1 Kag karon ako, si Nefi, indi makasulat sang tanan nga butang nga ginpanudlo sa tunga sang akon katawhan; kag indi man ako sagad sa pagsulat, kag amo man sa paghambal; kay kon ang isa ka tawo nagahambal paagi sa gahum sang Balaan nga Espiritu ang gahum sang Balaan nga Espiritu nagadala sini sa mga tagipusuon sang mga anak sang katawhan.

2 Apang tan-awa, may madamo nga nagapatig-a sang ila mga tagipusuon batok sa Balaan nga Espiritu, sa bagay nga wala ini sing lugar sa ila; gani, ginasikway nila ang madamo nga butang nga nasulat kag ginakabig ang mga ini bilang mga butang nga wala sing pulos.

3 Apang ako, si Nefi, nagsulat sang akon ginsulat, kag ginakabig ko ini nga may dako nga importansya, kag ilabi na gid sa akon katawhan. Kay dalayon ako nga nagapangamuyo para sa ila sa adlaw, kag ginabasa sang luha sang akon mga mata ang akon ulunan sa gab-i tungod sa ila; kag nagapakitluoy ako sa akon Dios nga may pagtuo, kag nahibal-an ko nga pamatian niya ang akon pagpakitluoy.

4 Kag nahibal-an ko nga ang Ginuong Dios magakonsagrar sang akon mga pangamuyo para sa kaayohan sang akon katawhan. Kag ang mga pulong nga akon ginsulat sa kahuyang pagahimuon nga mabaskog sa ila; kay ini nagakumbinsi sa ila sa paghimo sang maayo; ini nagapahayag sa ila parte sa ila mga amay; kag ini nagahambal parte kay Jesus, kag nagakumbinsi sa ila sa pagpati sa iya, kag sa pagpadayon tubtob sa katapusan, nga amo ang kabuhi nga wala’y katapusan.

5 Kag ini nagahambal sing masakit batok sa sala, suno sa kaprangka sang kamatuoran; gani, wala sing tawo nga maakig sa mga pulong nga akon ginsulat luwas lang nga mangin iya sia sang espiritu sang yawa.

6 Nagakasadya ako sa kaathagan; nagakasadya ako sa kamatuoran; nagakasadya ako sa akon Jesus, kay gintubos niya ang akon kalag halin sa impiyerno.

7 May putli ako nga paghigugma para sa akon katawhan, kag dako nga pagtuo kay Cristo nga masugata ko ang madamo nga kalag nga wala’y mantsa sa iya hukom-lingkuranan.

8 May putli ako nga paghigugma sa mga Judio—nagasiling ako nga Judio bangod ang buot ko silingon amo sila nga diin ako naghalin.

9 May putli man ako nga paghigugma sa mga Gentil. Apang tan-awa, wala sa mga ini ang malauman ko luwas lang nga magapakig-uli sila kay Cristo, kag magsulod sa makitid nga ganhaan, kag maglakat sa mapiot nga banas nga nagapadulong sa kabuhi, kag magapadayon sa banas tubtob sa katapusan nga adlaw sang pagtilaw.

10 Kag karon, pinalangga kong mga kauturan, kag amo man mga Judio, kag tanan kamo nga yara sa mga punta sang kalibutan, pamatii ining mga pulong kag magpati kay Cristo; kag kon indi kamo magpati sa sining mga pulong magpati kamo kay Cristo. Kag kon magpati kamo kay Cristo magapati kamo sa sining mga pulong, kay ang mga ini mga pulong ni Cristo, kag ginhatag niya ang mga ini sa akon; kag nagatudlo ang mga ini sa tanan nga tawo nga dapat sila maghimo sang maayo.

11 Kag kon ang mga ini indi mga pulong ni Cristo, kamo ang maghukom—kay ipakita sa inyo ni Cristo, nga may gahum kag dako nga himaya, nga iya ini mga pulong, sa katapusan nga adlaw; kag kamo kag ako magatindog sing atubangay sa atubang sang iya hukmanan; kag inyo mahibal-an nga ako ginsugo niya sa pagsulat sining mga butang, sa pihak sang akon kahuyang.

12 Kag nagapangamuyo ako sa Amay sa ngalan ni Cristo nga madamo sa aton, kon indi tanan, ang mahimo nga maluwas sa iya ginharian sa sinang dako kag katapusan nga adlaw.

13 Kag karon, pinalangga kong mga kauturan, ang tanan sinang iya sang panimalay ni Israel, kag tanan kamo nga yara sa mga punta sang kalibutan, nagahambal ako sa inyo bilang tingug sing isa nga nagasinggit halin sa yab-ok: Paalam tubtob nga mag-abot inang dako nga adlaw.

14 Kag kamo nga indi mag-ambit sang kaayo sang Dios, kag magatahod sang mga pulong sang mga Judio, kag amo man sang akon mga pulong, kag sang mga pulong nga magagwa sa baba sang Kordero sang Dios, tan-awa, nagapaalam ako sa inyo sing isa ka wala’y katubtuban nga pagpaalam, kay ining mga pulong magakondenar sa inyo sa katapusan nga adlaw.

15 Kay kon ano ang akon gintakpan sa duta, pagadal-on batok sa inyo sa hukmanan; kay amo ini ang ginsugo sa akon sang Ginuo, kag dapat gid nga tumanon ko. Amen.