1 Na nau lukim, em i kamap we olgeta pipol long graun ol i bin harim na witnesim ol dispela toktok. Na nogat wanpela nois i bin kamap long graun long planti aua bihain long ol dispela toktok.

2 Long wanem, ol pipol i bin kirap nogut tru stret, inap long ol i bin lusim krai na bikmaus long krai bikos long idai long wan lain bilong ol em ol i bin kilim, olsem na nogat wanpela nois bin kamap long olgeta graun long planti aua.

3 Na em i kamap we wanpela nek i bin kam gen long ol pipol, na olgeta pipol ol i bin harim na witnes long em, olsem:

4 O yupela ol pipol bilong ol dispela bikpela siti tru i bin pundaun, em i ol tumbuna pikinini bilong Jekop, em ol long haus bilong Israel, hamas taim mi bin bungim yupela wankain olsem wanpela kakaruk meri save bungim ol pikinini kakaruk bilong em aninit long ol wing bilong em, na lukautim yupela.

5 Na gen, hamas taim mi bin bungim yupela wankain olsem wanpela kakaruk meri save bungim ol pikinini kakaruk bilong em aninit long ol wing bilong em, ye, O yupela ol pipol long haus bilong Israel, yupela i bin pundaun, ye, O yupela ol pipol long haus bilong Israel, yupela ol i stap long Jerusalem, wantaim yupela ol i bin pundaun, ye, hamas taim mi bin bungim yupela wankain olsem wanpela kakaruk meri save bungim ol pikinini kakaruk bilong em, na yupela bai no inap larim mi bungim yupela.

6 O yupela haus bilong Israel em mi larim yupela long i stap laip, hamas taim mi bin bungim yupela wankain olsem wanpela kakaruk meri i save bungim ol pikinini kakaruk bilong em aninit long wing bilong em, sapos yupela bai tanim bel na kam bek long mi wantaim olgeta bel.

7 Tasol sapos nogat, O haus bilong Israel, ol ples bilong yupela long i stap bai bagarap i go inap long taim promis mi bin wokim long ol tumbuna papa bilong yupela bai kamap tru.

8 Na nau em i kamap we bihain long ol pipol i bin harim ol dispela toktok, lukim, ol i stat long krai na bikmaus long krai gen bikos ol i bin lusim wan lain na ol pren bilong ol.

9 Na em i kamap we tripela de i pinis olsem. Na monin i kam, na tudak i bin lus long pes bilong graun, na graun i no moa guria, na ol ston i no moa bruk, na nois nogut tru bilong pen wantaim olgeta nois bilong guria i pinis.

10 Na graun bin kamap strong gen, olsem em i no moa guria, na sore, krai wantaim bikmaus long krai bilong ol pipol ol i no idai i pinis, na sore bilong ol i bin senisim i go long amamas, na krai bilong ol i bin tanim i go long amamasim na tok tenkyu long Bikpela Jisas Krais, Ridima bilong ol.

11 Na ol skripsa ol profet i bin autim i kamap tru olsem.

12 Na em ol lain ol i moa stretpela ol i bin seiv, na em ol lain ol i bin kisim ol profet na i no paitim ol wantaim ston, na ol lain ol i no kapsaitim blut bilong ol seint, ol i bin larim ol long i stap laip—

13 Na ol i bin larim ol long i stap laip na ol i no bin planim ol aninit long graun, na ol i no bin dring wara na idai aninit long sol wara, na paia i no bin kukim ol, na nogat samting i bin pundaun antap long ol na kurungutim ol na kilim ol i idai, na ol raun win i no karim ol i go long we na smok wantaim smok bilong tudak i no winim ol.

14 Na nau, husat man i ritim, larim em long kisim save, man em i gat ol skripsa, larim em long painim ol, na lukim na kisim save sapos olgeta long ol dispela ol i bin idai na kisim bagarap wantaim paia, smok, win, raun win na graun bin op long daunim ol, na olgeta long ol dispela samting i no kamap tru ol profesi bilong planti holi profet.

15 Lukim, Mi tokim yupela, ye, planti ol i bin tokaut long ol dispela samting long taim Krais bai kam, na ol i bin kilim ol bikos ol i bin tokaut long ol dispela samting.

16 Ye, profet Jinos i bin tokaut long ol dispela samting, na tu Jinok i bin tokaut long ol dispela samting, long wanem, ol i bin tokaut long mipela stret, em i wanwan tumbuna pikinini bilong ol.

17 Lukim, tumbuna papa bilong mipela Jekop tu i bin tokaut long wanwan tumbuna pikinini bilong Josep. Na lukim, Yumi i no wanwan tumbuna pikinini bilong Josep? Na ol dispela samting i toktok long mipela, i no bin raitim long ol bros plet tumbuna papa bilong mipela Lihai i bin bringim kam long Jerusalem?

18 Na em i kamap we long arere long tripela ten foa krismas, lukim, mi bai soim long yupela olsem Bikpela i bin lavim nogut tru ol pipol bilong Nifai wantaim ol lain ol i bin kolim ol ol lain bilong Leman ol i bin larim ol i stap laip, na bikpela blesim tru i bin kapsaitim long het bilong ol, na Krais i bin soim em yet long ol hariap tru bihain long em i bin go antap long heven—

19 Na soim bodi bilong em long ol, na minista long ol, na stori long ministri bilong em em bai givim bihain long dispela rekot. Olsem na, nau mi pinisim ol toktok bilong mi.