1 Tan-awa, natabo ini nga ako, si Nefi, nagpakitluoy gid sa Ginuo nga akon Dios tungod sang kaakig sang akon mga kauturan.

2 Apang tan-awa, ang ila kaakig nagdugang batok sa akon, sa bagay nga nagtinguha sila sa pagpatay sa akon.

3 Huo, nagkumod sila batok sa akon nga nagasiling: Ang aton manghod nagahunahuna sa pagdumala sa aton; kag madamo kita sing naagom nga mga pagtilaw tungod sa iya; gani, karon patyon naton sia agud nga indi na kita masakitan pa tungod sang iya mga pulong. Kay tan-awa, wala kita sing tuyo nga sia ang aton mangin tagdumala; kay para ini sa aton, bilang mga magulang, ang magdumala sini nga katawhan.

4 Karon wala ko ginasulat sa sining mga lamina ang tanan nga pulong nga ginkumod nila batok sa akon. Apang tama na sa akon ang pagsiling nga nagtinguha sila sa pagpatay sa akon.

5 Kag natabo ini nga ang Ginuo nagpaandam sa akon, nga ako, si Nefi, dapat magpalayo sa ila kag magpalagyo sa kamingawan, kag ang tanan sinang mga maluyag mag-upod sa akon.

6 Gani, natabo ini nga ako, si Nefi, nagdala sang akon panimalay, kag amo man kay Zoram kag ang iya panimalay, kag kay Sam, ang akon magulang nga lalaki kag ang iya panimalay, kag kanday Jacob kag Jose nga akon mga manghod nga mga lalaki, kag amo man ang akon mga utod nga babayi, kag ang tanan sinang mga maluyag mag-upod sa akon. Kag ang tanan sinang mga maluyag mag-upod sa akon amo yadtong mga nagapati sa mga paandam kag mga rebelasyon sang Dios; gani, nagpamati sila sa akon mga pulong.

7 Kag dinala namon ang amon mga tolda kag kon ano nga mga butang nga amon masarangan, kag nagpanglakaton sa kamingawan sa sulod sang madamo nga inadlaw. Kag pagkatapos nga nakapanglakaton kami sa sulod sang madamo nga inadlaw nagpatindog kami sang amon mga tolda.

8 Kag luyag sang akon katawhan nga tawagon namon ang ngalan sang lugar nga Nefi; gani gintawag namon ini nga Nefi.

9 Kag ang tanan sinang mga nag-upod sa akon nagkasugot sa ila kaugalingon nga tawagon sila nga katawhan ni Nefi.

10 Kag ginbantayan namon ang pagtuman sang mga paghukom, kag sang mga pagsulundan, kag sang mga kasugoan sang Ginuo sa tanan nga butang suno sa layi ni Moises.

11 Kag ang Ginuo yara sa amon; kag nag-uswag kami sing tuman; kay nagsab-og kami sang binhi, kag nag-ani kami liwat sa kabuganaan. Kag nagsugod kami sa pagsagod sang mga panong, kag mga baka, kag mga kasapatan sang tagsa ka sahi.

12 Kag ako, si Nefi, nagdala man sang mga kasulatan nga nakurit sa mga lamina nga saway; kag amo man sang bola, ukon kompas, nga ginhanda para sa akon amay sang kamot sang Ginuo suno sa sinang nasulat.

13 Kag natabo ini nga nagsugod kami sa pag-uswag sing tuman, kag sa pagdamo sa duta.

14 Kag ako, si Nefi, nagdala sang espada ni Laban, kag kaanggid sa sini naghimo sang madamo nga espada, kay basi sa ano man nga paagi ang mga tawo nga karon ginatawag na nga mga Lamanhon magasalakay sa amon kag pamatyon kami; kay nahibal-an ko ang ila pagdumot sa akon kag sa mga anak ko kag sa ila nga ginatawag nga akon katawhan.

15 Kag gintudloan ko ang akon katawhan sa pagpatindog sang mga bilding, kag sa pagpamanday sang tanan nga sari sang kahoy, kag sang salsalon, kag sang tumbaga, kag sang saway, kag sang asero, kag sang bulawan, kag sang pilak, kag sang malahalon nga mga milinahon nga tuman kabugana.

16 Kag ako, si Nefi, nagpatindog sing isa ka templo; kag ginpasad ko ini suno sa pagkahimo sang templo ni Solomon luwas lamang nga wala ini nahimo sa madamo nga malahalon nga mga butang; kay indi masalapoan ang mga ini sa duta, kag sa sini nga kabangdanan, indi ini mahimo pareho sang templo ni Solomon. Apang ang paagi sa pagpasad pareho sang templo ni Solomon; kag ang pagkahimo sini tuman kapulido.

17 Kag natabo ini nga ako, si Nefi, nagpahanabo nga ang akon katawhan mangin mapisan, kag magpangabudlay paagi sa ila mga kamot.

18 Kag natabo ini nga luyag nila nga ako ang ila mangin hari. Apang ako, si Nefi, maluyag nga wala sila sing hari; bisan pa, ginhimo ko sa ila ang suno sa akon masarangan.

19 Kag tan-awa, ang mga pulong sang Ginuo natuman sa akon mga kauturan, nga iya ginhambal parte sa ila, nga ako amo ang ila mangin tagdumala kag ila manunudlo. Gani, ako ang ila nangin tagdumala kag ila manunudlo suno sa mga kasugoan sang Ginuo, tubtob sa tion nga gintinguhaan nila nga patyon ako.

20 Gani, ang pulong sang Ginuo natuman nga iya ginhambal sa akon nga nagasiling nga: Kon indi sila magpamati sa imo mga pulong pagasikwayon sila halin sa presensya sang Ginuo. Kag tan-awa, ginsikway sila halin sa iya presensya.

21 Kag ginpahanabo niya ang sumpa nga magtupa sa ila, huo, bisan isa ka masakit nga sumpa tungod sang ila kalainan. Kay tan-awa, ginpatig-a nila ang ila mga tagipusuon batok sa iya, sa bagay nga nangin pareho sila sing isa ka bato nga pangbag-id; gani, tungod kay mga maputi sila, kag tuman katahum kag makaluluyag, agud nga indi mangin makabibihag sa akon katawhan gintuga sang Ginuong Dios nga mag-itom ang ila mga panit.

22 Kag amo sini ang ginasiling sang Ginuong Dios: Ipahanabo ko nga mangin makangilil-ad sila sa imo katawhan, luwas lang kon maghinulsol sila sang ila mga kalainan.

23 Kag isumpa ang kaliwatan niya nga magasimbog sa ila kaliwatan; kay pagasumpaon sila bisan sang amo man nga sumpa. Kag ang Ginuo naghambal sini, kag ini nahimo.

24 Kag tungod sang ila sumpa nga yara sa ila nangin isa sila ka matamad nga katawhan, nga puno sang katontohan kag katusohan, kag nangita sa kamingawan sang mga sapat nga madakop.

25 Kag ang Ginuong Dios nagsiling sa akon: Mangin silot sila sa imo kaliwatan, sa pagpukaw sa ila sa pagdumdum sa akon; kag kon indi sila magdumdum sa akon, kag magpamati sa akon mga pulong, mangin silot sila sa ila bisan tubtob sa pagkalaglag.

26 Kag natabo ini nga ako, si Nefi, nagkonsagrar kanday Jacob kag Jose agud mangin mga pari kag mga manunudlo sila sa bug-os nga duta sang akon katawhan.

27 Kag natabo ini nga nagpuyo kami suno sa paagi sang kalipayan.

28 Kag treinta ka tuig ang naglabay halin sa tion nga nagbiya kami sa Jerusalem.

29 Kag ako, si Nefi, ang nag-amlig sang mga kasulatan sa akon mga lamina, nga akon ginhimo, parte sa akon katawhan tubtob sa sini nga tion.

30 Kag natabo ini nga ang Ginuong Dios nagsiling sa akon: Maghimo ka sang iban pa nga mga lamina; kag ikurit mo ang madamo nga butang sa mga ini nga maayo sa akon panulok, para sa kapuslanan sang imo katawhan.

31 Gani, ako, si Nefi, agud mangin matinumanon sa mga kasugoan sang Ginuo, naglakat kag naghimo sining mga lamina nga sa diin ginkurit ko ining mga butang.

32 Kag ginkurit ko inang makapahamuot sa Dios. Kag kon ang akon katawhan nahamuot sa mga butang sang Dios mahamuot sila sa sining akon mga kinurit nga yara sa sining mga lamina.

33 Kag kon luyag nga mahibal-an sang akon katawhan ang mas detalyado nga bahin sang kasaysayan sang akon katawhan kinahanglan gid nga magpangusisa sila sa akon iban pa nga mga lamina.

34 Kag tama na sa akon ang magsiling nga kwarenta na ka tuig ang naglabay, kag may mga giyera kag mga pagbinaisay na kami sa amon mga kauturan.