1 Apang, tan-awa sa katapusan nga mga adlaw, ukon sa mga adlaw sang mga Gentil—huo, tan-awa, ang tanan nga nasyon sang mga Gentil kag amo man sang mga Judio, inang mga magakadto sa sini nga duta kag inang mga yara sa iban pa nga mga duta, huo, bisan sa tanan nga kadutaan sang duta, tan-awa, mahubog sila sang kalainan kag sang tanan nga sahi sang mga kangil-aran—

2 Kag kon ina nga adlaw magaabot pagabisitahan sila sang Ginuo sang mga Kasoldadohan, paagi sa pagpanaguob kag paagi sa linog, kag paagi sa isa ka dako nga kinagahod, kag paagi sa unos, kag paagi sa bagyo, kag paagi sa dabadaba sang nagapanglamon nga kalayo.

3 Kag ang tanan nga nasyon nga magapakig-away sa Sion, kag nga nagapabudlay sa iya, mangin pareho sing isa ka damgo sing isa ka panan-awon sa kagab-ihon; huo, mangin amo ini sa ila, bisan pareho sing isa ka tawo nga ginagutom nga nagadamgo, kag tan-awa nagakaon sia apang nakabugtaw kag wala unod ang iya kalag; ukon pareho sing isa ka tawo nga ginauhaw nga nagadamgo, kag tan-awa nagainom sia apang nakabugtaw sia kag tan-awa nagapalangluya sia, kag ang iya kalag may kagana; huo, sa amo man mangin pareho sini ang kadam-an sang tanan nga nasyon nga nagapakig-away batok sa Bukid sang Sion.

4 Kay tan-awa, tanan kamo nga nagahimo sing kalainan, magpahimuyong kamo kag magkatingala, kay magasinggit kamo, kag magapanawag; huo, mahubog kamo apang indi sang alak, magaduling-duling kamo apang indi tungod sang maisog nga ilimnon.

5 Kay tan-awa, ang Ginuo nagbubo sa inyo sang espiritu sang mahamuok nga katulugon. Kay tan-awa, ginpiyong ninyo ang inyo mga mata, kag ginsikway ninyo ang mga propeta; kag ang inyo mga tagdumala, kag ang mga manugpanan-aw iya gintago tungod sang inyo kalainan.

6 Kag matabo ini nga ang Ginuong Dios magapahayag sa inyo sang mga pulong sing isa ka libro, kag ini mangin mga pulong nila nga nagkalatulog.

7 Kag tan-awa, ang libro pagaselyohan; kag sa libro may isulat nga rebelasyon halin sa Dios, halin sa ginsuguran sang kalibutan tubtob sa katapusan sini.

8 Gani, tungod sang mga butang nga napat-inan na, ang mga butang nga napat-inan indi pag-ihatag sa adlaw sang kalainan kag kangil-aran sang katawhan. Gani ang libro pagataguon halin sa ila.

9 Apang ang libro igahatag sa isa ka tawo, kag ihatag niya ang mga pulong sang libro, nga amo ang mga pulong sadtong mga nagkalatulog sa yab-ok, kag ihatag niya ining mga pulong sa isa pa;

10 Apang ang mga pulong nga natakpan indi niya pag-ihatag, kag indi man niya pag-ihatag ang libro. Kay ang libro pagatakpan sang gahum sang Dios, kag ang rebelasyon nga gintakpan pagataguon sa sulod sang libro tubtob sa kaugalingon nga natalana nga tion sang Ginuo, agud nga maggwa ang mga ini; kay tan-awa, nagapahayag ang mga ini sang tanan nga butang halin pa sa pagtuga sang kalibutan tubtob sa katapusan sini.

11 Kag magaabot ang adlaw nga ang mga pulong sang libro nga gintakpan pagabasahon sa mga atop sang balay; kag pagabasahon ang mga ini paagi sa gahum ni Cristo; kag ang tanan nga butang igapahayag sa mga anak sang katawhan kon ano man ang natabo na sa tunga sang mga anak sang katawhan, kag kon ano man ang matabo pa bisan sa katapusan sang duta.

12 Gani, sa sina nga adlaw kon san-o ang libro igahatag sa tawo nga akon ginahambal, ang libro pagataguon halin sa mga mata sang kalibutan, agud nga wala sing mga mata nga makakita sini luwas sa tatlo ka saksi nga makakita sini, paagi sa gahum sang Dios, luwas sa iya nga kay sin-o ang libro igahatag; kag magasaksi sila sa kamatuoran sang libro kag sa mga butang nga yara sa sini.

13 Kag wala na sing iban pa nga makatan-aw sini, luwas sa pila suno sa kabubut-on sang Dios, sa pagpamatuod sang iya pulong sa mga anak sang katawhan; kay ang Ginuong Dios nagsiling nga ang mga pulong sang tampad magahambal nga daw naghalin ini sa mga minatay.

14 Gani, ang Ginuong Dios magahikot sa pagpahayag sang mga pulong sang libro; kag sa baba sang kon ano kadamo nga mga saksi nga nagakaigo para sa iya palig-onon niya ang iya pulong; kag kalisud sa iya nga magasikway sang pulong sang Dios!

15 Apang tan-awa, matabo ini nga ang Ginuong Dios magasiling sa iya kon kay sin-o niya ihatag ang libro: Dal-a ining mga pulong nga wala matakpi kag ihatag ang mga ini sa isa pa, agud nga mapakita niya ini sa may tinun-an nga nagasiling: Basaha ini, ginaampo ko sa imo. Kag ang may tinun-an magasiling: Dal-a diri ang libro, kag basahon ko ang mga ini.

16 Kag karon, tungod sang himaya sang kalibutan kag agud makaangkon sing manggad magasiling sila sini, kag indi para sa himaya sang Dios.

17 Kag ang tawo magasiling: Indi ko madala ang libro, kay natakpan ini.

18 Dayon ang may tinun-an magasiling: Indi ko ini mabasa.

19 Gani matabo ini, nga ihatag liwat sang Ginuong Dios ang libro kag ang mga pulong sini sa iya nga wala sing tinun-an; kag ang tawo nga wala sing tinun-an magasiling: Wala ako sing tinun-an.

20 Dayon ang Ginuong Dios magasiling sa iya: Ang mga may tinun-an indi magbasa sang mga ini, kay ginsikway nila ang mga ini, kag makasarang ako sa paghimo sang akon kaugalingon nga buluhaton; gani ikaw ang magabasa sang mga pulong nga akon igahatag sa imo.

21 Indi pagtanduga ang mga butang nga natakpan, kay ipahayag ko ang mga ini sa akon kaugalingon nga natalana nga tion; kay ipakita ko sa mga anak sang katawhan nga makasarang ako sa paghimo sang akon kaugalingon nga buluhaton.

22 Gani kon imo na nabasa ang mga pulong nga akon ginsugo sa imo, kag nakakuha sang mga saksi nga akon ginpromisa sa imo, dayon takpan mo liwat ang libro kag ipatago ini sa akon, agud nga maamligan ko ang mga pulong nga wala pa nimo mabasa tubtob nga makita ko nga nagakaigo sa akon kaugalingon nga kaalam ang pagpahayag sang tanan nga butang sa mga anak sang katawhan.

23 Kay tan-awa, ako ang Dios; kag isa ako ka Dios sang mga milagro; kag ipakita ko sa kalibutan nga ako amo man sa gihapon kahapon, subong, kag tubtob sa wala’y katapusan; kag wala ako nagahikot sa tunga sang mga anak sang katawhan luwas lang nga ini suno sa ila pagtuo.

24 Kag sa liwat matabo ini nga ang Ginuo magasiling sa iya nga magabasa sang mga pulong nga igahatag sa iya:

25 Bangod nga ining katawhan nagapalapit sa akon sa ila baba, kag sa ila mga bibig nagatahod sa akon, apang ang ila mga tagipusuon malayo sa akon, kag ang ila kahadlok sa akon gintudlo sang mga pagsulundan sang tawo—

26 Gani, magahikot ako sa paghimo sing isa ka dalayawon nga buluhaton sa tunga sining katawhan, huo, isa ka dalayawon nga buluhaton kag makatilingala, kay ang kaalam sang ila mga maalam kag mga may tinun-an madula, kag ang paghangop sang ila mga mahinalungon pagalipdan.

27 Kag kalisud sa ila nga nagatinguha sa pagtago sing madalom sang ila plano sa Ginuo! Kag ang ila buluhaton yara sa dulom; kag sila nagasiling: Sin-o bala ang makakita sa aton, kag sin-o ang makahibalo sa aton? Kag sila nagasiling man: Sa pagkamatuod, ang imo pagpabaliskad sang mga butang pagakabigon nga daga sang manugkulon. Apang tan-awa, ipakita ko sa ila, siling sang Ginuo sang mga Kasoldadohan, nga nahibal-an ko ang tanan nila nga buhat. Kay magasiling bala ang hinimo sa naghimo sa iya, wala niya ako paghimoa? Ukon magasiling bala ang ginporma sa nagporma sa iya, wala sia sing paghangop?

28 Apang tan-awa, siling sang Ginuo sang mga Kasoldadohan: Ipakita ko sa mga anak sang katawhan nga diutay na gid lang nga tion kag ang Libanon mangin isa ka mabungahon nga patag; kag ang mabungahon nga patag pagakabigon nga isa ka lasang.

29 Kag sa sina nga adlaw ang mga bungol makabati sang mga pulong sang libro, kag ang mga mata sang mga bulag makakita halin sa wala’y kasanag kag halin sa kadulom.

30 Kag ang mga malulo magadugang, kag ang ila kalipay mangin sa Ginuo, kag ang mga imol sa tunga sang mga tawo magakasadya sa Balaan sang Israel.

31 Kay pat-od nga pareho nga buhi ang Ginuo makita nila nga ang makakululba mangin wala’y kapuslanan, kag ang manugtamay matupok, kag ang tanan nga nagabantay sang kalainan pagautdon;

32 Kag sila nga nagapabangod sa isa ka tawo nga nakasala tungod sa iya pulong, kag nagapahamtang sing siod para sa iya nga nagasaway sa ganhaan, kag nagawahig sa matarong bilang isa ka butang nga wala’y pulos.

33 Gani, amo ini ang siling sang Ginuo, nga nagtubos kay Abraham, parte sa panimalay ni Jacob: Si Jacob indi na subong mahuy-an, kag ang iya nawong subong indi man magpalanglapsi.

34 Apang kon makita niya ang iya mga kaanakan, ang binuhatan sang akon mga kamot, sa tunga niya, pakabalaanon nila ang akon ngalan, kag pakabalaanon ang Balaan ni Jacob, kag magakahadlok sa Dios sang Israel.

35 Sila man nga nagsayop sa espiritu makahangop, kag sila nga nagkumod magatuon sang doktrina.