1 Na em i kamap we dispela ol ami bilong ol stil lain, ol i bin redi long pait klostu long arere long wanpela ten eit krismas, na ol i stat long kam daun na ol i bin kamap hariap tru long ol liklik maunten, na ol bikpela maunten, ples we nogat man i stap, na ples banis wantaim ples hait bilong ol, na ol i stat long kisim ol graun long hap long saut na long hap long not, na ol i bin kisim olgeta graun wantaim siti ol lain bilong Nifai i bin lusim.

2 Tasol lukim, nogat wail animal o narapela animal long painim i stap long dispela graun ol lain bilong Nifai ol i bin lusim, na nogat wail animal ol i bin i stap long graun long ol stil lain long painim, tasol em ol animal long ples we nogat man i stap.

3 Na ol stil lain i nogat kaikai taim ol i bin hangre, na ol mas painim kaikai long ples we nogat man i stap, bikos ol lain bilong Nifai ol i no lusim wanpela samting long graun, tasol ol i bin bungim wantaim ol bulmakau, sipsip na olgeta samting bilong ol, na ol i bin i stap long wanpela bodi.

4 Olsem na, ol stil lain i nogat wei long strong long stil na kisim kaikai, tasol ol i mas kamap long ples klia long pait wantaim ol lain bilong Nifai, na ol lain bilong Nifai ol i bin i stap long wanpela bodi, na ol i bin gat bikpela namba tru long ol pipol, na lukautim i stap ol kaikai, hos, bulmakau wantaim olgeta kainkain animal bilong ol yet, olsem ol bai kaikai long sevenpela krismas, we ol i ting long bagarapim olgeta stil lain long pes long graun, na wanpela ten eit krismas i pinis olsem.

5 Na em i kamap we long wanpela ten nain krismas, Gidiani i bin painim olsem em i bin gat nid olsem em mas go antap long pait wantaim ol lain bilong Nifai, bikos ol i nogat rot long kisim kaikai tasol long strong long stil, stil na wokim pasin kilim man.

6 Na ol i no bin go long olgeta pes long graun long planim raisnabaut, nogut ol lain bilong Nifai bai kamap long ol na kilim ol, olsem na Gidiani i bin givim oda long ol ami bilong em olsem ol bai go antap long pait wantaim ol lain bilong Nifai insait long dispela krismas.

7 Na em i kamap we ol i bin kamap long pait long namba sikis mun, na lukim, bikpela na nogut taim stret ol i bin kamap long pait, na ol i bin pasim klos wankain olsem stil lain save pasim, na ol i bin pasim skin bilong pikinini sipsip raun long sangana bilong ol, penim ol yet wantaim blut, sapim het bilong ol na putim hetplet antap long ol, na ol ami bilong Gidiani i luk nogut tru stret, bikos long klospait bilong ol na bikos ol i bin penim wantaim blut.

8 Na em i kamap we ol ami long ol lain bilong Nifai, taim ol i lukim pes long ami bilong Gidiani, olgeta i bin pundaun long graun, na apim krai bilong ol i go antap long Bikpela God bilong ol, olsem em bai larim ol na seivim ol long han long birua bilong ol.

9 Na em i kamap we taim ol ami bilong Gidiani i lukim dispela, ol i stat long bikmaus long singaut, bikos ol i bin amamas, long wanem, ol i bin ting olsem ol lain bilong Nifai ol i bin poret na pundaun bikos ol i bin poret long ami bilong ol.

10 Tasol ol i bin kisim taim nogut long ol dispela samting, long wanem, ol lain bilong Nifai ol i no bin poret long ol, tasol ol i bin poret long God bilong ol na beten long em long banisim ol, olsem na, ol i bin redi long bungim ol ami bilong Gidiani taim ol i ron hariap tru long kilim ol.

11 Na bikpela pait i stat long namba sikis mun, na dispela pait i bin bikpela na nogut tru, ye, bikpela namba tru long ol pipol ol i bin kilim nogut tru, taim Lihai em i bin lusim Jerusalem ol i no bin lukim traipela kain pait na kilim planti pipol bilong Lihai olsem bipo.

12 Na Gidiani i bin mekim toktok bilong poret na mekim tok tru antap, tasol lukim, ol lain bilong Nifai ol i bin winim ol, na ol i bin go bek long pes long ol lain bilong Nifai.

13 Na em i kamap we Gidgidonai i bin givim oda long ol ami bilong em long bihainim ol i go long ol arere long ples we nogat man i stap, na olsem ol i no ken larim ol i stap laip wanpela man husat bai pundaun long han bilong ol taim ol i go, olsem na ol bin bihainim ol na kilim ol i go inap long arere long ples we nogat man i stap, olsem Gidgidonai bin givim oda.

14 Na em i kamap we Gidiani, em i bin sanap na strong long pait i bin ronawe taim em i ronawe, na bikos em i bin skin les long taim em i bin pait nogut tru olsem na ol i bin winim em na kilim em. Na arere long Gidiani, em wanpela stilman i bin olsem.

15 Na em i kamap we ol ami long ol lain bilong Nifai i bin go bek gen long ples hait bilong ol. Na em i kamap we dispela wanpela ten nain krismas i go pas, na ol stil lain ol i no bin kam bek gen long pait, na tu long tupela ten krismas.

16 Na long tupela ten wan krismas, ol i no kamap long pait, tasol ol i bin kamap long olgeta sait long pasim na banisim ol pipol bilong Nifai raunabaut, long wanem, ol i bin ting olsem sapos ol ken rausim ol pipol bilong Nifai long graun bilong ol, na long pasim ol long olgeta sait, na sapos ol i ken rausim ol long olgeta gutpela samting bilong ol long ausait, olsem ol bai mekim ol long givim ol yet long laik bilong ol.

17 Nau ol i bin makim narapela lida bilong ol, nem bilong em Jemnaria, olsem na Jemnaria i bin tokim ol olsem dispela pait mas kamap yet.

18 Tasol lukim, dispela i gutpela long ol lain bilong Nifai, long wanem, ol stil lain ol i bin painim hat long pait gut tru long givim pen long ol lain bilong Nifai, bikos long planti kaikai ol i bin bungim,

19 Na bikos ol stil lain ol i bin gat liklik kaikai, long wanem, lukim, ol i bin nogat kaikai, tasol ol i bin gat mit long kaikai, ol i bin kisim long ples we nogat man i stap;

20 Na em i kamap we ol wail animal long ples we nogat man i stap i klostu pinis, olsem na ol stil lain i klostu idai long hangre.

21 Na ol lain bilong Nifai ol i bin go aut olgeta de na nait, na kilim ol ami bilong ol long ol tausen na long ol ten tausen.

22 Olsem na ol pipol bilong Jemnaria ol i bin laikim long lusim plen bilong ol, bikos long bikpela bagarap tru i bin kamap long ol long nait na long de.

23 Na em i kamap we Jemnaria i bin givim oda long ol pipol bilong em olsem, ol i mas lusim pait, na wokabaut i go long longwe tru long graun long hap long not.

24 Na nau, Gidgidonai i bin save long plen bilong ol, na bikos em i bin save olsem ol i nogat strong bikos ol i bin hangre long kaikai, na bikos bikpela namba tru long ol pipol namel long ol ol i bin kilim ol i idai, olsem na em i bin salim ol ami bilong em long nait, na ol i pasim rot bilong ol taim ol i laik go bek, na putim ol ami bilong em long rot we ol bai go bek long pasim rot.

25 Na ol i bin wokim dispela long nait, na wokabaut i go pas bipo long ol stil lain, olsem na, taim ol stil lain ol i stat long wokabaut i go bek long narapela de, ol ami long ol lain bilong Nifai ol i bin bungim ol long fran na long bihain long ol.

26 Na ol stil lain ol i stap long hap long saut ol i bin lus tu long ples hait bilong ol. Na olgeta samting ol i bin wokim long oda bilong Gidgidonai.

27 Na planti tausen ol i bin givim ol yet olsem, kalabus lain long ol pipol bilong Nifai, na ol narapela lain bilong ol em ol i bin kilim ol.

28 Na lida bilong ol, Jemnaria ol i bin kisim em na hangamapim em antap long wanpela diwai na i stap i go inap long em i bin idai. Na taim em idai antap long wanpela diwai, ol i bin katim diwai i go daun long graun, na singaut wantaim bikmaus olsem:

29 Inap Bikpela i lukautim i stap ol pipol bilong em long stretpela pasin, na long pasin holi long bel, olsem ol bai katim i go daun long graun, olgeta lain ol i traim long kilim ol, bikos long pawa na kainkain pasin nogut long hait wankain olsem dispela man ol i bin katim i go daun long graun.

30 Na ol i bin amamas na singaut gen wantaim wanpela nek, olsem: Inap God bilong Abraham, na God bilong Aisek, na God bilong Jekop, lukautim dispela pipol long stretpela pasin, sapos ol i singaut yet long nem long God bilong ol long lukautim ol.

31 Na em i kamap we olgeta i bin singsing na amamasim God bilong ol long bikpela samting tru em i bin wokim long ol, long lukautim ol olsem ol i no pundaun long han long birua bilong ol.

32 Ye, ol i bin singaut: Hosana long Nambawan tru God I stap Antap. Na ol i bin singaut: Blesim nem bilong Bikpela God gat Olgeta Pawa, Nambawan tru God I stap Antap.

33 Na bel bilong ol i bin pulap wantaim amamas inap long ol i bin kapsaitim planti ai wara, bikos long bikpela na gutpela pasin tru bilong God long seivim ol long han long birua bilong ol, na ol i bin save, bikos long tanim bel na pasin daunim bel bilong ol, ol i bin seiv long bagarap oltaim oltaim.