1 Kag pagkatapos nga mabanhaw si Cristo halin sa minatay ipakita niya ang iya kaugalingon sa inyo, mga kaanakan ko, kag pinalangga kong mga kauturan; kag ang mga pulong nga iya igahambal sa inyo mangin layi nga inyo pagahimuon.

2 Kay tan-awa, ginasiling ko sa inyo nga nakita ko nga madamo nga henerasyon ang magalabay, kag mangin may dalagko nga mga giyera kag mga pagbinaisay sa tunga sang akon katawhan.

3 Kag pagkatapos nga magakari ang Mesias may mga tanda nga igahatag sa akon katawhan parte sang iya pagkatawo, kag sang iya man kamatayon kag pagkabanhaw; kag mangin dako kag makakululba ina nga adlaw sa mga malain, kay magakalamatay sila; kag magakalamatay sila tungod ginpanabog nila ang mga propeta, kag ang mga santos, kag ginpamato sila, kag ginpamatay sila; gani ang pagsinggit sang dugo sang mga santos magalab-ot sa Dios halin sa duta batok sa ila.

4 Gani, ang tanan sinang mga bugalon, kag inang mga nagahimo sing malain, ang adlaw nga magaabot magasunog sa ila, siling sang Ginuo sang mga Kasoldadohan, kay mangin pareho sila sang ginaraban.

5 Kag sila nga nagapamatay sang mga propeta, kag sang mga santos, ang kadalumon sang duta magalamon sa ila, siling sang Ginuo sang mga Kasoldadohan; kag tabunan sila sang mga bukid, kag hakupon sila palayo sang mga buhawi, kag tumbahan sila sang mga bilding kag dugmukon sila sing tinipik kag galingon sila tubtob nga mangin pulbos.

6 Kag bisitahan sila sang mga pagpanaguob, kag mga pagpangilat, kag mga linog, kag tanan nga sari sang kalaglagan, kay ang kalayo sang kaakig sang Ginuo magadabadaba batok sa ila, kag mangin pareho sila sang ginaraban, kag ang adlaw nga magaabot magatupok sa ila, siling sang Ginuo sang mga Kasoldadohan.

7 O ang kasakit, kag ang kalisud sang akon kalag tungod sang pagkadula sang mga ginpamatay sa akon katawhan! Kay ako, si Nefi, nakakita sini, kag halos diutayan na lang ini nagtupok sa akon sa atubang sang presensya sang Ginuo; apang kinahanglan gid nga magpakitluoy ako sa akon Dios: Matarong ang imo mga paggawi.

8 Apang tan-awa, ang mga matarong nga nagapamati sa mga pulong sang mga propeta, kag wala nagapamatay sa ila, kundi nga nagapaabot kay Cristo sing may kalig-on para sa mga tanda nga ginhatag, bisan pa sa pihak sang tanan nga paghingabot—tan-awa, sila inang indi magkalamatay.

9 Kundi nga ang Anak sang Pagkamatarong magapakita sa ila; kag paayohon niya sila, kag makaangkon sila sing paghidaet upod sa iya, tubtob nga tatlo ka henerasyon ang magalabay, kag madamo sang ika-apat nga henerasyon ang magalabay sa pagkamatarong.

10 Kag kon maglabay ining mga butang isa ka madasig nga kalaglagan ang magaabot sa akon katawhan; kay, sa pihak sang mga kasakit sang akon kalag, nakita ko ini; gani, nahibal-an ko nga matabo ini; kag ginbaligya nila ang ila mga kaugalingon sa wala’y kapuslanan; kay, kay bilang balus sang ila bugal kag sang ila kabuangan magaani sila sing kalaglagan; kay bangod nagpadaug sila sa yawa kag nagpili sang mga buluhaton sang kadulom sangsa kasanag, gani pat-od gid nga magapanaog sila sa impiyerno.

11 Kay ang Espiritu sang Ginuo indi dalayon nga magaimpluwensya sa tawo. Kag kon ang Espiritu magauntat sa pag-impluwensya sa tawo dayon magaabot ang madasig nga kalaglagan, kag ini ang ginakasubo sang akon kalag.

12 Kag sa amo man nga paagi nga naghambal ako parte sa pagpapati sa mga Judio, nga si Jesus amo ang tunay nga Cristo, kinahanglan nga ang mga Gentil mapapati man nga si Jesus amo ang Cristo, ang Wala’y Katapusan nga Dios;

13 Kag nagapakita sia sang iya kaugalingon sa tanan sinang mga nagapati sa iya, paagi sa gahum sang Balaan nga Espiritu; huo, sa tagsa ka nasyon, kaliwat, lengguahe, kag katawhan, nga nagahimo sang dalagko nga mga milagro, mga tanda, kag mga katilingalahan sa tunga sang mga anak sang katawhan suno sa ila pagtuo.

14 Apang tan-awa, magapropesiya ako sa inyo parte sa katapusan nga mga adlaw; parte sa mga adlaw nga kon san-o ang Ginuong Dios magapahayag sining mga butang sa mga anak sang katawhan.

15 Pagkatapos nga ang akon kaliwatan kag ang kaliwatan sang akon mga kauturan magausmod sa pagkawala’y pagtuo, kag masakit sang mga Gentil; huo, pagkatapos nga ang Ginuong Dios magakampo batok sa ila sa palibot, kag magasalakay sa ila gamit ang mga lambat, kag magpatindog sing mga kuta batok sa ila; kag pagkatapos nga mag-os-os sila paubos sa yab-ok, tubtob nga wala na sila, apang ang mga pulong sang mga matarong igasulat, kag ang mga pangamuyo sang mga tampad mabatian, kag ang tanan sinang mga nag-usmod sa pagkawala’y pagtuo indi malimtan.

16 Kay inang mga malaglag magahambal sa ila halin sa duta, kag ang ila panghambal mangin mahinay halin sa yab-ok, kag ang ila tingug mangin pareho sing isa ka espiritista; kay ang Ginuong Dios magahatag sa iya sing gahum agud nga maghutik sia parte sa ila, pareho nga daw naghalin ini sa duta; kag ang ila panghambal magahutik halin sa yab-ok.

17 Kay amo ini ang siling sang Ginuong Dios: Isulat nila ang mga butang nga pagahimuon sa tunga nila, kag igasulat ang mga ini kag takpan sa isa ka libro, kag inang mga nag-usmod sa pagkawala’y pagtuo indi makaangkon sang mga ini, kay nagtinguha sila sa pagguba sang mga butang sang Dios.

18 Gani, sa amo man nga paagi nga inang mga nalaglag ginlaglag sing madasig; kag ang kadam-an sang ila mga makakululba mangin pareho sang upa nga ginapalid—huo, amo ini ang ginasiling sang Ginuong Dios: Ini mangin sa gilayon, sa hinali—

19 Kag matabo ini nga yadtong mga nag-usmod sa pagkawala’y pagtuo pagasakiton sang kamot sang mga Gentil.

20 Kag ang mga Gentil naalsa sa bugal sang ila mga mata, kag nasandad, tungod sang kadakuon sang ila kasandaran, sa bagay nga nagpatindog sila sang madamo nga simbahan; apang, ginpanghiwala nila ang gahum kag mga milagro sang Dios, kag nagwali sa ila mga kaugalingon sang ila kaugalingon nga kaalam kag sang ila kaugalingon nga tinun-an, agud nga makaangkon sila sing manggad kag makagaling sa nawong sang mga imol.

21 Kag madamo ang simbahan nga ginpatindog nga nagatuga sang mga paghinisaay, kag mga pag-ilinaway, kag pagtuyo sing malain.

22 Kag may sekreto nga mga pagkunsabo, bisan pareho sa dumaan nga panahon, suno sa mga pagkunsabo sang yawa, kay sia ang tagtukod sining tanan nga butang; huo, ang tagtukod sang pagpamatay, kag sang mga buluhaton sang kadulom; kag amo man, ginaguyod niya sila sa liog sa isa ka mahumok nga pisi, tubtob nga magapos na niya sila sang iya mabakod nga mga pisi tubtob sa wala’y katapusan.

23 Kay tan-awa, pinalangga kong mga kauturan, ginasiling ko sa inyo nga ang Ginuong Dios wala nagahikot sa kadulom.

24 Wala sia sing ginahimo nga bisan ano luwas lang nga ini para sa benepisyo sang kalibutan; kay palangga niya ang kalibutan, bisan nga ginhatag niya ang iya kaugalingon nga kabuhi agud mapapalapit niya ang tanan nga tawo sa iya. Gani, wala sia sing ginsugo nga indi sila mag-ambit sang iya kaluwasan.

25 Tan-awa, nagasinggit bala sia bisan kay sin-o nga nagasiling: Magpalayo sa akon? Tan-awa, ginasiling ko sa inyo, Wala; kundi nga nagasiling sia: Kari kamo sa akon kamo nga yara sa mga punta sang kalibutan, magbakal sing gatas kag dugus nga wala sing kwarta kag wala sing bayad.

26 Tan-awa, may ginsugo bala sia nga bisan sin-o nga magpalayo sila pagwa sa mga sinagoga, ukon pagwa sa mga balay sang pagsimba? Tan-awa, ginasiling ko sa inyo, Wala.

27 May ginsugo bala sia nga bisan sin-o nga indi sila mag-ambit sang iya kaluwasan? Tan-awa ginasiling ko sa inyo, Wala; kundi nga ginahatag niya ini nga libre para sa tanan nga tawo; kag ginsugo niya ang iya katawhan nga kumbinsihon nila ang tanan nga tawo sa paghinulsol.

28 Tan-awa, may ginsugo bala ang Ginuo nga bisan sin-o nga indi sila mag-ambit sang iya kaayo? Tan-awa ginasiling ko sa inyo, Wala; kundi nga ang tanan nga tawo may pribilihiyo ang isa pareho sa isa, kag wala sing bisan isa nga ginadumilian.

29 Nagsugo sia nga mangin wala sing mga butig nga pagkapari; kay, tan-awa, ang mga butig nga pagkapari amo nga ang mga tawo nagawali kag nagapahamtang sang ila mga kaugalingon bilang isa ka kasanag sa kalibutan, agud nga makaangkon sila sing manggad kag pagdayaw sang kalibutan; apang wala sila nagapangita sang kaayohan sang Sion.

30 Tan-awa, ang Ginuo nagdumili sini nga butang; gani, ang Ginuong Dios naghatag sing isa ka kasugoan nga ang tanan nga tawo dapat nga may putli nga paghigugma, nga ang amo nga putli nga paghigugma amo ang pagpalangga. Kag luwas lang nga may putli sila nga paghigugma wala sila sing kapuslanan. Gani, kon may putli sila nga paghigugma indi nila pagtugotan nga madula ang nagapangabudlay sa Sion.

31 Apang ang nagapangabudlay sa Sion magapangabudlay para sa Sion; kay kon magpangabudlay sila agud makakwarta madula sila.

32 Kag sa liwat, ang Ginuong Dios nagsugo nga ang mga tawo indi magpamatay; nga indi sila magbutig; nga indi sila magpangawat; nga indi sila maggamit sang ngalan sang Ginuo nga ila Dios sa wala’y kapuslanan; nga indi sila magkahisa; nga dapat wala sila sing malain nga tinutuyo; nga indi sila makigbais sa isa kag isa; nga indi sila magpanghilawas; kag nga indi sila dapat maghimo sang bisan diin sining mga butang; kay madula ang kon sin-o man nga magahimo sang mga ini.

33 Kay wala sining mga kalainan ang naghalin sa Ginuo; kay nagahimo sia sinang maayo sa tunga sang mga anak sang katawhan; kag wala sia sing ginahimo nga bisan ano luwas lang nga ini mangin maathag sa mga anak sang katawhan; kag ginaagda niya sila tanan sa pagpalapit sa iya kag mag-ambit sang iya kaayo; kag wala sia sing ginadumilian nga bisan sin-o nga nagapalapit sa iya, itom kag puti, ulipon kag hilway, lalaki kag babayi; kag ginadumdum niya ang mga pagano; kag ang tanan palareho sa Dios, Judio kag Gentil.