Judio, kag nahibal-an ko nga ang mga Judio nakahangop sang mga butang sang mga propeta, kag wala na sing iban pa nga katawhan nga nakahangop sang mga butang nga ginhambal sa mga Judio nga pareho sa ila, luwas lang kon sila natudloan suno sa mga paagi sang mga butang sang mga Judio.

6 Apang tan-awa, ako, si Nefi, wala nagtudlo sang akon mga kaanakan suno sa mga paagi sang mga Judio; apang tan-awa, ako, sa akon kaugalingon, nakapuyo sa Jerusalem, gani nakahibalo ako parte sa mga rehiyon sa palibot sini; kag nakasambit ako sa akon mga kaanakan parte sa mga paghukom sang Dios, nga natabo sa tunga sang mga Judio, sa akon mga kaanakan, suno sa sinang tanan nga ginhambal ni Isaias, kag wala ko pag-isulat ang mga ini.

7 Apang tan-awa, magapadayon ako sa akon kaugalingon nga propesiya, suno sa akon kaathagan; nga sa diin nahibal-an ko nga wala sing tawo nga makasayop; apang, sa mga adlaw nga ang mga propesiya ni Isaias matuman ang mga tawo makahibalo sing may kapat-uran, sa panahon nga matabo ang mga ini.

8 Gani, importante ang mga ini sa mga anak sang katawhan, kag sia nga nagahunahuna nga indi, sa ila ako magahambal, kag itumod ang mga pulong sa akon kaugalingon nga katawhan; kay nahibal-an ko nga mangin may dako nga importansya ang mga ini sa ila sa katapusan nga mga adlaw; kay sa sina nga adlaw mahangpan nila ang mga ini; gani, para sa ila kaayohan ginsulat ko ang mga ini.

9 Kag pareho nga isa ka henerasyon sang mga Judio ang nalaglag tungod sang kalainan, sa amo man ginlaglag sila sa tanan nga henerasyon suno sa ila mga kalainan; kag wala pa gid sing bisan isa sa ila nga nalaglag luwas lang nga ini ginpropesiya na ngadaan sa ila sang mga propeta sang Ginuo.

10 Gani, nasugiran na sila parte sa kalaglagan nga matabo sa ila pagkatapos gilayon sang pagbiya sang akon amay sa Jerusalem; bisan pa amo sini, ginpatig-a nila ang ila mga tagipusuon; kag suno sa akon propesiya nalaglag sila, luwas sadtong mga gindala nga bihag sa Babilonia.

11 Kag karon ini akon ginahambal tungod sang espiritu nga yari sa akon. Kag bisan pa nga gindala sila magabalik sila liwat, kag magapanag-iya sang duta sang Jerusalem; gani, ipanumbalik sila liwat sa duta nga ila palanublion.

12 Apang, tan-awa, magaagom sila sing mga giyera, kag mga huring-huring sang mga giyera; kag kon ang adlaw magaabot nga ang Bugtong nga Anak sang Amay, huo, bisan ang Amay sang langit kag sang duta, magapakita sang iya kaugalingon sa ila sa unod, tan-awa, igasikway nila sia tungod sang ila mga kalainan, kag sang katig-a sang ila mga tagipusuon, kag sang ila pagkabatinggilan.

13 Tan-awa, igalansang nila sia sa krus; kag pagkatapos nga mahamyang sia sa isa ka pantyon sa sulod sang tatlo ka adlaw mabanhaw sia halin sa minatay, nga may pagpang-ayo sa iya mga pakpak; kag ang tanan sinang magapati sa iya ngalan maluwas sa ginharian sang Dios. Gani, ang akon kalag nagakalipay sa pagpropesiya parte sa iya, kay nakita ko ang iya adlaw, kag ang akon tagipusuon nagapakadako sang iya balaan nga ngalan.

14 Kag tan-awa matabo ini nga pagkatapos nga ang Mesias mabanhaw halin sa minatay, kag magpakita sang iya kaugalingon sa iya katawhan, sa tanan nga magapati sa iya ngalan, tan-awa, ang Jerusalem pagalaglagon liwat; kay kalisud sa ila nga nagapakig-away batok sa Dios kag sa katawhan sang iya simbahan.

15 Gani, ang mga Judio pagalaptahon sa tunga sang tanan nga nasyon; huo, kag ang Babilonia pagalaglagon man; gani, ang mga Judio pagalaptahon sang iban pa nga mga nasyon.

16 Kag pagkatapos nga nalapta sila, kag nasilotan sang Ginuong Dios paagi sa iban pa nga mga nasyon sa sulod sang madamo nga henerasyon, huo, bisan sa tanan nga henerasyon tubtob nga makumbinsi sila sa pagpati kay Cristo, ang Anak sang Dios, kag sa pagbayad-sala, nga wala’y dulonan para sa tanan nga katawhan—kag kon mag-abot ina nga adlaw nga magpati sila kay Cristo, kag magsimba sa Amay sa iya ngalan, nga may putli nga mga tagipusuon kag matinlo nga mga kamot, kag indi na magpaabot sing isa pa ka Mesias, dayon, sa sina nga tion, magaabot ang adlaw nga kinahanglanon nga magpati sila sa sining mga butang.

17 Kag ang Ginuo magapahamtang liwat sang iya kamot sa ika-duha nga tion sa pagpapanumbalik sang iya katawhan halin sa ila nagtalang kag nalaglag nga kahimtangan. Gani, magapadayon sia sa paghimo sing isa ka dalayawon nga buluhaton kag makatilingala sa tunga sang mga anak sang katawhan.

18 Gani, igapahayag niya ang iya mga pulong sa ila, nga ang amo nga mga pulong magahukom sa ila sa katapusan nga adlaw, kay pagahatagan sila sang mga ini sa katuyoan nga pagpapati sa ila sa matuod nga Mesias, nga ginsikway nila; kag sa pagpapati sa ila nga indi na nila kinahanglan nga maghulat pa sang Mesias nga mag-abot, kay wala na sing may magaabot, luwas lang nga ini amo ang isa ka di-matuod nga Mesias nga magapatalang sang katawhan; kay may isa lamang ka Mesias nga ginahambal sang mga propeta, kag ina nga Mesias amo sia nga pagasikwayon sang mga Judio.

19 Kay suno sa mga pulong sang mga propeta, ang Mesias magaabot sa sulod sang anum ka gatos ka tuig halin sa tion nga ang akon amay nagbiya sa Jerusalem; kag suno sa mga pulong sang mga propeta, kag sa pulong man sang anghel sang Dios, ang iya mangin ngalan amo si Jesucristo, ang Anak sang Dios.

20 Kag karon, mga kauturan ko, naghambal na ako sing maathag nga indi kamo magsayop. Kag pareho nga buhi ang Ginuong Dios nga nagdala sang Israel pagwa sa duta sang Egipto, kag naghatag kay Moises sang gahum nga paayohon niya ang mga nasyon pagkatapos nga mapangagat sila sang dalitan nga mga man-og, kon magtulok sila sa man-og nga gin-alsa niya sa ila atubang, kag naghatag man sa iya sing gahum nga hampakon ang bato kag ang tubig magailig; huo, tan-awa ginasiling ko sa inyo, nga pareho nga ining mga butang matuod, kag pareho nga buhi ang Ginuong Dios, wala na sing iban pa nga ngalan nga ginhatag sa idalom sang langit luwas sa sining Jesucristo, nga akon ginhambal, nga paagi sa iya ang tawo mahimo nga maluwas.

21 Gani, sa sini nga kabangdanan ang Ginuong Dios nagpromisa sa akon nga ining mga butang nga akon ginasulat pagataguon kag amligan, kag igapasa-pasa sa akon kaliwatan, sa tanan nga henerasyon, agud nga ang promisa kay Jose mahimo nga matuman, nga ang iya kaliwatan indi gid madula samtang nagapadayon ang duta.

22 Gani, ining mga butang igapasa-pasa sa tanan nga henerasyon samtang nagapadayon ang duta; kag igapasa-pasa ang mga ini suno sa kabubut-on kag ikalipay sang Dios; kag ang mga nasyon nga magapanag-iya sang mga ini pagahukman paagi sa mga ini suno sa mga pulong nga nasulat.

23 Kay nagapangabudlay kami sing matutum sa pagsulat, sa pagkumbinsi sang amon mga kaanakan, kag sang amon man mga kauturan, sa pagpati kay Cristo, kag sa pagpakig-uli sa Dios; kay nahibal-an naton nga paagi sa grasya kita naluwas, pagkatapos sang tanan nga aton mahimo.

24 Kag, bisan pa nga nagapati kita kay Cristo, ginatuman naton ang layi ni Moises, kag nagapaabot nga may kalig-on kay Cristo tubtob nga matuman ang layi.

25 Kay, sa amo nga katuyoan ang layi ginhatag; gani ang layi nangin patay sa aton, kag buhi kita kay Cristo tungod sang aton pagtuo; apang ginatuman naton ang layi tungod sang mga kasugoan.

26 Kag nagahambal kita parte kay Cristo, nagakasadya kita kay Cristo, nagawali kita parte kay Cristo, nagapropesiya kita parte kay Cristo, kag nagasulat kita suno sa aton mga propesiya, agud nga mahibal-an sang aton mga kaanakan kon sa ano nga ginhalinan sila mahimo nga magsalig para sa kapatawaran sang ila mga sala.

27 Gani, nagahambal kita parte sa layi agud nga mahimo nga mahibal-an sang aton mga kaanakan ang kawala’y pulos sang layi; kag sila, paagi sa paghibalo sang kawala’y pulos sang layi, mahimo nga magpaabot sa sina nga kabuhi nga yara kay Cristo, kag makahibalo kon sa ano nga katuyoan ang layi ginhatag. Kag pagkatapos nga matuman ang layi kay Cristo, nga indi na nila kinahanglan nga patig-ahon pa ang ila mga tagipusuon batok sa iya kon ang layi dapat na nga dulaon.

28 Kag karon tan-awa, katawhan ko, isa kamo ka katawhan nga batinggilan; gani, naghambal ako sing maathag sa inyo agud nga indi mahimo nga indi ninyo mahangpan. Kag ang mga pulong nga akon ginhambal magatindog bilang isa ka pagpamatuod batok sa inyo; kay tama na ang mga ini sa pagtudlo sang bisan sin-o nga tawo sang husto nga dalan; kay ang husto nga dalan amo ang magpati kay Cristo kag indi magpanghiwala sa iya; kay paagi sa pagpanghiwala sa iya ginapanghiwala man ninyo ang mga propeta kag ang layi.

29 Kag karon tan-awa, ginasiling ko sa inyo nga ang husto nga dalan amo ang magpati kay Cristo, kag indi magpanghiwala sa iya; kag si Cristo amo ang Balaan sang Israel; gani magduko kamo sa iya atubang, kag magsimba sa iya sa bug-os ninyo nga ikasarang, hunahuna, kag kusog, kag sa inyo bug-os nga kalag; kag kon inyo ini pagahimuon indi gid kamo pag-isikway.

30 Kag, sa bagay nga ini magakadapat, kinahanglan gid nga himuon ninyo ang mga hilikuton kag mga ordinansa sang Dios tubtob nga matuman ang layi nga ginhatag kay Moises.