1 Na nau em i kamap we bihain long Jisas i autim ol dispela toktok, em i tanim gen long ol pipol, na opim maus bilong em gen long ol, na tok: Tru tumas, tru tumas, Mi tokim yupela, noken Jasim narapela man olsem Bikpela bai jasim yupela.

2 Long wanem, sapos wanem jasmen yupela i wokim long jasim narapela, Bikpela bai jasim yupela wankain, na wanem skel yupela i yusim long skelim, Bikpela bai yusim wankain skel long jasim yupela gen.

3 Na bilong wanem yu lukim liklik pipia tru i stap long ai long brata bilong yu, tasol i no tingim long plang i stap long ai bilong yu yet?

4 O bilong wanem yu bai tokim brata bilong yu: Larim mi rausim liklik pipia tru i stap long ai bilong yu—na lukim, plang i stap long ai bilong yu yet?

5 Yu kusai man, rausim plang long ai bilong yu pastaim, na bihain yu bai lukluk gut long rausim liklik pipia tru long ai long brata bilong yu.

6 Noken givim samting i holi long ol dok, na tu tromoim ol kina long pik, nogut ol bai kurungutim antap long ol wantaim lek bilong ol, na tanim gen na brukim yu long namel.

7 Askim, na ol bai givim ol samting long yu, painim, na yu bai kisim, nok na dua bai op long yu.

8 Long wanem, wanwan man em i askim, i kisim, na man em i painim, i kisim, na long man em i nok, dua bai opim long em.

9 O yu bai kamap wanem kain man, husat, sapos pikinini man bilong yu i askim long bret, bai yu givim wanpela ston long em?

10 O sapos em i askim long pis, inap em bai givim wanpela snek long em?

11 Olsem, sapos yupela ol pasin nogut lain save givim ol gutpela presen long lain pikinini bilong yupela, hamas moa bai Papa bilong yupela i stap long heven bai givim ol gutpela samting long ol lain ol i askim long em?

12 Olsem na, wanem olgeta samting yu laikim ol man long wokim long yu, yu mas wokim wankain long ol, long wanem, ol toktok bilong lo na ol profet em i dispela.

13 Go insait long stretpela dua, bikos dua i bikpela, na rot i bikpela tru, na em i lid i go long ples bagarap, na planti pipol save go insait long em,

14 Tasol dua i stretpela, na liklik rot tru, na em i save lid i go long laip, na liklik namba long ol pipol save go insait long dispela rot.

15 Lukaut long ol giaman profet, ol i pasim skin bilong sipsip long kam long yupela, tasol insait long ol em ol olsem wail dok na nogut tru.

16 Yupela bai save long ol long prut ol i karim. Inap ol man ken bungim ol pikinini bilong rop wain long ol rop i gat nil long bus, o prut bilong diwai fik long ol sayor i gat mosong?

17 Wankain olsem, wanwan gutpela diwai save karim gutpela prut, na diwai nogut save karim prut nogut.

18 Wanpela gutpela diwai i no inap karim prut nogut, na tu wanpela diwai nogut i no inap karim gutpela prut.

19 Wanwan diwai i no karim gutpela prut i mas katim i go daun, na tromoi long paia.

20 Olsem na, yupela bai save long prut bilong ol.

21 I no olgeta man em i tok, Bikpela, Bikpela long mi bai go insait long kingdom bilong heven, tasol em man em i bihainim laik long Papa bilong mi em i stap long heven.

22 Planti bai tokim mi long dispela de: Bikpela, Bikpela, mipela i no bin profesai long nem bilong yu, na rausim ol tewel long nem bilong yu, na wokim planti gutpela wok long nem bilong yu?

23 Na bihain long dispela, mi bai tokim ol: Mi no save long yupela bipo, lusim mi, yupela ol i save wokim pasin nogut.

24 Olsem na, husat man i harim ol dispela toktok bilong mi na bihainim ol, mi bai tok dispela man em wankain olsem wanpela bikpela save man tru, em i sanapim haus bilong em antap long wanpela ston—

25 Na ren i pundaun, na ol tait wara i kamap, na ol win i winim, na paitim long haus, tasol haus i no pundaun, bikos em i bin sanapim long wanpela ston.

26 Na wanwan manmeri ol i harim ol dispela toktok bilong mi na ol i no bihainim ol bai kamap wankain olsem wanpela krankiman, em i sanapim haus bilong em antap long waisan—

27 Na ren i pundaun, na ol wara tait i kamap, na win i winim, na paitim long haus, na haus i pundaun, na pundaun bilong em i nogut tru.