1 Kag karon tan-awa, pinalangga kong mga kauturan, luyag ko nga maghambal sa inyo; kay ako, si Nefi, indi magtugot nga hunahunaon ninyo nga mas matarong kamo sangsa mga Gentil. Kay tan-awa, luwas lang nga magtuman kamo sang mga kasugoan sang Dios tanan kamo madula man; kag tungod sang mga pulong nga nahambal na indi kinahanglan nga hunahunaon ninyo nga lubos nga malaglag ang mga Gentil.

2 Kay tan-awa, ginasiling ko sa inyo nga kon ano kadamo sang mga Gentil nga maghinulsol mangin mga katawhan sang Ginuo sa kasugtanan; kag kon ano kadamo sang mga Judio ang indi maghinulsol pagasikwayon; kay ang Ginuo indi magpakighisugot sa bisan sin-o luwas lang kon ini upod sa ila nga nagahinulsol kag nagapati sa iya Anak, nga amo ang Balaan sang Israel.

3 Kag karon, luyag ko nga magpropesiya sing dugang pa parte sa mga Judio kag sa mga Gentil. Kay pagkatapos nga maggwa ang libro nga akon ginahambal, kag masulat sa mga Gentil, kag matakpan liwat sang Ginuo, mangin madamo ang magapati sa mga pulong nga nasulat; kag ipalapnag nila ang mga ini sa nagkalabilin sang aton kaliwatan.

4 Kag dayon mahibal-an sang nagkalabilin sang aton kaliwatan ang parte sa aton, kon paano kita naggwa halin sa Jerusalem, kag nga mga kaliwat sila sang mga Judio.

5 Kag ang ebanghelyo ni Jesucristo igapahayag sa tunga nila; gani, igapanumbalik sila sa ihibalo parte sa ila mga amay, kag amo man sa ihibalo parte kay Jesucristo, nga naagom na sadto sa tunga sang ila mga amay.

6 Kag dayon magakasadya sila; kay mahibal-an nila nga isa ini ka bugay sa ila halin sa kamot sang Dios; kag ang ila mga himbis sang kadulom magasugod sa pagkalataktak halin sa ila mga mata; kag indi pa magtaliwan ang madamo nga henerasyon sa tunga nila, luwas lang nga sila mangin isa ka putli kag isa ka makalilipay nga katawhan.

7 Kag matabo ini nga ang mga Judio nga nagalinapta magasugod man sa pagpati kay Cristo; kag magasugod sila sa pagtililipon sa ibabaw sang duta; kag ang tanan nga magpati kay Cristo mangin isa man ka makalilipay nga katawhan.

8 Kag matabo ini nga ang Ginuong Dios magasugod sang iya buluhaton sa tunga sang tanan nga nasyon, kaliwat, lengguahe, kag katawhan, sa pagpahanabo sang pagpanumbalik sang iya katawhan sa duta.

9 Kag sa pagkamatarong ang Ginuong Dios magahukom sang mga imol, kag magasaway sing makatarongan para sa kaayohan sang mga malulo sang duta. Kag sakiton niya ang duta sa baston sang iya baba; kag sa ginhawa sang iya mga bibig patyon niya ang mga malain.

10 Kay ang tion madali nga magaabot nga ang Ginuong Dios magahimo sing isa ka dako nga pagbinahin-bahin sa tunga sang katawhan, kag ang mga malain pagalaglagon niya; kag luwason niya ang iya katawhan, huo, bisan pa man kon kinahanglan niya nga laglagon ang mga malain paagi sa kalayo.

11 Kag ang pagkamatarong mangin wagkos sang iya mga balikawang, kag ang pagkatampad mangin wagkos sang iya mga hawak.

12 Kag dayon ang lobo magapuyo upod sa carnero; kag ang leopardo magahigda upod sa tinday nga kanding, kag ang tinday nga baka, kag ang bataon nga leon, kag ang pinatambok, magkaupod; kag isa ka diutay nga bata ang magatuytuy sa ila.

13 Kag ang baka kag ang oso magahalab; ang ila mga tinday magahigda nga magkaupod; kag ang leon magakaon sing dagami pareho sang baka.

14 Kag ang bata nga nagasuso magahampang sa ibabaw sang buho sang man-og nga dalitan, kag ang bata nga linutas magasulod sang iya kamot sa palanagoan sang dalitan nga man-og.

15 Indi sila maghalit ukon maglaglag sa bug-os ko nga bukid nga balaan; kay ang duta mapuno sang ihibalo parte sa Ginuo pareho nga ang mga tubig nagatabon sang dagat.

16 Gani, ang mga butang sang tanan nga nasyon igapahayag; huo, ang tanan nga butang igapahayag sa mga anak sang katawhan.

17 Wala sing butang nga sekreto kundi nga ini igapahayag; wala sing buluhaton sang kadulom kundi nga ini igapakita sa kasanag; kag wala sing butang nga maselyo sa duta kundi nga ini pagahubaron.

18 Gani, ang tanan nga butang nga ginpahayag sa mga anak sang katawhan igapahayag sa sina nga adlaw; kag si Satanas mangin wala na sing gahum sa mga tagipusuon sang mga anak sang katawhan sa sulod sang malawig nga tion. Kag karon, pinalangga kong mga kauturan, ginatapos ko ang akon mga ginapanghambal.