1 Na em i kamap we nainpela ten faiv krismas tu i pinis olsem, na ol pipol i stat long lus tingting long dispela ol mak na mirakel ol i bin harim, na i stat lus isi isi long pasin kirap nogut bilong ol long wanpela mak o mirakel long heven, na bel bilong ol i stat long kamap strong, na het bilong ol i pas, na ol i stat long kamap olsem ol i no bilip long olgeta samting ol i bin harim na lukim—

2 Na ol i bin ting olsem sampela samting nating long bel bilong ol olsem, ol man ol i bin wokim ol samting wantaim pawa bilong tewel, long giamanim na paulim bel bilong ol pipol, olsem na Satan i bin winim bel bilong ol pipol gen, na em i bin pasim ai bilong ol na paulim ol long bilip olsem doktrin bilong Krais i giaman na samting nating.

3 Na em i kamap we ol pipol i stat long kamap strong long wokim pasin nogut na pasin les nogut tru, na ol i no bilip olsem sampela moa mak o kirap nogut samting bai kamap, na Satan i bin go raunabaut, paulim bel bilong ol planti pipol, traim ol na mekim ol long wokim pasin nogut tru insait long graun.

4 Na em i kamap we nainpela ten sikis krismas i pinis olsem, na tu wankain long nainpela ten seven krismas, nainpela ten eit krismas na nainpela ten nain krismas,

5 Na tu wan handret krismas i pinis olsem long taim Mosaia i bin kamap king long ol pipol long ol lain bilong Nifai i kam long nau taim.

6 Na sikis handret nain krismas i pinis long taim Lihai i bin lusim Jerusalem i kam long nau taim.

7 Na nainpela krismas i pinis long taim mak bin kamap, we ol profet i bin toktok, olsem Krais bai kam long graun.

8 Nau ol lain bilong Nifai i stat long kaunim taim bilong ol long taim mak i bin kamap o long taim Krais i bin kam, olsem na, nainpela krismas i go pas pinis.

9 Na Nifai, em i papa bilong Nifai, em i bin lukautim ol rekot i no bin kam bek long graun bilong Jarahemla, na ol i no bin painim em long olgeta hap long graun.

10 Na em i kamap we planti toktok na profesai i bin salim i go namel long ol pipol, tasol ol pipol i stap yet long wokim pasin nogut na tenpela krismas i pinis olsem, na tu wanpela ten wan krismas i pinis wantaim pasin nogut.

11 Na em i kamap we ol bikpela pait na tok pait i stat long kamap long olgeta hap long graun insait long wanpela ten tri krismas, long wanem, ol stil lain bilong Gadianton ol i bin kamap planti tru, na kilim planti pipol, na bagarapim planti siti, na wok long kilim planti pipol long olgeta hap long graun, olsem na em i kamap we olgeta pipol, ol lain bilong Nifai wantaim ol lain bilong Leman ol i bin kisim ol samting bilong pait long pait wantaim ol.

12 Olsem na, olgeta lain bilong Leman ol i bin tanim bel long nem bilong Bikpela ol i bin bung wantaim lain brata bilong ol, ol lain bilong Nifai, na tingting long sindaun bilong ol, ol meri bilong ol wantaim lain pikinini bilong ol bin strongim ol, long kisim ol samting bilong pait long pait wantaim ol dispela stil lain bilong Gadianton, ye, na tu long lukautim rait bilong ol, narapela gutpela samting, sios na lotu bilong ol na fridom bilong ol.

13 Na em i kamap we bipo long dispela wanpela ten tri krismas i go pas, ol lain bilong Nifai ol i bin klostu kisim bagarap olgeta bikos long dispela pait i bin kamap nogut tru.

14 Na em i kamap we dispela ol lain bilong Leman ol i bin bung wantaim ol lain bilong Nifai ol i bin kaunim ol yet wantaim ol lain bilong Nifai,

15 Na kes bilong ol i bin lusim ol, na skin bilong ol i bin kamap waitpela wankain olsem long ol lain bilong Nifai;

16 Na ol yangpela man wantaim pikinini meri bilong ol i bin kamap naispela stret, na ol i bin kaunim ol yet wantaim ol lain bilong Nifai, na ol i bin kolim ol lain bilong Nifai. Na wanpela ten tri krismas i pinis olsem.

17 Na em i kamap we pait namel long ol stil lain wantaim ol pipol bilong Nifai i go yet, na kamap nogut tru long i stat long wanpela ten foa krismas, tasol ol pipol bilong Nifai ol i bin winim liklik long ol stil lain, inap long ol i bin ronim ol stil lain long graun bilong ol i go bek long ol maunten na ples hait bilong ol.

18 Na wanpela ten foa krismas i pinis olsem. Na ol i bin kam long pait wantaim ol pipol bilong Nifai insait long wanpela ten faiv krismas, na bikos long pasin nogut long ol pipol bilong Nifai wantaim planti tok pait, na bruknabaut long ol, ol stil lain bilong Gadianton ol i bin winim ol.

19 Na wanpela ten faiv krismas i pinis olsem, na ol pipol i stap long laip bilong planti pen olsem, na naip bilong pait bilong bagarap i bin hangamap antap long ol, inap long em bin klostu katim ol, na dispela bikos long ol pasin nogut bilong ol.