1 Kag karon, tan-awa, mga kauturan ko, naghambal ako sa inyo, suno sa pagpamilit sa akon sang Espiritu; gani, nahibal-an ko nga pat-od gid nga matabo ang mga ini.

2 Kag ang mga butang nga igasulat halin sa libro mangin may dako nga importansya sa mga anak sang katawhan, kag ilabi na gid sa aton kaliwatan, nga isa ka nagkalabilin sang panimalay ni Israel.

3 Kay matabo ini sa sina nga adlaw nga ang mga simbahan nga gintukod, kag indi sa Ginuo, nga ang isa magasiling sa isa: Tan-awa, ako, iya ako sang Ginuo; kag ang iban magasiling: Ako, iya ako sang Ginuo; kag amo ini ang isiling sang tagsa-tagsa nga nagtukod sang mga simbahan, kag indi sa Ginuo—

4 Kag magabinaisay sila ang isa batok sa isa; kag ang ila mga pari magabinaisay ang isa batok sa isa, kag magatudlo sila paagi sa ila tinun-an, kag ipanghiwala ang Balaan nga Espiritu nga nagahatag sing panghambal.

5 Kag ipanghiwala nila ang gahum sang Dios, ang Balaan sang Israel; kag magasiling sila sa katawhan: Magpamati sa amon, kag pamatii ninyo ang amon pagsulundan; kay tan-awa wala sing Dios subong, kay ang Ginuo kag ang Manunubos nakatapos na sang iya buluhaton, kag ginhatag na niya ang iya gahum sa mga tawo;

6 Tan-awa, magpamati kamo sa akon pagsulundan; kon magsiling sila nga may isa ka milagro nga ginhikot sang kamot sang Ginuo, indi ini pagpatiha; kay sa sini nga adlaw indi sia isa ka Dios sang mga milagro; natapos na niya ang iya buluhaton.

7 Huo, kag madamo ang magasiling: Magkaon, mag-inom, kag magkasadya, kay buwas mapatay kita; kag mangin maayo ini para sa aton.

8 Kag madamo man ang magasiling: Magkaon, mag-inom, kag magkasadya; apang, magkahadlok sa Dios—kay pakatarungon niya ang paghimo sing diutay nga sala; huo, magbinutig diutay, magpamentaha sa isa tungod sang iya mga pulong, magkutkot sing buho para sa imo isigkatawo; wala sing malain sa sini; kag himoa ining tanan nga butang, kay buwas mapatay kita; kag kon ugaling man nga may sala kita, hanoton kita sang Dios sing pila ka lapdos, kag sa katapusan maluwas kita sa ginharian sang Dios.

9 Huo, kag madamo ang magatudlo sa sini nga paagi, di-matuod kag wala’y pulos kag binuang nga mga doktrina, kag mangin hambog sila sa ila mga tagipusuon, kag magatinguha sa pagtago sing madalom sang ila plano sa Ginuo; kag ang ila mga buluhaton mangin yara sa dulom.

10 Kag ang dugo sang mga santos magasinggit halin sa duta batok sa ila.

11 Huo, sila tanan nagtalalang sa dalanon; nangin malain sila.

12 Tungod sang bugal, kag tungod sang di-matuod nga mga manunudlo, kag sayop nga doktrina, ang ila mga simbahan nangin malain, kag ang ila mga simbahan nangin matinaas-taason; tungod sang bugal nangin hambog sila.

13 Ginakawatan nila ang mga imol tungod sang ila matahum nga mga santuaryo; ginakawatan nila ang mga imol tungod sang ila matahum nga biste; kag ginahingabot nila ang mga malulo kag ang kubos sa tagipusuon tungod kay nangin hambog sila sa ila bugal.

14 Nagapatiskog sila sang ila mga liog kag nagapataas sang ila mga ulo; huo, kag tungod sang bugal, kag kalainan, kag mga kangil-aran, kag mga pagkamakihilawason, sila tanan nagtalalang luwas sa pila nga mapainubuson nga mga sumulunod ni Cristo; apang, naimpluwensyahan sila, sa bagay nga sa madamo nga kahigayunan nagasayop sila bangod gintudloan sila paagi sa mga pagsulundan sang tawo.

15 O ang maalam, kag ang may tinun-an, kag ang manggaranon, nga nangin hambog sa bugal sang ila mga tagipusuon, kag ang tanan sinang mga nagawali sang sayop nga mga doktrina, kag ang tanan sinang mga nagapanghilawas, kag nagapatiko sang husto nga dalanon sang Ginuo, kalisud, kalisud, kalisud sa ila, siling sang Ginuong Dios nga Makagagahum, kay igadap-ong sila sa impiyerno!

16 Kalisud sa ila nga nagawahig sa matarong bilang isa ka butang nga wala’y pulos kag nagapasipala batok sa sinang maayo, kag nagasiling nga indi ini importante! Kay magaabot ang adlaw nga ang Ginuong Dios madasig nga magabisita sang mga pumuluyo sang duta; kag sa sina nga adlaw nga lubos na sila nga luto sa kalainan madula sila.

17 Apang tan-awa, kon ang mga pumuluyo sang duta magahinulsol sang ila kalainan kag mga kangil-aran indi sila paglaglagon, siling sang Ginuo sang mga Kasoldadohan.

18 Apang tan-awa, inang dako kag makangilil-ad nga simbahan, ang makihilawason sang bug-os nga duta, pat-od gid nga marumpag sa duta, kag pat-od gid nga dako ang pagkarumpag sini.

19 Kay ang ginharian sang yawa pat-od gid nga mauyog, kag sila nga may kaangtanan sa sini kinahanglan gid nga mapukaw sa paghinulsol, ukon gapuson sila sang yawa paagi sa iya wala’y katubtuban nga mga kadena, kag masugyot sila sa kaakig, kag madula;

20 Kay tan-awa, sa sina nga adlaw magaibwal sia sa mga tagipusuon sang mga anak sang katawhan, kag magasugyot sa ila sa pagkaakig batok sa sinang maayo.

21 Kag ang iban pakalmahon niya, kag ili-ilihon sa dutan-on nga kasigurohan, sa bagay nga magasiling sila: Maayo ang tanan sa Sion; huo, nagauswag ang Sion, maayo ang tanan—kag gani ginadaya sang yawa ang ila mga kalag, kag ginadala sila sing mainandamon paidalom sa impiyerno.

22 Kag tan-awa, ang iban iya intuon, kag hambalan sila nga wala sing impiyerno; kag magasiling sia sa ila: Indi ako yawa, kay wala sang yawa—kag gani magahutik sia sa ila mga dulunggan tubtob nga magapos niya sila paagi sa iya makahaladlok nga mga kadena, nga halin sa sini wala sing kaluwasan.

23 Huo, gingapos sila sang kamatayon, kag impiyerno; kag kamatayon, kag impiyerno, kag sang yawa, kag ang tanan sadtong mga nadaug sang mga ini pat-od gid nga magatindog sa atubang sang trono sang Dios, kag pagahukman suno sa ila mga binuhatan, nga halin sa sini pat-od gid nga magakadto sila sa lugar nga ginhanda para sa ila, bisan sa isa ka linaw nga kalayo kag asupre, nga amo ang nagapadayon nga pagpaantos.

24 Gani, kalisud sa iya nga nagapatawhay sa Sion!

25 Kalisud sa iya nga magasinggit: Maayo ang tanan!

26 Huo, kalisud sa iya nga nagapamati sa mga pagsulundan sang tawo, kag nagapanghiwala sang gahum sang Dios, kag sang dulot sang Balaan nga Espiritu!

27 Huo, kalisud sa iya nga nagasiling: Nakabaton na kami, kag wala na kami nagakinahanglan sing dugang pa!

28 Kag sa malip-ot nga pulong, kalisud sa tanan sinang mga nagakurog, kag nagakaakig tungod sang kamatuoran sang Dios! Kay tan-awa, sia nga napasad sa bato nagabaton sini sing malipayon; kag sia nga napasad sa balason nga pundasyon nagakurog kay basi malaglag sia.

29 Kalisud sa iya nga magasiling: Nakabaton na kami sang pulong sang Dios, kag wala na kami nagakinahanglan sang pulong sang Dios kay tuman na ang amon nabal-an!

30 Kay tan-awa, amo ini ang ginasiling sang Ginuong Dios: Magahatag ako sa mga anak sang katawhan sing dinalan sa dinalan, pagsulundan sa pagsulundan, diutay diri kag diutay didto; kag bulahan inang mga nagapamati sa akon mga pagsulundan, kag nagatamod sang akon laygay, kay makatuon sila sing kaalam; kay sa iya nga magabaton magahatag ako sing dugang; kag halin sa ila nga magasiling, May ara na kami sing tuman, halin sa ila pagakuhaon bisan inang yara sa ila.

31 Ginasumpa sia nga nagabutang sang iya pagsalig sa tawo, ukon nagahimo sang unod nga iya butkon, ukon magapamati sa mga pagsulundan sang mga tawo, luwas lang nga ang ila mga pagsulundan igahatag sang gahum sang Balaan nga Espiritu.

32 Kalisud sa mga Gentil, siling sang Ginuong Dios sang mga Kasoldadohan! Kay bisan pa nga iuntay ko sing dalayon ang akon butkon sa ila adlaw-adlaw, ipanghiwala nila ako; bisan pa amo sini, mangin maluluy-on ako sa ila, siling sang Ginuong Dios, kon maghinulsol sila kag magkari sa akon; kay ang akon butkon nauntay sa bilog nga adlaw, siling sang Ginuong Dios sang mga Kasoldadohan.