1 Ang mga pulong ni Jacob, ang utod ni Nefi, nga iya ginhambal sa katawhan ni Nefi:

2 Tan-awa, pinalangga kong mga kauturan, ako, si Jacob, nga gintawag sang Dios, kag gin-ordinan suno sa iya balaan nga paagi, kag bangod ginkonsagrar sang akon utod nga si Nefi, nga kay sin-o kamo nagatulok bilang isa ka hari ukon isa ka manug-amlig, kag kay sin-o kamo nagasandig para sa kasigurohan, tan-awa nahibal-an ninyo nga nakahambal ako sa inyo sing tuman kadamo nga butang.

3 Apang, nagahambal ako liwat sa inyo; kay nagakabalaka ako para sa kaayohan sang inyo mga kalag. Huo, dako ang akon kabalaka para sa inyo; kag kamo mismo nakahibalo nga dalayon gid nga amo sini halin sang una. Kay ginlaygayan ko na kamo sa bug-os nga katutum; kag gintudloan ko na kamo sang mga pulong sang akon amay; kag naghambal ako sa inyo parte sa tanan nga butang nga nasulat halin pa sa pagtuga sang kalibutan.

4 Kag karon, tan-awa, magahambal ako sa inyo parte sa mga butang nga nagakalatabo, kag magaabot pa; gani, basahon ko sa inyo ang mga pulong ni Isaias. Kag amo ini ang mga pulong nga luyag sang akon utod nga ihambal ko sa inyo. Kag nagahambal ako sa inyo para sa inyo kaayohan agud nga matun-an ninyo kag himayaon ang ngalan sang inyo Dios.

5 Kag karon, ang mga pulong nga akon basahon amo yadtong mga pulong nga ginhambal ni Isaias parte sa bug-os nga panimalay ni Israel; gani, mahimo nga madapat ang mga ini sa inyo kay iya kamo sang panimalay ni Israel. Kag may madamo nga butang nga ginhambal ni Isaias nga mahimo nga madapat sa inyo bangod iya kamo sang panimalay ni Israel.

6 Kag karon, amo ini ang mga pulong: Amo ini ang ginasiling sang Ginuong Dios: Tan-awa, ibayaw ko ang akon kamot sa mga Gentil, kag patindugon ko ang akon bandera sa katawhan; kag kuguson nila ang imo mga anak nga lalaki sa ila mga butkon, kag ang imo mga anak nga babayi pagapas-anon sa ila mga abaga.

7 Kag ang mga hari mangin imo manug-atipan nga mga amay, kag ang ila mga reyna mangin imo manug-atipan nga mga iloy; magaduko sila sa imo nga ang ila mga nawong ayon sa duta, kag magadilap sang yab-ok sang imo mga tiil; kag imo mahibal-an nga ako amo ang Ginuo; kay indi sila mahuy-an nga nagahulat sa akon.

8 Kag karon, ako, si Jacob, medyo magahambal parte sining mga pulong. Kay tan-awa, ang Ginuo nagpakita sa akon nga yadtong mga yara sa Jerusalem, nga sa diin kita naghalin, nagkalamatay na kag ginpangdala nga bihag.

9 Apang, ang Ginuo nagpakita sa akon nga magabalik sila liwat. Kag ginpakita man niya sa akon nga ang Ginuong Dios, ang Balaan sang Israel, magapakita sang iya kaugalingon sa ila sa unod; kag pagkatapos nga magapakita sia sang iya kaugalingon pagabunalon nila sia kag ilansang nila sia sa krus suno sa mga pulong sang anghel nga naghambal sini sa akon.

10 Kag pagkatapos nga ginpatig-a nila ang ila mga tagipusuon kag nangin batinggilan batok sa Balaan sang Israel, tan-awa, ang mga paghukom sang Balaan sang Israel magatupa sa ila. Kag magaabot ang adlaw nga sakiton sila kag paantuson.

11 Gani, pagkatapos nga mapanabog sila diri kag didto, kay amo ini ang ginasiling sang anghel, madamo ang paantuson sa unod, kag indi pagtugotan nga magkalamatay tungod sang mga pangamuyo sang mga matutum; palaptahon sila, kag sakiton, kag dumtan; bisan pa amo sini, ang Ginuo mangin maluluy-on sa ila, sa bagay nga kon magdangat sila sa ihibalo parte sa ila Manunubos, pagatiponon sila liwat sa mga duta nga ila palanublion.

12 Kag bulahan ang mga Gentil, nga parte sa ila ang propeta nagsulat; kay tan-awa, kon lamang nga maghinulsol sila kag indi magpakig-away sa Sion, kag indi magbuylog sa sinang dako kag makangilil-ad nga simbahan, maluwas sila; kay ang Ginuong Dios magatuman sang iya mga kasugtanan nga ginhimo niya sa iya mga anak; kag sa amo nga kabangdanan ang propeta nagsulat sining mga butang.

13 Gani, sila nga magapakig-away batok sa Sion kag sa katawhan sang Ginuo sa kasugtanan magadilap sang yab-ok sang ila mga tiil; kag ang katawhan sang Ginuo indi mahuy-an. Kay ang katawhan sang Ginuo amo sila nga nagahulat sa iya; kay nagahulat sila gihapon sa pagkari sang Mesias.

14 Kag tan-awa, suno sa mga pulong sang propeta, ang Mesias magakari liwat sa ika-duha nga tion sa pagbawi sa ila; gani, ipakita niya ang iya kaugalingon sa ila sa gahum kag dako nga himaya padulong sa kalaglagan sang ila mga kaaway kon mag-abot inang adlaw nga magapati sila sa iya; kag wala sia sing pagalaglagon nga nagapati sa iya.

15 Kag sila nga indi magpati sa iya pagalaglagon, paagi sa kalayo, kag paagi sa unos, kag paagi sa mga linog, kag paagi sa mga pagpaagay sang dugo, kag paagi sa peste, kag paagi sa tiggulutom. Kag mahibal-an nila nga ang Ginuo amo ang Dios, ang Balaan sang Israel.

16 Kay ang inagaw bala pagakuhaon sa gamhanan, ukon ang makatarongan nga binihag pagaluwason?

17 Apang amo ini ang ginasiling sang Ginuo: Bisan ang mga bihag sang gamhanan pagakuhaon, kag ang inagaw sang makakululba pagaluwason; kay ang Dios nga Makagagahum magaluwas sang iya katawhan sang kasugtanan. Kay amo ini ang ginasiling sang Ginuo: Makigbais ako sa ila nga nagapakigbais sa imo—

18 Kag pakaunon ko sila nga nagapangpigos sa imo sang ila kaugalingon nga unod; kag mahubog sila sang ila kaugalingon nga dugo pareho sang matam-is nga alak; kag ang tanan nga unod makahibalo nga ako, ang Ginuo, amo ang imo Manluluwas kag imo Manunubos, ang Gamhanan ni Jacob.